యువతి ఆచూకీ తెలిపిన ఫేస్‌బుక్‌!

ప్రతీకాత్మక చిత్రం

సాక్షి, తెనాలి రూరల్‌: సోషల్‌ మీడియాలో ఓ యువతి పెట్టిన పోస్ట్‌ ఆధారంగా ఆమెను పోలీసులు రక్షించ గలిగారు. గుంటూరు జిల్లా, తెనాలికి చెందిన ఓ యువతి డిగ్రీ చదువుతోంది. ఏప్రిల్‌ 16వ తేదీన ఉదయం ఇంటి నుంచి వెళ్లి తిరిగి రాలేదు. అదే రోజు రాత్రి ఆమె తల్లిదండ్రులు పోలీసులను ఆశ్రయించగా, ఎస్‌ఐ టి.అనిల్‌కుమార్‌ కేసు నమోదు చేసి దర్యాప్తు చేపట్టారు. తమకు బంధువయిన ఢిల్లీలో నివసించే యువకుడు శశికాంత్‌పై వారు అనుమానం వ్యక్తం చేశారు.

ఈ నెల 12న ఢిల్లీ బాగుందంటూ ఆమె తన చెల్లెలికి ఫేస్‌బుక్‌ మెసెంజర్‌లో మెసేజ్‌ చేసింది. ఈ విషయం తెలుసుకున్న పోలీసులు నోయిడా ప్రాంతం నుంచి పోస్టింగ్‌ వచ్చినట్టు గుర్తించారు. ఎస్‌ఐ టి.అనిల్‌కుమార్‌ నేతృత్వంలో ప్రత్యేక బృందం ఢిల్లీ వెళ్లింది. ఆ యువతి హర్యానాలోని గుర్‌గావ్‌లో ఉన్నట్లు గుర్తించి అదుపులోకి తీసుకున్నారు. స్థానిక పోలీసులకు సమాచారమిచ్చి యువతిని తెనాలి తీసుకొచ్చారు.