హైదరాబాద్: బంగారు ఆభరణాల తయారీ సంస్థ ‘జోయాలుక్కాస్’ తాజాగా అమెరికాలో తన తొలి షోరూమ్ ను ప్రారంభించనుంది. హూస్టన్‌లోని హిల్‌క్రాఫ్ట్‌లో ఈ ఔట్‌లెట్ ఏర్పాటవుతుందని సంస్థ ఒక ప్రటకలో తెలిపింది. షోరూమ్ ప్రారంభోత్సవం ఈ నెల 19న ఉంటుందని పేర్కొంది. ఔట్‌లెట్‌ను ప్రారంభిస్తే తాము అంతర్జాతీయంగా 11 దేశాల్లో కార్యకలాపాలను నిర్వహించినట్లు అవుతుందని తెలిపింది. కొత్త షోరూమ్‌లో పలు డిజైన్లతో కూడిన ఆభరణాలను అందుబాటులో ఉంచామని, వినియోగదారులు నాణ్యమైన జువెలరీని అత్యుత్తమ విలువకు పొందొచ్చని సంస్థ చైర్మన్, ఎండీ జోయ్ అలుక్కాస్ తెలిపారు. త్వరలో న్యూజెర్సీ, చికాగో ప్రాంతాల్లో షోరూమ్‌లను ఏర్పాటు చేస్తామని పేర్కొన్నారు.


 హైదరాబాద్, బిజినెస్ బ్యూరో: స్వీడన్‌కు చెందిన ప్రపంచంలోనే అతిపెద్ద ఫర్నిచర్ రిటైల్ సంస్థ ఐకియా దేశంలో తొలి షోరూంను హైదరాబాద్‌లో ఏర్పాటు చేస్తోంది. హైదరాబాద్‌లో షోరూం ఏర్పాటుకు సంబంధించి హైటెక్ సిటీకి సమీపంలో 13 ఎకరాల స్థలాన్ని కొనుగోలు చేసినట్లు ఐకియా ఒక  ప్రకటనలో పేర్కొంది. వచ్చే పదేళ్లలో సుమారు రూ. 10,500 కోట్ల పెట్టుబడులు పెట్టడానికి ఐకియా ముందుకొచ్చిన సంగతి తెలిసింది.
 
 దేశవ్యాప్తంగా 25 స్టోర్లు ఏర్పాటు చేయాలన్న లక్ష్యంలో భాగంగా తొలి షోరూంను హైదరాబాద్‌లో సుమారు రూ. 500 కోట్ల వ్యయంతో ఏర్పాటు చేయనుంది. ‘మేక్ మోర్ ఇన్ ఇండియా’ అనే కార్యక్రమంలో భాగంగా స్థానిక సరఫరాదారుల నుంచి ఫర్నిచర్‌ను అత్యధికంగా సేకరించనున్నట్లు ఐకియా ఇండియా చీఫ్ ఎగ్జిక్యూటివ్ ఆఫీసర్ జువెన్సియో మేజు తెలిపారు. ఇందులో భాగంగా తెలంగాణా ప్రాంతం నుంచి కూడా అత్యధికంగా ఫర్నిచర్‌ను సమీకరించనున్నట్లు ఆయన తెలిపారు.