ఇంటర్ పరీక్షలకు అంతా రెడీ

శ్రీకాకుళం న్యూకాలనీ, న్యూస్‌లైన్ : జిల్లాలో బుధవారం నుంచి ప్రారంభం కానున్న ఇంట ర్మీడియెట్ పరీక్షలకు ఏర్పాట్లన్నీ పూర్తయ్యాయి. ఉదయం 9 నుంచి 12 గంటల వరకు జరిగే పరీక్షలకు ఒక్క నిమిషం ఆలస్యమైనా విద్యార్థులను అనుమతించరు. ఉదయం 8.30 నుంచి 8.45 వరకు విద్యార్థులను కేంద్రాల్లోకి అనుమతిస్తారు. 8.45 నుంచి 9 గంటల మధ్య వచ్చినవారిని వివరణ తీసుకుని అనుమతిస్తారు. జిల్లాలో 58,160 మంది పరీక్షలకు హాజరుకానుండగా వీరికోసం 93 కేంద్రాలు ఏర్పాటు చేశారు. ఫస్టియర్ పరీక్షలకు 27,863 (వొకేషనల్ విద్యార్థులు 1,396 మందితో కలిపి) మంది, సెకండియర్ పరీక్షలకు 30,297 (వొకేషనల్ విద్యార్థులు 2,651 మందితో కలిపి) మంది హాజరుకానున్నారు. 93 కేంద్రాలకు చీఫ్ సూపరింటెండెంట్లు, డిపార్ట్‌మెంటల్ అధికారులతోపాటు 37 మంది కస్టోడియన్లను నియమించారు. ప్రశ్నపత్రాలను 37 పోలీస్ స్టేషన్ల లో భద్రపరచగా ఇతర సామగ్రిని పరీక్ష కేంద్రాలకు చేరవేశారు.