సాక్షిప్రతినిధి, వరంగల్‌/ యాదాద్రి/ చర్ల/కాప్రా: ఏడేళ్ల క్రితం అదృశ్యమై..మావోయిస్టు పార్టీలో చేరి కీలకంగా ఎదిగిన బంటి (పల్లెపాటి) రాధ అలియాస్‌ నీల్సో శవమై ప్రత్యక్షమైంది. చైతన్య మహిళా సంఘం (సీఎంఎస్‌) సభ్యురాలి నుంచి దండకారణ్యంలో చేరి నాయకత్వ రక్షణదళ కమాండర్‌గా ఎదిగిన ఆమె.. చివరకు దళం సహచరుల చేతిలోనే హత మైంది. విద్యార్థి నుంచి దళనేతగా సాగిన ఏడేళ్ల ప్రస్థానం విషాదాంతంగా ముగిసింది. ఉద్యమంలో కొనసాగుతూనే ఛత్తీస్‌గఢ్, తెలంగాణ పోలీసులకు ‘కోవర్టు’గా మారిందన్న సమాచారం మేరకు మావోయిస్టు పార్టీ నాయకత్వం.. ప్రజాకోర్టు నిర్వహించి రాధ అలియాస్‌ నీల్సోను చర్ల సమీపంలో హతమార్చి ఏవోబీ కార్యదర్శి గణేష్‌ పేరిట బుధవారం వీడియో, ప్రకటన విడుదల చేసింది. రాధ కేసు..రంగంలోకి దిగిన ఎన్‌ఐఏ బంటి బాలయ్య– పోచమ్మ (బాలమ్మ)ల స్వస్థలం యాదాద్రి భువనగిరి జిల్లా తుర్కపల్లి మండలం వెంకటాపురం. ఉపాధి కోసం హైదరాబాద్‌కు వచ్చారు. మేడ్చల్‌ పరిధిలోని కాప్రాలో నివాసం ఉంటున్నారు. వారికి కుమారుడు సూర్యం, కూతురు రాధలు ఉండగా.. బంటి రాధ అలియాస్‌ నీల్సో 2017లో ఇంటర్‌ తర్వాత మెడికల్‌ ల్యాబ్‌ టెక్నీషియన్‌ కోర్సు చేస్తూ అదృశ్యమైంది. రాజాపేటకు చెందిన జిట్టా సుదర్శన్‌రెడ్డి పీపుల్‌వార్‌ నల్లగొండ జిల్లా కార్యదర్శిగా పనిచేసే సమయంలో రాధ విప్లవ గీతాలు ఆకర్షితురాలయ్యారు. అప్పట్లో ఆమె అదృశ్యం సంచలనంగా మారగా.. మొదట హైదరాబాద్‌లో ఫిర్యాదు చేసిన తల్లిదండ్రులు 2022, జనవరి 2న విశాఖపట్నం జిల్లా పెద్దబయలు పోలీస్‌స్టేషన్‌లో ఫిర్యాదు చేశారు. ఈ కేసును అక్కడి పోలీసులు ఎటూ తేల్చలేదు. కేంద్రహోంశాఖ ఆదేశాల మేరకు జాతీయ దర్యాప్తు సంస్థ (ఎన్‌ఐఏ) ఈ కేసును రీ ఓపెన్‌ చేసింది. మావోయిస్టులు ఆమెను బలవంతంగా పార్టీలో చేర్చుకున్నారన్న అభియోగంపై మావోయిస్టు పార్టీ అగ్రనేతలు గాజర్ల రవి అలియాస్‌ ఉదయ్, కాకరాల మాధవి అలియాస్‌ అరుణలతో పాటు పలువురిపై కేసు నమోదు చేసి దర్యాప్తు ముమ్మరం చేశారు. ఇదే క్రమంలో 2022, జూన్‌ 23 హైదరాబాద్‌లోని చిలకానగర్, ఫిర్జాదిగూడ, మెదక్‌ జిల్లా చేగుంట, వరంగల్‌ నగరంలలో ఎన్‌ఐఏ చైతన్య మహిళా సంఘం (సీఎంఎస్‌)తో సంబంధం ఉన్న పలువురి ఇళ్లల్లో సోదాలు నిర్వహించింది. ఈ సందర్భంగా హైదరాబాద్‌లో హైకోర్టు న్యాయవాదులు డొంగరి దేవేంద్ర, చుక్కా శిల్పా, దుబాసి స్వప్నలను అరెస్టు చేసి ఎన్‌ఐఏ రాధ ఆచూకీ కోసం విచారించింది. వరంగల్‌ నగరంలోని హంటర్‌రోడ్డు, ప్రకాశ్‌రెడ్డి పేటలలోనూ సోదాలు నిర్వహించింది. నేడు కాప్రాలో అంత్యక్రియలుపోలీసులు రాధ మృతదేహానికి భద్రాచలం ప్రభుత్వ వైద్యశాలలో శవ పంచనామా చేయించాక, కుటుంబ సభ్యులకు అప్పగించారు. కాగా, రాధ మెడకు ప్లాస్టిక్‌ తాడు కట్టి చెట్టుకు లాగడం ద్వారా ప్రాణం తీసినట్టు తెలుస్తోంది. గురువారం రాధ అంత్యక్రియలు కాప్రాలో నిర్వహించనున్నట్టు బంధువులు తెలిపారు. హేయమైన చర్య : ఎస్పీ రోహిత్‌ రాజుమావోయిస్టు పార్టీ నాయకుల వేధింపులు తట్టుకోలేక పార్టీని వీడి జనజీవన స్రవంతిలో కలవాలనుకున్న దళిత యువతి రాధ అలియాస్‌ నీల్సోను అతి కిరాతకంగా చంపడం హేయమైన చర్య అని భద్రాద్రి కొత్తగూడెం ఎస్పీ రోహిత్‌రాజు అన్నారు. సామాజిక న్యాయమంటూ మాటలు చెప్పే మావోయిస్టులు ఇతరులను వదిలేసి కేవలం దళితురాలైన రాధను ఎందుకు చంపారో సమాధానం చెప్పాలన్నారు. కీలకంగా ఎదిగి...సహచరుల చేతిలో హతమైఓ వైపు పోలీసులు, మరోవైపు ఎన్‌ఐఏ బంటి రాధ కోసం ఆరా తీస్తుండగా.. ఆమె మావోయిస్టు ఉద్యమంలో కీలకంగా ఎదిగింది. విశాఖపట్నం వెళ్లి 2017 డిసెంబర్‌లో అదృశ్యమైన ఆమె.. ఆంధ్ర –ఒడిశా బార్డర్‌ (ఏవోబీ) మావోయిస్టు కమిటీకి కీలకంగా మారింది. ఏడాదిలోనే పార్టీ నాయకత్వ కమిటీకి రక్షణ దళ కమాండర్‌గా ఎదిగింది. ఏవోబీ స్పెషల్‌ జోన్‌ కమిటీ అగ్రనేత అక్కిరాజు హరగోపాల్‌ అలియాస్‌ రామకృష్ణ (కోవిడ్‌ సమయంలో చనిపోయారు)తో పాటు పలువురు నేతలకు రక్షణ కల్పించే ఫ్లటూన్‌కు కీలకమైంది. సుమారు ఏడేళ్లపాటు బంటి రాధ అలియాస్‌ నీల్సో ప్రస్థానం మావోయిస్టు పార్టీలో కొనసాగింది. మూడు నెలల కిందటే అనుమానం వచ్చిన మావోయిస్టు పార్టీ నాయకత్వం ఆమెను ‘కోవర్టు’గా భావించి కీలక బాధ్యతల నుంచి తప్పించి నిఘా పెట్టింది. తన సోదరుడు సూర్యం ద్వారా పోలీసులకు సహకరిస్తుందని భావించిన పార్టీ నాయకత్వం, సెంట్రల్‌ కమిటీ ప్రొటెక్షన్‌ ఆర్మీ కమాండర్‌గా పనిచేసిన రాధ అలియాస్‌ నీల్సోను అంతమొందించినట్టు ప్రకటించింది. భద్రాద్రి కొత్తగూడెం జిల్లా చర్ల మండలం చెన్నాపురం సమీపంలో నీల్సోను చంపి ఈ హత్య తామే చేసినట్లు మావోయిస్టు పార్టీ ఏవోబీ స్పెషల్‌ జోనల్‌ కమిటీ కార్యదర్శి గణేశ్‌ పేరిట లేఖ విడుదల చేసింది. దీంతో రాష్ట్రంలోని పోలీసులు మళ్లీ అలర్ట్‌ అయ్యారు.

న్యూఢిల్లీ: భారత్‌లో లోక్‌సభ ఎన్నికల చివరి దశ ముందు ఓపెన్‌ ఏఐ సంచలనాత్మక విషయాన్ని బయటపెట్టింది. ప్రజల అభిప్రాయాలను కృత్రిమ మేధ (ఏఐ) సాంకేతికతతో కృత్రిమంగా ప్రభావితం చేసేందుకు ఇజ్రాయెల్‌ కేంద్రంగా జరిగిన కోవర్ట్‌ ఆపరేషన్‌ను అడ్డుకున్నట్టు చాట్‌ జీపీటీ సృష్టికర్త ఓపెన్‌ ఏఐ ప్రకటించింది. అధికార బీజేపీని విమర్శిస్తూ, ప్రతిపక్ష కాంగ్రెస్‌ను ప్రశంసిస్తూ ‘ఎస్‌టీవోఐసీ’ అనే రాజకీయ ప్రచార నిర్వహణ సంస్థ భారత ఎన్నికలపై కంటెంట్‌ను రూపొందించినట్టు తెలిపింది. ‘‘భారత్‌ను లక్ష్యంగా చేసుకుని అధికార బీజేపీని విమర్శిస్తూ, కాంగ్రెస్‌ను పొగుడుతూ అభిప్రాయాలను ఎస్‌టీవోఐసీ మే నెలలో వ్యాప్తిలోకి తెచి్చంది. 24 గంటల్లోనే దీన్ని అడ్డుకున్నాం’’అని ఓపెన్‌ఏఐ వెల్లడించింది. ఎక్స్, ఫేస్‌బుక్, ఇన్‌స్ట్రాగామ్‌ ప్లాట్‌ఫామ్‌లు, వెబ్‌సైట్లు, యూట్యూబ్‌ వేదికలపై ఓ సమూహంతో కూడిన అకౌంట్ల ద్వారా కంటెంట్‌ ఎడిట్, ప్రసారం చేసినట్టు, అలాంటి ఖాతాలను నిషేధించినట్టు ఓపెన్‌ ఏఐ ఓ నివేదిక రూపంలో బయటపెట్టింది. తమ ఏఐ టూల్స్‌ సాయంతో కథనాలు, అభిప్రాయాలను రూపొందించి వాటిని ఇన్‌స్ట్రాగామ్, ఫేస్‌బుక్, ఎక్స్‌ తదితర సామాజిక మాధ్యమాలు, వెబ్‌సైట్లలో పోస్ట్‌ చేసినట్టు పేర్కొంది. ఈ ఆపరేషన్‌కు ‘జీరో జెనో’ అని పేరు పెట్టింది. ఏఐని సురక్షిత అవసరాలకే వినియోగించాలన్న లక్ష్యంలో భాగంగానే ఈ ఆపరేషన్‌ను విచి్ఛన్నం చేసినట్టు తెలిపింది.

సాక్షి, హైదరాబాద్‌: ఎన్నికలు ఏవైనా.. రాజకీయ పార్టీలు, అభ్యర్థుల ఎత్తులు.. దానికి ప్రత్యర్థుల పైఎత్తులు మామూలే. లోక్‌సభ ఎన్నికల నేపథ్యంలో.. రాష్ట్రవ్యాప్తంగా వివిధ పార్టీల అభ్యర్థులు ఈ ఎత్తులు, పైఎత్తుల విషయంలో తిప్పలు పడుతున్నారు. ఓ వైపు తమ ప్రచారం కొనసాగిస్తూనే.. ప్రత్యర్థుల వ్యూహాలేమిటో తెలుసుకునేందుకు నిఘా పెడుతున్నారు. ఇందులో భాగంగా కొందరు ఏకంగా ‘కోవర్ట్‌ ఆపరేషన్లు’ కూడా చేయిస్తున్నట్టు రాజకీయవర్గాలు చెప్తున్నాయి.  ఎత్తులు తెలిస్తేనే పైఎత్తులు.. అసెంబ్లీ ఎన్నికలు జరిగాక ఆరు నెలల్లోపే లోక్‌సభ ఎన్నికలు రావడం ప్రతిష్టాత్మకంగా మారింది. ప్రతి అభ్యర్థి కూడా.. ఎదుటి పార్టీలో, పోటీలో ఉన్న అభ్యర్థులు ఏం చేస్తున్నారనేది తెలుసుకోవడంపై దృష్టిపెట్టారు. వారు ఎవరిని ఎలా కలుస్తున్నారు? ఏ హామీలిస్తున్నారు? ప్రలోభాల ఘట్టం ప్రారంభించారా? డంప్‌లు ఎక్కడ ఏర్పాటు చేశారు? వంటి అంశాలు తెలుసుకుని తిప్పికొట్టాలని.. ఓటర్లు వారి వైపు ఆకర్షితులు కాకుండా చర్యలు తీసుకోవాలని భావిస్తున్నారు. ఈ క్రమంలో అన్ని అవకాశాలను తమకు అనుకూలంగా మలుచుకునేందుకు ప్రయత్నిస్తున్నారు.  అనుచరులకు ‘ప్రత్యేక’బాధ్యతలు  ప్రత్యర్థులపై నిఘాకు, వ్యూహాలు తెలుసుకునేందుకు అభ్యర్థులు కొందరు నమ్మకస్తులైన అనుచరులను ప్రత్యేకంగా రంగంలోకి దింపుతున్నారు. వారు తమ అభ్యర్థి తరఫున పనిచేసినా, చేయకున్నా.. ఎదుటి అభ్యర్థి ఏం చేస్తున్నారనేది తెలుసుకోవడమే పని. వారు మరికొందరిని సమీకరించుకుని ‘షాడో టీమ్స్‌’మాదిరిగా పనిచేస్తూ.. ప్రత్యర్థులు ఏం చేస్తున్నారు, వారి వ్యూహాలేమిటన్నది తెలుసుకుని.. అభ్యర్థులకు సమాచారమిస్తున్నారు. కొందరు అభ్యర్థులైతే మరో అడుగు ముందుకేసి ప్రైవేట్‌ డిటెక్టివ్‌ ఏజెన్సీలనూ ఆశ్రయిస్తున్నట్టు రాజకీయ వర్గాలు చెప్తున్నాయి. ఇందుకోసం అభ్యర్థులు భారీగానే ఖర్చుపెడుతున్నారట. డంప్‌ల డేటా ‘లీక్‌’చేసేందుకు..  ప్రతి అభ్యర్థి తన ప్రత్యర్థులను వీలైనన్ని ఎక్కువ కోణాల్లో దెబ్బతీయడానికి ప్రయత్నిస్తున్నారు. కేవలం ప్రచార వ్యూహాలు మాత్రమేకాదు.. వారి ప్రలోభాల ‘డంప్స్‌’ల సమాచారం సేకరించడంపై దృష్టి పెడుతున్నారు. మద్యం, నగదును ఎక్కడ దాచి ఉంచుతున్నారు? ఆ కోణంలో వీరికి సహకరిస్తున్నది ఎవరు? అనే అంశాలను తెలుసుకునే యత్నం చేస్తున్నారు. పోలీసులకు, ఎన్నికల సంఘానికి వాటి సమాచారం ఇప్పించడం ద్వారా ప్రత్యర్థులను దెబ్బతీయాలన్నది వారి వ్యూహంగా కనిపిస్తోంది. మొత్తమ్మీద లోక్‌సభ ఎన్నికల ‘సిత్రాలు’ఎన్నో..   కోవర్టు  ఆపరేషన్లకూ ప్లాన్‌! అభ్యర్థులు తాము ఎవరితో నిఘా పెట్టినదీ ప్రత్యర్థి పార్టీవారు గుర్తించకుండా ఉండాలి, లేకుంటే బెడిసికొట్టే అవకాశాలు ఎక్కువు. పూర్తిగా కొత్తవారిని రంగంలోకి దింపితే వారికి స్థానిక రాజకీయ, సామాజిక, ఆర్థిక పరిస్థితులపై అవగాహన ఉండే అవకాశం తక్కువ. దీంతో కొందరు అభ్యర్థులు.. కోవర్ట్‌ ఆపరేషన్లు ప్రారంభించారని రాజకీయ వర్గాలు చెప్తున్నాయి. ప్రత్యర్థుల వెంట ఉండేవారికి ఎర వేసి, వారి నుంచే సమాచార సేకరణ చేస్తున్నట్టు చెప్తున్నాయి. ఇలా కోవర్ట్‌ ఆపరేషన్లకు సహకరించే వారికి భారీగానే నజరానాలు ఇస్తున్నట్టు వివరిస్తున్నాయి. 

న్యూఢిల్లీ: అదానీ గ్రూప్‌ ప్రమోటర్లపై ఆరోపణలు గుప్పించిన ఓసీసీఆర్‌పీ తాజాగా పారిశ్రామిక దిగ్గజం అనిల్‌ అగర్వాల్‌కి చెందిన కంపెనీలు వేదాంత, కెయిర్న్‌ ఇండియాను టార్గెట్‌ చేసింది. పర్యావరణ చట్టాలను అనుకూలంగా మార్చుకునేందుకు వేదాంత కోవర్టు లాబీయింగ్‌ నడిపినట్లు కొత్తగా మరో నివేదికలో ఆరోపించింది. ప్రభుత్వం కూడా ప్రజలను సంప్రదించకుండా నిబంధనల మార్పులను ఆమోదించి,  ‘అక్రమ పద్ధతుల్లో’ అమలు చేసినట్లు పేర్కొంది. ఆర్గనైజ్డ్‌ క్రైమ్‌ అండ్‌ కరప్షన్‌ రిపోరి్టంగ్‌ ప్రాజెక్టు (ఓసీసీఆర్‌పీ) విడుదల చేసిన నివేదికలోని కొన్ని ప్రధానాంశాలు.. ► కొత్తగా పర్యావరణ అనుమతుల అవసరం లేకుండా దేశీయంగా ఉత్పత్తిని 50% వరకు పెంచుకునేందుకు మైనింగ్‌ కంపెనీలకు అనుమతినిస్తే ఆర్థిక వ్యవస్థ రికవరీ మరింత వేగవంతం కాగలదని 2021 జనవరిలో వేదాంత గ్రూప్‌  చైర్మన్‌ అనిల్‌ అగర్వాల్‌ అప్పటి పర్యావరణ శాఖ మంత్రి ప్రకాష్‌ జవదేకర్‌కు లేఖ రాశారు. ► ‘‘2022 తొలినాళ్లలో పలు దఫాల సమావేశాల అనంతరం పర్యావరణ శాఖ నిబంధనలను సడలించింది. ప్రజాభిప్రాయాల సేకరణ నిర్వహించాల్సిన అవసరం లేకుండా మైనింగ్‌ కంపెనీలు 50 శాతం వరకు ఉత్పత్తిని పెంచుకునేందుకు అనుమతించింది’’ అని ఓసీసీఆర్‌పీ తెలిపింది.   ► వేదాంత తరహాలోనే దాని అనుబంధ సంస్థ కెయిర్న్‌ ఆయిల్‌ అండ్‌ గ్యాస్‌ కూడా వ్యవహరించింది. చమురు అన్వేషణ ప్రాజెక్టుల కోసం ప్రజాభిప్రాయ సేకరణ నిబంధనను ఎత్తివేసేందుకు లాబీయింగ్‌ చేసింది. ► అధికార బీజేపీకి వేదాంత గణనీయంగా విరాళాలు కూడా ఇచి్చనట్లు (2016–2020 మధ్య కాలంలో రూ.43.5 కోటు)్ల ఆధారాలు ఉన్నాయని ఓసీసీఆర్‌పీ తెలిపింది.   వేదాంత స్పందన ఇదీ.. ఓసీసీఆర్‌పీ ఆరోపణలను నిర్దుష్టంగా ఖండించకుండా వేదాంత స్పందించింది. ‘దిగుమతులకు ప్రత్యామ్నాయంగా పర్యావరణానికి అనుకూలమైన విధానాల్లో దేశీయంగా ఉత్పత్తిని పెంచాలనేది మా లక్ష్యం. దానికి అనుగుణంగా దేశాభివృద్ధిని దృష్టిలో ఉంచుకుని, సహజ వనరుల విషయంలో భారత్‌ స్వావలంబన సాధించడంలో తోడ్పాటు అందించే ఉద్దేశంతో ప్రభుత్వ పరిశీలన కోసం పలు విజ్ఞప్తులు చేశాము‘ అని సంస్థ అధికార ప్రతినిధి తెలిపారు. 

సాక్షి, హైదరాబాద్‌: అన్ని రాజకీయ పార్టీల్లో సీఎం కేసీఆర్‌ కోవర్టులు, ఇన్‌ఫార్మర్లు ఉన్నారన్న బీజేపీ జాతీయ కార్యవర్గ సభ్యుడు ఈటల రాజేందర్‌ వ్యాఖ్యలు కాషాయదళంలో తీవ్ర కలకలానికి దారితీశాయి. బీజేపీలో నిజంగానే కేసీఆర్‌ ఇన్‌ఫార్మర్లు ఉన్నారా? ఉంటే అలాంటి నాయకులెవరు? కేసీఆర్‌కు, బీఆర్‌ఎస్‌కు పరోక్షంగా సహకరిస్తున్నది ఎవరు? అసలు ఈటల ఉద్ధేశం ఏమిటన్న అంతర్గత చర్చకు కారణమయ్యాయి. ఈ సందేహాలను బలపర్చేలా ఇటీవల ఇతర పార్టీల నుంచి బీజేపీలోకి వెళ్తున్నారంటూ కొందరు నేతల పేర్లు ప్రాథమిక చర్చల సమయంలోనే లీకవడంపై రచ్చ జరుగుతోంది. ఈ క్రమంలోనే కోవర్టులను గుర్తించి, కట్టడి చేయడంపై బీజేపీ ముఖ్యులు దృష్టిపెట్టినట్టు తెలుస్తోంది.  చేరికలకు ఇబ్బందిగా లీకులు  రాష్ట్ర కాంగ్రెస్‌లో కేసీఆర్‌ కోవర్టులు ఉన్నారంటూ కొందరు నేతలు చేసిన బహిరంగ వ్యాఖ్యలు ఇటీవల ఆ పారీ్టలో రచ్చకు కారణమయ్యాయి. పార్టీ వర్గాలు చీలి పోయి, ఆరోపణలు ప్రత్యారోపణల దాకా పరిస్థితి వెళ్లింది. ఇదే సమయంలో బీజేపీ సహా అన్ని పార్టీల్లో కేసీఆర్‌ కోవర్టులు ఉన్నారంటూ ఈటల రాజేందర్‌ పేర్కొనడం చర్చనీయాంశంగా మారింది. అసలు ఈటల ఇలాంటి వ్యాఖ్యలు ఎందుకు చేయాల్సి వచి్చందనే దాని నుంచి.. బీజేపీలో ఎవరు కోవర్టులనే దాకా ఆ పార్టీ నాయకుల్లో సందేహాలు వ్యక్తమవుతున్నాయి. దీంతోపాటు ఇటీవల మీడియా ప్రతినిధులతో భేటీ సందర్భంగా ఆఫ్‌ ది రికార్డ్‌గా ఈటల చేసిన వ్యాఖ్యలపైనా చర్చజరుగుతోంది. పార్టీ జాతీయ కార్యవర్గ సభ్యుడిగా, రాష్ట్ర పార్టీ చేరికల కమిటీ కనీ్వనర్‌గానూ ఈటల వ్యవహరిస్తున్నారు. అలాంటిది తానే స్వయంగా కోవర్టుల ఆరోపణలు చేయడం, బీజేపీలో చేరబోయే ఇతర పారీ్టల నేతల పేర్లు ముందుగానే లీక్‌ కావడంతో వారు వెనుకడుగు వేస్తున్నారని వ్యాఖ్యానించడం రాజకీయ ప్రాధాన్యత సంతరించుకుంది. నిజానికి ఏ రాజకీయ పారీ్టలోనూ చేరికల కోసం ప్రత్యేకంగా కమిటీ లేదని.. బీజేపీలో కమిటీ ఏర్పాటు చేసినా చేరబోయే నేతల పేర్లు ప్రాథమిక దశలోనే ఎలా లీక్‌ అవుతున్నాయని పార్టీ నేతలు అనుమానాలు వ్యక్తం చేస్తున్నారు.  కోవర్టుల కట్టడి ఎలా?  ఒకవేళ బీజేపీలో కేసీఆర్‌ కోవర్టులు, ఇన్‌ఫార్మర్లు ఉంటే వారు ఏ స్థాయిలో ఉన్నారు? వారిని ఎలా గుర్తించాలనే చర్చ కూడా సాగుతోంది. అలాంటి వారిని ఆధారాలతో గుర్తించడంతోపాటు కట్టడి చేయడం, అవసరమైతే పక్కనపెట్టడం ఎలాగన్న ఆలోచనలో పార్టీ ముఖ్య నేతలు ఉన్నారు. అయితే ఈ కోవర్టులు/ఇన్‌ఫార్మర్ల అంశం మునుగోడు ఉప ఎన్నిక సమయంలోనే తెరపైకి వచి్చంది. ఉప ఎన్నికను జాతీయ, రాష్ట్ర నాయకత్వాలు ప్రతిష్టాత్మకంగా తీసుకుని, పకడ్బందీ వ్యూహాలతో ముందుకెళ్లాయి. అధికార పార్టీ అభ్యర్థిని కోమటిరెడ్డి రాజగోపాల్‌రెడ్డి ఓడిస్తే.. వచ్చే అసెంబ్లీ, లోక్‌సభ ఎన్నికల్లో బీజేపీకి మరింత సానుకూలత వస్తుందని, బీఆర్‌ఎస్‌కు బీజేపీనే ప్రత్యామ్నాయమనే సంకేతాలు ప్రజల్లోకి వెళ్తాయని ఆశించాయి. ఇక ఈ ఉప ఎన్నికలో బీజేపీ సర్వశక్తులూ ఒడ్డినా.. రాజగోపాల్‌రెడ్డి ఓటమి చెందడానికి కేసీఆర్‌ కోవర్టులే కారణమనే ఆరోపణలు వచ్చాయి. మునుగోడు పోలింగ్‌కు కేవలం కొన్నిరోజుల ముందు.. కొందరు నేతలు తిరిగి కేసీఆర్, కేటీఆర్‌ల సమక్షంలో బీఆర్‌ఎస్‌లో చేరడం ఆ ఆరోపణలకు బలం చేకూర్చింది. మునుగోడులో బీజేపీ వ్యూహాలు, ఎత్తుగడలను కోవర్టుల ద్వారా తెలుసుకోవడం వల్ల పారీ్టకి నష్టం జరిగిందన్న చర్చ జరిగింది.     ఇంకా అభ్యర్థుల కోసమే..!  బీజేపీ ప్రతిష్టాత్మకంగా తీసుకున్న తెలంగాణ అసెంబ్లీ ఎన్నికలకు ఇంకా 10 నెలలు కూడా లేదు. అయినా బీజేపీకి మెజారిటీ సీట్లలో బలమైన అభ్యర్థుల కోసం వెతుకులాట తప్పడం లేదని రాజకీయ వర్గాలు చెప్తున్నాయి. ఇప్పటివరకు వేసుకున్న అంచనాల ప్రకారం.. 30 చోట్ల మాత్రమే బలమైన అభ్యర్థులు, మరికొన్నిచోట్ల ఫర్వాలేదనే స్థాయిలో అభ్యర్థులు ఉన్నారని.. చాలాచోట్ల గట్టి అభ్యర్థులను వెతకాల్సిన పరిస్థితి ఉందని అంటున్నాయి. బీజేపీలో టికెట్‌ కేటాయింపుపై భరోసా, ఇతర అంశాలపై స్పష్టత రానందునే.. నేతల చేరికలు ముందుకు పడటం లేదని పేర్కొంటున్నాయి.   ఈటల ఉద్దేశమేమిటి?  ‘ఆశించిన మేర బీఆర్‌ఎస్, కాంగ్రెస్‌ల నుంచి ముఖ్య నేతలు ఇంకా బీజేపీలో చేరకపోవడానికి కోవర్టు రాజకీయాలే ప్రధాన కారణమనే అభిప్రాయంతో ఈటల ఉన్నారా? లేక బీజేపీలో కుదురుకునే విషయంలో ఈటల ఇంకా ఏమైనా ఇబ్బందులు పడుతున్నారా? అందుకే ఇలాంటి వ్యాఖ్యలు చేశారా? ఎవరిని ఉద్దేశించి ఈ వ్యాఖ్యలు చేసి ఉంటారు?’ అనే చర్చ బీజేపీలో నడుస్తోంది. గతంలో బీఆర్‌ఎస్‌లో నంబర్‌–2గా ఉంటూ కేసీఆర్‌ పన్నే రాజకీయ వ్యూహాలు, ఆయా సందర్భాల్లో వ్యవహరించే తీరు తెలిసిన వ్యక్తిగా ఈటలకు బీజేపీ జాతీయ నాయకత్వం తగిన ప్రాధాన్యతే ఇస్తోందని పారీ్టవర్గాలు చెప్తున్నాయి. మరి ఆయన రాష్ట్రపారీ్టలో ఇంకా పూర్తిగా ఇమడలేకపోతున్నారా? తగిన గౌరవం, ప్రాధాన్యత లభించలేదనే అసంతృప్తితో ఉన్నారా? అన్న చర్చ కూడా సాగుతోంది.

అడవుల జిల్లా ఆదిలాబాద్‌లో కమలం పార్టీని కోవర్టుల భయం వెంటాడుతోందా? ప్రత్యర్థి పార్టీలతో కుమ్మకై పార్టీలోని బలమైన నేతల్ని దెబ్బతీయడానికి కుట్రలు చేస్తున్నారా? కాషాయ సేనలో కోవర్టులను చేరదీస్తున్నదెవరు? ఉమ్మడి ఆదిలాబాద్ జిల్లా బీజేపీలో అసలేం జరుగుతోంది?  బండి నడిపించాం, టికెట్ ఇవ్వండి.. బీజేపీ రాష్ట్ర అధ్యక్షుడు బండి సంజయ్ నిర్మల్ జిల్లాలో జరిపిన ప్రజా సంగ్రామ యాత్ర పార్టీ శ్రేణుల్లో ఉత్సాహాన్ని నింపింది. వారిలో బలాన్ని పెంచింది. జిల్లా అంతటా నిర్వహించిన సభలు, సమావేశాలతో  కేడర్‌కు ఊపునిచ్చింది. భారీగా తరలివచ్చిన ప్రజలు కమలం పార్టీ పట్ల వారికున్న అభిమానాన్ని చాటుకున్నారు. దీంతో పార్టీ టిక్కెట్ వస్తే చాలు.. విజయం సాధించడం ఖాయమనే నమ్మకం నాయకుల్లో  కలిగించింది. దీంతో అనేక మంది నాయకులు ఎన్నికల్లో టిక్కెట్ల కోసం పోటీ పడుతున్నారు. ద్వితీయ శ్రేణి నేతలు సైతం తమకు కూడా టిక్కెట్ ఇస్తే గెలిచి చూపిస్తామంటూ రాష్ట్ర నేతల దగ్గర పైరవీలు చేస్తున్నారని టాక్. టిక్కెట్ల కోసం పెరుగుతున్న పోటీ.. పార్టీని డ్యామేజ్ చేయాలనుకునేవారికి అవకాశం కలిగిస్తోందనే ప్రచారం సాగుతోంది. ఈ వ్యవహారం పార్టీ కోసం కష్టపడుతూ.. కచ్చితంగా టిక్కెట్ పొందడానికి అర్హత ఉన్న నేతల్లో ఆందోళన పెంచుతోంది.  టికెట్ మాత్రం నాకే.. ముథోల్ నియోజకవర్గంలో బండి సంజయ్ పాదయాత్రకు ముగ్గురు నేతలు ఒకరిని మించి మరొకరు జనసమీకరణ చేశారు. అదేవిధంగా టిక్కెట్ తనకే  దక్కుతుందని ముగ్గురూ ప్రచారం చేసుకుంటున్నారట. నేతలంతా వర్గాలుగా విడిపోయి నియోజకవర్గంలో పట్టు బిగిస్తూ.. తమ వ్యతిరేకుల్ని చిత్తు చేయడానికి ప్రయత్నిస్తున్నారని నియోజకవర్గంలో కేడర్ ఆవేదన వ్యక్తం చేస్తున్నారు. ఖానాపూర్ నియోజకవర్గంలో మాజీ ఎంపీ రమేష్  రాథోడ్‌తో పాటు మరో ముగ్గురు పోటీ పడుతున్నారు. నలుగురూ నాలుగు వర్గాలుగా చీలిపోయారు. ఎంపీగా, ఎమ్మెల్యేగా పనిచేసి అనుభవం ఉన్న రమేష్ రాథోడ్ బలమైన అభ్యర్థిగా పార్టీ నిర్వహించిన సర్వేలో తేలిందట. అయితే రమేష్ రాథోడ్‌కు టిక్కెట్ ఇస్తే మిగిలిన వారు పనిచేయరనే టాక్ వినిపిస్తోంది. ఆయనకు టిక్కెట్ ఇస్తే ఓడించేందుకు ఇప్పటినుంచే పావులు కదుపుతున్నారట. ఈ విషయమై రమేష్ రాథోడ్ తన సన్నిహితుల దగ్గర ఆవేదన వ్యక్తం చేస్తున్నట్లు సమాచారం. మా వాడికి టికెట్ ఇవ్వాల్సిందే.. బోధ్ నియోజకవర్గానికి చెందిన ఆదిలాబాద్ ఎంపీ సోయం బాపురావు.. తన నియోజకవర్గంలో ఇటీవలే పదవీ విరమణ చేసిన ప్రభుత్వ ఉద్యోగి దశరథ్‌కు మద్దతిస్తున్నట్లు సమాచారం. దశరథ్‌ కూడా టిక్కెట్ కోసం తీవ్రంగా ప్రయత్నిస్తున్నారట. ఇక జిల్లా కేంద్రం ఆదిలాబాద్ అసెంబ్లీ సెగ్మెంట్‌లో పోటీకి జిల్లా అధ్యక్షుడు పాయల్ శంకర్ సీరియస్‌గా ప్రయత్నిస్తున్నారు. ఆయన గతంలో రెండుసార్లు పోటీ చేసి ఓడిపోయారు. అయితే జిల్లా పరిషత్ చైర్మన్ సుహసినిరెడ్డి, ఎన్అర్ఐ కంది శ్రీనివాస్ తామే అభ్యర్థులమంటూ ప్రచారం చేసుకుంటున్నారు. ఇదిలా ఉంటే పార్టీ నాయకత్వం ఏ పిలుపునిచ్చినా కలిసి పనిచేయలేని పరిస్థితులు జిల్లా కమలం పార్టీ నాయకుల మధ్య ఉన్నట్లు చెబుతున్నారు. కొందరు నేతల మధ్య పచ్చగడ్డి వేస్తే భగ్గుమనే స్థాయికి విభేదాలు చేరాయట. ఇటీవల బండి సంజయ్ సమక్షంలోనే ఒకరిపై ఒకరు ఫిర్యాదులు చేసుకున్నట్లు తెలుస్తోంది. ఇంత మంది పోటీ పడుతున్న ఈ పరిస్థితుల్లో ఒకరికి టిక్కెట్ ఇస్తే మిగిలినవారు పనిచేయరనే టాక్ వినిపిస్తోంది.  ఒకరికి టికెట్ ఇస్తే.. ఇంకొకరు ఓడిస్తారు ఇక పూర్తిగా ఆదివాసీల కోట ఆసిఫాబాద్ నియోజకవర్గంలో.. ఆదివాసీ, లంబాడ వర్గాల నేతలు టిక్కెట్ కోసం పోటీపడుతున్నారు. ఇక్కడ ఆదివాసీలే గెలుపోటములు నిర్ణయిస్తారు. ఆదివాసీ నేత విజయ్‌కుమార్.. లంబాడా వర్గం నేత ఆత్మారామ్ నాయక్ టిక్కెట్ కోసం పోటీ పడుతున్నారు. ఆత్మారామ్ గత ఎన్నికల్లో పోటీ చేసి డిపాజిట్లు కూడా దక్కించుకోలేకపోయారు. అయినా ఈసారి కూడా తనకే టిక్కెట్ ఇస్తారంటూ ఆయన ధీమాగా ఉన్నారు. ఇక సిర్పూర్ కాగజ్ నగర్లో పోటీ పడుతున్న ఇద్దరు నేతల మధ్య సర్దుబాటు చేసినా.. కుదరడంలేదట. ఈ విధంగా ప్రతీ నియోజకవర్గంలోనూ పార్టీలో బహుముఖ పోటీలు రాష్ట్ర నాయకత్వాన్ని చికాకు పెడుతున్నట్లు సమాచారం. ఒకరికి టిక్కెట్ ఇస్తే.. టిక్కెట్ రానివారు కచ్చితంగా కోవర్ట్ ఆపరేషన్ చేసి.. తమ పార్టీ అభ్యర్థినే ఓడించేందుకు ప్రయత్నిస్తారని కమలం నాయకులు ఆందోళన చెందుతున్నారు. ఉమ్మడి ఆదిలాబాద్ జిల్లాను వేధిస్తున్న ఈ సమస్యను కాషాయ పార్టీ నాయకత్వం ఎలా పరిష్కరిస్తుందో చూడాలి. పొలిటికల్ ఎడిటర్, సాక్షి డిజిటల్ feedback@sakshi.com


 సాక్షి, హైదరాబాద్: తనను కోవర్టుగా పార్టీ నాయకులే కొందరు అభివర్ణిస్తున్నారని ప్రతిపక్ష నేత కె.జానారెడ్డి ఆవేదన వ్యక్తం చేశారు. సోమవారం టీపీసీసీ అధ్యక్షుడు ఎన్.ఉత్తమ్‌కుమార్ రెడ్డి అధ్యక్షతన పార్టీ ముఖ్యనేతలు కె.జానారెడ్డి, మల్లు భట్టివిక్రమార్క, షబ్బీర్ అలీ, పొన్నాల లక్ష్మయ్య, వి.హనుమంతరావు, పొంగులేటి సుధాకర్ రెడ్డి, ఎం.కోదండరెడ్డి తదితరులు సమావేశమయ్యారు. రుణ మాఫీపై రైతుల నుంచి దరఖాస్తు చేయించడం, ఫీజు రీయింబర్స్‌మెంట్‌పై విద్యార్థులతో దరఖాస్తు చేయించాలని టీపీసీసీ తీసుకున్న ఉద్యమ కార్యాచరణపై ఈ సమావేశంలో చర్చించారు.
 నెలరోజుల పాటు గ్రామాల్లో రైతుల నుంచి, విద్యార్థుల నుంచి దరఖాస్తులు తీసుకోవాలని, దీనికి ప్రస్తుత జిల్లాల వారీగా బాధ్యులుగా ముఖ్యనేతలు వ్యవహరించాలని నిర్ణయించారు. కాంగ్రెస్ నుంచి టీఆర్‌ఎస్‌లో చేరిన పలువురు కాంగ్రెస్ ఎమ్మెల్యేల గురించి, టీడీపీ నేత రేవంత్ రెడ్డి వ్యాఖ్యలను తిప్పికొట్టడంపై పార్టీ ముఖ్యులు నిర్లక్ష్యంగా ఉంటున్నారని పొంగులేటి సుధాకర్ రెడ్డి అసంతృప్తి వెలిబుచ్చినట్లుగా తెలిసింది. ఇదే సందర్భంలో జానారెడ్డి మాట్లాడుతూ..
 తనపై కొందరు పార్టీ నేతలే అనుచితంగా మాట్లాడుతున్నారని, కోవర్టునంటూ తననుద్దేశించి మాట్లాడుతున్నారని ఆవేదన వ్యక్తం చేసినట్టుగా సమాచారం. కోవర్టంటూ తాను మాట్లాడలేదని వి.హనుమంతరావు సమాధానం ఇవ్వడంతో ఈ చర్చ సద్దుమణిగింది. రేవంత్ విమర్శల గురించి కాంగ్రెస్‌పార్టీ ఎక్కువగా మాట్లాడకపోవడమే మంచిదని ఈ సమావేశంలో అభిప్రాయపడినట్టుగా సమాచారం.


 మావోయిస్టు పార్టీలో పనిచేసి అదే పార్టీకి చెందిన ముఖ్యులను హతమార్చి కోవర్టులుగా మారిన పలువురు మాజీ నక్సలైట్లు మాఫియాగా, సంఘ వ్యతిరేక కార్యకలాపాలకు అడ్డాలుగా మారుతున్నారు. చివరికి పోలీసుల చేతుల్లో హతమవుతున్నారు. గ్రీన్ టైగర్స్, బ్లాక్ టైగర్స్ పేరిట సంఘ వ్యతిరేక కార్యకలాపాలు నడిపినవారు, పోలీసు అధికారుల మెప్పుకోసం మావోయిస్టుల కుటుంబ సభ్యులను సైతం హతమార్చి కలకలం సృష్టించిన వారు ఇలాగే అంతమవుతున్నారు. 
 
 మావోయిస్టు పార్టీలో కీలక బాధ్యతలు నిర్వర్తించి కోవర్టులుగా మారిన శంకర్‌నాయక్, కత్తుల సమ్మయ్య, సోమ్లానాయక్, బయ్యపు సమ్మిరెడ్డి, శివకుమార్.. తాజాగా నయీమ్ మృతి చెందగా.. జడల నాగరాజు, గోవిందరెడ్డి జాడలేకుండా పోయారు. ఇందులో ఎక్కువ మంది కరీంనగర్ జిల్లాకు చెందిన వారే కావడం గమనార్హం.    - పెద్దపల్లి
  
 పోలీసుల చేతిలో హతమవుతున్న మాజీ నక్సలైట్లు
 ♦ మావోయిస్టు పార్టీని దెబ్బతీసి కోవర్టులుగా మారిన వారిలో కత్తుల సమ్మయ్యను మొదటి వ్యక్తిగా చెప్పుకోవచ్చు. కరీంనగర్ జిల్లా కాచాపూర్ గ్రామానికి చెందిన సమ్మయ్య హుస్నాబాద్ దళంలో పనిచేస్తూ 1991లో కోవర్టుగా మారాడు. హిమ్మత్‌నగర్‌లో సేద తీర్చుకుంటున్న భూపతి దళంపై కాల్పులు జరపడంతో కమాండర్ భూపతి సహా మరో ఇద్దరు సభ్యులు చనిపోయారు. అలాగే హైదరాబాద్‌లో డీఐజీ వ్యాస్‌ను హతమార్చిన వారిలో కత్తుల సమ్మయ్య, నయూమ్ ప్రధాన పాత్రధారులు. వీరిద్దరూ పార్టీతో విభేదించి కోవర్టులుగా మారి పౌరహక్కుల సంఘాల నాయకులను హతమార్చారు. రాజధానిలో గ్యాంగ్‌లను నడుపుతూ సెటిల్‌మెంట్లు చేశారు. 1996లో కొలంబోకు వెళ్లిన కత్తుల సమ్మయ్య విమాన ప్రమాదంలో చనిపోయినట్లు పోలీసులు ప్రకటించారు.
 
 ♦ కరీంనగర్ జిల్లా కమాన్‌పూర్ మండలం రాణాపూర్‌కు చెందిన మరో కోవర్టు బయ్యపు సమ్మిరెడ్డి 1999లో పోలీసులకు లొంగిపోయి అప్పటి జిల్లా కార్యదర్శి అనుపురం కొమురయ్య ఎన్‌కౌంటర్‌కు సహకరించాడు. పౌరహక్కుల సంఘం రాష్ట్ర అధ్యక్షుడు పురుషోత్తం, కనకాచారి హత్యల్లో పాల్గొన్నాడు. రాష్ట్రవ్యాప్తంగా పలు సంఘటనల్లో పాల్గొన్న సమ్మిరెడ్డి పేరు చెబితే చాలు.. ఎన్నో కేసులు పరిష్కారమయ్యేవి. కానీ సమ్మిరెడ్డి గుంటూరు జిల్లాలో దారుణహత్యకు గురయ్యాడు. నాలుగు రోజుల తర్వాత కుళ్లిపోయిన శవం దొరికింది. తన కుమారుడిని పోలీసులే చంపారని, పార్టీలో ఉండి చనిపోయినా తమ కుటుంబానికి గౌరవం దక్కేదని సమ్మిరెడ్డి తండ్రి రాఘవరెడ్డి చేసిన ప్రకటన సంచలనం రేపింది.
 
 ♦ కరీంనగర్ జిల్లా కాల్వ శ్రీరాంపూర్ మండలం కూనారం గ్రామానికి చెందిన శివకుమార్ ఆదిలాబాద్ జిల్లా మంచిర్యాల కోల్‌బెల్ట్ ప్రాంతంలో సింగరేణి కార్మిక సంస్థ (సికాస) సానుభూతిదారుడుగా పనిచేశాడు. తర్వాత అదే పార్టీపై తిరుగుబాటు చేసి పోలీసులకు సహకరించాడు. పాతికేళ్ల పాటు పోలీసులను ముప్పుతిప్పలు పెట్టిన సికాస నేత రమాకాంత్, మరో ఇద్దరు సభ్యుల ఎన్‌కౌంటర్‌కు శివకుమారే కారణమని ప్రచారం జరిగింది. దానికి సంబంధించిన రివార్డు పంపకాల్లో విభేదాలు రావడంతో పోలీసులు శివకుమార్‌ను ఎన్‌కౌంటర్ చేసినట్లు కోల్‌బెల్ట్ ప్రాంతంలో ప్రచారమైంది.
 
 ♦ కరీంనగర్ జిల్లా మంథని మండలం ఖమ్మంపల్లికి చెందిన జడల నాగరాజు 1999లో పీపుల్స్‌వార్‌లో దళ సభ్యుడిగా చేరాడు. అప్పటి ఆ పార్టీ జిల్లా కార్యదర్శి విజయ్ అలియాస్ కొట్టె పురుషోత్తంను కాల్చిచంపి పోలీసులకు లొంగిపోయాడు. 2008 వరకు పలు వివాదాస్పదమైన కేసులతో సంబంధం కలిగిన నాగరాజు.. తర్వాత రెండు మూడేళ్ల పాటు మౌనంగానే ఉన్నాడు. 2011 డిసెంబర్ 26న మూడు నెలల్లో తిరిగి వస్తానని భార్య రాణికి చెప్పి వెళ్లిపోయాడు. ఇప్పటివరకు నాగరాజు జాడ లేదు.
 
 ♦ పీపుల్స్‌వార్ కేంద్ర కమిటీ నాయకులు నల్ల ఆదిరెడ్డి, శీలం నరేశ్, ఎర్రం సంతోష్‌రెడ్డిలను పోలీసులకు పట్టించిన ఆ పార్టీ అగ్రనేత గోవిందరెడ్డి ఆ తర్వాత జాడ లేకుండా పోయూడు. నల్లగొండ జిల్లాకు చెందిన గోవిందరెడ్డిని ప్రభుత్వమే విదేశాలకు పంపించినట్లు ప్రచారం జరిగింది. అతని తల్లిదండ్రులు చివరి దశలో భిక్షాటన చేస్తూ విషాదకర స్థితిలో మరణించారు. గోవిందరెడ్డి ఆచూకీ ఇప్పటికీ తెలియదు.
 
 ♦ నిజామాబాద్ జిల్లా ఆర్మూర్‌కు చెందిన శంకర్‌నాయక్ కరీంనగర్, నిజామాబాద్ జిల్లాల్లో మావోయిస్టు పార్టీని దెబ్బతీస్తానని, దళాలను మట్టుపెడతానని అంటూ కోవర్టుగా మారాడు. అతను పోలీసులకు సవాలుగా మారడంతో చివరకు పోలీసులే ఎన్‌కౌంటర్‌లో చంపేయాల్సిన పరిస్థితి ఏర్పడింది.
 
 ♦ నల్లగొండ జిల్లా పావురాల గుట్ట వద్ద మావోయిస్టు పార్టీ అప్పటి రాష్ట్ర కార్యదర్శి చిన్నన్నపై కాల్పులు జరిపిన సోమ్లానాయక్.. చివరికి గిరిజనుల చేతిలోనే మరణించాడు. ప్రకాశం, నల్లగొండ జిల్లాల్లో ఆయనకు గతంలో తిండిపెట్టిన వారినే వేధించడంతో మట్టుబెట్టారు.
  
 ఇక హైదరాబాద్‌లో మాఫియా రాజ్యాన్ని ఏలిన నయూమ్ వ్యవహారం ప్రభుత్వానికి తలనొప్పిగా మారడంతో వ్యూహాత్మకంగా వ్యవహరించి మట్టుబెట్టినట్లు ప్రచారం జరుగుతోంది. పోలీసులు, కోవర్టులు ఒకటేనంటూ పలు సందర్భాల్లో హక్కుల సంఘాల నాయకులు ఆరోపణలు చేశారు. అవసరమైతే కోవర్టులను సైతం ఎన్‌కౌంటర్ చేస్తామని నయీమ్ సంఘటనతో మరోసారి పోలీసులు రుజువు చేశారు.


 హైదరాబాద్ : తనకెవరూ షోకాజ్ నోటీసులు పంపించలేదని కాంగ్రెస్ సీనియర్ నేత, రాజ్యసభ సభ్యుడు పాల్వాయి గోవర్థన్ రెడ్డి తెలిపారు. ఆయన గురువారమిక్కడ మాట్లాడుతూ ...తాను  ముక్కుసూటిగా వ్యవహరిస్తానని అన్నారు. జానారెడ్డిపై  తాను చేసిన వ్యాఖ్యలకు సంబంధించి  దిగ్విజయ్ సింగ్ తనను వివరణ అడిగినట్లు పాల్వాయి తెలిపారు. కాంగ్రెస్ లో ఉన్న కోవర్ట్లులు పార్టీని విడిచి పోవాలని, వారివల్లే కాంగ్రెస్ బలహీనపడుతోందన్నారు.
 తానే పెద్ద ప్రతిపక్ష నాయకుడినని, కాంగ్రెస్తో తనకంటే పెద్ద అపోజిషన్ లీడర్ లేరని పాల్వాయి వ్యాఖ్యలు చేశారు. కేసీఆర్ ప్రభుత్వం కరువును ఏమాత్రం పట్టించుకోవడం లేదని, ఆయనవి అన్ని హిట్లర్ విధానాలు అని, నియంత పాలనలో ప్రజలు బాధపడుతున్నారని అన్నారు. కాగా అధికార టీఆర్‌ఎస్‌కు సీఎల్పీ నేత కె.జానారెడ్డి కోవర్టుగా వ్యవహరిస్తున్నారని పాల్వాయి గోవర్ధన్‌రెడ్డి ఆరోపించిన విషయం తెలిసిందే.


 సాక్షి, హైదరాబాద్: అధికార టీఆర్‌ఎస్‌కు సీఎల్పీ నేత కె.జానారెడ్డి కోవర్టుగా వ్యవహరిస్తున్నారని కాంగ్రెస్ సీనియర్ నేత, రాజ్యసభ సభ్యుడు పాల్వాయి గోవర్ధన్‌రెడ్డి ఆరోపించారు. జానారెడ్డి వంటి కోవర్టులు పార్టీలో చాలామంది ఉన్నారని, వారిపై చర్యలు తీసుకోవాలని కోరారు. పాల్వాయి బుధవారమిక్కడ విలేకరులతో మాట్లాడుతూ.. పార్టీలోని కోవర్టుల గురించి సోనియాగాంధీకి, రాహుల్‌గాంధీకి లేఖ రాసినట్టు చెప్పారు. కాంగ్రెస్‌లో ఇప్పుడు ప్రక్షాళనకు సమయం వచ్చిందని, ఆయారాం గయారాంలను తప్పించడం ఖాయమని పేర్కొన్నారు.
 నల్లగొండలో పార్టీ మూడు గ్రూపులుగా ఉందని, దుర్మార్గులు పార్టీని వీడితేనే లాభమని వ్యాఖ్యానించారు. కోమటిరెడ్డి సోదరులు పార్టీ అండతో కోట్లు దండుకున్నారని ధ్వజమెత్తారు. మంత్రి హరీష్‌రావుతో మాట్లాడుతూ పనులు చేసుకుంటున్నారని ఆరోపించారు. తప్పుగా మాట్లాడినందుకే కోమటిరెడ్డి వెంకటరెడ్డికి షోకాజు నోటీసు ఇచ్చారని, అధిష్టానం అనుమతితోనే షోకాజు ఇచ్చినట్టు తెలిపారు. దిగ్విజయ్‌ను తిట్టినా, జానారెడ్డి గురించి మాట్లాడినా పార్టీ బాగుకోసమేనని పేర్కొన్నారు. కాంగ్రెస్ కేడర్‌ను కాపాడుకోవడానికే తన కుమార్తె స్రవంతి గత ఎన్నికల్లో రెబెల్‌గా పోటీచేశారని చెప్పారు. సుఖేందర్‌రెడ్డి, భాస్కర్‌రావు పార్టీని వీడితే కాంగ్రెస్‌కు వచ్చే నష్టం ఏమీ లేదని పాల్వాయి స్పష్టంచేశారు.


 తెలంగాణలో కాంగ్రెస్ పార్టీని మరోసారి గ్రూపు రాజకీయాలు పట్టి పీడిస్తున్నాయని ఆ పార్టీ నాయకులే ఇదై పోతున్నారు. అదీగాకుండా కోవర్టుల వల్ల కూడా ఒక అడుగు ముందుకు రెండడుగులు వెనక్కు అన్నట్లుగా పార్టీ పరిస్థితి తయారైందని సీనియర్ నేతలు అంతర్గత చర్చల్లో వాపోతున్నారు. గాంధీ కుటుంబానికి, పార్టీ హైకమాండ్‌కు వీరవిధేయుడినని చెప్పుకునే నేత తీరును వారు ఉదహరిస్తున్నారు. టీఆర్‌ఎస్‌పై కాకుండా టీడీపీ, బీజేపీలను టార్గెట్ చేస్తూ సదరు నేత విమర్శల పరంపరను కొనసాగించడం కూడా ఈ నేతలకు నచ్చడంలేదు. తాజాగా లలిత్ మోదీ వ్యవహారంతో సుష్మా, వసుంధరరాజే రాజీనామాలు, వ్యాపంలో ఎంపీ సీఎం చౌహాన్ రాజీనామాల కోసం డిమాండ్ చేస్తూ నిరసనలు తెలుపుదామని సదరునేత ప్రతిపాదించారట.
 
 దీనిని పార్టీ ముఖ్యనేతలు పెద్దగా పట్టించుకోలేదు. దీనితో ఆయన ఎల్‌బీనగర్ చౌరస్తాలో శుక్రవారం ఒక నిరసన ధర్నాను నిర్వహించడంతో పాటు ఏఐసీసీలో ఉన్న పలుకుబడితో ఒకనేతను కూడా దానిలో పాల్గొనేలా చేయగలిగారు. అధిష్టానం వద్ద ఏం మాట వస్తుందోనని ఇతర రాష్ట్ర స్థాయి నేతలు కూడా పాల్గొనక తప్పలేదు. అయితే, పాల్గొనకపోతే హైకమాండ్‌కు ఫిర్యాదులు పోతాయని, నిరసనకు పెద్ద ఎత్తున కవరేజీ వస్తే ఆ నేతకే క్రెడిట్ దక్కుతుందని మీడియాకు సమాచారం ఇవ్వలేదని వీరవిధేయుడి అనుచరులు వాపోతున్నారు.