చనిపోయిన వ్యక్తిని ట్రాన్స్‌ఫర్‌ చేశారు..!

లక్నో : చనిపోయిన వ్యక్తికి ట్రాన్సఫర్‌ ఆర్డర్‌ ఇచ్చి రికార్డ్‌ సృష్టించారు ఉత్తరప్రదేశ్‌ పోలీసులు. వివరాలు.. సత్య నారాయణ సింగ్‌ అనే వ్యక్తి నెల రోజుల క్రితం మరణించాడు. అయితే చనిపోయే నాటికి అతను డీఎస్పీగా పని చేసున్నారు. ఈ క్రమంలో కొన్ని రోజుల క్రితం యూపీ పోలీసు ఉన్నతాధికారులు ట్రాన్సఫర్‌ లిస్ట్‌ తయారు చేశారు. అయితే ఇందులో మరణించిన సత్య నారాయణ సింగ్‌ పేరును కూడా చేర్చి.. జాబితాను ప్రకటించారు. పొరపాటును గుర్తించిన యూపీ డీజీపీ ట్విటర్‌ ద్వారా క్షమాపణలు చెప్పారు.

ఈ సందర్భంగా ఆయన ‘ఈ రోజు ప్రచురించిన ట్రాన్సఫర్‌ లిస్ట్‌లో మరణించిన డీఎస్పీ సత్యనారాయణ పేరు ఉండటం చాలా బాధకరం. దాన్ని క్యాన్సల్‌ చేస్తూ ఉత్తర్వులు జారీ చేశాను. కానీ ఇలాంటి తప్పులను సహించకూడదు. డిపార్ట్‌మెంట్‌ హెడ్‌గా ఈ విషయం గురించి క్షమాపణలు చెప్తున్నాను. ఇందుకు బాధ్యులైన వారి మీద కఠిన చర్యలు తీసుకోవడమే కాక ఇక మీదట ఇలాంటి పొరపాట్లు జరగకుండా చూసుకుంటానం’టూ డీజీపీ ట్వీట్‌ చేశారు.