తల్లులే మా ఇలవేల్పు  
 
  ‘న్యూస్‌లైన్’తో రాష్ట్ర బీసీ సంక్షేమశాఖ మంత్రి బస్వరాజు సారయ్య
 
   ‘‘రెండేళ్లకోసారి వచ్చే మేడారం జాతర అంటే మాకు వారం రోజుల పండుగ. చుట్టాలు, దగ్గరి మిత్రులను పిలిచి జాతరను ఘనంగా జరుపుకుంటాం.. గిరిజన వనదేవతలు సమ్మక్క, సారలమ్మ తల్లులే మా ఇంటి ఇలవేల్పు.. మా నాయిన వారి పేర్లను కలిపే నాకు సారయ్య అని పేరు పెట్టిండు.. వారి దయతోనే నేను ఇప్పుడు ఈ స్థాయిలో ఉన్నా.. జాతరలో తల్లుల మహత్యం చాలా గొప్పది. అంత బెల్లం... కోట్లాది మంది భక్తులు వస్తున్నా... గద్దెల వద్ద ఒక్క ఈగ కూడా కనిపించదు.. అదీ సమ్మక్క, సారలమ్మల మహత్యం..’’ అని రాష్ట్ర బీసీ సంక్షేమ శాఖ మంత్రి బస్వరాజు సారయ్య చెప్పుకొచ్చారు. మేడారం మహాజాతరను పురస్కరించుకుని వనదేవతల మహత్యం, తన అనుభవాలు, అభిప్రాయాలను ‘న్యూస్‌లైన్’కు వెల్లడించారు. అవి ఆయన మాటల్లోనే..
  
  వారం వారం దర్శనాలు..
 
  మేడారంలో సమ్మక్క, సారలమ్మలను దర్శించుకునేందుకు ఇక నుంచి ప్రత్యేక ఏర్పాట్లు చేస్తాం. వారంవారం దర్శనాలు ఉండేందుకు ఇప్పటికే నిర్ణయం తీసుకున్నాం. ప్రతీ వారం పూజారులు అందుబాటులో ఉండడం, భక్తులకు తగిన సౌకర్యాలు కల్పించాలని భావిస్తున్నాం. వారం వారం దర్శనాలతో పాటు ప్రతీ రెండేళ్లకోసారి మహాజాతరను ఘనంగా నిర్వహించాల్సి ఉంటోంది. ఇప్పటికే జాతర ఏర్పాట్లకు రెట్టింపు నిధులు తీసుకొచ్చాం. గత జాతరకు రూ. 60 కోట్లు తీసుకువస్తే... ఈసారి వాటిని రూ.100 కోట్లకు పెంచాం. మేడారం చుట్టూ రహదారులను అభివృద్ధి చేశాం. ఒకప్పుడు ఎడ్లబండ్లలో రెండు రోజులు వెళ్లాల్సి వచ్చేది. ఇప్పుడు ఎలాంటి వాహనాల్లోనైనా కేవలం రెండు గంటల్లోనే చేరుకోవచ్చు. చుట్టూర ఉన్న గ్రామాల్లో కూడా అభివృద్ధి పనులు చేశాం. రానున్న తెలంగాణ ప్రత్యేక రాష్ట్రంలో మేడారం జాతరను మరింత ఘనంగా నిర్వహిస్తాం.
  
 ప్రత్యేక బడ్జెట్‌తో శాశ్వత ప్రాతిపదికన పనులు చేయిస్తాం. పెద్ద పెద్ద దేవాలయాలకు దీటుగా మేడారంలో పూజలు నిర్వహించేలా చూస్తాం. జంపన్నవాగు వద్ద భక్తులు ఎప్పుడైనా పుణ్యస్నానాలు ఆచరించే విధంగా ఏర్పాట్లు చేయిస్తాం. అక్కడ మినీ రిజర్వాయర్ ఏర్పాటుకు ప్రతిపాదనలు రూపొందిస్తున్నాం. తాగునీటి కోసం పెద్ద ట్యాంకులు, మినీ ట్యాంకులు నిర్మించేందుకు ప్రతిపాదనలు పంపించాం. ఇవన్నీ శాశ్వత పనులే.
  
 తెలంగాణ ఉద్యమానికి స్ఫూర్తి..
 
 సమ్మక్క, సారలమ్మలు అంటే ధీరవనితలు. గుండె ధైర్యానికి నిలువెత్తు నిదర్శనం. ప్రాణత్యాగానికి వెనకాడని నైజం. తెలంగాణ ప్రత్యేక రాష్ట్ర ఉద్యమానికి ఆ తల్లులే స్ఫూర్తి. ఉద్యమంలో వారిని తలుచుకుంటూ ముందుకు పోయాం. ఇప్పుడు తల్లుల దయవల్లే తెలంగాణ సిద్ధిస్తోంది.
  
  తల్లుల పేరే నాకు..
 
  మా ఇంటి ఇలవేల్పు సమ్మక్క, సారలమ్మలే కావడంతో వారి పేర్లు కలిసి ఉండేలా నాకు ‘సారయ్య’ అని పేరు పెట్టిండు మా నాయిన. మాకు తల్లులంటే ఎంతో నమ్మకం. ఏ వరం కావాలన్నా... ముందుగా మొక్కేది ఆ తల్లులనే. ఇప్పుడు ఆ దేవతలకు సేవ చేసే భాగ్యం నాకు కలిగింది. వారి మహత్యం గురించి ఎంత చెప్పినా తక్కువే. కోట్ల మంది వచ్చి బెల్లంగడ్డలు విసిరినా.. అక్కడ (గద్దెల కాడ) ఒక్క ఈగ కూడా వాలదు. బెల్లం ఉన్న చోట ఈగలుంటాయి. కానీ... తల్లుల గద్దెల వద్ద ఒక్కటైనా ఉంటుందా..? అదీ మహత్యం.
  
  ఇంట్లో ఒకటే సందడి..
 
  మేడారం జాతర వచ్చిందంటే మా ఇంట్లో వారం రోజులపాటు ఒకటే సందడి. మా నాయినకు సమ్మక్క పూనకం ఉండేది. దాంతో మా కుటుంబం మొత్తం జాతరను పెద్ద పండుగగా జరుపుకునేటోళ్లం. మొదటికి(మేడారం) వెళ్లేందుకు సమ్మక్క పున్నం మొదలైనప్పటి నుంచి ఏర్పాట్లు చేసుకునేటోళ్లం. జాతర మొదలయ్యే రెండు రోజుల ముందే ఇక్కడి నుంచి బయలుదేరి అక్కడికి వెళ్లేవాళ్లం. మధ్యమధ్యలో ఆగి చెట్ల కింద వంటలు చేసుకుని తినేటోళ్లం. కుటుంబం మొత్తం కలిసి ప్రయాణం చేయడం మరిచిపోలేని అనుభూతి. జాతర జరిగే నాలుగు రోజులపాటు మేడారంలోనే ఉండేవాళ్లం. సమ్మక్క, సారలమ్మ తల్లుల సేవలో మా నాయిన తరించేవారు. దేవుడు వచ్చినప్పుడు జంపన్నవాగులో జనాలు నాయిన చుట్టూ చేరి వరాలు కోరుకునేవారు. ఇప్పటివరకు 14 జాతరలు క్రమం తప్పకుండా వెళ్లా. వెళ్లిన ప్రతీసారి మరిచిపోలేని అనుభూతి. గతంలో దట్టమైన అటవీప్రాంతం నుంచి వెళ్లా.. ఇప్పుడు సాఫీగా సాగిపోతున్న రహదారులపై నుంచి కూడా వెళ్తున్నా.
  


 =మంత్రులు పొన్నాల లక్ష్మయ్య, బస్వరాజు సారయ్య
  =ఎంజీఎంలో లిక్విడ్ ఆక్సిజన్ ప్లాంటు ప్రారంభం
  
 ఎంజీఎం, న్యూస్‌లైన్ : ఎంజీఎం ఆస్పత్రి సమస్యలను రాష్ట్ర ఆరోగ్య శాఖ మంత్రి దృష్టికి తీసుకెళ్తామని రాష్ట్ర మంత్రులు పొన్నాల లక్ష్మయ్య, బస్వరాజు సారయ్య అన్నారు. ఎంజీఎంలో ఆస్పత్రిలో 10 కిలో లీటర్ల సామర్థ్యం కలిగిన ఆక్సిజన్ ప్లాంట్‌ను రాష్ట్ర ఐటీ శాఖ మంత్రి పొన్నాల లక్ష్మయ్య, బీసీ సంక్షేమశాఖ మంత్రి బస్వరాజు సారయ్య, ఎంపీ సిరిసిల్ల రాజయ్య శుక్రవారం ప్రారంభించారు. ఆనంతరం ఎంజీఎం అకాడమీ హాల్‌లో డాక్టర్లతో సమీక్షా సమావేశాన్ని నిర్వహించారు. ఎంజీఎం ఆస్పత్రిలోని  సమస్యల పరిష్కారానికి రాష్ట్ర ఆరోగ్య శాఖ మంత్రి తో త్వరలో సమావేశమవుతామని పొన్నాల లక్ష్మయ్య తెలిపారు.  
 
 ఎంజీఎం ఆస్పత్రిలో సిబ్బంది భర్తీ, కావాల్సిన సాంకేతిక పరికరాల కొనుగోలు, ఆస్పత్రి అభివృద్ధి నిధుల విని యోగం గురించి ప్రభుత్వ దృష్టికి తెస్తామన్నారు. అనేక సమస్యలు ఉన్నప్పటికీ పేద ప్రజలకు మెరుగైన వైద్య సౌకర్యాన్ని అందించడానికి ఇక్కడి సిబ్బంది కృషి చేస్తున్నారన్నారు. వ్యవస్థలోని లోపాలను అధిగమించి సమస్యల పరిష్కారానికి కృషి చేయాలని సూచించారు. ఆస్పత్రి అభివృద్ధి నిధులను పూర్తిస్థాయిలో వినియోగించుకోవడం ద్వారా కొన్ని సమస్యలను పరిష్కరించుకోవచ్చునని అన్నారు.
 
 మంత్రి బస్వరాజు సారయ్య మాట్లాడుతూ ఎం జీఎం ఆస్పత్రిలో మౌలిక సదుపాయాలు మెరుగుపరుచాల్సిన అవసరం ఉందన్నారు. ప్రస్తు తం ఉన్న 250 పోస్టులకు 69 ఔట్  సోర్సింగ్ ద్వారా, మిగిలినవి రెగ్యూలైరైజ్ చేయడానికి ప్రభుత్వం అంగీకరించిందని తెలిపారు. ప్రతీ వారం ఎంజీఎం పనితీరుపై జిల్లా కలెక్టర్ రివ్యూ చేయాలని సూచించారు. తన నియోజకవర్గ అభివృద్ధి నిధుల నుంచి రూ. 5.25 లక్షలు ఆస్పత్రి అభివృద్ధికి, రూ. 4 ల క్షలు కేయూ క్రికెట్ మైదానం అభివృద్ధికి ఇచ్చానని చెప్పారు. ఎంపీ రాజయ్య మాట్లాడుతూ ఎంజీఎంలో వెంటిలేటర్లకు రూ. 12 లక్షలు ఎంపీ అభివృద్ధి నిధుల నుంచి మంజూరు చేస్తున్నట్లు తెలిపారు.
 
 జిల్లాలోని వివిధ ఆస్పత్రుల్లో ఖాళీగా ఉన్న 40 డాక్టర్ల పోస్టుల భర్తీకి ఒత్తిడి తెస్తామని అన్నారు. ఆస్పతి అభివృద్ధి నిధులను ఉపయోగించుకోవడానికి ప్రభుత్వం నుంచి అనుమతి ఇప్పించాలని మంత్రులను జిల్లా కలెక్టర్ కిషన్ కోరారు. అవసరమైన పరికరాల కొనుగోలుకు అనుమతులు ఇప్పించాలన్నారు. ప్రారంభ కార్యక్రమంలో ఎమ్మెల్యేలు కె.శ్రీధర్, డాక్టర్ తాటి కొండ రాజయ్య, మునిసిపల్ కమిషనర్ పండాదాస్, అదనపు జేసీ సంజీవయ్య, ఎంజీఎం సూపరింటెండెంట్ డాక్టర్ మనోహర్, ఆర్‌ఎంఓలు డాక్టర్ నాగేశ్వర్‌రావు, హేమంత్, శివకుమార్, డాక్టర్లు చంద్రశేఖర్, ప్రవీణ్, వెంకట్‌రెడ్డి, బందెల మోహన్‌రావు, శ్రీనివాస్, కరుణాకర్‌రెడ్డి, దొడ్డ రమేష్, తహసీల్దార్ రవి, ఆర్‌ఐ నాగేంద్రప్రసాద్ పాల్గొన్నారు.