హీరో హీరోయిన్లు తమ క్రేజ్‌ను పారితోషికం పెంచుకోవడానికి వాడుకుంటుంటారు. అయితే వారి మార్కెట్‌ను ఇతరులు మరో విధంగా ఉపయోగించుకుంటారు. అలా ఓ టీవీ ఛానల్‌ అగ్రనటి నయనతార క్రేజ్‌ను భలే తెలివిగా వాడేసుకున్నారు. లేడీ సూపర్‌స్టార్‌గా వెలిగిపోతున్న దక్షిణాది టాప్‌ కథానాయకి నయనతార అన్న విషయం తెలిసిందే. సూపర్‌స్టార్‌ రజనీకాంత్, ఇళయదళపతి విజయ్‌ వంటి వారితో నటిస్తూనే, శివకార్తీకేయన్‌ వంటి యువ హీరోలతోనూ జత కట్టడానికి సై అంటోంది. మరో పక్క హీరోయిన్‌ ఓరింయంటెడ్‌ పాత్రల్లోనూ నటిస్తూ అన్ని రకాల పాత్రల్లోనూ తనదైన ముద్ర వేసుకుంటోంది. అంతే కాకుండా తెలుగులోనూ అగ్ర హీరోలతో జత కడుతూ విరామం లేకుండా నటిస్తోంది. ఇలాంటి బిజీ షెడ్యూల్‌లో ఈ ముద్దుగుమ్మ బుల్లితెరపై మెరబోతోందనే ప్రచారం సామాజిక మాద్యమాల్లో వైరల్‌ అయ్యింది. నయనతార బిగ్‌బాస్‌ రియాలిటీ షోలో వ్యాఖ్యాతగా పాల్గొనబోతోందనీ, మరో కార్యక్రమానికి న్యాయ నిర్ణేతగా వ్యవహరించబోతోందనీ, తన చిత్రాల ప్రమోషన్‌ కార్యమాల్లోనే పాల్గొనడానికి సమ్మతించని నయనతార బుల్లితెరపైకి రాబోవడం నిజంగా విశేషమే లాంటి రకరకాల ప్రచారం హోరెత్తింది. కానీ నిజమేంటంటే నయనతార ఎలాంటి టీవీ కార్యక్రమాల్లోనూ పాల్గొనడం లేదట. ఇదంతా ఒక టీవీ ప్రచారానికి వాడుకున్న పనేనని తెలిసింది. ఆ మధ్య ఆర్యకు వధువు కావాలంటూ ఒక కార్యక్రమాన్ని నిర్వహించి పెద్ద ఎత్తున ప్రచారం పొందే ప్రయత్నం చేసిన ఆ ఛానల్, చివరికి ఆర్య ఏ అమ్మాయిని ఎంచుకోకపోవడంతో అదంతా ప్రబ్లిసిటీ స్టంటేనని తేలిపోయింది. తాజాగా నటి నయనతారను అదే ఛానల్‌ తన ప్రచారానికి వాడేసుకుంటోంది. నిజం ఏమిటంటే కలర్స్‌ టీవీ ఛానల్‌ త్వరలో నయనతార బుల్లితెరపైకి రానుందనే ప్రచారం చేసింది. దీంతో సామాజిక మాధ్యమాలు దీన్ని పెద్దగా ప్రచారం చేసేశాయి. అసలు విషయం ఏమిటంటే నయనతార నటించిన ఇమైకా నోడిగళ్‌ చిత్రం మే 12న ఆ ఛానల్‌లో ప్రసారం కానుందట. దానికి కలర్స్‌ ఛానల్‌ అంత బిల్డప్‌ ఇచ్చిందన్నమాట. అంత బిజీగా ఉన్న నయనతార ఏమిటీ బుల్లితెర కార్యక్రమంలో పాల్గొనడమేమిటీ? అన్న విషయాన్ని సామాజిక మాద్యమాలు కొంచెం కూడా ఆలోచించకుండా ఇష్టం వచ్చినట్లు ప్రచారం చేసేశారు. కాగా ఇదే విధంగా ఇప్పుడు మరో అగ్రనటి అనుష్క బుల్లితెరపైకా రానుందనీ, తెలుగులో బిగ్‌బాస్‌ రియాలిటీ షో 3కి వ్యాఖ్యాతగా వ్యవహరించబోతోందనే ప్రచారం జోరందుకుంది. ఇందులోనైనా నిజం ఉందా? లేక ఇదీ పబ్లిసిటీ స్టంటేనా? అని సినీ అభిమానులు అనుమానం వ్యక్తం చేస్తున్నారు.

లైఫ్‌లో కెరీర్‌ను ఎలా ప్లాన్‌ చేసుకోవాలన్న ఆలోచన ప్రతి ఒక్కరికీ ఏదో ఒక స్టేజ్‌లో వస్తుంది. అలాంటి టైమ్‌లోనే రాశీ ఖన్నా ఓ కీలక నిర్ణయం తీసుకుని ఇంతమంది అభిమానుల మనసు గెలుచుకున్నారు. ఇంతకీ విషయం ఏంటంటే.. రాశీ ఖన్నా ముందు హీరోయిన్‌ అవ్వాలనుకోలేదట.‘‘ అవును..నా కెరీర్‌ను ముందుగా నేను నటిగా ఊహించుకోలేదు. అనుకోకుండా సినిమాల్లోకి వచ్చాను. కానీ ఆ తర్వాత వెండితెరపై నన్ను నేను చూసుకున్న తొలిసారి ఏదో తెలియని అనుభూతి కలిగింది.  నా నటనను ఆడియన్స్‌ ఎంజాయ్‌ చేస్తున్నప్పుడు నేను ఆశ్చర్యపోయాను. అప్పుడే నాలో ఉన్న ప్రతిభ నాకు తెలిసింది. ఒక లైఫ్‌ అంతా నటిగా కొనసాగాలని ఆ క్షణంలో నిర్ణయించుకున్నా’’ అని పేర్కొన్నారు రాశీ ఖన్నా. ఇక ఆమె కోలీవుడ్‌లో ఎంట్రీ ఇస్తున్న తొలి సినిమా ‘ఇమైక్క నొడిగల్‌’ ఈ నెల 24న విడుదల కానుంది.

తమిళసినిమా: అగ్రనటిగా రాణిస్తున్న నటి నయనతార. లేడీ సూపర్‌స్టార్‌ పట్టాన్ని కూడా అందుకున్న ఈ బ్యూటీ చేతిలో స్టార్స్‌తో నటిస్తున్న చిత్రాలు, లేడీ ఓరియెంటెడ్‌ చిత్రాలు అంటూ అరడజనుకుపైనే ఉన్నాయి. తెలుగులో చిరంజీవి సరసన సైరా నరసింహారెడ్డి, అజిత్‌కు జంటగా విశ్వాసం చిత్రాల్లో నటిస్తూ బిజీగా ఉన్న నయనతార త్వరలో కమలహాసన్‌తో ఇండియన్‌ 2 చిత్రంలో జత కట్టడానికి రెడీ అవుతోంది. అంత క్రేజ్‌ ఉన్న నటి చిత్రాలు చూడాలని సగటు ప్రేక్షకుడికి ఉంటుంది. అలాంటిది అరమ్‌ చిత్రం తరువాత ఆమె నటించిన చిత్రమేదీ తెరపైకి రాలేదు. ఇది ఆమె అభిమానులకు  కాస్త నిరాశ పరచే విషయమే. అయితే నయనతార నటించిన లేడీ ఓరియెంటెడ్‌ కథా చిత్రాలు ఇమైకా నొడిగళ్, కొలమావు కోకిల త్వరలో వరుసగా థియేటర్లలో సందడి చేయడానికి రెడీ అవుతున్నాయి. ఇమైకా నొడిగళ్‌ చిత్రంలో నయనతార సీబీఐ అధికారిగా ఒక పవర్‌ఫుల్‌ పాత్రను పోషించింది. అదేవిధంగా కొలమావు కోకిల చిత్రంలో డ్రగ్స్‌ స్మగ్లర్‌గా నటించింది. ఈ చిత్రం ఇటీవలే సెన్సార్‌ కార్యక్రమాలను పూర్తి చేసుకుంది. సెన్సార్‌బోర్డు దీనికి యూ/ఏ సర్టిఫికెట్‌ను ఇచ్చింది. నయనతార నటించిన ఈ రెండు చిత్రాలపైనా భారీ అంచనాలే నెలకొన్నాయి. వీటిలో కొలైమావు కోకిల జూలైలో తెరపైకి వచ్చే అవకాశం ఉంది. ఇమైకా నొడిగళ్‌ చిత్రాన్ని నిర్మాతలు జూలై చివరి వారంలో విడుదలకు సన్నాహాలు చేస్తున్నట్లు ఇటీవల నిర్వహించిన ఆడియో ఆవిష్కరణ వేదికపై వెల్లడించారు. మొత్తం మీద నయనతార చిత్రాలు త్వరలో వరుసగా థియేటర్లలో సందడి చేయబోతున్నాయన్నమాట.

తమిళసినిమా: నటి నయనతార గురి పెడితే లక్ష్య సాధనే అనే స్థాయికి చేరుకున్నారు. కోలీవుడ్‌లో నంబర్‌ఒన్‌ స్థానంలో వెలిగిపోతున్న ఈ బ్యూటీ అరమ్‌ చిత్రంలో కలెక్టర్‌గా నటించి సంచలన విజయాన్ని అందుకుంది. మాయ చిత్రం తరువాత నయనతార లేడీ ఓరియెంటెడ్‌ కథా చిత్రంతో హిట్‌ కొట్టిన చిత్రం అరమ్‌. పెద్ద హీరోల రేంజ్‌లో వసూళ్లు సాధిస్తున్న ఆ చిత్రం నవంబర్‌లో విడుదలై డి సెంబర్‌లో కూడా థియేటర్లలో నిలబడింది. ఇదిలా ఉంటే నయనతార జనవరిపైనా గురిపెట్టారు. స్టార్‌ చిత్రాల నెలగా భావించే జనవరిలో సంక్రాంతి, రిపబ్లిక్‌ దినోత్సవం అంటూ సినిమాల పండగ దినాలున్నాయి.ఈ తేదీలో నయనతార తన తాజా చిత్రం ఇమైకా నోడిగళ్‌ చిత్రాన్ని గురిపెట్టారు. యువ నటుడు అధర్వ కథానాయకుడిగా నటిస్తున్న ఇందులో హైదరాబాదీ బ్యూటీ రేష్మీఖన్నా కథానాయకిగా నటిస్తోంది.ఈ అమ్మడికిదే ఇక్కడ తొలి చిత్రం అవుతుంది.  బాలీవుడ్‌ ప్రముఖ దర్శకుడు అనురాగ్‌ కశ్యప్‌ ప్రతినాయకుడిగా కోలీవుడ్‌కు దిగుమతి అవుతున్నారు. ఇక ఈ చిత్రంలో నయనతార సీబీఐ ఆధికారిగా ఒక పవర్‌ఫుల్‌ పాత్రను పోషిస్తున్నారు. ఆమెకు జంటగా సక్సెస్‌ఫుల్‌ నటుడు విజయ్‌సేతుపతి కీలక పాత్రలో మెరస్తుండడం విశేషం. ఈ జంట ఇంతకు ముందు నానుమ్‌ రౌడీదాన్‌ చిత్రంతో హిట్‌ కొట్టారన్నది గమనార్హం. క్యామియో ఫిలింస్‌ పతాకంపై సీజే.జయకుమార్‌ నిర్మిస్తున్న ఈ చిత్రానికి అజయ్‌ జ్ఞానముత్తు దర్శకత్వం వహిస్తున్నారు. హిప్‌ హాప్‌ తమిళా ఆది సంగీతాన్ని, ఆర్‌డీ.రాజశేఖర్‌ ఛాయాగ్రహణం అందిస్తున్న ఈ చిత్ర షూటింగ్‌ చివరి దశకు చేరుకుందని చిత్ర వర్గాలు వెల్లడించారు.అయితే శనివారమే విజయ్‌సేతుపతి ఈ చిత్ర షూటింగ్‌లో పాల్గొన్నారట. నయనతారతో ఆయన సన్నివేశాలను చిత్రీకరిస్తున్నారు.ఈ చిత్రాన్ని జనవరిలో విడుదలకు సన్నాహాలు చేస్తున్నట్లు చిత్ర నిర్మాత వెల్లడించారు.

తమిళసినిమా: నయనతార చిత్రంలో ప్రేమించొద్దు పాటకు అమోఘ ఆదరణ లభిస్తోందంటున్నారు ఆ చిత్ర నిర్మాత. ప్రస్తుతం నటి నయనతారకున్న ఇమేజే వేరు. కథానాయకి చుట్టూ తిరిగే పాత్రలో నటిస్తూ ఆ చిత్రాల వ్యాపారాలకు క్రేజ్‌ తీసుకొస్తున్న నటి నయనతార. ప్రస్తుతం ఆమె నటిస్తున్న ఆ తరహా చిత్రాల్లో ఇమైకా నోడిగళ్‌ ఒకటి.యువ నటుడు అధర్వ కథానాయకుడిగా నటిస్తున్న ఇందులో నటి రాశీఖన్నా కథానాయకిగా నటిస్తోంది. అజయ్‌ జ్ఞానముత్తు దర్శకత్వం వహిస్తున్న ఈ చిత్రాన్ని క్యామియో ఫిలింస్‌ పతాకంపై సీజే.జయకుమార్‌ నిర్మిస్తున్నారు. హిప్‌హాప్‌ తమిళా సంగీత బాణీలు కడుతున్న ఇమైకా నోడిగళ్‌ చిత్రం చిత్రీకరణను పూర్తి చేసుకుని, నిర్మాణాంతర కార్యక్రమాల్లో బిజీగా ఉంది. ఈ చిత్రంలో కాదలిక్కాదే( ప్రేమింయచొద్దు) అనే పాటను ఇటీవల చిత్ర యూనిట్‌ విడుదల చేసింది. ఈ పాటకు ప్రేక్షకుల నుంచి అమోఘ ఆదరణ లభిస్తోందని నిర్మాత వెల్లడించారు.  హీరో తన ప్రేమ దూరం అవడానికి కారణమైన స్నేహితుడిపై అక్కసుతో ప్రేమించొద్దని పాడతాడన్నారు. చిత్రంలో ఈ పాట చాలా కొత్తగా ఉండాలని భావించిన దర్శకుడు, సంగీతదర్శకుడు జనరంజకంగా రూపొందించారని చెప్పారు. చిత్ర టీజర్, సింగిల్‌ సాంగ్‌తోనే ఇమైకా నోడిగళ్‌ చిత్రానికి ఇంత మంచి రెస్పాన్స్‌ రావడంతో చిత్రంపై అంచనాలు మరింత పెరుగుతున్నాయన్న సంతోషాన్ని నిర్మాత సీజే.జయకుమార్‌ వ్యక్తం చేశారు. త్వరలోనే చిత్ర విడుదల వివరాలను వెల్లడిస్తామని ఆయన తెలిపారు.


 హీరోయిన్లకు అభినయంతో పాటు అందం చాలా అవసరం. దాన్ని కాపాడుకోవడానికి నిరంత శారీరక శ్రమ చేస్తూనే ఉండాలి. ముఖ్యంగా టాలీవుడ్‌లో హీరోయిన్లు చాలా స్లిమ్‌గా ఉంటేనే అభిమానులు ఆదరిస్తారు. కోలీవుడ్లో అలా కాదు బబ్లీగా ఉన్నా చూసేస్తారు. కాగా హీరోయిన్‌ రాశీఖన్నా ఇతర హీరోయిన్ల కన్నా కాస్త బొద్దుగా ఉంటుంది. అయినా హీరోయిన్‌గా రాణిస్తోంది. ప్రస్తుతం చేతి నిండా చిత్రాలతో యమ బిజీగా ఉంది.
 
 తెలుగులో ఐదు, తమిళంలో ఒకటి, మలయాళంలో ఒకటి అంటూ నటించేస్తోంది. అయితే ఇప్పటి వరకూ ఇంకా కోలీవుడ్ తెరపై ప్రత్యక్షం కాలేదు. తెలుగులో జూనియర్‌ ఎన్‌టీఆర్‌ సరసన జై లవకుశ చిత్రం నటిస్తోంది. అంతేకాక రవితేజకు జంటగా టచ్‌ చేసి చూడు, వరుణ్‌తేజతో మరో చిత్రం చేస్తున్న రాశీఖన్నా, సిద్ధార్థ్‌తో సైతాన్‌ కా బచ్చా చిత్రంలో కూడా నటిస్తోంది. ఇది తమిళంలోనూ విడుదలయ్యే అవకాశం ఉంది. నయనతార ప్రధాన పాత్ర పోషిస్తున్న ఇమైకా నోడిగళ్‌ చిత్రం ద్వారా కోలీవుడ్‌కు రంగప్రవేశం చేస్తున్న రాశీఖన్నా ఇందులో అధర్వతో రొమాన్స్ చేస్తోంది.
 
 అదే విధంగా మలయాళంలో మోహన్‌లాల్‌ హీరోగా నటిస్తున్న విలన్‌ చిత్రం ద్వారా తెరంగేట్రం చేస్తోంది. కాస్త బొద్దుగా ఉండే ఆ అమ్మడిని బరువు తగ్గాలన్న దర్శక నిర్మాతల షరతులతో నాలుగు నెలలుగా డైట్ చేస్తూ సన్నబడి ఇప్పుడు మరింత అందంగా తయారైంది. రాశీఖన్నాలోని కొత్త అందాలను చూడవచ్చునన్నమాట. చూద్దాం ఆ జాన ఇమైకా నోడిగళ్‌ ఎంత అందాలను ఒలకబోస్తుందో. తను కూడా  ఈ చిత్రం కోసం చాలానే ఎదురుచూస్తోంది.


 ఇమేజ్ చట్రంలో ఇరుక్కున్న నటీనటులు ప్రయోగాత్మక చిత్రాలు, పాత్రలు చేయడానికి దాదాపు సాహసం చేయరు. కానీ, నయనతార లాంటి కొందరు ఆర్టిస్టులు మాత్రం పాత్రల ఎంపిక విషయంలో తెగువ చూపిస్తారు. ఒకవైపు రొటీన్ కమర్షియల్ సినిమాలు, మరోవైపు లేడీ ఓరియంటెడ్ మూవీస్ చేస్తున్నారు. అది మాత్రమే కాదు.. కథ నచ్చితే తమిళ నటుడు శివకార్తికేయన్ వంటి అప్‌కమింగ్ హీరోల సరసన నటిస్తున్నారు. అప్‌కమింగ్ డెరైక్టర్స్‌తో కూడా సినిమాలు చేయడానికి వెనకాడడం లేదు.
  
  ఇప్పటికే చేతిలో కథానాయిక ప్రాధాన్యంగా సాగే ‘దొర’ అనే సినిమా ఉంది. ఇప్పుడు మరో సినిమా ఒప్పుకున్నారు. ‘కన్ ఇమైక్క నొడిగళ్’ అనేది ఈ చిత్రం టైటిల్. అంటే.. రెప్పపాటు కాలం అని అర్థం. ‘డీమాంట్ కాలనీ’ అనే చిత్రం ద్వారా దర్శకునిగా పరిచయమైన ఆర్. అజయ్ జ్ఞానముత్తుకి ఇది రెండో సినిమా. అయినప్పటికీ అతను చెప్పిన కథ నచ్చి, నయన అంగీకరించేశారు. ఈ చిత్రకథ రాసుకున్న తర్వాత నయనతార అయితే బాగుంటుందని అజయ్ అనుకున్నారట. ఒప్పుకుంటారో లేదో అనే సందేహంతోనే కథ చెప్పారట.
  
   కథ విన్నాక ఈ సినిమా టైటిల్‌లా కళ్లు మూసి తెరిచే లోపు ఈ బ్యూటీ గ్రీన్ సిగ్నల్ ఇచ్చేశారట. ఇప్పటివరకూ చేయని పాత్రను నయనతార ఇందులో చేస్తున్నారని దర్శకుడు పేర్కొన్నారు. కాగా, ఈ చిత్రంలో అథర్వ మురళి హీరోగా నటించనున్నారు. అతని సరసనే నయనతార నాయికగా నటిస్తారనే వార్త ప్రచారంలో ఉంది. అది నిజం కాదనీ, అథర్వ సరసన వేరే నాయికను తీసుకుంటామని దర్శకుడు స్పష్టం చేశారు.