TV
గోపీచంద్ ఫుల్ యాక్షన్
ప్రభాస్‌తో ‘మిర్చి’ వంటి బ్లాక్‌బస్టర్ తీసిన యువి క్రియేషన్స్ సంస్థ, గోపీచంద్‌తో ఓ చిత్రానికి శ్రీకారం చుట్టింది. దర్శకుడు చంద్రశేఖర్ యేలేటి శిష్యుడైన రాధాకృష్ణకుమార్ దర్శకునిగా పరిచయమవుతున్నారు. ఈ చిత్రం పూజా కార్యక్రమాలు శుక్రవారం హైదరాబాద్‌లోని సంస్థ కార్యాలయంలో నిరాడంబరంగా జరిగాయి. దేవుని పటాలపై చిత్రీకరించిన ముహూర్తపు దృశ్యానికి ప్రభాస్ కెమెరా స్విచాన్ చేయగా, నిర్మాత ‘దిల్’రాజు క్లాప్ ఇచ్చారు. చంద్రశేఖర్ యేలేటి గౌరవ దర్శకత్వం వహించారు. ఈ సందర్భంగా నిర్మాతలు వి. వంశీ కృష్ణారెడ్డి, ప్రమోద్ ఉప్పలపాటి మాట్లాడుతూ -‘‘భారీ తారాగణంతో అత్యున్నత సాంకేతిక నిపుణులతో ఈ చిత్రాన్ని రూపొందిస్తున్నాం. అన్ని వాణిజ్య హంగులతో యాక్షన్ ఓరియెంటెడ్‌గా ఈ సినిమా ఉంటుంది. జూన్ 6 నుంచి చిత్రీకరణ మొదలుపెడతాం. ప్రముఖ సంగీత దర్శకుడు మణిశర్మ తనయుడు సాగర్ మహతి ఈ చిత్రానికి స్వరాలందిస్తున్నారు’’ అని తెలిపారు. బ్రహ్మానందం, పోసాని కృష్ణమురళి, సుప్రీత్, శ్రీనివాస్ అవసరాల తదితరులు నటించనున్న ఈ చిత్రానికి కెమెరా: శక్తి శరవణన్, ఎడిటింగ్: కోటగిరి వెంకటేశ్వరరావు, యాక్షన్: అనల్ అరసు, ఎగ్జిక్యూటివ్ నిర్మాతలు: ఎమ్. అశోక్ కుమార్‌రాజు, ఎన్. సందీప్.
