IPL 2023: సీఎస్‌కే ఓపెనర్ల సరి కొత్త చరిత్ర.. ఇదే తొలి సారి

చెపాక్‌ వేదికగా లక్నో సూపర్‌ జెయింట్స్‌తో జరుగుతున్న మ్యాచ్‌లో సీఎస్‌కే ఓపెనర్లు రుత్‌రాజ్‌ గైక్వాడ్‌, డెవాన్‌ కాన్వే విధ్వంసం సృష్టించారు. వీరిద్దరూ తొలి వికెట్‌కు 110 పరుగుల భాగస్వామ్యాన్ని నెలకొల్పారు. తద్వారా ఈ జంట ఓ అరుదైన ఘనతను తమ పేరిట లిఖించుకుంది. ఐపీఎల్‌లో సీఎస్‌కే తరపున అత్యధిక సార్లు సెంచరీ భాగస్వా‍మ్యం నమోదు చేసిన జోడిగా వీరిద్దరూ నిలిచారు.

ఇప్పటివరకు వీరిద్దరూ మూడు సార్లు సెంచరీ భాగస్వా‍మ్యం నెలకొల్పారు. ఇంతకుముందు వరకు ఈ రికార్డు మురళీ విజయ్, మైఖేల్ హస్సీ పేరిట ఉండేది. వీరిద్దరూ రెండు సార్లు సెంచరీ భాగస్వామ్యాన్ని నమోదు చేశారు. తాజా మ్యాచ్‌తో ఈ రికార్డును గైక్వాడ్‌, కాన్వే బ్రేక్‌ చేశారు.
రుత్‌రాజ్‌ హాఫ్‌ సెంచరీ..
కాగా ఐపీఎల్‌-2023లో రుత్‌రాజ్‌ గైక్వాడ్‌ వరుసగా మూడో హాఫ్‌ సెంచరీ నమోదు చేశాడు. రుత్‌రాజ్‌ కేవలం 25 బంతుల్లోనే తన హాఫ్‌ సెంచరీ మార్క్‌ను అందుకున్నాడు. అతడి ఇన్నింగ్స్‌లో 3 ఫోర్లు, 4 సిక్స్‌లు ఉన్నాయి. అదే విధంగా కాన్వే కూడా అద్భుతమైన ఇన్నింగ్స్‌ ఆడాడు.  29 బంతుల్లో 5 ఫోర్లు, 2 సిక్స్‌లతో 47 పరుగులు చేశాడు.