శ్రీకాకుళం రూరల్‌: ఈ నెల 13న జరిగిన సార్వత్రిక ఎన్నికల ఓటింగ్‌ సమయంలో చాపురం, గోవిందపురం పరిధిలో టీడీపీ, వైఎస్సార్‌ సీపీ వర్గీయులు ఒకరిపై ఒకరు కర్రలు, రాళ్లతో దాడులకు పాల్పడ్డారు. ఈ నేపథ్యంలో ఇరు గ్రామాలకు చెందిన తొమ్మిది మందిపై రూరల్‌ పోలీసులు బుధవారం కేసు నమోదు చేసినట్లు ఎస్‌ఐ వాసుదేవరావు తెలిపారు. రెండు గ్రామాల్లోనూ పోలీస్‌ పికెట్‌ కొనసాగుతుందని చెప్పారు. ఆటో నుంచి జారిపడి వ్యక్తి మృతి శ్రీకాకుళం క్రైమ్‌: నగరంలోని సూర్యమహల్‌ కూడలి సమీపంలో ఆటో ప్రమాదానికి గురైన వ్యక్తి జెమ్స్‌లో చికిత్స పొందుతూ బుధవారం మృతిచెందాడు. ట్రాఫిక్‌ పోలీసులు తెలిపిన వివరాల ప్రకారం.. చినమండలవీధిలో పెయింటింగ్‌ పనులు చేస్తూ జీవనం సాగిస్తున్న తోట శ్రీనివాసరావు (46) తన చెల్లెల్లిద్దరితో కలిసి మంగళవారం సరుబుజ్జిలిలో బంధువుల ఇంటికి బయల్దేరారు. సూర్యమహాల్‌ కూడలి వద్ద ఆటో ఎక్కి సీటులో కూర్చుంటుండగానే డ్రైవర్‌ నిర్లక్ష్యంతో స్టార్ట్‌ చేసి ముందుకు తీయడంతో శ్రీనివాసరావు రోడ్డుపై పడిపోయాడు. దీంతో రాగోలు జెమ్స్‌ ఆసుపత్రికి తరలించారు. తలపై గాయం కనిపించకపోయినా అంతర్గతంగా రక్తస్రావమై మృతి చెందినట్లు అక్కడ ముఖ్య వైద్యాధికారి ప్రవీణ్‌ ధ్రువీకరించడంతో ట్రాఫిక్‌ ఎస్‌ఐ ప్రసాదరావు కేసు నమోదు చేసి దర్యాప్తు చేస్తున్నారు. రోడ్డు ప్రమాదంలో వివాహితకు గాయాలు శ్రీకాకుళం క్రైమ్‌: జిల్లా కేంద్రంలోని కిమ్స్‌ సమీపంలోని దత్తాత్రేయస్వామి గుడి వద్ద ద్విచక్ర వాహనం పైనుంచి జారిపడి ఓ వివాహితకు గాయాలయ్యాయి. ట్రాఫిక్‌ పోలీసులు తెలిపిన వివరాల ప్రకారం.. అరసవల్లి సూర్యనారాయణ స్వామిని దర్శించుకునేందుకు విజయనగరం జిల్లా రాజాం మండలం వంజరాంపేట నుంచి గోవిందరావు, సత్యవతి దంపతులు తమ కుమారుడు, కోడలుతో కలిసి రెండు ద్విచక్రవాహనాల్లో బుధవారం వచ్చారు. తిరుగు ప్రయాణంలో కిమ్స్‌ సమీ పంలోని దత్తాత్రేయ గుడి వద్దకు వచ్చేసరికి స్పీడ్‌ బ్రేకర్‌ గమనించకపోవడంతో గోవిందరావు వెనుక కూర్చున్న భార్య సత్యవతి జారిపడి ఎదురుగా ఉన్న డివైడర్‌పై పడిపోయింది. ఆమె తలకు తీవ్ర గాయమవ్వడంతో కుటుంబసభ్యులు సమీపంలోని కిమ్స్‌కు తరలించారు. పరిస్థితి విషమించడంతో విశాఖ కేజీహెచ్‌కు తరలించి చికిత్స అందిస్తున్నారు. కేసు నమోదు చేసి దర్యాప్తు చేస్తున్నట్లు ట్రాఫిక్‌ ఎస్‌ఐ ప్రసాదరావు పేర్కొన్నారు. ఘనంగా బంగారమ్మ జంగిడి ఊరేగింపు ఎల్‌.ఎన్‌.పేట: మండలంలోని లక్ష్మీనర్సుపేట వంశధార నదీతీరంలో కొలువైన బంగారమ్మ తల్లి అమ్మవారి పెద్ద పండగలను భక్తి శ్రద్ధలతో నిర్వహిస్తున్నారు. ఈ నెల 28వ తేదీ వరకు పండగ కార్యక్రమాలు నిర్వహిస్తున్నట్లు కమిటీ సభ్యులు తెలిపారు. దీనిలో భాగంగా బుధవారం అమ్మవారి జంగిడి ఊరేగింపు ఘనంగా జరిగింది. భక్తులు అధిక సంఖ్యలో పాల్గొని అమ్మవారికి ధూపదీపాలతో నైవేద్యం, ప్రసాదాలు సమర్పించారు.‘ఆ విద్యాసంస్థల గుర్తింపు రద్దు చేయాలి’ శ్రీకాకుళం న్యూకాలనీ: జిల్లాలో కొన్ని ప్రైవేటు, కార్పొరేట్‌ కాలేజీలు వేసవి సెలవుల్లోనూ ప్రత్యేక తరగతులు నిర్వహిస్తున్నాయని ఆంధ్రప్రదేశ్‌ ప్రైవేట్‌ టీచర్స్‌ లెక్చరర్స్‌ యూనియన్‌ స్టేట్‌ వైస్‌ ప్రెసిడెంట్‌ గంగు మన్మధరావు బుధవారం ఒక ప్రకటనలో పేర్కొన్నారు. మండుటెండలు, ఉక్కపోతలతో ఇంటి వద్ద కూడా అలమటిస్తున్న తరుణంలో విద్యార్థులు విద్యాసంస్థల్లో ఎలా ఉండగలరని ప్రశ్నించారు. అధికారుల పర్యవేక్షణ లోపం కారణంగా విద్యార్థులు నరకయాతన పడుతున్నారని ఆవేదన వ్యక్తం చేశారు. ప్రత్యేక తరగతులు, అదనపు తరగతులు నిర్వహిస్తున్న స్కూల్స్‌, కాలేజీలపై సంబంధిత జిల్లా అధికారులు ఎందుకు చర్యలు తీసుకోవడంలేదని ప్రశ్నించారు. ఇప్పటికై నా స్పందించి ప్రత్యేక తరగతులు నిర్వహిస్తున్న ప్రైవేటు, కార్పొరేట్‌ కాలేజీల గుర్తింపు రద్దు చేయాలని డిమాండ్‌ చేశారు.

శ్రీకాకుళం క్రైమ్‌: నగరంలోని గుడివీధి సమీపంలోని ఉమారుద్ర కోటేశ్వర స్వామి దేవాలయానికి అనుసంధానంగా ఉన్న ఆంజనేయస్వామి దేవస్థానం తాలుకా భూముల శిస్తుల సొమ్ము దుర్వినియోగమైనట్లు ఆలయ ఈవో ఎం.సుకన్య గురువారం ఒకటో పట్టణ పోలీసులకు ఫిర్యాదు చేశారు. ఎస్‌ఐ బలివాడ గణేష్‌ తెలిపిన వివరాల ప్రకారం.. పై రెండు దేవాలయాల్లో ఏకీకృత సర్వీసు కింద అటెండరుగా పనిచేస్తున్న వి.సతీష్‌ దేవస్థానాలకు చెందిన భూముల శిస్తు సొమ్ము అనధికారికంగా వసూళ్లు చేసి దుర్వినియోగానికి పాల్పడ్డాడు. ఆంజనేయ దేవాలయానికి సంబంధించి రూ.2,16,800, కోటేశ్వర స్వామి ఆలయానికి సంబంధించి రూ.3,162 సొమ్ము వసూళ్లకు పాల్పడటమే కాక వాటికి సంబంఽధించిన రశీదులను రిజిస్టర్‌ బుక్‌ నుంచి మాయం చేశాడు. ఇటీవలే విధుల్లోకి చేరిన ఈవో సుకన్య ఉన్నతాధికారుల దృష్టికి విషయం తీసుకెళ్లగా వారు ఫిర్యాదు చేయమని చెప్పడంతో గురువారం పోలీసులకు ఫిర్యాదు చేశారు. కేసు నమోదు చేసి దర్యాప్తు చేస్తున్నట్లు ఎస్‌ఐ గణేష్‌ పేర్కొన్నారు.

● పిల్లలను బావులు, చెరువుల్లో ఈత కొట్టేందుకు పంపించకండి. అవసరమైతే మీరే స్వయంగా వారికి తోడుగా వెళ్లండి. ● ద్విచక్రవాహనాలు నడపమని వారి చేతికి తాళాలు ఇవ్వవద్దు. వారికి తాళాలు కనిపించకుండా ఉండేలా జాగ్రత్త తీసుకోండి. మొబైల్‌ ఫోన్లు, ట్యాబ్‌లు వారి చేతికి ఇవ్వకపోవడం ఉత్తమం. ● స్నేహితులతో కలిసి దూరప్రాంతాలకు పంపకండి. ● మధ్యాహ్న సమయంలో ఆరుబయట ఆడుకోవడానికి అనుమతించకండి. ఉదయం , సాయంత్రం వేళల్లో మాత్రమే ఆడుకోవడానికి పంపించడం మేలు. ● ఇంట్లో పెద్దలతో వారు ఎక్కువ సమయం గడిపేలా చూడండి. వీలైనంత వరకు మన సంప్రదాయాలను నేర్పించాలి. ● రామాయణం, మహాభారతం, ఇతిహాస కథలు చెప్పే వారి వద్దకు పిల్లల్ని పంపించండి. ● పిల్లలు ఆడుకోవడానికి సమయం నిర్ణయించండి. వేసవికాలంలో పిల్లలు ఆడుకునేందుకు నిర్దిష్టమైన టైం టేబుల్‌ ను రూపొందించండి. అప్పుడు పిల్లలు టైం టేబుల్‌ ప్రకారం ఆడుకునే వీలుంది. అదే పనిగా ఎండల్లో ఆడుకోకుండా నీడ పట్టునే ఉంటారు. ముఖ్యంగా పిల్లలు టీవీ ఎక్కువ సమయం చూడకుండా వారిని ఫిజికల్‌ గేమ్స్‌ వైపు మోటివేట్‌ చేస్తే మంచిది. ● పిల్లలకు ఉదయం యోగా, సాయంత్రం కరాటే, డ్రాయింగ్‌, నృత్యం, స్విమ్మింగ్‌, క్రికెట్‌, చెస్‌, వంటి వాటిలో శిక్షణ ఇప్పించడం వల్ల వారు బోర్‌ ఫీల్‌ అవ్వరు. ● వేసవికాలంలో పిల్లలు అల్లరి చేస్తున్నారని వారికి మీ స్మార్ట్‌ ఫోన్‌ ఇచ్చి ఆరోగ్యాన్ని పాడు చేయకండి. ● మొబైల్‌ ఫోన్‌ బదులు మంచి కథల పుస్తకాలు, డ్రాయింగ్‌ పుస్తకాలు కొనివ్వండి. వారిలో సృజనాత్మకతను వెలికి తీసేలాబొమ్మలు వేయించండి. లేదా ఇతర కళలను నేర్పించండి.

ఆమదాలవలస రూరల్‌: వేసవి తాపం పెరగడందో దోసకాయలకు గిరాకీ పెరిగింది. చల్లని నేస్తాలుగా పేరుపొందిన దోసకాయలు మన జిల్లాతో పాటు ఒడిశాకు చెందిన వారు ఎక్కువగా కొనుగోలు చేస్తుంటారు. ఇక్కడి రైతులు ప్రతి రోజూ ఇతర జిల్లాకు వీటిని ఎగుమతి చేస్తూ తమ వ్యాపారాలను ముందుకు సాగిస్తున్నారు. ఆమదాలవలస మండలంలో మునగవలస, జొన్నవలస, సరుబుజ్జిలి మండలంలో రొట్టవలస, అవతరాబాద్‌ గ్రామాల్లో దోసకాయలు అధిక విస్తీర్ణంలో సాగు చేస్తున్నారు. మార్కెట్‌కు తరలించడంతో పాటు రోడ్డు పక్కన రైతులే స్వయంగా విక్రయాలు సాగు చేస్తున్నారు. వివాహాది శుభకార్యాలు చేసుకునే వారు దోసకాయలను విందు భోజనాల్లో సైతం అందుబాటులో ఉంచుతున్నారు. అందుకే వీటికి గిరాకీ పెరిగింది. సైజు బట్టి రూ.5 నుంచి రూ.30 వరకు, కిలో రూ.50 చొప్పున రైతులు విక్రయిస్తున్నారు. మునగవలస, రొట్టవలస గ్రామాల వద్ద దోసకాయలను ఇతర జిల్లాలకు చెందిన ప్రయాణికులతో పాటు ఒడిశా వాసులు ఎక్కువగా కొనుగోలు చేస్తున్నారు.

శ్రీకాకుళం: జిల్లా ఉన్నతాధికారులను తప్పుదోవ పట్టించేందుకు సర్వశిక్షా అభయాన్‌లో కొందరు ఉద్యోగులు స్కెచ్‌ వేశారు. ప్రభుత్వ నిబంధనల మేరకు నిత్యావసర సరకులు, మాంసం, గుడ్లు సరఫరా చేసేందుకు ముందుగా టెండర్లు నిర్వహిస్తారు. టెండర్‌ రోజున ఖరారు చేసిన ధరలకే సంవత్సరం పొడవునా సరఫరా చేయాల్సి ఉంటుంది. రేటు పెరిగినా, తగ్గినా ఇందులో మార్పు ఉండదు. దీనిలో భాగంగా గుడ్డు ధర పేపరు ధరకు సరఫరా చేసేలా ఒప్పందం కుదుర్చుకున్నారు. అయితే ఇందుకు భిన్నంగా కొన్ని నెలల నుంచి గుడ్డు ధర రూ.6.30 పైసలకు బిల్లు దాఖలు చేస్తున్నారు. బిల్లులు దాఖలు చేసే నాటికి గుడ్డు ధర రూ. 5.50పైసలు ఉండగా అదనంగా 80పైసలు చెల్లిస్తూ వస్తున్నారు. కేజీబీవీల నుంచి రూ.6.30పైసలకు బిల్లులు వస్తుండగా ఆ మేరకు చెల్లింపులు కూడా జరిగిపోయాయి. ఎస్‌ఎస్‌ఏలోని అధికారుల సూచ నల మేరకే బిల్లులు దాఖలు చేస్తున్నట్లు ఎస్‌వోలు చెబుతున్నారు. కాగా అదనపు చెల్లింపుల విషయం జిల్లా ఉన్నతాధికారుల దృష్టికి వెళ్లింది. ఆయన వివరణ కోరడంతో రెండు రోజులుగా ఎస్‌వోలపై ఎస్‌ఎస్‌ఏలోని కొందరు ఉద్యోగులు ఒత్తిడి తెస్తూ పేపరు ధరకే బిల్లులు దాఖలు చేస్తున్నట్లు లిఖితపూర్వకంగా ఇవ్వాలని డిమాండ్‌ చేస్తున్నట్లు ఎస్‌వోలు ‘సాక్షి’కి తెలిపారు. బిల్లులు దాఖలు చేసినదానికి విరుద్ధంగా లేఖలు ఇస్తే తాము తప్పు చేసినట్లు అవుతుందనిర, తమను హెచ్చరిస్తూ వ్యాఖ్యానాలు చేస్తున్నారని, వాయిస్‌ మెసేజ్‌లు కూడా పెడుతున్నారని వాపోతున్నారు. ఎట్టి పరిస్థితుల్లో లేఖలు ఇవ్వకూడదని బుధవారం జరిగిన ఎస్‌వోల రహ స్య సమావేశంలో నిర్ణయించుకున్నట్లు భోగట్టా. ఇదిలా ఉంటే నిత్యావసర సరకుల సరఫరా కాంట్రాక్ట్‌ కూడా కాంట్రాక్ట్‌ పొందిన వ్యక్తి కాకుండా వేరొకరు సరఫరా చేస్తున్నట్లు, అవి నాశిరకంగా ఉంటున్నట్లు ఎస్‌వోలు చెబుతున్నారు. అయితే బిల్లులు మాత్రం కాంట్రాక్ట్‌ పొందిన సంస్థ నుంచే దాఖలు అవుతుండడంతో వారికి బిల్లులు చెల్లిస్తున్నారు. రికవరీ చేస్తాం.. ఈ విషయాన్ని అకౌంట్‌ సెక్షన్‌ సూపరింటెండెంట్‌ పద్మావతి వద్ద ప్రస్తావించగా గుడ్డు ధర అదనంగా చెల్లించడం వాస్తవమేనన్నారు. వారి నుంచి రికవరీ చేస్తామన్నారు. బిల్లుకు విరుద్ధంగా ఎస్‌వోలను లేఖలు అడగడం నిజమేనని, ఎఫ్‌ఏవో సూచనల మేరకే ఎస్‌వోలకు వాయిస్‌ మెసేజ్‌ పెట్టామన్నారు. నిత్యావసర సరకుల కాంట్రాక్ట్‌ ఎవరికి ఇచ్చారో, ఎవరు సరఫరా చేస్తున్నారో తనకు తెలియదని పేర్కొన్నారు. ఉన్నతాధికారులను తప్పుదోవ పట్టించేందుకు కొందరు ఎస్‌ఎస్‌ఏ ఉద్యోగుల స్కెచ్‌ డైట్‌ బిల్లులకు భిన్నంగా లేఖలు ఇవ్వాలని కేజీబీవీ ఎస్‌వోలపై ఒత్తిడి