‘హ్యాపీ’ బాధితుల ఆందోళన

సొసైటీ కార్యాలయం వద్ద పాస్‌ పుస్తకాలతో బాధితులు   

తల్లాడ ఖమ్మం : హ్యాపీ ఫ్యూచర్‌ మల్టీపర్పస్‌ కో–ఆపరేటివ్‌ సొసైటీ లిమిటెడ్‌ బాధితులు శుక్రవారం తల్లాడ పోలీస్‌ స్టేషన్‌లో ఫిర్యాదు చేశారు. మూతపడిన తల్లాడ బ్రాంచి కార్యాలయం వద్ద నిరసన తెలిపారు. గత డిసెంబరు నెలలో తల్లాడ, కల్లూరులో ‘హ్యాపీ’ సొసైటీ బ్రాంచీలు ఏర్పాటయ్యాయి. తమ సంస్థకు ప్రభుత్వ గుర్తింపు (రిజిస్ట్రేషన్‌) ఉందని అక్కడి ఉద్యోగులు చెప్పారు.

తమ  సంస్థలో 90 రోజులపాటు ఆర్‌డీ కడితే ఆ తర్వాత రెట్టింపు మొత్తాన్ని లోనుగా ఇస్తామన్నారని చెప్పారు. వారం క్రితం తల్లాడ బ్రాంచి మూతపడడంతో తామంతా మోసపోయామని ఫిర్యాదులో పేర్కొన్నారు. ఎస్‌ఐ మేడా ప్రసాద్‌ కేసు నమోదు చేశారు.