TV
మంచి మనసున్న దొంగ
వృత్తి దొంగతనం. కానీ మనసు నిండా మంచితనం. తెలీని బిడ్డ కోసం ప్రాణాలివ్వడానికి కూడా వెనుకాడని అమ్మతనం.. సింపుల్‌గా శ్రీకాంత్ కేరక్టరైజేషన్ ఇదే. ‘మొండోడు’లో శ్రీకాంత్ పాత్ర ప్రతి ఒక్కరూ ప్రేమించేలా ఉంటుంది’’ అంటున్నారు దర్శకుడు ప్రభు. రాజరాజేశ్వరి శ్రీనివాసరెడ్డి నిర్మిస్తున్న ఈ చిత్రం ద్వారా జర్నలిస్ట్ ప్రభు దర్శకునిగా పరిచయం అవుతున్నారు. నిర్మాణం పూర్తి చేసుకున్న ఈ చిత్రం గురించి ప్రభు మాట్లాడుతూ -‘‘భావోద్వేగపూరితమైన కథాంశమిది.
ఇటీవలే సెన్సార్ కూడా పూర్తయింది. సెన్సార్ సభ్యులు ఎంతో అభినందించారు కూడా. ఈ సినిమాకు పూరి జగన్నాథ్ వాయిస్ ఓవర్ ఇవ్వడం విశేషం. త్వరలోనే సినిమాను ప్రేక్షకుల ముందుకు తెస్తాం’’ అని తెలిపారు. పోసాని కృష్ణమురళి, చిత్రం శ్రీను, రవివర్మ, కారుమంచి రఘు, డా.రవిప్రకాష్ తదితరులు ఇతర పాత్రలు పోషిస్తున్న ఈ చిత్రానికి సంగీతం:సాయికార్తీక్, కెమెరా: వి.శ్రీనివాసరెడ్డి, ఎడిటింగ్: నాగిరెడ్డి, సమర్పణ: జోత్స్నారెడ్డి.
