పొత్తు పొడిచింది!

 

 బీజేపీకి సహకరించని టీడీపీ..

 1999, 2004లలో టీడీపీ, బీజేపీల మధ్య కుదిరిన పొత్తులో భాగంగా రెండుసార్లు మంగళగిరి నియోజకవర్గాన్ని బీజేపీకి కేటాయించింది. బీజేపీ తరఫున 1999లో యడ్లపాటి రఘనాథబాబు, 2004లో తమ్మిశెట్టి జానకిదేవీలపై  కాంగ్రెస్‌పార్టీ అభ్యర్థి మురుగుడు హనుమంతరావు రెండుసార్లు పోటీ చేసి గెలుపొందారు. గతంలో సైతం టీడీపీ శ్రేణులు బీజేపీకి సహకరించలేదు. దీంతో ఆ పార్టీ అభ్యర్థి ఓడిపోయారు. అయితే ప్రస్తుతం ప్రజల్లో తమకు బలం ఉందని, తమ బలంపైనే టీడీపీ అభ్యర్థుల గెలుపు ఓటములు ఆధారపడి ఉంటాయని వారు ఘంటాపథంగా చెబుతున్నారు. అలాగే దేశం, రాష్ట్రంలో మారిన రాజకీయ పరిస్థితుల్లో భాగంగా మోడీ హవా తమకు కలిసి వస్తుందని బీజేపీ శ్రేణులు భావిస్తున్నారు. నరసరావుపేటతో పాటు గుంటూరు పశ్చిమ, సత్తెనపల్లి టిక్కెట్లు సైతం తమకు కేటాయించేలా అధిష్టానంపై మరోసారి వత్తిడి తీసుకువస్తామని ఆ పార్టీ నాయకులు చెబుతున్నారు. ఇదే సమయంలో నరసరావుపేట అసెంబ్లీకి బీజేపీ అభ్యర్థిగా యడ్లపాటి రఘనాథబాబు, నలబోలు విష్ణుల్లో ఒకరిని ఎంపిక చేస్తున్నట్లు ఆ పార్టీ వర్గాలు వెల్లడిస్తున్నాయి. 

 

 టీడీపీ తహతహ..

 రాష్ట్ర విభజనకు సహకరించిన బీజేపీతో టీడీపీ పొత్తు కుదుర్చుకోవడంపై లౌకికవాదులు తప్పు పడుతున్నారు. వాస్తవానికి ఈ సార్వత్రిక ఎన్నికల్లో తొలి నుంచి బీజేపీతో పొత్తుకు టీడీపీ తహతహలాడటంపై ప్రజలు మండిపడుతున్నారు. మరోసారి బీజేపీతో పొత్తు పెట్టుకొనేది లేదని 2009లో తేల్చిచెప్పిన  చంద్రబాబు తాజాగా ఇప్పుడు పొత్తులకు వెళ్లడంపై ముస్లిం, మైనారిటీలు అసంతృప్తిని వ్యక్తం చేస్తున్నారు. చంద్రబాబు తన నైజాన్ని మరోసారి నిరూపించుకున్నారన్న విమర్శలు పెద్దఎత్తున వస్తున్నాయి. ఇదే సమయంలో టీడీపీ అభ్యర్థుల్లో సైతం గుండెల్లో రైళ్లు పరిగెడుతున్నాయి. బీజేపీతో పొత్తుతో ముస్లిం, మైనారిటీల ఓట్లు తమకు దూరమయ్యే ప్రమాదం ఉందని భావిస్తున్నారు.