నాదల్‌కు జొకోవిచ్‌ షాక్‌

ఇద్దరు మాజీ చాంపియన్స్‌ మధ్య సుదీర్ఘంగా సాగిన పురుషుల సింగిల్స్‌ రెండో సెమీఫైనల్లో నొవాక్‌ జొకోవిచ్‌ (సెర్బియా) పైచేయి సాధించాడు. ప్రపంచ నంబర్‌వన్‌ రాఫెల్‌ నాదల్‌ (స్పెయిన్‌)తో శనివారం జరిగిన సెమీఫైనల్లో 12వ సీడ్‌ జొకోవిచ్‌ 6–4, 3–6, 7–6 (11/9), 3–6, 10–8తో గెలుపొందాడు. 5 గంటల 15 నిమిషాలపాటు జరిగిన ఈ మ్యాచ్‌లో జొకోవిచ్‌ 23 ఏస్‌లు సంధించి, నాదల్‌ సర్వీస్‌ను నాలుగుసార్లు బ్రేక్‌ చేశాడు. నేడు జరిగే ఫైనల్లో ఎనిమిదో సీడ్‌ కెవిన్‌ అండర్సన్‌ (దక్షిణాఫ్రికా)తో జొకోవిచ్‌ తలపడతాడు.

2011, 2014, 2015లలో జొకోవిచ్‌ వింబుల్డన్‌ చాంపియన్‌గా నిలువగా... అండర్సన్‌ తొలిసారి ఈ టోర్నీలో ఫైనల్‌కు చేరాడు. శుక్రవారమే నాదల్, జొకోవిచ్‌ సెమీఫైనల్‌ ముగియాల్సింది. అయితే అండర్సన్, జాన్‌ ఇస్నెర్‌ (అమెరికా) మధ్య తొలి సెమీఫైనల్‌ 6 గంటల 36 నిమిషాలపాటు సాగడంతో నాదల్, జొకోవిచ్‌ రెండో సెమీఫైనల్‌ ఆలస్యంగా ప్రారంభమైంది. మరోవైపు రాత్రి 11 తర్వాత ఆటను నిలిపివేయాలని వింబుల్డన్‌ టోర్నీ నిబంధనలు చెబుతున్నాయి. అప్పటికి జొకోవిచ్‌ 6–4, 3–6, 7–6 (11/9)తో ఆధిక్యంలో ఉండటం... ఫలితం రాకపోవడంతో మ్యాచ్‌ను శనివారం కొనసాగించారు.