కొడుకుపై గుడ్డిప్రేమతో దేశాన్ని భ్రష్టు పట్టించారు

సాక్షి, బెంగళూరు: తన కుమారుడిపై గుడ్డి ప్రేమతో సోనియాగాంధీ దేశాన్ని భ్రష్టు పట్టించారని నరేంద్ర మోడీ విమర్శించారు. యూపీఏ ప్రభుత్వాన్ని సోనియా రిమోట్ కంట్రోల్‌తో నడిపించారని ఆరోపించారు. ఆదివారం ఆయన కర్ణాటకలోని చిక్కబళ్లాపూర్, చిక్కమంగళూరు, హవేరి ప్రాంతాల్లో సుడిగాలి పర్యటన నిర్వహించారు. యూపీఏ ప్రభుత్వంపై, సోనియా, మన్మోహన్‌లపై విరుచుకుపడ్డారు. ‘‘తన కుమారుడిపై ఒక తల్లి గుడ్డి ప్రేమ దేశాన్ని భ్రష్టు పట్టించింది.. మరి దీనివల్ల ఏమైనా ప్రయోజనం వచ్చిందా? ఆ కుమారుడిని మనం నమ్మకగలమా? అతడిని నమ్మి దేశం బతకగలదా?..’’ అంటూ సోనియా, రాహుల్‌లను పరోక్షంగా విమర్శించారు. ఇక అనుకోకుండా (యాక్సిడెంటల్‌గా) ప్రధాని అయిన మన్మోహన్‌సింగ్ వల్ల దేశ ప్రజలందరికీ ప్రమాదమని వ్యాఖ్యానించారు.