అడ్వాన్స్‌డ్‌ ఎరాలో ఉన్నాం.. మీట నొక్కే వేగంలో పనులు అయిపోతున్నాయి..  అయినా స్త్రీకి సంబంధించిన విషయంలో సమాజపు ఆలోచనలే  ఇంకా ప్రగతి పంథా పట్టలేదు! అందుకే ఇప్పటికీ ఆమెకు భద్రత లేదు!  ఆమె సేఫ్టీకి సాంకేతికత యాప్‌ల ద్వారా ఇస్తున్న భరోసా మనసావాచాకర్మణా సమాజం ఇవ్వడం లేదు! ఆ స్పృహను సాధించే వరకు..   మహిళ ఆ సేఫ్టీ యాప్‌లనే నమ్ముకోక తప్పదు!! అంతర్జాతీయ మహిళా దినోత్సవం.. యూఎన్‌ఓ ఈ ఏడాది ప్రకటించిన థీమ్‌.. డిజిటాల్‌: ఇన్నోవేషన్‌ అండ్‌ టెక్నాలజీ ఫర్‌ జెండర్‌ ఈక్వాలిటీ (DigtALL: Innovation and technology for gender equality). . అవును ఏ ఆవిష్కరణ అయినా.. సాంకేతికతైనా స్త్రీ, పురుష సమానత్వాన్నే చాటాలి. ఈ సమానత్వ పోరు నేటిది కాదు.. దాదాపు 115 ఏళ్ల నాటిది. నాడు అమెరికాలో గార్మెంట్‌ ఇండస్ట్రీలో ప్రమాదరకమైన పని పరిస్థితులు.. స్త్రీల పట్ల వివక్ష.. అసమాన వేతనాలు వంటి విషయాల్లో మార్పు కోసం మహిళల సమ్మెతో మొదలైన పోరాటం.. అన్ని రంగాల్లో.. అన్ని విషయాల్లో జెండర్‌ ఈక్వాలిటీ దిశగా ఇంకా కొనసాగుతూనే ఉంది. శతాబ్దం మారింది.. అయినా సమానత్వ సాధన కోసం ఇంకా థీమ్స్‌ను సెట్‌ చేసుకునే దశ, దిశలోనే ఉన్నాం. ‘కాలం మారింది.. ఇప్పుడు అన్ని రంగాల్లో స్త్రీలు కనపడుతున్నారు.. వినపడుతున్నారు కదా!’ అని మనకు అనిపించినప్పుడల్లా.. ఒక్కసారి స్త్రీల మీద జరుగుతున్న క్రైమ్‌ రికార్డ్స్‌ను ముందేసుకుందాం! అన్ని రంగాల్లో స్త్రీలు ఉన్నారు కదా అని ఎత్తుకున్న తల దించేసుకుంటుంది. స్వేచ్ఛ ఉంటేనే సమానత్వం సిద్ధిస్తుంది. భద్రత ఉంటేనే ఆ స్వేచ్ఛకు అర్థం ఉంటుంది. ఇంట్లో హింస.. బయట హింస.. ఆఖరకు ఆడపిల్ల తల్లి గర్భంలో ఉన్నా హింసే. ఈ వాక్యాలు రొడ్డకొట్టుడులా అనిపిస్తున్నాయి. అంటే పరిస్థితిలో ఇంకా మార్పు రాలేదనే కదా! అందుకే ఇన్నోవేషన్‌ అండ్‌ టెక్నాలజీ ఫర్‌ జెండర్‌ ఈక్వాలిటీ సాధించాలంటే ముందు ఆడపిల్ల సురక్షితంగా ఉండాలి. ఇంటా.. బయటా బేఫికర్‌గా మసలగలగాలి! పోలీసులు, చట్టాలు ఉన్నాయి కదా అని తట్టొచ్చు! ‘నాకు సేఫ్టీ లేదు.. భయంగా ఉంది’ అని అమ్మాయి చెబితేనే కదా.. పోలీసులు స్పందించేది. ఆ అభద్రతను రిజిస్టర్‌ చేస్తేనే కదా.. రక్షణ చట్టాలు వచ్చేవి. ఇదంతా జరగాలంటే సమాజంలో అవగాహన రావాలి. అమ్మాయిలను చూసే తీరు.. వాళ్లతో ప్రవర్తించే పద్ధతులు మారాలి. వాళ్ల పట్ల మర్యాద పెరగాలి. వీటన్నిటికీ మగపిల్లలకు జెండర్‌ సెన్సిటివిటీ ఎడ్యుకేషన్‌ ఎంత అవసరమో.. తనున్న పరిస్థితి పట్ల ఎరుక.. దాన్నుంచి బయటపడే చొరవ అమ్మాయిలకూ అంతే అవసరం. ముందు తన చుట్టూ ఉన్న ప్రమాదాన్ని గుర్తించే ధైర్యం.. తెగువ చేయాలి. అందుకు ఇప్పుడు సాంకేతికత బోలెడంత సాయాన్ని అందిస్తోంది. యాప్‌ల రూపంలో! అలా ఫోన్‌లో తప్పకుండా డౌన్‌లోడ్‌ చేసుకోవాల్సిన విమెన్‌ సెక్యూరిటీ యాప్‌లు కొన్ని ఇక్కడ..   దిశ ఇది ఆంధ్రప్రదేశ్‌ పోలీస్‌ కమ్యూనికేషన్‌ వింగ్‌ రూపొందించిన ఆండ్రాయిడ్‌ యాప్‌. ఫోన్‌లో యాప్‌ను ఓపెన్‌చేసి.. మూడుసార్లు షేక్‌ చేయగానే ఫోన్‌లోని జీపీఎస్‌ యాక్టివేట్‌ అయ్యి.. దగ్గర్లో ఉన్న పోలీస్‌ స్టేషన్‌లు, డ్యూటీలో ఉన్న పోలీసులను అలర్ట్‌ చేస్తుంది లొకేషన్‌ను పంపించి. ఒకవేళ ఫోన్‌ షేక్‌ చేయకుండా యాప్‌లోని ఎస్‌ఓఎస్‌ బటన్‌ను నొక్కినా.. మీ సమాచారం మీరున్న ప్రాంతానికి దగ్గర్లోని పోలీస్‌ స్టేషన్‌లు, ఆన్‌ డ్యూటీ పోలీసులకు చేరుతుంది. వెంటనే సహాయ సిబ్బంది మీ దగ్గరకు చేరుకుంటారు. ఈ యాప్‌ సహాయంతో 100 నంబర్, లేదా ఈ యాప్‌లో ఉన్న ఇతర హెల్ప్‌ లైన్‌ నంబర్స్‌కూ కాల్‌ చేయవచ్చు. ఈ యాప్‌ ప్రమాదస్థలికి దగ్గర్లోని పోలీస్‌ స్టేషన్ల వివరాలనే కాక.. ఇతర సేఫ్టీ ప్లేసెస్, ఆసుపత్రులు, ఇతర హెల్ప్‌లైన్‌ నంబర్లనూ అందిస్తోంది.  విమెన్‌ సేఫ్టీ (Women Safety)  ఈ యాప్‌లోని బటన్‌ను ఒక్కసారి తడితే చాలు.. మీరు ప్రమాదంలో చిక్కుకున్న సంగతి.. లొకేషన్‌ గూగుల్‌ మ్యాప్‌ లింక్‌ సహా మీ ఫోన్‌లో మీరు ఫీడ్‌ చేసుకున్న ఎమర్జెన్సీ నంబర్లకు చేరిపోతుంది. ఇందులోని బటన్లు మూడు రంగుల్లో ఉంటాయి. అంటే మీరున్న పరిస్థితి తీవ్రతను బట్టి ఆయా రంగుల్లో ఉన్న బటన్స్‌ను నొక్కాలి.  షీ టీమ్స్‌ మహిళల భద్రత కోసం తెలంగాణ రాష్ట్రం షీ టీమ్స్‌ను ఏర్పాటు చేసింది. ఈ వింగ్‌ 2014లో ప్రారంభమైంది. తొలుత హైదరాబాద్‌లోని సైబరాబాద్‌ పరిధికే వీరి సేవలు పరిమితమైనా.. తర్వాత ఏడాదికి అంటే 2015కల్లా  రాష్ట్రంలోని ప్రతి జిల్లాలోనూ షీ టీమ్స్‌ను ఏర్పాటు చేశారు. ప్రస్తుతం తెలంగాణ అంతటా 331 షీ టీమ్స్‌ పనిచేస్తున్నాయి.  112 యాప్‌ కేంద్ర ప్రభుత్వం రూపొందించిన ఆల్‌ ఇన్‌ వన్‌ యాప్‌ ఇది. ఉపయోగించడం చాలా తేలిక. ప్రమాదంలో ఉన్నప్పుడు.. ఈ యాప్‌ను సింగిల్‌ ట్యాప్‌ చేస్తే చాలు.. మీరున్న డేంజర్‌ సిచ్యుయేషన్‌కు సంబంధించి అలారమ్‌ మోగుతుంది. తక్షణమే సహాయక చర్యల సిబ్బందీ స్పందిస్తారు. ఇది ఆండ్రాయిడ్, ఐఓఎస్‌ రెండు ఫోన్‌లకూ సెట్‌ అవుతుంది. ఈ 112 యాప్‌ మొత్తం 23 రాష్ట్రాలు, కేంద్రపాలిత ప్రాంతాల్లో పనిచేస్తుంది. కీ ఫీచర్స్‌ ఏంటంటే.. ఎమర్జెన్సీ అలారమ్‌ను పంపించేందుకు ఇందులో ఆడియో/విజువల్‌ మీడియా ఉంటుంది. 24 గంటలూ ఈ యాప్‌ ద్వారా భద్రతా సేవలు పొందవచ్చు. అదనంగా.. సంఘటనల విచారణలోనూ తనవంతు సాయం అందిస్తుంది.  మై సేఫ్టీపిన్‌ (My SafetyPin) డేటా మాపింగ్‌ టెక్నిక్స్‌ సాయంతో బహిరంగ ప్రదేశాల్లో మహిళలు సేఫ్‌గా ఫీలయ్యేందుకు సాయపడుతుందీ అప్లికేషన్‌. వెలుతురు, వైశాల్యం, సెక్యూరిటీ గార్డ్స్, కాలిబాట, ప్రజా రవాణా వ్యవస్థ, జెండర్‌ యూసేజ్, భావోద్వేగాలు.. మొదలైన తొమ్మిది అంశాలను పరిగణనలోకి తీసుకుని ఈ యాప్‌ను రూపొందించారు. ఒకవేళ మీరు రాంగ్‌రూట్‌ని ఎంచుకున్నా ఇది వెంటనే మీ కుటుంబ సభ్యులను అలర్ట్‌ చేస్తుంది. భద్రమైన దారిని ఎంచుకునేందుకు మీకు తోడ్పడుతుంది. మీరు తప్పిదారి అంత భద్రతలేని ప్రాంతంలోకి వెళ్లినా.. ఆ సమాచారాన్ని మీ కుటుంబ సభ్యులకు అందజేస్తుంది. సెర్చింగ్‌లో మీ చుట్టుపక్కల ఉన్న ఆసుపత్రులు, షాపింగ్‌ కాంప్లెక్స్‌లు.. ఇతర సౌకర్యాల గురించీ మీకు సమాచారం ఇస్తుంది. దేశంలోని నగరాలను సురక్షిత నగరాలుగా మార్చడమే ‘మై సేఫ్టీపిన్‌’ లక్ష్యం.  షీరోస్‌ ఇప్పుడున్న లీడింగ్‌ విమెన్‌ యాప్స్‌లో యూనిక్‌ యాప్‌ ఇది. మహిళల భద్రతకు సంబంధించే కాదు కెరీర్‌ గైడెన్స్, ఫ్రీ హెల్ప్‌ లైన్, రెసిపీలు మొదలు బ్యూటీ టిప్స్, ఇంట్లో ఉండే పనిచేసుకునే ఉపాధి అవకాశాల నుంచి కొత్త కొత్త పరిచయాలు, ఉచిత న్యాయ సలహాల వరకు మహిళలకు అవసరమైన చాలా అంశాల్లో ఈ యాప్‌ సహాయమందిస్తుంది. మీ నెలసరినీ ట్రాక్‌ చేస్తూ సూచనలిస్తుంది. అన్నిటికన్నా ముఖ్యమైనది దీని గోప్యత, భద్రత. మీ ఫొటోలు, వీడియోలు మొదలు మీ వ్యక్తిగత సమాచారాన్నంత గోప్యంగా.. భద్రంగా ఉంచుతుంది. దీని సేవలను ఇటు ఆండ్రాయిడ్, అటు ఐఓఎస్‌.. రెండు ఫోన్‌లలోనూ పొందవచ్చు.   స్మార్ట్‌ 24 గీ సెవెన్‌ ( స్మార్ట్‌ 24 X7) దీనితో ఇరవైనాలుగు గంటల కస్టమర్‌ సర్వీస్‌ సెంటర్‌తో సపోర్ట్‌ పొందవచ్చు. ఇది ఇటు యాపిల్‌ అటు ఆండ్రాయిడ్‌ ఫోన్లలో సెట్‌ అవుతుంది. ఆపదలో ఉన్న మహిళలు తమ దీని ద్వారా ఎమర్జెన్సీ అలర్ట్స్‌ను కుటుంబ సభ్యులు, స్నేహితులతోపాటు చుట్టుపక్కలనున్న ఫైర్‌ స్టేషన్, పోలీస్‌ స్టేషన్, అంబులెన్స్‌ సర్వీసెస్‌కూ పంపిచవచ్చు. వాటి సహాయం పొందవచ్చు.ఆపదలో ఉన్న వాళ్లు బటన్‌ నొక్కగానే ఆ ఫోన్‌లోని కాంటాక్ట్‌ లిస్ట్‌లో వాళ్లు సేవ్‌ చేసుకున్న అయిదు ఎమర్జెన్సీ నంబర్లకు క్షణాల్లో సమాచారం వెళ్తుంది. ఒకవేళ జీపీఆర్‌ఎస్‌ అందుబాటులో లేకపోతే.. ఎస్‌మ్మెస్‌లు వెళ్తాయి. స్మార్ట్‌ 24 ఇంటూ సెవెన్‌ కస్టమర్‌ కేర్‌ సెంటర్‌ వాళ్లూ  వెంటనే కాల్‌ చేస్తారు.  బీసేఫ్‌ (bSafe) మహిళల మీద జరుగుతున్న హింస, లైంగిక వేధింపులు, లైంగిక దాడులను నివారించడమే కాక దురదృష్టవశాత్తు ఇలాంటి నేరాలు జరిగితే.. సంబంధించిన సాక్ష్యాధారాలనూ అందిస్తుంది. వాయిస్‌ యాక్టివేషన్, లైవ్‌ స్ట్రీమింగ్, ఆడియో, వీడియో రికార్డింగ్, ఫాల్స్‌ కాల్, ఫాలో మీ, లొకేషన్‌ ట్రాకింగ్‌ వంటి ఫీచర్స్‌తో మహిళల భద్రతకు భరోసానిస్తోంది. బటన్‌ను ఒక్కసారి నొక్కితే చాలు.. ఎస్‌ఓఎస్‌ సిగ్నల్‌ను సెండ్‌ చేసేస్తుంది. దీని ద్వారా.. అత్యవసర వేళల్లో ఫొటోలు తీసుకుని.. వాటిని పోస్ట్‌ చేయొచ్చు. మీరున్న చోటును మీ కుటుంబ సభ్యులకు తెలియజేస్తుంది. దీన్ని ఇటు ఆండ్రాయిడ్, అటు ఐఓఎస్‌ రెండు ఫోన్లలోనూ డౌన్‌లోడ్‌ చేçసుకోవచ్చు.  నిర్భయ ఇది యూజర్‌ ఫ్రెండ్లీ యాప్‌. ఫోన్‌లో డౌన్‌లోడ్‌ అయ్యాక.. ఒక్కసారి బటన్‌ను ప్రెస్‌ చేయగానే యాక్టివేట్‌ అవుతుంది. ఒకవేళ బటన్‌ నొక్కడం వీలు పడకపోతే ఫోన్‌ షేకింగ్‌ ద్వారా, ఎస్సెమ్మెస్‌ల ద్వారా.. ఫోన్‌ కాల్‌ ద్వారా కూడా  మన పరిస్థితిని తెలియజేయవచ్చు. అయితే వీటికి డేటా ప్లాన్, జీపీఎస్‌ అవసరం ఉంటాయి. ఆపదలో ఉన్నవారి లొకేషన్‌ను ఇది ప్రతి రెండు గంటలు.. లేదా ప్రతి మూడువందల మీటర్లకు మారినప్పుడల్లా  ఎమర్జెన్సీ కాంటాక్ట్స్‌కు పంపిస్తూంటుంది.  ఎస్‌ఓఎస్‌ – స్టే సేఫ్‌  ఇది ఆండ్రాయిడ్‌ యాప్‌. ఫోన్‌లో ఈ యాప్‌ యాక్టివేట్‌ అయితే చాలు.. ఫోన్‌ లాక్‌ మోడ్‌లో ఉన్నా ఈ యాప్‌ను ఉపయోగించుకోవచ్చు. ఆపదలో ఉన్నప్పుడు ఫోన్‌ను అన్‌లాక్‌ చేసుకునేంత టైమ్‌ ఉండదు. వెంటనే స్పందించాలి. అందుకే ఈ యాప్‌ను డౌన్‌లోడ్‌ చేసుకోవడం మంచిది. ఆపదలో ఉన్నామని తెలియగానే ఫోన్‌ను రెండుమూడు సార్లు షేక్‌ చేయాలి.. అంతే.. మనకు సంబంధించిన సమాచారం.. మనమున్న లొకేషన్‌ సహా ఎమర్జెన్సీ కాంటాక్ట్‌కి వెళ్లిపోతాయి. ఒకవేళ షేక్‌ చేయడం తికమక వ్యవహారంలా అనిపిస్తే ఈ యాప్‌ హోమ్‌ బటన్‌ను ప్రెస్‌ చేసినా చాలు.. మన సమాచారం, లొకేషన్‌ సహా మప ఫోన్‌ బ్యాటరీ ఏ స్థితిలో ఉందో కూడా ఎమర్జెన్సీ కాంటాక్ట్‌కి చెప్పేస్తుంది. అంతేకాదు ఆడియో రికార్డింగ్‌నూ పంపుతుంది.  రక్ష (Raksha) భద్రతతో కూడిన స్వావలంబన.. ఈ యాప్‌ లక్ష్యం. అందుకే అహర్నిశలూ అందుబాటులో ఉంటుంది. దీన్ని ఉపయోగించడమూ తేలికే. మీరు ఆపదలో చిక్కుకున్నారని మీకు అనిపించిన  వెంటనే యాప్‌లో సూచించిన బటన్‌ను ప్రెస్‌ చేస్తే చాలు.. మీరున్న లొకేషన్‌ సహా మీకు సంబంధించిన అలర్ట్స్‌ అన్నీ మీ కుటుంబ సభ్యులకు చేరుతాయి మీ వాళ్ల ఫోన్‌ నంబర్ల ద్వారా.  నెట్‌వర్క్‌ లేకపోయినా.. ఈ యాప్‌ స్పందిస్తుంది. వాల్యూమ్‌ కీని మూడు సెకండ్ల పాటు ప్రెస్‌ చేస్తే చాలు.. మీ సమాచారాన్ని మీ కుటుంబ సభ్యులకు అందజేస్తుంది. ఇందులో ఎస్‌ఓఎస్‌ కూడా ఉన్నందున.. ఇంటర్నెట్‌ లేని ఏరియాల్లో .. ఎస్సెమ్మెస్‌ ద్వారా మీకు సంబంధించిన సమాచారాన్ని మీ కుటుంబ సభ్యులకు చేరవేస్తుంది.  ఐయామ్‌ శక్తి (Iam Shakthi) ఇదీ యూజర్‌ ఫ్రెండ్లీనే. ఫోన్‌లోని పవర్‌ బటన్‌ను రెండు సెకండ్ల వ్యవధిలో అయిదుసార్లు నొక్కితే చాలు.. ఫోన్‌లో ముందుగా సెట్‌ చేసిపెట్టుకున్న ఎమర్జెన్సీ కాంటాక్ట్స్‌కు లొకేషన్‌ సహా సమాచారం వెళుతుంది. బటన్‌ నొక్కిన వెంటనే లొకేషన్‌ను ట్రేస్‌ చేయలేకపోతే.. ట్రేస్‌ అయిన వెంటనే మళ్లీ అలర్ట్‌ మెసేజెస్‌ను పంపిస్తుంది.  విత్‌యు (WithYou) ఇది కూడా ‘స్పాట్‌ఎన్‌సేవ్‌’ లాంటిదే. ఆపదలో ఉన్నప్పుడు ఫోన్‌లోని పవర్‌ బటన్‌ను రెండుసార్లు నొక్కితే .. మనకు సంబంధించిన సమాచారమంతా లొకేషన్‌ సహా.. అంతకుముందే సెట్‌ చేసిపెట్టుకున్న ఎమర్జెన్సీ కాంటాక్ట్స్‌కు వెళుతుంది.. ప్రతి రెండు నిమిషాలకు ఒకసారి.  స్పాట్‌ఎన్‌సేవ్‌ ఫీల్‌ సెక్యూర్‌ ఇప్పుడున్న అన్ని సేఫ్టీ యాప్‌లోకెల్లా అడ్వాన్స్‌డ్‌ యాప్‌ ఇది. దీన్ని ఫోన్‌లో డౌన్‌లోడ్‌ చేసుకోవాల్సిన అవసరం లేదు. వాచీలా మణికట్టుకు ధరిస్తే చాలు. అవును రిస్ట్‌ బ్యాండ్‌లా! డేంజర్‌ సిచ్యుయేషన్‌లో ఉన్నప్పుడు మీ ఫోన్‌ పవర్‌ బటన్‌ను రెండుసార్లు ప్రెస్‌ చేయాలి అంతే.. రిస్ట్‌బ్యాండ్‌లోని యాప్‌ యాక్టివేట్‌ అయ్యి మీరు ముందే సెట్‌ చేసి పెట్టుకున్న మీ ఎమర్జెన్సీ ఫోన్‌ నంబర్స్‌కి.. ప్రతి రెండు నిమిషాలకు ఒకసారి.. మీరున్న లొకేషన్‌ సహా వివరాలను అందిస్తూంటుంది. ఒకవేళ మీరు ఫోన్‌ను ఉపయోగించే స్థితిలో లేకపోతే రిస్ట్‌బ్యాండ్‌కున్న బటన్‌ను రెండుసార్లు ప్రెస్‌ చేసినా చాలు బ్లూటూత్‌ సాయంతో యాప్‌ పనిచేయడం మొదలుపెడుతుంది. ఇటు చూడండీ..  ఎన్‌సీఆర్‌బీ (నేషనల్‌ క్రైమ్‌ రికార్డ్స్‌ బ్యూరో)–2021 నివేదిక ప్రకారం.. దేశంలో మహిళల మీద జరుగుతున్న హింస 2020 సంవత్సరం కన్నా 2021లో 15.3 శాతం పెరిగింది. 2020లో 3,71,503 కేసులు నమోదైతే 2021లో 4,28,278 కేసులు నమోదయ్యాయి. ప్రతి లక్ష జనాభాకు ఈ హింసాత్మక సంఘటనల రేటు 64.5 శాతంగా నమోదైంది. 2020లో ఇది 56.5 శాతం. వీటిల్లో 31.8 శాతం గృహహింస కేసులే. మిగతావన్నీ వేధింపులు, కిడ్నాప్‌లు, లైంగికదాడుల కేసులు. మహిళల మీద జరుగుతున్న హింసలో అసోం రాష్ట్రం మొదటి స్థానపు అప్రతిష్ఠను మూటగట్టుకుంది. తర్వాత స్థానాల్లో ఒడిశా, హరియాణా, తెలంగాణ, రాజస్థాన్‌లు నిలిచి ఆ అవమానపు భారాన్ని మోస్తున్నాయి. షాకింగ్‌ ఏంటంటే.. గతంలో కన్నా తెలంగాణలో మహిళల మీద హింస పెరిగినట్టు చూపిస్తోంది ఎన్‌సీఆర్‌బీ. అత్యంత తక్కువ కేసులతో నాగాలాండ్‌ కాస్త మెరుగైన రాష్ట్రంగా కనిపిస్తోంది. మూడేళ్లుగా ఇది ఈ రికార్డ్‌నే మెయిన్‌టైన్‌ చేస్తోంది. హింస పెట్రేగుతున్న నగరాల్లో ఢిల్లీ, ముంబై, బెంగళూరు, హైదరాబాద్‌లు నిలిచి తలవంచుకుంటున్నాయి.  2021 సంవత్సరం CEOWORLD మ్యాగజీన్‌ ప్రచురించిన నివేదిక ప్రకారం.. మహిళల భద్రత విషయంలో ప్రపంచంలోకెల్లా తొలి స్థానంలో నిలిచిన దేశం నెదర్లాండ్స్‌. రెండో స్థానంలో నార్వే, మూడో స్థానంలో స్వీడన్‌లు ఉన్నాయి. డెన్మార్క్‌ నాలుగో స్థానాన్ని పొందింది. చిత్రమేంటంటే.. అందరికీ పెద్దన్నలా వ్యవహరించే అమెరికా మొదటి పది స్థానాల్లో ఎక్కడా లేదు. 20వ స్థానంలో ఉంది! యునైటెడ్‌ కింగ్‌డమ్‌ది పదిహేడో స్థానం. మన గురించీ చెప్పుకోవాలి కదా.. మహిళల భద్రత విషయంలో మన పరువుకు దక్కిన ప్లేస్‌.. నలభై తొమ్మిది!   

సాక్షి, హైదరాబాద్‌: గ్రేటర్‌ నగరంలో మహిళల సదుపాయార్థం ఇప్పటికే షీ టాయ్‌లెట్లు, మొబైల్‌ టాయ్‌లెట్లు వంటివి అందుబాటులోకి తెచ్చిన యంత్రాంగం తాజాగా ఎలక్ట్రిక్‌ వాహనాల మొబైల్‌ టాయ్‌లెట్లను అందుబాటులోకి తెచ్చింది. కేంద్ర హోం మంత్రిత్వశాఖ వివిధ మెట్రో నగరాల్లో సేఫ్‌ సిటీ ప్రాజెక్ట్‌ కింద మహిళల రక్షణ, భద్రతలకు సంబంధించిన సదుపాయాలు, ఏర్పాట్ల కోసం ‘నిర్భయ’ ఫండ్స్‌ నుంచి  నిధులు అందజేస్తోంది. అలా అందిన నిధులతో మహిళల మొబైల్‌ టాయ్‌లెట్ల కోసం ఎలక్ట్రిక్‌ వాహనాలు సమకూర్చుకున్న పోలీసు శాఖ.. వాటి నిర్వహణను జీహెచ్‌ఎంసీకి అప్పగించింది. గ్రేటర్‌ నగరంలోని మూడు కమిషనరేట్ల పరిధిలోని ఆరు జీహెచ్‌ఎంసీ జోన్లలో వీటిని ఉంచారు. సికింద్రాబాద్‌ జోన్‌లో 3 వాహనాలు, ఎబీనగర్‌లో జోన్‌లో 3, ఖైరతాబాద్‌జోన్‌లో 2, చారి్మనార్‌ జోన్‌లో 2, శేరిలింగంపల్లి, కూకట్‌పల్లి జోన్లలో ఒక్కొక్కటి చొప్పున ఈ ఎలక్ట్రిక్‌ మొబైల్‌ బస్సులను ఉంచినట్లు అధికారులు పేర్కొన్నారు. మహిళలు ఎక్కువగా సంచరించే ప్రాంతాల్లో వీటిని ఉంచనున్నట్లు పేర్కొన్నారు. ట్యాంక్‌బండ్, ధర్నాచౌక్, చార్మినార్, సికింద్రాబాద్‌ రైల్వేస్టేషన్, ప్రగతిభవన్, అసెంబ్లీ, గచ్చిబౌలి జంక్షన్, రాజేంద్రనగర్, బాలానగర్, ఎల్‌బీనగర్, ఉప్పల్‌  తదితర ప్రాంతాల్లో మహిళల రద్దీని బట్టి అందుబాటులో ఉంచనున్నట్లు  అధికారులు తెలిపారు. అన్ని వాహనాల్లో  చంటిపిల్లలకు పాలిచ్చేందుకు గదితోపాటు శానిటరీ నాప్‌కిన్స్‌ వంటివి ఉంటాయని పేర్కొన్నారు.   షీ గెస్ట్‌హౌస్‌..  సేఫ్‌సిటీ ద్వారా అందే నిధులతో నగరంలో మహిళా యాత్రికుల సౌకర్యార్థం గెస్ట్‌హౌస్‌ను కూడా నిర్మించనున్నారు. నాంపల్లి సరాయి వద్ద 1900 చదరపుగజాల విస్తీర్ణంలో పార్కింగ్‌ సదుపాయంతోపాటు అయిదంతస్తులతో నిర్మించేందుకు జీహెచ్‌ఎంసీ పాలకమండలి  ఇదివరకే ఆమోదం తెలిపింది. మొత్తం 187 బెడ్స్‌ కలిగి ఉండే గెస్ట్‌హౌస్‌లో సింగిల్‌ బెడ్స్, షేరింగ్‌ బెడ్స్‌ ఉంటాయి. గెస్ట్‌హౌస్‌లో ఏసీతోపాటు వైఫై, లాకర్లు, లిఫ్టులు, ఇంటర్నెట్‌ కియోస్క్‌లు, ఎమర్జెన్సీ క్లినిక్‌ తదితర సదుపాయాలుంటాయి. అంచనా వ్యయం రూ.11 కోట్లు.    (చదవండి: ‘ఫార్మా’లిటీస్‌ దందా! )

లక్నో: ఉత్త‌ర ప్ర‌దేశ్‌లో మ‌రో నిర్భ‌య ఉదంతం వెలుగు చూసింది. క‌దులుతున్న బ‌స్సులో మ‌హిళ అత్యాచారానికి గురైంది. పోలీసులు తెలిపిన వివ‌రాల ప్ర‌కారం.. 25 ఏళ్ల మ‌హిళ త‌న ఇద్ద‌రు పిల్ల‌ల‌ను తీసుకుని బుధ‌వారం ప్ర‌తాప్‌ఘ‌ర్ నుంచి నోయిడా వెళ్లేందుకు ప్రైవేటు బ‌స్సు ఎక్కింది. ఈ క్ర‌మంలో ఆమెపై క‌న్నేసిన ఇద్ద‌రు బ‌స్సు డ్రైవ‌ర్లు ఆమెను వెన‌క సీటులో కూర్చోమ‌న్నారు. అనంత‌రం మ‌హిళ‌ను చంపుతామ‌ని బెదిరిస్తూ క‌దులుతున్న‌ బ‌స్సులో ఆమెపై అత్యాచారానికి పాల్పడ్డారు. నోయిడాలో బ‌స్సు దిగిన వెంట‌నే ఆమె భ‌ర్త స‌హకారంతో పోలీసుల‌కు ఫిర్యాదు చేసింది. (‘నిర్భయ’దోషులకు ఉరి) ఈ ఘ‌ట‌న‌పై ఐపీసీ సెక్ష‌న్ 376, 506 కింద పోలీసులు కేసు న‌మోదు చేశారు. దారుణానికి పాల్ప‌డ్డ నిందితుల్లో ఒక‌రిని అదుపులోకి తీసుకోగా, మ‌రో నిందితుడి కోసం గాలింపు చేప‌ట్టారు. అనంత‌రం బ‌స్సును స్వాధీనం చేసుకున్నారు. ల‌క్నో- మ‌ధుర మ‌ధ్య మ‌హిళపై లైంగిక దాడికి పాల్ప‌డి ఉంటార‌ని పోలీసులు భావిస్తున్నారు. మ‌హిళ‌ను వైద్య ప‌రీక్ష‌ల నిమిత్తం ఆసుప‌త్రికి త‌ర‌లించారు. (అక్రమ దత్తత: బాలుడి దీనగాద)

సాక్షి, న్యూఢిల్లీ: దిశ నిందితుల ఎన్‌కౌంటర్‌పై దేశ వ్యాప్తంగా హర్షాతిరేకాలు వ్యక్తమవుతున్నాయి. దిశ అత్యాచార ఘటనపై దేశ వ్యాప్తంగా తీవ్ర ఆగ్రహావేశాలు వ్యక్తమవడంతో కేసు విచారణలో పోలీసులు ప్రత్యేక దృష్టిని సారించిన విషయం తెలిసిందే. ఈ క్రమంలోనే విచారణలో భాగంగా దిశ మృతదేహాన్ని కాల్చిన చటాన్‌పల్లి అండర్‌పాస్‌ ప్రాంతంలో క్రైమ్‌ సీన్‌ను రీకన్‌స్ట్రక్షన్‌ చేస్తుండగా పారిపోయేందుకు ప్రయత్నించారు. దీంతో నలుగురు నిందితులను పోలీసులు కాల్చిచంపారు. తాజా ఘటనపై నిర్భయ తల్లి ఆశాదేవి స్పందించారు. దిశకు న్యాయం జరిగింది, కానీ నిర్భయ పరిస్థితి ఏంటని ప్రశ్నించారు. ‘దిశ చనిపోయిన ఎనిమిది రోజుల్లోనే పోలీసులు న్యాయం చేశారు. కానీ నా బిడ్డ చనిపోయి ఏడేళ్లు అవుతోంది. అయినా కనీస న్యాయం జరగలేదు. ఏడేళ్లుగా కోర్టుల చుట్టూ తిరుగుతూనే ఉన్నాను. ఉరిశిక్ష పడింది కానీ అది ఇంత వరకు అమలు కాలేదు. శిక్ష అమలు జరిగే వరకు పోరాడుతూనే ఉంటా. దిశ కేసులో పోలీసుల తీరును స్వాగతిస్తున్నా. ఎన్‌కౌంటర్‌ జరిపిన పోలీసులపై ప్రభుత్వం ఎలాంటి చర్యలను తీసుకోవద్దు. ఆమె ఆత్మకు ఎట్టకేలకు శాంతి జరిగింది’ అని అన్నారు. దేశ రాజధాని ఢిల్లీలో 2012 డిసెంబర్‌ 15న నిర్భయపై  ఆరుగురు వ్యక్తులు అత్యాచారం జరిపిన విషయం తెలిసిందే. అనంతరం చికిత్స పొందుతూ ఆమె మృతి చెందింది. దీనిపై విచారణ జరిపిన ప్రత్యేక కోర్టు నిందితులకు ఉరిశిక్ష విధించగా.. నిందితుల్లో ఒకరైన రామ్‌సింగ్‌ జైల్లోనే ఆత్మహత్యకు పాల్పడ్డాడు.  చదవండి: దిశ నిందితుల ఎన్‌కౌంటర్‌ దిశను చంపిన దగ్గరే ఎన్‌కౌంటర్‌.. మా బిడ్డకు న్యాయం జరిగింది: దిశ తల్లిదండ్రులు

సాక్షి, న్యూఢిల్లీ: రాష్ట్ర వ్యాప్తంగా సంచలనం రేపిన వెటర్నరీ డాక్టర్‌ ప్రియాంకారెడ్డి దారుణ హత్యపై నిర్భయ తల్లి ఆశాదేవి స్పందించారు. హైదరాబాద్‌ నడిబొడ్డున ఇలాంటి ఘటన జరగటం చాలా బాధాకరమన్నారు. ఆడపిల్లలు బయటకు వెళ్తే తిరిగి వచ్చే పరిస్థితి దేశంలో లేకుండా పోయిందని తీవ్ర ఆవేదన వ్యక్తం చేశారు. ఇంత పాశవిక దాడులు జరుగుతుంటే పోలీసులు, అధికార వ్యవస్థ ఏ స్థితిలో ఉందో అర్థమవుతోందని ప్రభుత్వంపై అసహనం వ్యక్తం చేశారు. ఘటన జరిగిన అనంతరం శుక్రవారం ఆమె స్థానిక మీడియాతో ఆమె మాట్లాడారు. తన బిడ్డలానే ప్రియాంక కూడా కామాంధుల దాహనికి బలైపోయిందని గుర్తుచేశారు. ప్రియాంకను హతమార్చిన వారిని వెంటనే అరెస్ట్‌ చేసి ఉరి శిక్షను వేయాలని ఆమె డిమాండ్‌ చేశారు. దేశంలో మహిళలకు కనీస భద్రత లేకుండాపోయిందని, దీనికి కేంద్రప్రభుత్వం తగు చర్యలను తీసుకోవాలని ఆమె కోరారు. ఇలాంటి ఘటనలు జరకుండా ఉండాలంటే దోషులకు కఠిన శిక్షలు వేయాలని అన్నారు. నిర్భయ ఘటన జరిగి ఎనిమిదేళ్లు కావస్తున్న దోషులకు ఇంకా ఉరిశిక్ష అమలు చేయకపోవడంపై ఆమె తీవ్ర అసంతృప్తి వ్యక్తం చేశారు. వాళ్లను ఉరి తీసేంతవరకు తమ పోరాటం ఆగదని ఆశాదేవి తెలిపారు. ఇక దేశ రాజధాని ఢిల్లీలోని నిర్భయ ఘటనను తలపిస్తున్న ప్రియాంకరెడ్డి ఉదంతంపై జాతీయ మహిళా కమిషన్ కూడా స్పందించిన విషయం తెలిసిందే. ఈ కేసును సుమోటాగా తీసుకుని.. విచారణ చేపట్టనున్నట్లు తెలిపింది. ఈ ఘటనలో నిందితులను కఠినంగా శిక్షించేవరకు పోరాడుతామని స్పష్టం చేసింది. దర్యాప్తుపై సమగ్ర నివేదిక ఇవ్వాలని సంబంధిత అధికారులను ఆదేశించింది. కాగా దేశంలోని వివిధ ప్రాంతాల నుంచి అనేక మంది మహిళలు.. హైదరాబాద్‌లో ఉద్యోగాలు చేస్తున్నారని.. ఇలాంటి దారుణ ఘటనలు జరిగితే మహిళలు స్వేచ్ఛగా ఎలా తిరగలుగుతారని మహిళా కమిషన్‌ చైర్‌పర్సన్‌ రేఖాశర్మ ఆవేదన వ్యక్తం చేశారు. ఈ మేరకు హైదరాబాద్‌ డీజీపీకి జాతీయ మహిళా కమిషన్‌ ఓ లేఖ రాశారు. కాగా వెటర్నరీ డాక్టర్‌ ప్రియాంకరెడ్డి దారుణ హత్యపై టాలీవుడ్‌ సెలబ్రిటీలు, ప్రముఖులు సైతం సోషల్‌ మీడియాలో స్పందిస్తున్నారు. ప్రియాంకరెడ్డి హత్య తమను ఎంతగానో కలచివేసిందని ఆవేదన వ్యక్తం చేస్తున్నారు. దోషులను కఠినంగా శిక్షించాలని వారు డిమాండ్‌ చేస్తున్నారు. ఇలా చేసుంటే ఘోరం జరిగేది కాదు అప్పుడు అభయ.. ఇప్పుడు ! నమ్మించి చంపేశారు! ప్రియాంక హత్య కేసులో కొత్త విషయాలు భయమవుతోంది పాప​.. ప్లీజ్‌ మాట్లాడు

చండీగఢ్‌: ఎన్నికలపై ఓటర్లకు అవగహన కల్పించేందుకు పంజాబ్‌లో ఏర్పాటు చేసిన ఓ ఫ్లెక్సీ వివాదాస్పదంగా మారింది. దేశ వ్యాప్తంగా సంచలన సృష్టించిన నిర్భయ అత్యాచార ఘటనలో ప్రధాన దోషిగా ఉన్న ముఖేష్‌ సింగ్‌ ఫోటోను ఆ ఫ్లెక్సీలో వేయడమే దీనికి కారణం. పంజాబ్‌లోని హోస్లాపూర్‌ జిల్లా కార్యాలయం సమీపంలో దీనిని ఏర్పాటు చేశారు. ప్రముఖ పంజాబ్‌ గాయకుడు గురుదాస్‌ మాన్‌, ఆటగాడు అభినవ్‌ బీంద్రాతో పాటు ముఖేష్‌ చిత్రం కూడా ఫ్లెక్సీలో ఉంది. దీనిని గమనించిన కొందరు ఆ ఫోటోలను సోషల్‌ మీడియాలో షేర్‌ చేసి ప్రభుత్వంపై తీవ్రస్థాయిలో విమర్శల వర్షం కురిపిస్తున్నారు. దీంతో స్పందించిన మంత్రి శ్యామ్‌ ఆరోరా.. ఘటనపై విచారణకు ఆదేశించామని, అధికారుల తప్పిదం కారణంగా ఇది జరిగిందని వివరించే ప్రయత్నం చేశారు. దీనికి కారణమయిన అధికారులపై వెంటనే చర్యలు తీసుకుంటామని మంత్రి వెల్లడించారు. ఢిల్లీలో 2012 డిసెంబర్‌ 16న రాత్రి తన స్నేహితుడితో బస్సులో ప్రయాణిస్తున్న 23 ఏళ్ల యువతిపై ఆరుగురు యువకులు సామూహిక అత్యాచారం చేసిన విషయం తెలిసిందే. ఈ ఘటనలో తీవ్రంగా గాయపడ్డ ఆమె సింగపూర్‌లో చికిత్స పొందుతూ.. పరిస్థితి విషమించడంతో మరణించారు. నిర్భయగా పేరుపొందిన ఈ కేసులో ఒక్క మైనర్‌ మినహా మిగిలిన ఐదుగురికి ఉరి శిక్ష పడింది. అందులో ఒకరైన ముఖేష్‌ తనకు విధించిన ఉరి శిక్షను రద్దు చేయాలని పిటిషన్‌ వేశాడు. అంతేకాక అత్యాచారాలకు మహిళలే కారకులు అంటూ ఆయన చేసిన వ్యాఖ్యలు అప్పట్లో పెద్దదుమారమే సృష్టించాయి. దీంతో ముఖేష్‌ను వెంటనే ఉరి తీయాలని చాలామంది డిమాండ్‌ చేశారు.


  ఏలూరు (ఆర్‌ఆర్‌పేట) న్యూస్‌లైన్ : స్త్రీలకు నిర్భయ చట్టం అభయం లాంటిదని జిల్లా న్యాయసేవాధికార సంస్థ కార్యదర్శి పి.లక్ష్మీశారద అన్నారు. బాలల హక్కులు, చట్టాలు, సంక్షేమ పథకాలపై మహిళాభివృద్ధి, శిశు సంక్షేమ శాఖ ఆధ్వర్యంలో స్థానిక కస్తూరిబా బాలికోన్నత పాఠశాలలో గురువారం అవగాహన సదస్సు నిర్వహించారు. ఈ కార్యక్రమంలో ముఖ్య అతిథిగా పాల్గొన్న లక్ష్మీశారద మాట్లాడుతూ గతంలో చట్టాల్లో అత్యాచారం అనే పదం మాత్రమే ఉండేదని, నిర్భయ చట్టంలో ఆ పదాన్ని తీసివేసి లైంగిక దాడి అనే పదాన్ని ఉపయోగించారని తెలిపారు. దీని పరిధిని విస్తృతం చేశారని మహిళలు, బాలికలు ఇంటిలో ఉన్నప్పుడు వారికి తెలియకుండా ఫొటోలు తీసినా ఈ చట్టం నేరంగా పరిగణిస్తుందన్నారు. లైంగిక దాడులకు పాల్పడినట్లు రుజువైతే నిర్భయ చట్ట ప్రకారం మరణ శిక్ష, జీవిత ఖైదు వంటి కఠిన శిక్షలు సైతం విధించే అవకాశముందని హెచ్చరించారు.
  
  బాలికలు స్వీయ నియంత్రణ పాటించాలని, ప్రేమ పేరుతో మోసపోవద్దని పిలుపునిచ్చారు. తమ పట్ల ఎవరైనా అసభ్యంగా ప్రవర్తిస్తే వెంటనే తల్లిదండ్రులకు గాని, ఉపాధ్యాయులకుగాని తెలపాలని లేదా పోలీస్ స్టేషన్లో ఫిర్యాదు చేయాలని సూచించారు. బాలికలు ఫిర్యాదు చేయడానికి పోలీస్ స్టేషన్‌కు వెళ్లినప్పుడు పోలీసులు వారిపై మర్యాదగా నడుచుకోవాలని, అనవసరమైన ప్రశ్నలు వేసి వారిని భయభ్రాంతులకు గురి చేస్తే అటువంటి పోలీసు అధికారులపై కూడా కేసులు నమోదు చేసి శిక్షించే అవకాశముందన్నారు. ఎటువంటి సమస్యలు ఎదురైనా ఆత్మస్థైర్యంతో ఎదుర్కొనేలా బాలికలకు భరోసా ఇవ్వాల్సిన బాధ్యత సమాజంపై ఉందన్నారు. స్త్రీ శిశు సంక్షేమ శాఖ రీజనల్ జాయింట్ డెరైక్టర్ కె.రాఘవరావు, ఆ శాఖ ప్రాజెక్టు డెరైక్టర్ వి.వసంతబాల, జిల్లా శిశు రక్షణాధికారి సీహెచ్ సూర్య చక్రవేణి, బాలికాభివృద్ధి అధికారి టి.ఉదయిని పాల్గొన్నారు.