సాక్షి, సుజాతనగర్‌: మోదీ, కేసీఆర్‌ల తెరవెనుక డ్రామాలను చైతన్యం కలిగిన తెలంగాణ ప్రజలు తిప్పికొట్టాలని సీపీఎం పొలిట్‌బ్యూరో సభ్యురాలు బృందాకారత్‌ పిలుపునిచ్చారు. తెలంగాణలో ఇద్దరు తిట్టుకోవడం, ఢిల్లీలో ఇద్దరు కలిసుండే విషయాలను ప్రజలు గమనిస్తూనే ఉన్నారని అన్నారు. సీపీఎం బలపరిచిన బీఎల్‌ఎఫ్‌ అభ్యర్థి ఎడవల్లి కృష్ణ విజయాన్ని కాంక్షిస్తూ మండల కేంద్రం సుజాతనగర్‌లో ఆదివారం బహిరంగ సభను నిర్వహించారు. ఈ సందర్భంగా ఆమె మాట్లాడుతూ  ప్రధాని నరేంద్రమోదీ, తెలంగాణ సీఎం కేసీఆర్‌ ఇద్దరూ మాటల గారడీ చేసే వాళ్లేనని అన్నారు. వారిద్దరినీ గద్దెదించాలని చెప్పారు. అధికారం, సొంత ప్రయోజనాల కోసమే ప్రజాకూటమి ఏర్పడిందన్నారు. రాష్ట్రంలో ఎన్నికల ప్రచారానికి వస్తున్న మోదీ, అమిత్‌షాల కళ్లజోళ్లకు పేదప్రజలు కనబడటం లేదా అని ఆమె ప్రశ్నించారు. మోదీకి చిన్న తమ్ముడిలా ఉన్న కేసీఆర్‌ ఢిల్లీలో తన స్నేహితులను ప్రసన్నం చేసేందుకే ఎనిమిది నెలలు ముందుగానే ఎన్నికలకు పోయారన్నారు. ఎన్నికలకు ముందు ఎన్నో హామీలను గుప్పించిన కేసీఆర్‌ వాటిని తుంగలో తొక్కారని, మళ్లీ అధికారదాహంతో ముందుకు వస్తున్నారన్నారు. బీజేపి, కాంగ్రెస్, టీఆర్‌ఎస్‌ పార్టీలు అనుసరిస్తున్న విధానాలను తిప్పికొట్టి, రైతు నాగలి గుర్తుకు వేసి ఎడవల్లి కృష్ణను గెలిపించాలని కోరారు. బీఎల్‌ఎఫ్‌ అభ్యర్థి ఎడవల్లి కృష్ణ మాట్లాడుతూ తాము అధికారంలోకి వస్తే బీఎల్‌ఎఫ్‌ ప్రకటించిన మేనిఫోస్టోను నూరు శాతం అమలు చేస్తామని అన్నారు. సీపీఎం రాష్ట్ర కమిటీ సభ్యుడు కాసాని ఐలయ్య, జిల్లా కార్యదర్శి అన్నవరపు కనకయ్య, జిల్లా కమిటీ సభ్యుడు కున్సోత్‌ ధర్మా, అన్నవరపు సత్యనారాయణ, మహిళా సంఘం రాష్ట్ర ఉపాధ్యక్షురాలు ఆశాలత, కొత్తగూడెం, చండ్రుగొండ, సుజాతనగర్‌ మండలాల కార్యదర్శులు భూక్యా రమేష్, యాసా నరేష్, ఎంపీటీసీలు శ్రీలక్ష్మి, కుమారి మండల కార్యదర్శి వీర్ల రమేష్, బీఎల్‌ఎఫ్‌ నాయకులు తాళ్ళూరి శ్రీనివాసరావు, పెద్దమళ్ల నాగేశ్వరరావు, గురజాల సీతయ్య, లావుడ్యా సత్యనారాయణ, నర్రా శివరామకృష్ణ, అలవాల కార్తీక్, , కాట్రాల తిరుపతిరావు తదితరులు పాల్గొన్నారు.  ధన రాజకీయాలను నిరోధించాలి  చుంచుపల్లి(కొత్తగూడెం):  దేశంలో డబ్బుతో కూడిన రాజకీయాలు ఇటీవల బాగా పెరిగిపోయాయని, వాటిని నిరోధించడంలో ఎన్నికల సంఘం  ముందుకు రావాలని సీపీఎం పొలిట్‌బ్యూరో సభ్యురాలు బృందా కారత్‌ అన్నారు.ఆదివారం ఆమె కొత్తగూడెంలో విలేకరులతో మాట్లాsడారు. దేశంలో బీజేపీ ప్రభుత్వం ఫెడరల్‌ వ్యవస్థను పూర్తిగా నాశనం చేసిందని ఆరోపించారు. ఆంధ్రప్రదేశ్‌లో రాజధాని నిర్మాణం పేరుతో ప్రభుత్వం వేల ఎకరాల భూములను సేకరిస్తూ రైతులకు అన్యాయం చేసిందని విమర్శించారు. రాష్ట్రంలో కూటమి కుర్చీ కోసం పోరాటం చేస్తోందని విమర్శించారు. మరిన్ని వార్తాలు...  

సాక్షి, కొణిజర్ల/ముదిగొండ: ప్రధాని నరేంద్ర మోదీ, తెలంగాణ సీఎం కేసీఆర్‌ ఇద్దరూ మాటలతో గారడీ చేసే మాయగాళ్లని సీపీఎం పొలిట్‌బ్యూరో సభ్యురాలు బృందాకారత్‌ అన్నారు. సీపీఎం, బీఎల్‌ఎఫ్‌ అభ్యర్థుల విజయాన్ని కాంక్షిస్తూ వైరా, మధిర నియోజకవర్గాల పరిధిలోని కొణిజర్ల, ముదిగొండ మండల కేంద్రాల్లో బుధవారం రాత్రి జరిగిన బహిరంగ సభల్లో ఆమె పాల్గొని ప్రసంగించారు. తెలంగాణ రాష్ట్రంలో ప్రస్తుతం విభిన్న పరిస్థితులు ఉన్నాయని, అధికారం, సొంత ప్రయోజనాల కోసమే మహాకూటమి ఏర్పడిందన్నారు. కేసీఆర్‌.. ప్రధాని మోదీని, ఢిల్లీలో తన స్నేహితులను ప్రసన్నం చేసుకునేందుకు ఎనిమిది నెలల ముందుగానే ఎన్నికలకు పోయారన్నా రు. భవిష్యత్‌లో తెలంగాణ ప్రజలు సంతోషంగా కలిసి మెలిసి ఉండాలంటే మోదీ, కేసీఆర్‌ ప్రభుత్వాలను ఓడించాలన్నారు. ఎన్నికలకు ముందు ఎన్నో హామీలు గుప్పించి.. అధికారం చేపట్టిన తర్వాత వాటిని తుంగలో తొక్కారని, మళ్లీ ఎన్నికలు రాగానే కొత్త హామీలతో ప్రజల ముందుకొస్తున్నారన్నారు. ముదిగొండ సభకు హాజరైన కార్యకర్తలు కేరళ, త్రిపుర రాష్ట్రాల్లో అధికారంలోకి వచ్చిన మూడు నెలల్లోనే రుణమాఫీ చేస్తే, కేసీఆర్‌ నాలుగున్నరేళ్లయినా చేయలేకపోయాడన్నారు. గడిచిన నాలుగున్నరేళ్లలో కేసీఆర్‌ వంద గదుల ఇల్లు కట్టుకున్నాడని, రాష్ట్రంలోని నిరుపేదలకు మాత్రం రెండు గదుల ఇల్లు కూడా కట్టించి ఇవ్వలేకపోయాడన్నారు. రాష్ట్రంలో అగ్రవర్ణాల ఆధిపత్యానికి వ్యతిరేకంగా, దళితులు, మైనార్టీలు, ఆదివాసీలు, మహిళల హక్కుల కోసం, ప్రత్యామ్నాయ రాజకీయ విధానాల కోసం సీపీఎం, బీఎల్‌ఎఫ్‌ కూటమి పోరాడుతుందన్నారు. ప్రస్తుతం కాంగ్రెస్, టీఆర్‌ఎస్‌ పార్టీలు అనుసరిస్తున్న విధానాలను తిప్పికొట్టాలని, టీఆర్‌ఎస్‌ ద్రోహిగా నిలిచి పేదలను మోసం చేసిన వ్యక్తికి ఓట్లు వేయొద్దని ఆమె పేర్కొన్నారు. కాంగ్రెస్‌ నాయకుల మొసలి కన్నీరును నమ్మొద్దన్నారు. వితంతువులకు రూ.5వేల పింఛన్‌ ఇవ్వాలని, యువకులకు ఉద్యోగాలు ఇవ్వాలని, స్వామినాథన్‌ కమిషన్‌ సిఫారసుల అమలు బీఎల్‌ఎఫ్‌తోనే సాధ్యమని అన్నారు. ప్రస్తుతం తెలంగాణలో మార్పు గాలి వీస్తోందన్నారు. వైరా, మధిర సీపీఎం, బీఎల్‌ఎఫ్‌ అభ్యర్థులు భూక్యా వీరభద్రం, కోట రాంబాబుకు ఓటు వేసి గెలిపిస్తే పోడు సాగుదారుల సమస్యలు, మహిళా, కూలీల సమస్యలపై పోరాడుతారన్నారు.  కొణిజర్ల సభకు హాజరైన కార్యకర్తలు  వడ్లమూడి నాగేశ్వరరావు, వాసిరెడ్డి వరప్రసాద్‌ అధ్యక్షతన జరిగిన సమావేశంలో అభ్యర్థులు భూక్యా వీరభద్రం, కోట రాంబాబు, సీపీఎం రాష్ట్ర కార్యదర్శివర్గ సభ్యుడు పోతినేని సుదర్శన్, పార్టీ జిల్లా కార్యదర్శి నున్నా నాగేశ్వరారావు, సీపీఎం రాష్ట్ర నాయకుడు పొన్నం వెంకటేశ్వర్లు, సామాజిక కార్యకర్త దేవి, వ్యవసాయ కార్మిక సం«ఘం రాష్ట్ర అధ్యక్షుడు బుర్రి ప్రసాద్, నాయకులు కల్యాణం వెంకటేశ్వరరావు, బొంతు రాంబాబు, తాళ్లపల్లి కృష్ణ, వైరా, కొణిజర్ల ఎంపీపీలు బొంతు సమత, వడ్లమూడి ఉమారాణి, కొణిజర్ల మండల ఇన్‌చార్జి గట్టు రమాదేవి, కొప్పుల కృష్ణయ్య, బండి పద్మ, ఇరుకు నాగేశ్వరరావు, భట్టు పురుషోత్తం, ప్రభావతి, ఎం.వెంకటేశ్వర్లు, దామోదర్‌ పాల్గొన్నారు. 


 ఏలూరు : ప్రధానమంత్రి నరేంద్ర మోదీ, ఏపీ ముఖ్యమంత్రి చంద్రబాబు నాయుడు పాలనపై సీపీఎం కేంద్ర కమిటీ సభ్యురాలు బృందాకారత్ తీవ్రస్థాయిలో మండిపడ్డారు. సీపీఎం జిల్లా సదస్సులో పాల్గొన్న ఆమె సోమవారమిక్కడ మాట్లాడుతూ కేంద్రం ప్రవేశపెట్టిన భూ సేకరణ చట్టం బ్రిటిష్ కాలం నాటి చట్టం కంటే దారుణంగా ఉందని అన్నారు. బీజేపీతో పొత్తు చారిత్రాత్మక  తప్పిదమన్న చంద్రబాబు ఏ విధంగా పొత్తు పెట్టుకున్నారని బృందాకారత్ ప్రశ్నించారు. చంద్రబాబుది రెండు మాటలు, ద్వంద్వ వైఖరని ఆమె ధ్వజమెత్తారు. ఏపీకి ప్రత్యేక హోదా ఇవ్వకపోవడం బీజేపీ మాట తప్పడమే అన్నారు. రాజధాని పేరుతో రైతుల నుంచి బలవంతంగా భూములు సేకరించటం దారుణమన్నారు.