మా పొట్ట కొట్టే ఎయిర్‌పోర్టు వద్దు

మా పొట్ట కొట్టే ఎయిర్‌పోర్టు వద్దు

వజ్రపుకొత్తూరు రూరల్‌/కాశీబుగ్గ: మందస, వజ్రపుకొత్తూరు మండలాల సరిహద్దు ప్రాంతంలో గ్రీన్‌ఫీల్డ్‌ ఎయిర్‌ పోర్డు నిర్మాణానికి ప్రభుత్వాలు సన్నాహాలు చేస్తున్న నేపథ్యంలో ఉద్దాన రైతులు ఆందోళన చెందుతున్నారు. ఈ ప్రాంతంలో ఓ వైపు కేంద్ర బృందం(ఏఏఐ) స్థల పరిశీలన చేస్తుంటే.. మరో వైపు స్థానిక ఉద్దాన రైతులు నుంచి వ్యతిరేక సెగలు మొదలయ్యాయి. ఆయా మండలాల సరిహద్దు గ్రామాల్లో రైతులు చర్చలు జరిపి మందస మండలం రాంపురం పంచాయతీలో శుక్రవారం ఉద్దాన రైతులు ప్రత్యేక సమావేశం ఏర్పాటు చేశారు. ఎయిర్‌ పోర్టు నిర్మాణానికి వ్యతిరేకింగా ఆందోళన చేపట్టారు. ఈ సందర్భంగా పలువురు ఉద్దాన రైతులు మాట్లాడుతూ ఏళ్ల తరబడి ఉద్యాన పంటలను నమ్ముకొని పిల్లాపాపలతో జీవనోపాధి సాగిస్తున్నామని చెప్పారు. తాము నమ్ముకున్న భూమిని వదులుకునే ప్రసక్తే లేదని స్పష్టం చేశారు. మాకు నష్టం కలిగించే ఎలాంటి ఎయిర్‌పోర్టులు వద్దు.. మా భూములే ముద్దు అంటూ ముక్తకంఠంతో నినదించారు.