ఎంఎస్ ధోనికి 'వంద'నం: సచిన్

ఎంఎస్ ధోనికి 'వంద'నం: సచిన్

న్యూఢిల్లీ: ఇటీవల శ్రీలంకతో జరిగిన దైపాక్షిక సిరీస్ ద్వారా భారత మాజీ కెప్టెన్ మహేంద్ర సింగ్ పలు ఘనతల్ని సాధించిన సంగతి తెలిసిందే. వన్డేల్లో మూడొందల మ్యాచ్ ల మైలురాయిని దాటడంతో పాటు వంద స్టంపింగ్ ల రికార్డును, అత్యధిక నాటౌట్ల రికార్డును సైతం లంక పర్యటనలో ధోని సాధించారు. అయితే ఇదంతా లంకేయులతో ఐదు వన్డేల సిరీస్ ను ఆడే క్రమంలో ధోని సాధించిన ఘనతలు.

కాగా, ఆస్ట్రేలియాతో ఐదు వన్డేల సిరీస్ లో భాగంగా చెన్నైలోని చిదంబర్ స్టేడియంలో జరిగిన మ్యాచ్ లో ధోని మరో అరుదైన రికార్డును సొంతం చేసుకున్నారు. తన అంతర్జాతీయ కెరీర్‌లో వందో అర్ధ శతకాన్ని ధోని పూర్తి చేసుకున్నారు. ఆసీస్ తో మ్యాచ్ లో 88 బంతుల్లో 79 పరుగుల్ని ధోని సాధించడంతో  సెంచరీ అర్థ శతకాల్ని నమోదు చేసిన జాబితాలో ధోని చేరిపోయారు. టెస్టుల్లో 33 అర్ధశతకాలు, వన్డేల్లో 66, టీ20ల్లో ఒక అర్ధ శతకంతో ధోనీ ఈ ఘనతను అందుకున్నారు.

ఇలా ధోని తన అంతర్జాతీయ కెరీర్లో వంద అర్థ శతకాల్ని సాధించడంపై మాస్టర్ బ్లాస్టర్ సచిన్ టెండుల్కర్ ప్రశంసల వర్షం కురిపించారు. ధోనికి 'వంద'నం అంటూ తన సందేశాన్ని ట్విట్టర్ ద్వారా తెలిపారు. ధోని  ఖాతాలో మరొక 'శతకం' చేరిందంటూ కొనియాడారు. 'ఈసారి వికెట్లు ముందు మెరిసిన ధోని మరొక ఘనతను సాధించారు. అతనికే ఇవే నా అభినందనలు అంటూ ట్వీట్ చేశారు. ఈ మేరకు ధోని ఫోటోను పోస్ట్ చేశారు.


అంతర్జాతీయ కెరీర్‌లో ఇలా వందో అర్ధ శతకం అందుకున్న భారత క్రికెటర్ల జాబితాలో బ్యాటింగ్ దిగ్గజం సచిన్ టెండుల్కర్ 164 అర్ధ శతకాలతో అగ్రస్థానంలో ఉండగా.. తర్వాతి స్థానాల్లో రాహుల్ ద్రవిడ్, సౌరవ్ గంగూలీలు ఉన్నారు. తాజాగా ధోనీ నాలుగో స్థానంలో నిలిచారు. మొత్తంగా ప్రపంచంలోనే ఈ 100 అర్ధ శతకాలు అందుకున్న14వ బ్యాట్స్‌మెన్‌గా ధోని రికార్డులకెక్కారు.

లంకేయులతో వన్డే సిరీస్ లో వంద స్టంపింగ్ లతో కొత్త రికార్డును సృష్టించిన ధోనిని అప్పడు కూడా సచిన్ తనదైన శైలిలో పొగడ్తలతో ముంచెత్తారు. ధోని ఒక మెరుపు అంటూ ఆ సందర్భంలో సచిన్ కొనియాడారు.
 

Yet another 100 for @msdhoni! This time in front of the stumps! Congratulations on a century of 50s Mahi pic.twitter.com/2yPf1wUnW7

— sachin tendulkar (@sachin_rt) 17 September 2017