కమల ఓ యోధురాలు.. పోరాడి ఓడారు: తులసేంద్రపురం ప్రజలు

చెన్నై:  అమెరికా అధ్యక్ష ఎన్నికల్లో ఇండో-అమెరికన్‌, డెమోక్రటిక్‌ పార్టీ అభ్యర్థి కమలా హారిస్‌పై రిపబ్లిక్‌ పార్టీ అభ్యర్థి డొనాల్డ్‌ ట్రంప్‌ ఘన విజయం సాధించారు. కమల ఓటమిపై ఆమె తల్లి పూర్వీకుల గ్రామమైన తమిళనాడులోని తులసేంద్రపురం ప్రజలు స్పందించారు. అమెరికా అధ్యక్ష ఎన్నికల్లో కమలా హారిస్‌.. డొనాల్డ్‌ ట్రంప్‌ చేతిలో ఓడిపోయినా.. ఆమె ఒక పోరాట యోధురాలని అన్నారు. ఆమె మళ్లీ నాలుగేళ్ల తర్వాత వచ్చే అధ్యక్ష ఎన్నికల్లో తప్పకుండా గెలిచితీరుతారని ఆశాభావం వ్యక్తం చేశారు. 

ఇక.. ఈ గ్రామ ప్రజలు.. ఇవాళ ఉదయం నుంచి.. అమెరికా ఎన్నికల పలితాలం కోసం టెలివిజన్ స్క్రీన్‌లకు అతుక్కుపోయారు. ఎన్నికల ఫలితాలకు సంబంధించి.. మీడియా, వెబ్‌సైట్‌లలో ట్రెండ్‌ను పరిశీలించారు. కొంతమంది కమలా హారిస్ విజయం కోసం శ్రీ ధర్మ శాస్తా పెరుమాళ్ ఆలయాన్ని సందర్శించి.. పూజలు చేశారు. అయితే డెమోక్రాటిక్ ప్రత్యర్థి కమలా హారిస్‌ ఓడిపోతున్నట్లు వెల్లడవుతున్న ఫలితాలతో ప్రజల కోలాహలంతో నిండిన తులసేంద్రపురం గ్రామాన్ని ఒక్కసారిగా నిశ్శబ్దం ఆవహించింది. ఇక్కడికి వచ్చిన.. ఇద్దరు అమెరికన్లు, ఓ యూకే పౌరుడు గ్రామం నుంచి వెళ్లిపోయారని గ్రామవాసులు తెలిపారు.

తిరువారూర్ జిల్లా డీఎంకే ప్రతినిధి, తులసేంద్రపురం గ్రామ నాయకుడు జే.సుధాకర్ మీడియాతో మాట్లాడారు.‘‘ మేం​ కమలా హారిస్‌ విజయాన్ని ఆశించాం. దీపావళి కంటే పెద్ద వేడుకలను ప్లాన్ చేశాం. బాణాసంచా పేల్చడం, మిఠాయిలు పంపిణీ చేయడం, ఆలయ పూజలు చేయటం, మధ్యాహ్న భోజనం ఏర్పాటు చేశాం. కానీ.. ఫలితాలు  కమలకు వ్యతిరేకంగా వచ్చాయి. అయితే.. విజయం, వైఫల్యం జీవితంలో ఒక భాగం. అధ్యక్ష ఎన్నిక కఠినమైన పోరాటం. ఆమె పోరాట స్ఫూర్తిని తప్పక మెచ్చుకోవాలి. 

...కమల ఒక పోరాట యోధురాలు,  దేవుడి దయతో వచ్చే ఎన్నికల్లో తప్పకుండా విజయం సాధిస్తారు. కమల గెలిచి అమెరికా మొదటి మహిళా అధ్యక్షురాలవుతారని గ్రామంలోని ప్రతి ఒక్కరూ ఆశించారు. ఆమె వచ్చే ఎన్నికల్లో గెలిచి.. మా గ్రామాన్ని సందర్శిస్తారని మేం ఆశిస్తున్నాం. ఆ రోజు వచ్చినప్పుడు, మేం కమలకు ఘన స్వాగతం పలుకుతాం. డొనాల్డ్ ట్రంప్‌కు మేం మా గ్రామం తరఫున శుభాకాంక్షలు తెలియజేస్తున్నాం. ఆయన భారతదేశంతో సత్సంబంధాలను పెంపొందించుకుంటారని, ప్రపంచ శాంతిని పెంపొందించాలని ఆశిస్తున్నాం ’’అని అన్నారు.

తులసేంద్రపురం గ్రామ నివాసి, విశ్రాంత ఓఎన్‌జీసీ ఉద్యోగి టీఎస్‌ అన్బసరసు మీడియాతో మాట్లాడారు. ‘‘ కమల ఓడిపోయిన వాస్తవాన్ని మేం జీర్ణించుకోలేకపోతున్నాం.అయితే.. ఆమె వయస్సు కేవలం 60 ఏళ్లు మాత్రమే. వచ్చే ఎన్నికల్లో ఆమె గెలుస్తారని మేం భావిస్తున్నాం. మాకు పూర్తి నమ్మకం ఉంది. కమల ఈ ఓటమితో కుంగిపోరు. అమెరికా ప్రజల కోసం తన పనిని కొనసాగిస్తారు. భవిష్యత్తులో  ఆమె అమెరికాకు అధ్యక్షురాలుగా ఎన్నికయ్యాక.. ఖచ్చితంగా మా గ్రామాన్ని సందర్శిస్తారని మేం ఆశిస్తున్నాం. కొన్నేళ్ల క్రితం ఆమె మా గ్రామానికి వస్తారని మేం భావించాం. ఆమె బంధువులకు సైతం సమాచారం అందించాం. అప్పటి నుంచి మా గ్రామం పర్యాటకంగా మారిపోయింది’’ అని అన్నారు.

చదవండి:  అమెరికా అధ్యక్షుడిగా ట్రంప్‌.. స్పీకర్‌ మైక్‌ జాన్సన్‌ ప్రకటన