సింగపూర్‌కు కెప్టెన్

సాక్షి, చెన్నై : రాష్ట్రంలో లోక్‌సభ ఎన్నికల వేడి రాజుకుంది. ఆయా రాజకీయ పార్టీలు తమ దైన శైలిలో వ్యూహ రచనల్లో ఉన్నాయి. అందరికంటే ముందుగా అన్నాడీఎంకే ఎన్నికల పనుల్లో దూసుకెళుతోంది. ఇక తమ తమ నేతృత్వంలో కూటమి లక్ష్యంగా డీఎంకే, బీజేపీ, కాంగ్రెస్‌లు వేర్వేరుగా పావులు కదుపుతున్నాయి. వీరందరి దృష్టి  ప్రధాన ప్రతిపక్ష నేత విజయకాంత్ మీద పడింది. ఆయన్ను తమ వైపు తిప్పుకోవడమే లక్ష్యంగా తీవ్రంగా కుస్తీలు పడుతున్నారు. బీజేపీతో పొత్తు దాదాపుగా ఖరారైనట్టునన్న సంకేతాలు వెలువడుతున్నాయి. రెండు మూడు రోజుల్లో తమ పొత్తును ఆయన ఖరారు చేయనున్నారన్న ప్రచారం సాగుతోంది.  కమలంతో కలసి అడుగులు వేయడానికి విజయకాంత్ సిద్ధం అవుతున్నారన్న సమాచారంతో డీఎంకే వర్గాలు మేల్కొన్నాయి. ఫార్వర్డ్ బ్లాక్ నేత సంతానం ద్వారా విజయకాంత్‌తో రాయబారం సాగించారు. ఆదివారం ఉదయం విజయకాంత్, సంతానం భేటీ అయ్యారు. ఈ భేటీ విషయాలు గోప్యంగానే ఉన్నా, హఠాత్తుగా విజయకాంత్ సింగపూర్ బయలుదేరి వెళ్లడం చర్చకు దారి తీసింది.