TV
టీ20 వరల్డ్‌కప్‌-2024లో సెయింట్‌ లూసియా వేదికగా నేపాల్‌తో జరిగిన మ్యాచ్‌లో 21 పరుగుల తేడాతో బంగ్లాదేశ్‌ విజయం సాధించింది. దీంతో బంగ్లా జట్టు తమ సూపర్‌-8 బెర్త్‌ను ఖారారు చేసుకుంది. కాగా బంగ్లా విజయంలో ఆ జట్టు యువ పేసర్‌ తంజిమ్ హసన్ షకిబ్‌ది కీలక పాత్ర.
ఈ మ్యాచ్‌లో తంజిమ్ హసన్ సంచలన ప్రదర్శన కనబరిచాడు. తన పేస్‌ బౌలింగ్‌తో నేపాల్‌ బ్యాటర్లకు తంజిమ్ చుక్కలు చూపించాడు. అతడి బౌలింగ్‌ దాటికి నేపాల్‌ పట్టుమని పదినిమిషాలు క్రీజులో నిలబడలేకపోయారు.
ఈ మ్యాచ్‌లో తంజిమ్ తన నాలుగు ఓవర్ల కోటాలో కేవలం 7 పరుగులు మాత్రమే ఇచ్చి 4 వికెట్లు పడగొట్టాడు. అంతేకాకుండా అతడి బౌలింగ్‌ కోటాలో రెండు మెయిడిన్‌ ఓవర్లు ఉండడం గమనార్హం. దీంతో బంగ్లాదేశ్‌ 107 పరుగుల స్వల్ప లక్ష్యాన్ని డిఫెండ్‌ చేసుకోగలిగింది.
ఇక ఈ మ్యాచ్‌లో అద్భుతమైన ప్రదర్శన కనబరిచిన తంజిమ్ ఓ అరుదైన ఘనతను తన పేరిట లిఖించుకున్నాడు. టీ20 వరల్డ్‌కప్‌లో ఒక మ్యాచ్‌లో అత్యధిక డాట్‌బాల్స్‌ వేసిన బౌలర్‌గా సకిబ్‌ రికార్డులకెక్కాడు.
ఈ మ్యాచ్‌లో సకిబ్‌ 21 డాట్‌ బాల్స్‌ వేశాడు. ఇంతకుముందు ఈ రికార్డు న్యూజిలాండ్‌ పేసర్‌ ట్రెంట్‌ బౌల్ట్‌ పేరిట ఉండేది. బౌల్డ్‌ 20 డాట్‌బాల్స్‌ వేశాడు. తాజా మ్యాచ్‌తో బౌల్ట్‌ అల్‌టైమ్‌ రికార్డును సకిబ్‌ బ్రేక్‌ చేశాడు.
Comments
Please login to add a commentAdd a comment