పంచగ్రామాల్లో ఇళ్ల నిర్మాణాల పునఃపరిశీలన

సింహాచలం: శ్రీ వరాహ లక్ష్మీనృసింహస్వామి దేవస్థాన పరిధి పంచగ్రామాల్లో ఉన్న ఇళ్లను దేవస్థానం అధికారులు పునఃపరిశీలన చేయనున్నారు. దేవస్థానం భూసమస్య పరిష్కారంలో భాగంగా తొలుత ఇళ్ల నిర్మాణాల సమస్యని తీర్చేందుకు ప్రభుత్వం చర్యలు ప్రారంభించింది. ఈ మేరకు నిర్మాణాలను పరిశీలించి నివేదిక ఇవ్వాల్సిందిగా రాష్ట్ర దేవదాయశాఖ కమిషనర్‌ కార్యాలయం ఇటీవల సింహాచలం దేవస్థానం అధికారులను ఆదేశించింది. 2008లోనే పంచగ్రామాలైన అడవివరం, వేపగుంట, చీమలాపల్లి, వెంకటాపురం, పురుషోత్తపురంలో ఎన్ని ఇళ్ల నిర్మాణాలు జరిగాయో దేవస్థానం సర్వే చేసింది. ఆ సర్వే రిపోర్టులో మొత్తం 12,149 నిర్మాణాలున్నట్లు లెక్క తేల్చింది. హైకోర్టుకు కూడా ఆ నివేదికను సమర్పించింది. అప్పటి నుంచి ఆ నిర్మాణాలను క్రమబద్ధీకరించేందుకు, ప్రత్యామ్నాయంగా దేవస్థానానికి ప్రభుత్వ స్థలాలు అందించేందుకు ప్రయత్నిస్తున్నారు. ఆ జాబితాలోని నిర్మాణాలను మరొకసారి పరిశీలించి నివేదిక అందించాలని దేవస్థానం అధికారులను దేవదాయ శాఖ ఆదేశించింది. ఈ పరిశీలన కోసం దేవస్థానం అధికారులతో మూడు బృందాలను ఏర్పాటు చేసినట్లు దేవస్థానం ఈవో వి.త్రినాథరావు తెలిపారు. అప్పటి నివేదిక ఆధారంగా ఆయా నిర్మాణాలు ఎలా ఉన్నాయో పరిశీలించి, తుది నివేదికను కమిషనర్‌కి సమర్పిస్తామన్నారు.

సింహాచలం దేవస్థానం అధికారులతో

మూడు బృందాల ఏర్పాటు