ఆగి... అడుగేద్దామా?

 న్యూఢిల్లీ: ఆమ్ ఆద్మీ పార్టీని అపఖ్యాతిపాలుచేసి మళ్లీ ఎన్నికలకు వెళ్లినా పెద్దగా ప్రయోజనం ఉండకపోవచ్చని కమలనాథులు భావిస్తున్నారా? ఢిల్లీలో అసెంబ్లీ ఎన్నికలు రావడం భారతీయ జనతా పార్టీకి ఇష్టం లేదా? లోక్‌సభ ఎన్నికల తర్వాతే ప్రభుత్వ ఏర్పాటు కోసం పావులు కదిపే అవకాశముందా? రాజకీయ విశ్లేషకులు మాత్రం ఇదే అభిప్రాయాన్ని వ్యక్తం చేస్తున్నారు. ఎన్నికలకు సిద్ధమని బీజేపీ ప్రకటించినప్పటికీ ఆపార్టీ ఎమ్మెల్యేలు ఢిల్లీలో అసెంబ్లీని రద్దు చేయకుండా సుప్తచేతనావస్థలో ఉంచాలని లెఫ్టినెంట్ గవర్నర్ తీసుకున్న నిర్ణయాన్ని సమర్థిస్తున్నారు. ఇందుకు కారణం బీజేపీ ఎమ్మెల్యేలు ఎన్నికలకు సుముఖంగా లేకపోవడమేనంటున్నారు. అసెంబ్లీని రద్దు చేసినట్లయితే లోక్‌సభ ఎన్నికలతోపాటు ఢిల్లీ విధానసభకు కూడా ఎన్నికలు నిర్వహించాల్సి వచ్చేది. కానీ అసెంబ్లీని సస్పెన్షన్‌లో ఉంచడం వల్ల ఎన్నికల ముప్పు తప్పిందనే ఆనందంలో బీజేపీ ఎమ్మెల్యేలు ఉన్నట్లు సమాచారం.  ఇంత త్వరగా విధానసభ ఎన్నికలను ఎదుర్కోవడం బీజేపీకి ఇష్టం లేదనే విషయాన్ని డాక్టర్ హర్షవర్ధన్  స్వయంగా అంగీకరించారు. ప్రభుత్వాన్ని ఏర్పాటుచేయాలని తమ ఎమ్మెల్యేలు ఎవరూ అధిష్టానాన్ని కోరలేదని, అయితే మళ్లీ ఎన్నికలకు వెళ్లడానికి మాత్రం తమ ఎమ్మెల్యేలు సుముఖంగా లేరని చెప్పారు. అందువల్ల అసెంబ్లీని రద్దు చేయకుండా సుప్తచేతనావస్థలో ఉంచాలన్న లెఫ్టినెంట్ గవర్నర్ నిర్ణయం పట్ల బీజేపీ హర్షం వ్యక్తం చేస్తోంది.