‘జీరో’ నుంచి ప్రయాణం ప్రారంభించి ఒక్కో పాఠం నేర్చుకుంటూ తమ కంపెనీ ‘వెల్‌స్పన్‌’ను ప్రపంచంలోని అతి పెద్ద టెక్ట్స్‌టెల్‌  కంపెనీల పక్కన నిలబెట్టింది దీపాలీ గోయెంకా... రాజస్థాన్‌లోని జైపుర్‌కు చెందిన దీపాలీకి పద్దెనిమిది సంవత్సరాల వయసులోనే వివాహం జరిగింది. ఇంటికే పరిమితం కాకుండా, ఏదైనా చేయాలనిపించేది. ముప్ఫైసంవత్సరాల వయసులో భర్త చేసే టెక్ట్స్‌టైల్‌ వ్యాపారంలోకి అడుగు పెట్టింది.‘నా భార్యగా ఇక్కడ నీకు ప్రత్యేక గుర్తింపు, గౌరవం అంటూ ఏవీ ఉండవు’ అని చెప్పాడు ఆమె భర్త ‘వెల్‌స్పన్‌’ చైర్మన్‌ బీకే గోయెంకా. (సోషల్ మీడియా స్టార్, అన్‌స్టాపబుల్‌ టైకూన్‌ దిపాలీ: రతన్‌టాటా కంటే ఖరీదైన ఇల్లు) తొలిరోజుల్లో ‘బాస్‌ భార్య’గానే గుర్తింపు పొందిన దీపాలీ ఆ తరువాత కాలంలో తనదైన గుర్తింపు తెచ్చుకుంది. నిరుపమానమైన నాయకత్వానికి ప్రతీకగా ప్రత్యేక ప్రశంసలు అందుకుంది. సైకాలజీ చదువుకున్న దీపాలీకి వ్యాపార వ్యవహారాలలో ఎలాంటి అనుభవం లేదు. ఏమీ తెలియని శూన్యం నుంచి అన్ని తెలుసుకోవాలనే తపన వరకు ఆమె ప్రయాణం కొనసాగింది. నష్టాలు ఎక్కడా జరుగుతున్నాయి? వాటిని నివారించడం ఎలా? ఇలా ఎన్నో విషయాలను త్వరగా తెలుసుకుంది. ఆఫీసుకు వెళ్లామా, వచ్చామా...అనే తీరులో కాకుండా ప్రతి అంశంపై స్పష్టమైన అవగాహన పెంచుకుంది. ఒకానొక కాలంలో విదేశీ ఒప్పందాలు రద్దు అయిపోయి కంపెనీ సంక్షోభపుటంచుల్లోకి వెళ్లింది. ఇలాంటి పరిస్థితులలో దీపాలీ ట్రబుల్‌ షూటర్‌గా మారి కంపెనీని మళ్లీ విజయపథంలోకి తీసుకువచ్చింది. (వరల్డ్‌లోనే రిచెస్ట్ బిచ్చగాడు ఎవరో తెలుసా? ఎన్ని కోట్ల ఆస్థి తెలిస్తే..?) ఇంతలోనే కోవిడ్‌ రూపంలో మరో సంక్షోభం ఎదురైంది. దాన్ని కూడా తన నాయకత్వ లక్షణాలతో విజయవంతంగా అధిగమించింది.‘ఏ సంక్షోభాన్నీ వృథాగా పోనివ్వకూడదు. దానినుంచి నేర్చుకునే విలువైన పాఠాలు ఎన్నో ఉంటాయి. మనల్ని మనం పునఃపరిశీలన చేసుకోవడానికి, మెరుగు పెట్టుకోవడానికి సంక్షోభాలు ఉపయోగపడతాయి’ అంటుంది దీపాలీ. ప్రస్తుతం కంపెనీకి సంబంధించిన ఉత్పత్తుల్లో 94 శాతం బయటి దేశాలకు ఎగుమతి చేస్తున్నారు. ఇంటర్నేషనల్‌ మార్కెట్‌తో పాటు ఇండియన్‌ మార్కెట్‌పై కూడా దీపాలీ దృష్టి సారించింది. ‘వ్యాపారవేత్త నిలువ నీరులా ఒకచోట ఉండిపోకూడదు. ప్రవాహమైపోవాలి. ప్రతి అడుగులో కొత్త విషయాలు తెలుసుకోవాలి. కొత్తగా ఆలోచించడం అనేది వ్యాపారానికి ప్రాణవాయువులాంటిది’ అనేది తాను నమ్మిన సిద్ధాంతం. ఇప్పుడు కంపెనీ చేతిలో సరికొత్త ఆవిష్కరణలకు సంబంధించి 35 పేటెంట్స్‌ ఉన్నాయి.‘అందరికీ అన్నీ తెలియాలి అని ఏమీ లేదు. తెలుసుకోవడానికి మన దగ్గర ఉన్న శక్తి... ప్రశ్న. ఒక్క ప్రశ్నతో ఎన్నో విషయాలు తెలుసుకోవచ్చు. మన అజ్ఞానం బయటపడుతుందేమో అని సంశయిస్తే అక్కడే ఉండిపోతాం. నాకు ఈ విషయం గురించి పెద్దగా తెలియదు. దయచేసి చెబుతారా? అని అడిగేదాన్ని. మనం తెలివి ఉన్న వ్యక్తి అయినంత మాత్రాన సరిపోదు. ఆ తెలివితో కంపెనీ ఎంత ముందుకు వెళ్లిందనేది ముఖ్యం. నేర్చుకోవడం అనే ప్రక్రియకు కాలపరిధి లేదు. అది నిత్యం జరుగుతూనే ఉండాలి’ అంటుంది దీపాలీ. ఈఎస్‌జీ–ఎన్విరాన్‌మెంటల్, సోషల్‌ అండ్‌ గవర్నెన్స్‌ తమ వ్యాపారానికి కీలకం అనేది దీపాలీ చెప్పేమాట. కంపెనీ ప్రాడక్ట్స్‌కు సంబంధించి తయారీ ప్రక్రియలో రీసైకిల్‌ వాటర్‌ను ఉపయోగించడం కూడా ఇందులో భాగమే. మరోవైపు రైతులతో కలిసి పర్యావరణానికి సంబంధించిన విషయాలపై పనిచేస్తోంది.దీపాలీ ‘వెల్‌స్పన్‌’లోకి అడుగు పెట్టినప్పుడు కేవలం ఏడు శాతం మంది మహిళలే ఉండేవారు. ఇప్పుడు వారి ప్రాతినిధ్యం ముప్ఫై శాతానికి పెరిగింది.ఈతరం వ్యాపారవేత్తలకు దీపాలీ ఇచ్చే సలహా ఇది...‘వ్యాపారికి తన వ్యాపారం మాత్రమే ప్రపంచం కాకూడదు. తన మానసిక ఆరోగ్యం, తినే తిండి, వ్యాయామాలపై కూడా దృష్టి పెట్టాలి. మనం మానసికంగా చురుగ్గా ఉంటేనే ఉత్తమమైన ఆలోచనలు వస్తాయి’సక్సెస్‌ఫుల్‌ ఎంటర్‌ప్రెన్యూర్‌గా నిరూపించుకున్న దీపాలీ గోయెంకాలో మరో కోణం దాతృత్వం.

భువనేశ్వర్‌: రాష్ట్రంలో ముఖ్యమంత్రి నవీన్‌ పట్నాయక్‌ మంత్రి మండలి పునర్వ్యవస్థీకరణ సోమవారం జరగనున్నట్లు తెలుస్తోంది. స్వస్థలం హర్యానా పర్యటనలో ఉన్న గవర్నర్‌ ప్రొఫెసర్‌ గణేషీ లాల్‌ ఆదివారం భువనేశ్వర్‌కు తిరిగి రానున్నారు. దీంతో 22న కొత్త మంత్రులతో ఆయన ప్రమాణ స్వీకారం చేయించనున్నట్లు విశ్వసనీయ వర్గాల సమాచారం. పునర్వ్యవస్థీకరణలో భాగంగా కొత్తగా ముగ్గురు మంత్రులుగా ప్రమాణ స్వీకారం చేసే అవకాశం ఉంది. వీరిలో ఇటీవల ఝార్సుగుడ నియోజకవర్గం నుంచి సమీప ప్రత్యర్థిపై భారీ ఆధిక్యతతో గెలుపొందిన దివంగత మంత్రి కుమార్తె దీపాలి దాస్‌కు మంత్రి బెర్తు లభించే అవకాశాలపై చర్చ జరుగుతోంది. కొనసాగుతున్న మంత్రి మండలిలో ఇటీవల ఇద్దరు మంత్రులతో పాటు స్పీకర్‌ విక్రమ కేశరి అరూఖ్‌ రాజీనామా చేశారు. మిగిలిన ఇద్దరిలో మంత్రులు సమీర్‌ రంజన్‌ దాస్‌, శ్రీకాంత్‌ సాహు ఉన్నారు. స్పీకర్‌ పదవికి రాజీనామా చేసిన విక్రమ్‌ కేశరి అరుఖ్‌కు కొత్త మంత్రి మండలిలో స్థానం లభిస్తుందని ఊహాగానాలు బలంగా వ్యాపించి ఉన్నాయి. మరో కొత్త ముఖం ఎవరనేది ఉత్కంఠభరితంగా కొనసాగుతుంది. ఈ ఖాళీల భర్తీతో ముఖ్యమంత్రి నవీన్‌ పట్నాయక్‌ కొంతమంది మంత్రుల శాఖలను మార్చే యోచనలో ఉన్నట్లు సమాచారం.

భువనేశ్వర్‌: ఝార్సుగుడ ఎమ్మెల్యేగా దీపాలీ దాస్‌ సోమవారం ప్రమాణ స్వీకారం చేశారు. ముందస్తు షెడ్యూల్‌ ప్రకారం ఉదయం 10:45 గంటలకు ఈ కార్యక్రమానికి హాజరు కాగా, శాసనసభ డిప్యూటీ స్పీకర్‌ రజనీకాంత్‌ సింగ్‌ ఆమెతో ప్రమాణ స్వీకారం చేయించారు. కార్యక్రమానికి ఆమె తల్లి, సోదరుడు, మంత్రులు ప్రమీలా మల్లిక్‌, రీతా సాహు తదితరులు హాజరయ్యారు. ప్రమాణ స్వీకారం చేసిన అనంతరం ఆమె మీడియాతో మాట్లాడారు. ఘన విజయంతో ఓటర్లు కట్టబెట్టిన గురుతర బాధ్యతను అంకిత భావంతో నిర్వహిస్తానని ప్రకటించారు. ముఖ్యమంత్రి నవీన్‌ పట్నాయక్‌ మార్గదర్శకంలో ఝార్సుగుడ నియోజకవర్గ బహుముఖ అభివృద్ధికి కృషి చేస్తానని తెలిపారు. ఇటీవల ముగిసిన ఉప ఎన్నికల్లో దీపాలీ దాస్‌ మీప ప్రత్యర్థి, బీజేపీ నాయకుడు టొంకొధొరొ త్రిపాఠిపై 48,721 ఓట్ల భారీ మెజార్టీతో గెలుపొందిన విషయం తెలిసిందే. ప్రమాణ స్వీకారానికి ముందు సోదరుడు విశాల్‌ దాస్‌ ఆదివారం నవీన్‌ నివాస్‌లో పార్టీ అధ్యక్షుడు, ముఖ్యమంత్రి నవీన్‌ పట్నాయక్‌ను కలిసి ఆశీస్సులు అందుకున్నారు. ఈ విజయం ఝార్సగుడ ఉప ఎన్నికలో చారిత్రాత్మక విజయమని సీఎం అభినందించారు. నియోజకవర్గ అభివృద్ధికి నాయకత్వం వహించాలని, ప్రజల జీవితాల్లో మార్పు తీసుకురావడానికి అంకితభావంతో పని చేయాలని ఆమెకు సూచించారు. ఇదిలా ఉండగా.. దీపాలి దాస్‌ సుమారు ఏడాది కంటే తక్కువ కాలమే ఈ పదవిలో ఉంటారు. 2024 సార్వత్రిక ఎన్నికలు సమీపంలో ఉండటమే ప్రధాన కారణం. తిరుగులేని బీజేడీ.. ముఖ్యమంత్రి నవీన్‌ పట్నాయక్‌ 5వ విడత పాలనలో 8 నియోజకవర్గాల్లో ఉప ఎన్నికలు జరిగాయి. అత్యధికంగా 7 చోట్ల జరిగిన ఉప ఎన్నికల్లో ఆయన నేతృత్వంలో బిజూ జనతాదళ్‌ విజయ శంఖారావం చేయగా.. మరో స్థానంలో భారతీయ జనతా పార్టీ తన సిట్టింగ్‌ స్థానాన్ని నిలబెట్టుకుంది. కాంగ్రెస్‌ పత్తా లేకుండా పతనమైంది. 2000 తర్వాత ఈ విడతలో రాష్ట్రంలో అత్యధిక ఉప ఎన్నికలు జరగడం విశేషం.

అరుణ– కళ్యాణి టాకీస్‌ పతాకంపై కృష్ణచైతన్య దర్శకత్వంలో రూపొందనున్న చిత్రం ‘ఒకడు’. శనివారం హైదరాబాద్‌లో ఈ చిత్రం ప్రారంభమైంది. అఖిల్‌రెడ్డి హీరోగా పరిచయమవుతున్నారు. ముహూర్తపు సన్నివేశానికి శేఖర్‌ మాస్టర్‌ క్లాప్‌నివ్వగా, సత్య మాస్టర్‌ కెమెరా స్విచాన్‌ చేశారు. స్క్రిప్ట్‌ను దర్శకుడు బీవీయస్‌ రవి దర్శకునికి అందించారు. ఈ సందర్బంగా కృష్ణచైతన్య మాట్లాడుతూ – ‘‘ఇది నా మొదటి చిత్రం. అందరూ అనుభవం ఉన్న టెక్నీషియన్లతో ఈ సినిమా చేయడం ఆనందంగా ఉంది. సంగీత దర్శకులు మణిశర్మ గారు స్వరాలందించడం హ్యాపీ. మొత్తం ఐదు ఫెడ్యూల్స్‌లో సినిమా పూర్తి చేస్తాం ఈనెల 16న రెగ్యులర్‌ షూటింగ్‌ ప్రారంభిస్తాం’’ అన్నారు. ఈ సినిమా మంచి మెసేజ్‌తో ప్రేక్షకుల ముందుకు వస్తుందని చిత్ర నిర్మాత ముత్తయ్య అన్నారు.‘‘నేను చేస్తున్న మొదటి సినిమాకు మంచి స్క్రిప్ట్‌ కుదిరింది. మంచి సైకలాజికల్‌ థ్రిల్లర్‌ను ప్రేక్షకులకు ఇవ్వబోతున్నాం’’ అన్నారు అఖిల్‌రెడ్డి.

ఆమె పేరు దీపాలి ఘోష్‌. ప్రేమను పంచే ఆమె మనసు,  కష్టాలను ఎదుర్కొనగలిగే ఆమె ధైర్యం, ఒంటరిగా ఉన్నా  ఎటువంటి మచ్చ పడకుండా గడిపిన ఆమె నిజాయితీ...  ఎంతోమంది మహిళలకు ఆదర్శంగా నిలిచేలా చేశాయి. ఈ కథ స్వాతంత్య్రానికి పూర్వం ప్రారంభమైంది. బంగ్లాదేశ్‌లో ఒక మారుమూల ప్రాంతం. ఆమె వయసు నాలుగు సంవత్సరాలు. తల్లి మరణించింది. తండ్రి మరో వివాహం చేసుకోలేదు. అత్యంత సంపన్నురాలైన తన సోదరికి పిల్లను అప్పచెప్పాడు. మేనత్త ఆమెను రాకుమార్తెలా పెంచింది. అయినా తన తోటివారు తల్లిదండ్రులతో సంతోషంగా ఆడుకుంటుంటే, ఆ పసి హృదయానికి తల్లిదండ్రులు గుర్తుకు వచ్చేవారు. అలాగే పెరిగి పెద్దదైంది. ఆమె చాలా తెలివైనది, అందమైనది. వంద గ్రామాలకు అధిపతి అయిన ఒక జమీందారుతో ఆమెకు 14వ ఏటే 1945లో వివాహం జరిగింది. ఏ లోటూ లేకుండా జీవితం హాయిగా సాగింది.  భర్తకు ఉద్యోగం ఇప్పించింది! రెండో ప్రపంచం ముగుస్తున్న ఆ కాలంలో.. బెంగాల్‌... తూర్పు బెంగాల్, పశ్చిమ బెంగాల్‌గా చీలిపోయింది. సంపన్నులందరూ తక్కువ ధనంతో పశ్చిమ బెంగాల్‌ చేరుకున్నారు. ఆమె కూడా భర్తతో కలిసి కలకత్తా నగరం చేరుకుంది. అయితే గత వైభవం లేకపోవడంతో జీవితం దుర్భరంగా మారింది. సంపద పోయినా భర్తలో జమీందారీతనం పోలేదు. ఒక్క పైసా కూడా సంపాదించకుండా, ఆమె మీద అజమాయిషీ చేయడం ప్రారంభించాడు. ఆమె ఎంతో కష్టం మీద భర్తకు ఇండియన్‌ ఆర్మీలో ఉద్యోగం వేయించింది. చేరిన కొద్ది రోజులకే ఆ ఉద్యోగం మానేశాడు. అప్పటికే వారికి ఐదుగురు సంతానం. కొత్త ఉద్యోగం కోసం ప్రయత్నాలు ప్రారంభించారు. మామగారు షాపు పెట్టించాడు కూతురి కష్టాల్ని కళ్లారా చూస్తున్న ఆమె తండ్రి... తాను దాచుకున్న సొమ్ములన్నీ అమ్మేసి, అల్లుడికి ఒక పెద్ద షాపు ఇచ్చాడు. అది కూడా నిలబెట్టుకోలేకపోయాడు భర్త. డబ్బు లేకుండా ఐదుగురు పిల్లల్ని ఎలా పెంచాలా అనే ఆలోచనతో ఆమెకు రాత్రుళ్లు నిద్రపట్టేది కాదు. భర్తను ఎలాగో ఒప్పించి ఉత్తరప్రదేశ్‌లో ఉద్యోగంలో చేర్పించింది. అక్కడ కూడా ఉద్యోగం మానేసి, ఇంట్లో ఖాళీగా కూర్చోవడం ప్రారంభించాడు. ఇక ఆమె ధైర్యం చేయక తప్పలేదు. తాను ఉద్యోగం చేస్తానని తేల్చి చెప్పేసింది. అతడికి ఆ మాటలు నచ్చలేదు. విడాకులు ఇచ్చేస్తానని బెదిరించాడు. ఆమె అంగీకరించింది. ఇద్దరూ విడిపోయారు. ఐదుగురు పిల్లలతో ఆమె ఘజియాబాద్‌లో ఒక చిన్న ఇంట్లోకి మారింది.  విడాకులు ఒడ్డుకు చేర్చాయి ప్రతిరోజూ ఉదయం నాలుగు గంటలకు నిద్ర లేచేది. డబ్బు కోసం మైళ్ల కొలదీ దూరం నడిచేది. పని నుంచి ఇంటికి వచ్చాక, ఇంటి దగ్గర ట్యూషన్లు చెప్పేది. ఒక్కోసారి పిల్లలంతా భోజనం చేశాక, తనకు మిగిలేది కాదు. నిద్రకు కూడా దూరమైపోయింది. ఒక రాకుమార్తెలా పెరిగి, ఒక రాజకుమారుడిని పెండ్లాడి, అవసరాలు తీరడం కోసం రెండు ఉద్యోగాలు చేయడమంటే విధి పగ పట్టడమే కదా!రోజూ ఆఫీసు నుంచి ఇంటికి వచ్చేసరికి ఏదో ఒక ఇబ్బంది ఎదురవుతూ ఉండేది. పనులన్నీ ఒంటరిగా చక్కబెట్టుకోవడం కష్టమని అర్థం చేసుకుంది. ఇంటి పనులు, చదువుకోవడం అన్నీ వారికి వారే చేసుకునేలా పిల్లలకు నేర్పింది. ఆమెలేదు.. ఆదర్శం ఉంది పిల్లల్ని పెంచడం కోసమే తన జీవితాన్ని అంకితం చేసింది. వచ్చిన ఆదాయంతో జాగ్రత్తగా జీవించడం అలవాటు చేసుకుంది. పిల్లల్ని వృద్ధిలోకి తీసుకువచ్చింది. నేడు పిల్లలంతా పెద్దవారయ్యారు, అందరికీ పెళ్లిళ్లు అయ్యాయి. అందరూ మంచి హోదాలో ఉన్నారు. అయితే అవన్నీ చూడటానికి ఇప్పుడు ఆమె లేదు. నిద్రాహారాలు లేకుండా పనిచేయడంతో ఆమె ఆరోగ్యం క్షీణించి, కన్ను మూసింది.  (మనవరాలు సైనీ బెనర్జీ పాల్‌ ఈ విషయాలన్నీ  ఇటీవలే వెల్లడించారు)

సాక్షి, హైదరాబాద్‌ : ప్రపంచవ్యాప్తంగా ఉన్న తెలుగు ప్రజలకు వైఎస్‌ఆర్‌ కాంగ్రెస్‌ పార్టీ అధ్యక్షుడు వైఎస్‌ జగన్‌ మోహన్‌ రెడ్డి దీపావళి శుభాకాంక్షలు తెలిపారు. చీకటి మీద వెలుగు, చెడు మీద మంచి, దుష్ట శక్తుల మీద దైవ శక్తులు సాధించిన విజయానికి దీపావళి ప్రతీక అని ఆయన పేర్కొన్నారు. ఈ పర్వదినం సందర్భంగా తెలుగు ప్రజలందరికీ సకల శుభాలు,సంపదలు, సౌభాగ్యాలు కలగాలని, ప్రతిఇంటా దీపావళి ఆనందాల కోటి కాంతులు నింపాలని వైఎస్‌ జగన్‌ అభిలాషించారు.


 ఆటకు అందం జత చేరితే అది అచ్చు అశ్వని నాచప్పలా ఉంటుంది. పాతికేళ్ల క్రితమే ఆమె క్రీడా గ్లామర్‌కు ఓనమాలు నేర్పింది. ఒకప్పటి అందాల అమెరికన్ అథ్లెట్ ఫ్లోరెన్స్ జాయ్‌నర్ తరహాలో ఇండియన్ ఫ్లోజోగా గుర్తింపు తెచ్చుకుంది. అదే సౌందర్యం ఆమెను సినీ తారను చేసింది. పరుగులో పీటీ ఉషను వెనక్కి నెట్టినా...ఆటకంటే అందమే ఆమెను ఎక్కువ సార్లు అందలమెక్కించింది. ఈ ‘కన్నడ కస్తూరి’ ఇప్పటికీ క్రీడలతో తన అనుబంధాన్ని కొనసాగిస్తూనే ఉంది. ఒక స్వచ్ఛంద సంస్థ ద్వారా పిల్లలకు చేయూతనివ్వడం తనకు ప్రస్తుతం అత్యంత సంతృప్తినిస్తోందంటూ అశ్వని చెప్పిన అనేక విశేషాలు ఆమె మాటల్లోనే...
  
 అథ్లెటిక్స్ తర్వాత...
  
 ట్రాక్‌కు దూరమైనా...నేను ఆటకు దూరం కాలేదు. ఇంకా చెప్పాలంటే గతంలోకంటే ఎక్కువగా బిజీ అయ్యాను. ముఖ్యంగా నా సొంత స్కూల్, స్పోర్ట్స్ ఫౌండేషన్ కార్యకలాపాలు చాలా ఎక్కువగా ఉన్నాయి. నా స్వస్థలం కొడగులో 30 ఎకరాల విస్తీర్ణంలో  ఐసీఎస్‌ఈ స్కూల్ ఒకటి నేను నిర్వహిస్తున్నాను. అక్కడ రెగ్యులర్ స్టడీస్‌తో పాటు ఆటలకు కూడా ప్రాధాన్యత ఉంటుంది. ప్రస్తుతం అథ్లెటిక్స్,హాకీ, 10 మీ. ఎయిర్ రైఫిల్ క్రీడాంశాలు ఉన్నాయి. అంతే కాదు...పరిక్రమ అనే స్వచ్ఛంద సేవా సంస్థను గత 12 ఏళ్లుగా నడిపిస్తున్నాను. ఇందులో వేయికి పైగా చిన్నారులకు కావాల్సిన సౌకర్యాలు అందిస్తున్నాను. ఇది నా జీవితంలో చాలా సంతృప్తినిస్తున్న కార్యక్రమంగా చెప్పవచ్చు.
  
 ఆటలకు సంబంధించి...
  
 స్పోర్ట్స్ ఫౌండేషన్ మాత్రం పూర్తి స్థాయిలో క్రీడాకారులను తయారు చేసే పనిలో ఉంది. ముఖ్యంగా అథ్లెటిక్స్‌లో టాలెంట్ సెర్చ్ కార్యక్రమం కొనసాగుతూ ఉంటుంది. ఇందులో 200కు పైగా ఆటగాళ్లు ఉన్నారు. గత నాలుగేళ్లుగా మా ఫౌండేషన్‌కు చెందిన అనేక మంది అథ్లెట్లు జాతీయ స్థాయిలో కర్ణాటకకు ప్రాతినిధ్యం వహిస్తూ వస్తున్నారు. ఇకపై మరిన్ని మంచి ఫలితాల సాధనపై దృష్టి పెట్టాను. కిరణ్ మజుందార్‌షా తదితర కార్పొరేట్ దిగ్గజాలు నాకు ఆర్థికంగా అండగా నిలుస్తున్నారు. బెంగళూరు జిల్లాతో పాటు కర్ణాటక అథ్లెటిక్స్ సంఘం ఉపాధ్యక్షురాలిగా కూడా ఆటతో నా అనుబంధం కొనసాగుతూనే ఉంది.
  
 నాటి గుర్తులు
 
 ఒక అథ్లెట్‌గా నేను సంతృప్తికరంగానే  కెరీర్‌ను ముగించానని భావిస్తున్నాను. ఆసియా, శాఫ్ క్రీడల్లో పతకాలైనా, ఏషియన్ ట్రాక్ అండ్ ఫీల్డ్ పోటీల్లో ఇతర విజయాలైనా ఎప్పటికీ గుర్తుండిపోతాయి. ఇప్పటి సౌకర్యాలవంటివాటితో పోలిస్తే మేం పరిమిత అవకాశాలతోనే సత్తా చాటామని చెప్పగలను. ఆనాడు పీటీ ఉష స్థాయి ఏమిటో అందరికీ తెలుసు. నేషనల్స్‌లో రెండు సార్లు ఆమెను ఓడించగలిగాను. సహజంగానే చాలా మంది అథ్లెట్లలాగే గాయాలు నా కెరీర్ కీలక దశలో ఇబ్బంది పెట్టడంతో పరుగుకు బ్రేక్ వేయాల్సి వచ్చింది.
  
 తొలి సినిమా అనుభవం
 
 నా జీవితంలో అదో ప్రత్యేక దశ. నటన గురించి ఏ మాత్రం తెలియని సమయంలో నా స్టోరీ అంటూ చెప్పేసరికి అశ్వినిలో అథ్లెట్‌గా నటించాను. నేను జీవితంలో ఎప్పుడూ ఏడవలేదు. అలాంటిది ఆ సమయంలో ఏడుపు సన్నివేశాల్లో కూడా నవ్వుతూ నేను భానుచందర్‌ను, దర్శకుడిని సతాయించిన రోజులు బాగా గుర్తున్నాయి. అయితే ఆ తర్వాత అందరూ నన్ను ప్రతీ సినిమాలో పరుగెత్తాలనే కోరుకునేవారు. ఈ సమయంలో నేనే కాదు, యూనిట్ మొత్తానికి ఉదయమే రన్నింగ్, ఎక్సర్‌సైజ్ ఉండేది. అందరినీ తీసుకొని నేను బయల్దేరే దాన్ని. అదో సరదా అనుభవం.
  
 ఆ తర్వాతి సినిమాలు...
 
 అశ్విని తర్వాత మరో నాలుగు సినిమాలు చేశాను. అయితే అవన్నీ ఒకే దర్శకుడివి కావడంతో ఇబ్బంది రాలేదు. పైగా నేనెప్పుడూ గ్లామర్ చూపించాల్సిన అవసరం లేకపోయింది. ప్రతీ సినిమాలో ఏదో వేరే ఒక జంట పాటల కోసం ఉండేది. అయితే ఇవి చేశాక ఇక నాకు చాలనిపించింది. ఫైటింగ్స్ కూడా అయిపోయాయి ఇక చేసేదేముంది అనిపించడంతో ఇక సినిమాలు చాలు అని గట్టిగా నిర్ణయించుకున్నాను. చాలా మంది అడిగినా నిరాకరించాను.
  
 భారత అథ్లెటిక్స్‌పై...
 
 నిస్సందేహంగా సౌకర్యాల పరంగా చూస్తే మనం ఎవరికీ తక్కువ కాదు. అయితే ఒలింపిక్స్ స్థాయితో పోలిస్తే అథ్లెటిక్స్ ఇంకా చాలా వెనుకబడే ఉంది. మిడిల్ డిస్టెన్స్‌లో మంచి ఫలితాలే వస్తున్నా స్ప్రింట్స్‌లో ఎంతో మెరుగు పడాల్సి ఉంది. గత కామన్వెల్త్ క్రీడలు మన దేశంలో జరగడం ఎంతో మంచి చేసింది. ఆ తర్వాత ప్రతిభాన్వేషణతో పాటు కార్పొరేట్లు కూడా సహకారానికి ముందుకు వస్తున్నాయి. ఈ ఏడాది కూడా కామన్వెల్త్, ఆసియా క్రీడల్లో మనకు ఎక్కువ సంఖ్యలో పతకాలు గెలిచే అవకాశం ఉంది. ప్రత్యేకంగా పేర్లను ప్రస్తావించలేను కానీ ఓవరాల్‌గా అథ్లెటిక్స్ పరిస్థితి రోజు రోజుకూ మెరుగవుతూనే ఉంది. కాస్త ఓపిక పడితే రాబోయే కొన్నేళ్లలో అద్భుత ఫలితాలు వస్తాయి. ఇంకా చెప్పాలంటే మిషన్ 2020 పేరుతో క్రీడల్లో అనేక లక్ష్యాలతో ముందుకు సాగుతున్నాం. సరైన కోచ్‌లతో ప్రణాళికలు సమర్థంగా అమలు చేయాల్సి ఉంది.
  
 క్రీడల్లో అవినీతిపై...
  
 కామన్వెల్త్ వ్యవహారంలో కల్మాడీ పరిస్థితి ఏమైందో చూశారుగా. ఇలా అవినీతిని రూపుమాపాలనే ఆటగాళ్లం అందరం కలసి క్లీన్ స్పోర్ట్స్ సంస్థను స్థాపించాం. క్రీడల్లో అవినీతి బయటపెట్టడంలో మేం కూడా కీలక పాత్ర పోషించామని గర్వంగా చెప్పగలం. వాస్తవంగా చూస్తే ఆటలో ఇంత అవినీతి ఉంటుందా అనేది ఒక అథ్లెట్‌గా ఉన్న సమయంలో తెలీలేదు. కానీ అలాంటివాటిని పరిహరిస్తే భారత్ మరింత వేగంగా దూసుకుపోగలదని అనిపించింది. ఇప్పటికే అనేక కార్యక్రమాలు చేపట్టాం. గత ప్రభుత్వం క్రీడా సంఘాల్లో రాజకీయ నాయకులు ఉండరాదన్న సూచనకు మేం గట్టిగా మద్దతిచ్చాం. ఇకపై కూడా దీనిని మరింత సమర్థవంతంగా నిర్వహించి క్రీడలను క్లీన్‌గా ఉంచుతామని చెప్పగలం.
  
 కుటుంబం....
 
 నా భర్త ఆటోమొబైల్ వ్యాపారంలో చాలా ఏళ్లుగా ఉన్నారు. ఇద్దరు అమ్మాయిలు అనీషా, దీపాలి. ఆరంభంలో ఆటలపై ఆసక్తి చూపిన అనీషా జాతీయ స్థాయి బ్యాడ్మింటన్‌లో రాణించింది. అయితే ఆ తర్వాత చదువు నిమిత్తం విదేశాలకు వెళ్లిపోయింది. ఇక చిన్న అమ్మాయికి కూడా పెద్దగా ఆసక్తి లేదు కాబట్టి నా కుటుంబంనుంచి మరో అథ్లెట్ లేనట్లే.