ఈ ఏడాది చివర్లో థియేటర్స్‌లోకి రావాలన్నది లాల్‌ సింగ్‌ చద్దా ప్లాన్‌. కానీ ఆ ప్లాన్‌లో మార్పు ఉండబోతోందని బాలీవుడ్‌ టాక్‌. ఆమిర్‌ ఖాన్‌ హీరోగా తెరకెక్కుతున్న చిత్రం ‘లాల్‌ సింగ్‌ చద్దా’. అద్వైత్‌ చందన్‌ దర్శకత్వం వహిస్తున్నారు. కరీనా కపూర్‌ కథానాయిక. హాలీవుడ్‌ చిత్రం ‘ఫారెస్ట్‌ గంప్‌’కి హిందీ రీమేక్‌గా ఈ సినిమా తెరకెక్కుతోంది. ఈ సినిమాను క్రిస్మస్‌ సీజన్లో రిలీజ్‌ చేయాలని ప్లాన్‌ చేశారు ఆమిర్‌ ఖాన్‌. అయితే కరోనా వైరస్‌ కారణంగా షూటింగ్స్‌కి బ్రేక్‌ పడటంతో ‘లాల్‌ సింగ్‌ చద్దా’ను క్రిస్మస్‌ సీజన్‌లో రిలీజ్‌ చేయడం కష్టం అంటున్నారు. మరి లాల్‌ సింగ్‌ అనుకున్న టైమ్‌కి వస్తాడా? రాడా?  చూడాలి.

కొత్త సినిమా కోసం కొత్త ప్రయాణం మొదలు పెట్టారు బాలీవుడ్‌ మిస్టర్‌ పర్‌ఫెక్ట్‌ ఆమిర్‌ ఖాన్‌. ఆయన హీరోగా నటించనున్న తాజా చిత్రం ‘లాల్‌సింగ్‌ చద్దా’. ఆస్కార్‌ విన్నింగ్‌ ఫిల్మ్‌ ‘ఫారెస్ట్‌ గంప్‌’ (1994)కి హిందీ రీమేక్‌ ఇది. ఇందులో కరీనా కపూర్‌ కథానాయికగా నటించనున్నారు. ఈ సినిమా చిత్రీకరణ మొదలైంది. తొలి సన్నివేశానికి ఆమిర్‌ ఖాన్‌ తల్లి జీనత్‌ హుస్సేన్‌ క్లాప్‌ ఇచ్చారు. హిందీ చిత్రం ‘సీక్రెట్‌ సూపర్‌స్టార్‌’ ఫేమ్‌ అద్వైత్‌ చందన్‌ ఈ సినిమాకు దర్శకత్వం వహిస్తున్నారు. ఈ సినిమా కోసం ఆమిర్‌ ఖాన్‌ దాదాపు 20కేజీల బరువు తగ్గిన   విషయం తెలిసిందే. వచ్చే ఏడాది క్రిస్మస్‌ సందర్భంగా చిత్రాన్ని విడుదల చేయాలనుకుంటున్నారు.

ఆమిర్‌ ఖాన్‌ సినిమా అంటే రికార్డ్‌ స్థాయి కలెక్షన్లు సాధారణం. కానీ ఆమిర్‌ నటించబోయే కొత్త సినిమాను రికార్డ్‌ స్థాయి లొకేషన్లలో చిత్రీకరించాలనుకుంటున్నారని తెలిసింది. 1994లో టామ్‌ హ్యాంక్స్‌ నటించిన హాలీవుడ్‌ చిత్రం ‘ఫారెస్ట్‌ గంప్‌’ ఆధారంగా ‘లాల్‌ సింగ్‌ చద్దా’ సినిమా చేస్తున్నారు ఆమిర్‌. అద్వైత్‌ చందన్‌ దర్శకుడు. ఈ సినిమాలోని పాత్ర కోసం బరువు తగ్గే పనిలో ఉన్నారు ఆమిర్‌ ఖాన్‌. నవంబర్‌లో ఈ సినిమా రెగ్యులర్‌ షూటింగ్‌ ప్రారంభం కానుంది. దేశవ్యాప్తంగా 100కుపైగా లొకేషన్లలో ఈ సినిమాను చిత్రీకరిస్తారట. ఢిల్లీ, గుజరాత్, ముంబై, కోల్‌కత్తా, బెంగళూరు, హైదరాబాద్‌తో పాటు మరిన్ని లొకేషన్లు కోసం వెతుకుతున్నారట. ఇన్ని లొకేషన్లలో ఇప్పటి వరకూ ఏ బాలీవుడ్‌ సినిమా కూడా చిత్రీకరణ జరుపుకోలేదట. ఈ సినిమాలో కరీనా కపూర్‌ హీరోయిన్‌గా నటించనున్నారు. తమిళ నటుడు విజయ్‌ సేతుపతి ఓ కీలక పాత్రలో కనిపించనున్నారు.

‘ఓషో’ స్క్రిప్ట్‌తో పూర్తిగా సంతృప్తి చెందలేదట బాలీవుడ్‌ మిస్టర్‌ పర్ఫెక్షనిస్ట్‌ ఆమిర్‌ ఖాన్‌. దాంతో పారామౌంట్‌ సంస్థ నిర్మించిన ఓ హాలీవుడ్‌ సినిమాను రీమేక్‌ చేయాలనే ఆలోచనలో ఉన్నారని ఇటీవల వార్తలు వచ్చాయి. ఇప్పుడు ఆ సినిమా ఏంటో తెలిసిపోయింది. 1994లో రిలీజ్‌ అయిన ‘ఫారెస్ట్‌ గంప్‌’ చిత్రాన్ని ఆమిర్‌ రీమేక్‌ చేయాలనుకుంటున్నారట. ‘మై నేమ్‌ ఈజ్‌ గంప్, ఫారెస్ట్‌ గంప్‌’ అంటూ మానసిక వికలాంగుడిగా టామ్‌ హ్యాంక్స్‌ నటించిన హాలీవుడ్‌ చిత్రం ‘ఫారెస్ట్‌ గంప్‌’. టామ్‌ హ్యాంక్స్‌ నటనకు ఆస్కార్‌ కూడా లభించింది. ఫారెస్ట్‌ గంప్‌ అనే వ్యక్తి జీవిత కథతో ఈ సినిమా సాగుతుంది. ఇప్పుడు ఈ చిత్రాన్ని ఇండియన్‌ ఆడియన్స్‌ టేస్ట్‌కు తగ్గట్టుగా మార్పులు చేయిస్తున్నారట ఆమిర్‌. స్క్రిప్ట్‌ వర్క్‌ కంప్లీట్‌ అయితే ఆయన తర్వాతి ప్రాజెక్ట్‌ ఇదే అవుతుంది.


 లండన్: తాను ఓ చెట్టుకింద పెళ్లి చేసుకున్నానని ప్రముఖ హాలీవుడ్ నటి ఆమీ అడమ్స్ చెప్పింది. అందుకు 'ఫారెస్ట్ గంప్' అనే హాలీవుడ్ చిత్రం స్ఫూర్తి అని తెలిపింది. 2015, మే నెలలో ఆడమ్స్ వివాహం హాలీవుడ్ నటుడు డారెన్ లి గాలోతో జరిగింది. వీరిద్దరు అంతకుముందు 2008 నుంచే సహజీవనం ప్రారంభించారు.
 
 తన వివాహం గురించి ఆడమ్స్ మీడియాకు చెబుతూ.. 'ఫారెస్ట్ గంప్ అనే చిత్రాన్ని చూసిన తర్వాత నేను చెట్టుకిందే పెళ్లి చేసుకోవాలని నిర్ణయించుకున్నాను. అది నాకు చాలా ముఖ్యమైంది కూడా. నా బంధువులను, స్నేహితులను అందరిని ఆ చెట్టు కింద గుండ్రంగా కూర్చోబెట్టి అక్కడే పెళ్లి చేసుకున్నాను. తొలుత తన నిర్ణయం తెలుసుకున్నవారంతా గందరగోళం పడిపోయారు. ఆ సినిమా తనపై విపరీతంగా ప్రభావం చూపిందని అనుకున్నారు. కానీ, నాకు ఆ సమయంలో అలా పెళ్లి చేసుకోవడమే సరైనదని అనిపించింది' అని ఆమె చెప్పింది.