TV
బస్‌లో మహిళ డ్యాన్స్‌ : సిబ్బందిపై వేటు
సాక్షి, న్యూఢిల్లీ : దేశ రాజధాని ఢిల్లీలోని బస్‌లో ఓ మహిళ డ్యాన్స్‌ చేస్తుండగా బస్‌ సిబ్బంది ఎంచక్కా ఎంజాయ్‌ చేసిన వీడియో సోషల్‌ మీడియాలో ఇటీవల వైరల్‌ అయింది. ఈ ఘటనకు సంబంధించి బస్‌ డ్రైవర్‌ను ఢిల్లీ రవాణా సంస్థ (డీటీసీ) సస్పెండ్‌ చేసింది. కండక్టర్‌కు షోకాజ్‌ నోటీస్‌ జారీ చేసి మార్షల్‌ను తిరిగి సివిల్‌ డిఫెన్స్‌ కార్యాలయానికి పంపింది.
జూన్‌ 12న జనక్‌పురిలో తీసిన ఈ వీడియో ఆ తర్వాత పలు సోషల్‌ మీడియా వేదికల్లో చక్కర్లు కొట్టింది. హర్యానీ సాంగ్‌కు చిందులేస్తూ మహిళ ఈ వీడియోలో కనిపించింది. డ్రైవర్‌, కండక్టర్‌, మార్షల్‌ ఆమెను అడ్డుకోకుండా విధి నిర్వహణలో నిర్లక్ష్యం వహించారని, డీటీసీ ప్రతిష్టను దెబ్బతీశారని పేర్కొంటూ ఉన్నతాధికారులు వారిపై చర్యలు చేపట్టారు. కాగా బస్‌ను ఢిల్లీలోని హరినగర్‌ డిపోకు చెందిన వాహనంగా గుర్తించారు.
