వసుధైక కుటుంబం.. ఐదు తరాల అనుబంధం

తన ముందు తరాలతో విద్యార్థిని శుభకృతి

హైదరాబాద్: ఐదు తరాలు అలరించాయి. ఒకే వేదికపైకి వచ్చి సంభ్రమాశ్చర్యాలకు గురిచేశాయి. ఈ ఘనతను ఆదివారం నగరంలోని జూబ్లీహిల్స్‌ భారతీయ విద్యాభవన్‌ పబ్లిక్‌ స్కూల్‌ విద్యాశ్రమం దక్కించుకుంది. ఇక్కడ చదువుతున్న విద్యార్థుల కుటుంబాలను పరిచయం చేసే క్రమం చేపట్టారు. కన్నులపండువగా జరిగిన ఈ కార్యక్రమంలో ఐదు తరాలకు చెందిన కుటుంబం ఒకటి, నాలుగు తరాలకు చెందిన కుటుంబం ఒకటి, మూడు తరాలకు చెందిన నాలుగు కుటుంబాలు ఆహూతులను అలరించాయి. ఈ పాఠశాలల్లో చదువుతున్న తాళ్లపాక శుభకృతి 5వ తరగతి చదువుతోంది.

తల్లి జ్యోతిష్మతి గైనకాలజిస్ట్‌. తండ్రి కార్తీక్‌ భరద్వాజ్‌ సీసీఎంబీలో సైంటిస్ట్‌. ఈ చిన్నారి తన తల్లి జ్యోతిష్మతి, నాయనమ్మ నాగమణి, ఆ తర్వాత తరం సావిత్రీదేవి, పార్వతి.. వీరందరినీ ఒకే వేదికపై చూసుకుని మురిసిపోయింది. ఇలా ఆ తరానికి చెందిన వారంతా తమ అనుభవాలను నెమరువేసుకున్నారు. మరికొంత మంది వృద్ధాప్యాన్ని సైతం లెక్కచేయండా తమ ముని మనవలు, ముని మనవరాళ్లతో కలిసి సందడి చేశారు. కార్యక్రమంలో స్కూల్‌ ప్రిన్సిపాల్‌ అరుణశ్రీ, ఉపాధ్యాయులు, విద్యార్థులు, వారి తల్లిదండ్రులు తదితరులు పాల్గొన్నారు.