కొచ్చి: ప్రైమ్‌ వాలీబాల్‌ లీగ్‌ (పీవీఎల్‌) రెండో సీజన్‌లో అహ్మదాబాద్‌ డిఫెండర్స్‌ జట్టు ఛాంపియన్‌గా అవతరించింది. ఆదివారం జరిగిన ఫైనల్లో అహ్మదాబాద్‌ డిఫెండర్స్‌ 15-7, 15-10, 1-20, 13-15, 15-10తో బెంగళూరు టోర్పిడోస్‌ జట్టుపై గెలిచింది. అహ్మదాబాద్‌ తరఫున అంగముత్తు రామస్వామి 16 పాయింట్లు, సంతోష్‌ 11 పాయింట్లు స్కోర్‌ చేశారు. బెంగళూరు తరఫున పంకజ్‌ శర్మ 11 పాయింట్లు, ముజీబ్‌ 9 పాయింట్లు సాధించారు. 

Prime Volleyball League 2023- మాదాపూర్‌: వాలీబాల్‌ ప్రేమికులకు ఉత్కంఠతోపాటు ఉల్లాసాన్ని నింపేందుకు ప్రైమ్‌ వాలీబాల్‌ లీగ్‌ (పీవీఎల్‌) రెండో సీజన్‌లో హైదరాబాద్‌ అంచె మ్యాచ్‌లకు గచ్చిబౌలి ఇండోర్‌ స్టేడియం సిద్ధమైంది. బుధవారం నుంచి హైదరాబాద్‌ అంచె మ్యాచ్‌లు మొదలుకానున్నాయి. ఈనెల 21 వరకు హైదరాబాద్‌లో మ్యాచ్‌లు జరుగుతాయి. ఇక బుధవారం నాటి మ్యాచ్‌లో కొచ్చి బ్లూ స్పైకర్స్‌తో హైదరాబాద్‌ బ్లాక్‌హాక్స్‌ జట్టు తలపడుతుంది. బెంగుళూరులో తొలి అంచె మ్యాచ్‌లు ఈనెల 4 నుంచి 12 వరకు జరిగాయి.      చదవండి: Virat Kohli: రోహిత్‌పై ప్రేమ లేదు.. కానీ కోహ్లికి వ్యతిరేకం! బీసీసీఐ చీఫ్‌ సెలక్టర్‌ చేతన్‌ శర్మ కామెంట్స్‌ వైరల్‌ WPL 2023: ఆర్సీబీ మెంటార్‌గా భారత టెన్నిస్‌ స్టార్‌ సానియా మీర్జా

Prime Volleyball League Season 2- బెంగళూరు: ప్రైమ్‌ వాలీబాల్‌ లీగ్‌లో ముంబై మెటియోస్‌ జట్టు తొలి విజయం సాధించింది. చెన్నై బ్లిట్జ్‌తో శుక్రవారం జరిగిన మ్యాచ్‌లో ముంబై మెటియోస్‌ 5–0తో (15–14, 15–6, 15–11, 15–12, 15–9) జయభేరి మోగించింది. ఈ సీజన్‌లో ఓ జట్టు ప్రత్యర్థిని 5–0తో ఓడించడం ఇదే తొలిసారి. ముంబై తరఫున జేమ్స్‌ అనూ 14 పాయింట్లు, హర్‌దీప్‌ సింగ్‌ 12 పాయింట్లు, బ్రాండన్‌ గ్రీన్‌వే తొమ్మిది పాయింట్లు స్కోరు చేశారు. చెన్నై బ్లిట్జ్‌ తరఫున జోబిన్‌ వర్ఘీస్‌ 11 పాయింట్లతో రాణించాడు. శనివారం జరిగే మ్యాచ్‌లో కాలికట్‌ హీరోస్‌తో హైదరాబాద్‌ బ్లాక్‌హాక్స్‌ తలపడుతుంది.   చదవండి:  ILT20 2023: ముంబై ఎమిరేట్స్‌ ఔట్‌.. ఫైనల్‌కు చేరిన గల్ఫ్ జెయింట్స్ T20 WC: పాకిస్తాన్‌తో తొలి మ్యాచ్‌.. టీమిండియాకు ఊహించని షాక్‌!

సాక్షి, హైదరాబాద్‌: ‘‘మన రాజధాని నగరంలో క్రీడల పట్ల ఆసక్తి పెరుగుతుండటం పట్ల చాలా సంతోషంగా ఉన్నాము. హైదరాబాద్‌లో క్రీడల వృద్ధికి ఎల్లవేళలా మద్దతుగా ఉంటాం’’ అని మంత్రి కల్వకుంట్ల తారక రామారావు అన్నారు. తాజా.. సీజన్‌లో హైదరాబాద్‌ బ్లాక్‌ హాక్స్‌ మెరుగైన ప్రదర్శన కనబరచాలని ఆకాంక్షిస్తున్నట్లు పేర్కొన్నారు. కాగా తెలంగాణా ప్రభుత్వ కార్యాలయంలో హైదరాబాద్‌ బ్లాక్‌ హాక్స్‌ నూతన జెర్సీ విడుదల సందర్భంగా ఈ వ్యాఖ్యలు చేశారు. ఈ ఆవిష్కరణ కార్యక్రమానికి హైదరాబాద్‌ బ్లాక్‌ హాక్స్‌ యజమానులు, వ్యాపారవేత్తలు అభిషేక్‌ రెడ్డి కంకణాల (ప్రిన్సిపల్‌ ఓనర్‌), శ్యామ్‌ గోపు (సహ యజమాని)తదితరులు హాజరయ్యారు. ఈ సందర్భంగా అభిషేక్‌ రెడ్డి మాట్లాడుతూ.. ‘‘భారతదేశంలో ప్రాధమిక స్థాయి నుంచి వాలీబాల్‌  అభివృద్ధి చేయడానికి మేము కట్టుబడి ఉన్నాము.  హైదరాబాద్‌ బ్లాక్‌ హాక్స్ టీమ్‌ ద్వారా యువతలో ఈ క్రీడ పట్ల ఆసక్తి కలిగించేందుకు కృషి చేస్తాము’’ అని అన్నారు. ‘‘తెలంగాణా ప్రభుత్వం, మంత్రి కేటీఆర్‌, జయేష్‌ రంజన్ మా టీమ్‌కు అందిస్తున్న మద్దతుకు కృతజ్ఞతలు. వారి మద్దతు మా టీమ్‌కు ఆత్మవిశ్వాసం కలిగిస్తుంది. హైదరాబాద్‌లో క్రీడాకారులకు పూర్తి మద్దతును తెలంగాణా ప్రభుత్వం అందిస్తోంది’’ అని ధన్యవాదాలు తెలిపారు.  అదే విధంగా.. బ్రెజిల్‌, ఇటలీ, జపాన్‌ లాంటి దేశాలలో అభివృద్ధి చెందుతున్న వాలీబాల్‌ సంస్కృతిని అనుకరించే మార్గంలో భారతదేశం ఉందని అభిషేక్‌ రెడ్డి విశ్వాసం వ్యక్తం చేశారు. ‘‘బ్లాక్‌ హాక్స్‌ టీమ్‌ ప్రాధమిక స్ధాయి నుంచి క్రీడను అభివృద్ధి చేయడానికి బహుళ అంచెల విధానాన్ని సృష్టించాల్సి ఉంది. ‘చోటు లీగ్స్‌’ను పాఠశాల విద్యార్థుల కోసం, అలాగే ‘మస్తీ లీగ్స్‌’ను టీనేజర్ల కోసం నిర్వహించడానికి ప్రణాళిక చేశాము. తద్వారా మన దేశంలో ఈ క్రీడను మరింతగా విస్తరించనున్నాము’’ అని అన్నారు. ఇదిలా ఉంటే.. హోరాహోరీగా అహ్మదాబాద్‌ డిఫెండర్స్‌తో జరిగిన సోమవారం నాటి మ్యాచ్‌లో హైదరాబాద్‌ బ్లాక్‌ హాక్స్‌  13–15, 15–9, 15–14, 15–11, 10–15తో విజయం సాధించిన విషయం తెలిసిందే. తదుపరి మ్యాచ్‌లో చెన్నై బ్లిట్జ్‌తో పోరుకు సిద్ధమైంది. చదవండి: BGT 2023: బోర్డర్ గవాస్కర్ ట్రోఫీలో డబుల్ సెంచరీలు చేసిన భారత ఆటగాళ్లు వీరే

బెంగళూరు: ప్రైమ్‌ వాలీబాల్‌ లీగ్‌లో హైదరాబాద్‌ బ్లాక్‌హాక్స్‌ జట్టుకు శుభారంభం లభించింది. గత ఏడాది రన్నరప్‌ అహ్మదాబాద్‌ డిఫెండర్స్‌తో సోమవారం జరిగిన మ్యాచ్‌లో హైదరాబాద్‌ బ్లాక్‌హాక్స్‌ 13–15, 15–9, 15–14, 15–11, 10–15తో విజయం సాధించింది. తొలి సెట్‌ కోల్పోయిన హైదరాబాద్‌ ఆ వెంటనే తేరుకొని వరుసగా మూడు సెట్‌లు నెగ్గి విజయాన్ని ఖరారు చేసుకుంది. నామమాత్రమైన ఐదో సెట్‌ను అహ్మదాబాద్‌ గెల్చుకున్నా ఊరట చెందింది. మ్యాచ్‌లో అత్యధికంగా 16 పాయింట్లు స్కోరు చేసిన హైదరాబాద్‌ జట్టు ఆటగాడు గురుప్రశాంత్‌ ‘ప్లేయర్‌ ఆఫ్‌ ద మ్యాచ్‌’ అవార్డు గెల్చుకున్నాడు. నేడు జరిగే మ్యాచ్‌లో చెన్నై బ్లిట్జ్‌తో కొచ్చి బ్లూ స్పైకర్స్‌ ఆడతుంది.   

బెంగళూరు: ప్రైమ్‌ వాలీబాల్‌ లీగ్‌ (పీవీఎల్‌) రెండో సీజన్‌లో డిఫెండింగ్‌ చాంపియన్‌ కోల్‌కతా థండర్‌బోల్ట్స్‌ శుభారంభం చేసింది. శనివారం జరిగిన తొలి మ్యాచ్‌లో కోల్‌కతా 15–11, 15–11, 15–14, 10–15, 14–15తో బెంగళూరు టోర్సెడోస్‌ జట్టును ఓడించింది. కోల్‌కతా వరుసగా మూడు సెట్‌లు గెలిచి విజయాన్ని ఖాయం చేసుకుంది. ఈ లీగ్‌ నిబంధనల ప్రకారం ఫలితంతో సంబంధం లేకుండా రెండు జట్లు నిర్ణీత ఐదు సెట్‌లు ఆడాల్సి ఉంటుంది. ఈ గెలుపుతో కోల్‌కతా ఖాతాలో రెండు పాయింట్లు చేరాయి. నేడు జరిగే మ్యాచ్‌లో కాలికట్‌ హీరోస్‌తో ముంబై మిటియోస్‌ తలపడతాయి. 

బెంగళూరు: గత ఏడాది వాలీబాల్‌ ప్రియుల్ని అలరించిన ప్రైమ్‌ వాలీబాల్‌ లీగ్‌ (పీవీఎల్‌) ఇప్పుడు రెండో సీజన్‌తో మరింత ప్రేక్షకాదరణ పొందాలని ఆశిస్తోంది. నేటి నుంచి ప్రారంభమయ్యే సీజన్‌–2 పోటీల్లో ఎనిమిది ఫ్రాంచైజీ జట్లు కోల్‌కతా థండర్‌బోల్ట్స్, హైదరాబాద్‌ బ్లాక్‌హాక్స్, కొచ్చి బ్లూ స్పైకర్స్, కాలికట్‌ హీరోస్, అహ్మదాబాద్‌ డిఫెండర్స్, బెంగళూరు టొర్పెడోస్, చెన్నై బ్లిట్జ్, ముంబై మిటియోర్స్‌ ‘ఢీ’కి రెడీ అయ్యాయి. డిఫెండింగ్‌ చాంపియన్స్‌ కోల్‌కతా థండర్‌బోల్ట్స్‌ తమ జోరు ఈ సీజన్‌లోనూ కొనసాగించేందుకు ఉత్సాహంగా ఉంది. ముందుగా శనివారం నుంచి లీగ్‌ దశలో 28 మ్యాచ్‌లు జరుగుతాయి. పాయింట్ల పట్టికలో తొలి నాలుగు స్థానాల్లో నిలిచిన జట్ల మధ్య మార్చి 3, 4 తేదీల్లో సెమీఫైనల్స్‌ పోటీలు నిర్వహిస్తారు. 5న విజేతను తేల్చే ఫైనల్‌ పోరుతో టోర్నీ ముగుస్తుంది. బెంగళూరులో నేడు కోల్‌కతా థండర్‌బోల్ట్స్, బెంగళూరు టొర్పెడోస్‌ల మధ్య ఆరంభ మ్యాచ్‌ జరుగుతుంది. ఈ నెల 12 నుంచి 21 వరకు హైదరాబాద్‌ వేదికగా 11 మ్యాచ్‌లు జరుగుతాయి. అనంతరం మిగిలిన లీగ్‌ దశ సహా సెమీస్, ఫైనల్‌ దాకా కొచ్చిలోనే మ్యాచ్‌ల్ని నిర్వహిస్తారు. రాత్రి 7 గంటలకు మొదలయ్యే మ్యాచ్‌లను సోనీ స్పోర్ట్స్‌ నెట్‌వర్క్‌ ప్రత్యక్ష ప్రసారం చేయనుంది. ఈ టోర్నీలో విజేతగా నిలిచే జట్టుకు క్లబ్‌ వాలీబాల్‌ ప్రపంచ చాంపియన్‌షిప్‌లో పాల్గొనే అవకాశం కల్పించారు. ఈసారి, వచ్చే ఏడాది క్లబ్‌ వాలీబాల్‌ ప్రపంచ చాంపియన్‌షిప్‌ భారత్‌లోనే జరుగనుండటంతో మరో విశేషం.  

న్యూఢిల్లీ:  ఫిబ్రవరి 2022లో నిర్వహించిన అద్భుత విజయం సాధించిన తరువాత, భారతదేశ వ్యాప్తంగా ఈ క్రీడ పట్ల అసాధారణ ఆసక్తి కూడా పెరిగింది. ఈ లీగ్‌ రెండవ సీజన్‌ సమీపిస్తోన్న వేళ రూపే ప్రైమ్‌ వాలీబాల్‌ లీగ్‌ పవర్డ్‌ బై ఏ23 ఇప్పుడు మరింతగా  విస్తరిస్తోంది. తాజాగా ప్రముఖ దేశీయ డిజిటల్‌ చెల్లింపుల కంపెనీ ఫోన్‌పే సహ వ్యవస్థాపకులు రూపే ప్రైమ్‌ వాలీబాల్‌ లీగ్‌లో భారీ పెట్టుబడులు పెట్టారు. 8వ ఫ్రాంచైజీ- ముంబై మీటార్స్‌ను ఫ్రాంచైజీని చేజిక్కుంచుకున్నారు. అలాగే భారత వాలీబాల్‌ టీమ్‌ మాజీ కెప్టెన్‌ అభిజిత్‌ భట్టాచార్య  నూతన ముంబై మీటార్స్‌  జీఎంగా  చేరారని ఫోన్‌పే  ఫౌండర్లు ఒక ప్రకటనలో తెలిపారు. వాలీబాల్‌ క్రీడాకారుడిగా వాలీబాల్‌ ఆట ఆనందం గురించి తనకు తెలుసునని రూపే పీవీఎల్‌ తమకు ఖచ్చితమైన అవకాశాన్ని ప్రొఫెషనల్‌ మార్గంలో ప్రపంచశ్రేణి స్ధాయిలో  నిర్మించే అవకాశం అందిస్తుందని భావిస్తున్నామంటూ  కోఫౌండర్‌ సమీర్‌ నిగమ్‌ సంతోషం వెలిబుచ్చారు. భారతీయ క్రీడా వ్యవస్థ అత్యంత ఉత్సాహ పూరిత మైందనీ, ముఖ్యంగా క్రికెటేతర రంగంలో అభివృద్ధికి ఎన్నో అవకాశాలున్న రంగంలో తగిన తోడ్పాటునందించేందుకు రూపే పీవీఎల్‌ తమకు గొప్ప అవకాశంగా భావిస్తున్నామని మరో కో ఫౌండర్‌ రాహూల్‌ చారి తెలిపారు. రూపే ప్రైమ్‌ వాలీబాల్‌ లీగ్‌ సీఈఓ జాయ్‌ భట్టాచార్య మాట్లాడుతూ అత్యంత గౌరవనీయమైన కార్పోరేట్‌ లీడర్లు సమీర్‌, రాహుల్‌లు ఫ్రాంచైజీ యజమానులుగా చేరడం ఆనందంగా ఉందన్నారు. అలాగే ముంబై ఫ్రాంచైజీ యజమానులును స్వాగతించిన థామస్‌ ముత్తూట్‌, యజమాని, కొచి బ్లూ స్పైకర్స్‌ మాట్లాడుతూ వారి వ్యాపార అనుభవం, ఈ క్రీడ పట్ల అభిరుచి రూపే ప్రైమ్‌ వాలీబాల్‌ లీగ్‌కు తోడ్పడుతుందనిపేర్కొన్నారు.  రెండో సీజన్‌ 2023 సంవత్సరారంభంలో ప్రారంభమవుతుందని అంచనా. వాలీబాల్‌ అంతర్జాతీయ సంస్ధ (ఫెడరేషన్‌ ఇంటర్నేషనల్‌ డీ వాలీబాల్‌, ఎఫ్‌ఐవీబీ)కు వాణిజ్య విభాగం, వాలీబాల్‌ వరల్డ్‌ ఇప్పుడు పీవీఎల్‌తో చేతులు కలపడంతో పాటుగా పలు సంవత్సరాల పాటు అంతర్జాతీయ స్ట్రీమింగ్‌ భాగస్వామిగా వ్యవహరించనుంది. సోనీ స్పోర్ట్స్‌ నెట్‌వర్క్‌ హోస్ట్‌ బ్రాడ్‌కాస్టర్‌గా కొనసాగనుంది. ఈ లీగ్‌కు మొత్తం 133 మిలియన్‌ల టెలివిజన్‌ వ్యూయర్‌షిప్‌ ఉంది. ఆంగ్లం, హిందీ, తమిళం, తెలుగు, మలయాళంలలో కామెంట్రీ ఎంచుకునే అవకాశమూ అందించింది.

సాక్షి, హైదరాబాద్‌: ప్రైమ్‌ వాలీబాల్‌ లీగ్‌ (పీవీఎల్‌) టోర్నమెంట్‌లో కోల్‌కతా థండర్‌బోల్ట్స్‌ జట్టు చాంపియన్‌గా అవతరించింది. గచ్చిబౌలి ఇండోర్‌ స్టేడియంలో ఆదివారం జరిగిన ఫైనల్లో కోల్‌కతా థండర్‌బోల్ట్స్‌ 3–0 (15–13, 15–10, 15–12)తో అహ్మదాబాద్‌ డిఫెండర్స్‌ జట్టును ఓడించింది. కోల్‌కతా ఆటగాడు వినీత్‌ ‘ప్లేయర్‌ ఆఫ్‌ ద ఫైనల్‌’ అవా ర్డును దక్కించుకున్నాడు. హోరాహోరీగా సాగిన ఫైనల్లో కీలకదశలో కోల్‌కతా ఆటగాళ్లు పాయింట్లు గెలిచి వరుస సెట్‌లలో విజయాన్ని అందుకున్నారు. వినీత్‌ ‘మోస్ట్‌ వాల్యుబుల్‌ ప్లేయర్‌’ గా... ఎస్‌వీ గురుప్రశాంత్‌ (హైదరాబాద్‌ బ్లాక్‌హాక్స్‌) ‘ఎమర్జింగ్‌ ప్లేయర్‌ ఆఫ్‌ ద సీజన్‌’గా... అంగముత్తు (అహ్మదాబాద్‌ డిఫెండర్స్‌) ‘బెస్ట్‌ స్పైకర్‌ ఆఫ్‌ ద సీజన్‌’గా... జాన్‌ జోసెఫ్‌ (హైదరాబాద్‌ బ్లాక్‌ హాక్స్‌) ‘బెస్ట్‌ బ్లాకర్‌ ఆఫ్‌ ద సీజన్‌’గా... షాన్‌ జాన్‌ (అహ్మదాబాద్‌ డిఫెండర్స్‌) ‘ఫాంటసీ ప్లేయర్‌ ఆఫ్‌ ద సీజన్‌’గా అవార్డులు గెల్చుకున్నారు. ప్రముఖ సినీ నటుడు విజయ్‌ దేవరకొండ ముఖ్యఅతిథిగా విచ్చేసి విజేత జట్టుకు ట్రోఫీని అందజేశాడు.

సాక్షి, హైదరాబాద్‌: ప్రైమ్‌ వాలీబాల్‌ టోర్నమెంట్‌లో కోల్‌కతా థండర్‌బోల్ట్స్‌ జట్టు విజయంతో శుభారంభం చేసింది. గచ్చిబౌలి ఇండోర్‌ స్టేడియంలో సోమవారం కాలికట్‌ హీరోస్‌తో జరిగిన మ్యాచ్‌లో కోల్‌కతా థండర్‌బోల్ట్స్‌ 3–2 (15–13, 12–15, 15–10, 12–15, 15–13) సెట్‌ల తేడాతో గెలిచింది. కోల్‌కతా కెప్టెన్‌ అశ్వల్‌ రాయ్‌ అద్భుత ప్రదర్శనతో తన జట్టు విజయంలో కీలకపాత్ర పోషించాడు. నేడు జరిగే మ్యాచ్‌లో బెంగళూరు టార్పెడోస్‌ జట్టుతో కొచ్చి బ్లూ స్పైకర్స్‌ తలపడుతుంది.

Prime Volleyball League- Hyderabad Black Hawks: ‘ప్రైమ్‌ వాలీబాల్‌ లీగ్‌’లో హైదరాబాద్‌ బ్లాక్‌ హాక్స్‌ జట్టుకు కంకణాల అభిషేక్‌ రెడ్డి యజమానిగా ఉన్నారు. ఇప్పటికే బ్యాడ్మింటన్, బాక్సింగ్‌ లీగ్‌లలో కూడా భాగస్వామ్యం ఉన్న ఆయన ఈ సారి వాలీబాల్‌ క్రీడకు ప్రాచుర్యం కల్పించాలని లీగ్‌లో భాగమయ్యేందుకు సిద్ధపడ్డారు. వాలీబాల్‌ లీగ్‌ ద్వారా లాభాలు ఆశించడం లేదని, ఆటలపై ఉన్న ఆసక్తితోనే ముందుకు వచ్చానని ఆయన వెల్లడించారు. ‘ప్రీమియర్‌ బ్యాడ్మింటన్‌ లీగ్‌లో రెండేళ్లు వరుసగా చాంపియన్‌గా నిలిచిన బెంగళూరు రాప్టర్స్‌ జట్టు కూడా మాదే. ఆ తర్వాత ఒక సీజన్‌లో బాక్సింగ్‌ లీగ్‌లో కూడా జట్టును తీసుకున్నాం. ఐటీ తదితర రంగాల్లో వ్యాపారాలు నా వృత్తి అయినా క్రీడలు ప్రవృత్తి. అందుకే వాలీబాల్‌ లీగ్‌లోనూ భాగస్వామిని కావాలని నిర్ణయించుకున్నా. టీవీల్లో ప్రసారాల ద్వారా దిగువ స్థాయి వరకు ఆటలకు ప్రచారం లభిస్తుందనేది నా నమ్మకం. గ్రామీణ ప్రాంతాల్లో ఎంతో ఇష్టపడే వాలీబాల్‌ను కూడా ఇప్పుడు వారికి మరింత చేరువ చేయడమే మా లీగ్‌ లక్ష్యం. ఆర్థికపరంగా లీగ్‌ లాభదాయకం కాదని తెలిసినా కనీసం రాబోయే ఐదేళ్లు దేనికైనా సిద్ధపడే ఇందులోకి వచ్చాను. ఫ్రాంచైజీ జట్లే లీగ్‌ సమష్టి నిర్వాహకులు కాబట్టి పెద్ద సమస్య లేదు. మా హైదరాబాద్‌ టీమ్‌ అన్ని రకాలుగా పటిష్టంగా ఉంది. అత్యుత్తమ కోచ్‌ నేత్వత్వంలో టైటిల్‌ సాధిస్తామనే నమ్మకం ఉంది. మేం ఆశించిన స్థాయిలో ఈసారి స్థానికంగా ప్రతిభ గల ఆటగాళ్లు లభించకపోయినా వచ్చే ఏడాది మా టీమ్‌లో ఎక్కువ మందికి అవకాశం దక్కుతుందని ఆశిస్తున్నాం’ అని ‘సాక్షి’తో మాట్లాడుతూ అభిషేక్‌ వివరించారు. కాగా ఫిబ్రవరి 5 నుంచి వాలీబాల్‌ క్రీడలో లీగ్‌ నిర్వహణకు రంగం సిద్ధమైంది. ‘రూపే ప్రైమ్‌ వాలీబాల్‌ లీగ్‌’ పేరుతో జరగనున్న ఈ టోర్నీని మొత్తం హైదరాబాద్‌లోనే నిర్వహించనున్నారు. చదవండి: PSL 2022: ఇంత దరిద్రమైన ఎంట్రీ ఎప్పుడు చూడలేదు.. అఫ్రిదిపై ట్రోల్స్‌ వర్షం

సాక్షి, హైదరాబాద్‌: వాలీబాల్‌ క్రీడలో కూడా లీగ్‌ నిర్వహణకు రంగం సిద్ధమైంది. ‘రూపే ప్రైమ్‌ వాలీబాల్‌ లీగ్‌’ పేరుతో జరగనున్న ఈ టోర్నీని మొత్తం హైదరాబాద్‌లోనే నిర్వహిస్తున్నారు. గచ్చిబౌలి ఇండోర్‌ స్టేడియంలో నేడు మొదలయ్యే ఈ లీగ్‌ ఈనెల 27న ఫైనల్‌తో ముగుస్తుంది. మ్యాచ్‌లు రాత్రి 7 గంటల నుంచి జరుగుతాయి. మ్యాచ్‌లను సోనీ టెన్‌–1,2,3,4  చానెల్స్‌లో ప్రత్యక్ష ప్రసారం చేయనున్నారు. హైదరాబాద్‌ బ్లాక్‌ హాక్స్, కొచ్చి బ్లూ స్పైకర్స్, చెన్నై బ్లిట్జ్, అహ్మదాబాద్‌ డిఫెండర్స్, బెంగళూరు టార్పెడోస్, కాలికట్‌ హీరోస్, కోల్‌కతా థండర్‌బోల్ట్స్‌ పేర్లతో మొత్తం 7 జట్లు బరిలో ఉన్నాయి. ఒక్కో జట్టులో 14 మంది చొప్పున ఆటగాళ్లు ఉండగా, అందులో గరిష్టంగా ఇద్దరు విదేశీ యులు. గ్రూప్‌ దశలో తొలి నాలుగు స్థానాల్లో నిలిచిన జట్లు సెమీఫైనల్‌కు అర్హత సాధిస్తాయి. పలువురు అంతర్జాతీయ స్టార్‌ ఆటగాళ్లు లీగ్‌లో పాల్గొంటుండటం విశేషం. ఒలింపిక్‌ స్వర్ణం, ప్రపంచకప్‌ గెలుచుకున్న జట్లలో సభ్యుడైన అమెరికా దిగ్గజం డేవిడ్‌ లీ కాలికట్‌ తరఫున ఆడ బోతున్నాడు. హెన్రీ బెల్, జెరోమ్‌ వినీత్, అజిత్, అశ్వల్‌ రాయ్, అమిత్‌ గులియా, ముత్తుస్వామి ఇతర కీలక ఆటగాళ్లు. హైదరాబాద్‌ జట్టుకు విపుల్‌ కుమార్‌ కెప్టెన్‌గా వ్యవహరిస్తుండగా... అర్జెంటీనాకు చెందిన రూబెన్‌ వెలోచిన్‌ కోచ్‌గా ఉన్నారు. అయితే కరోనా కారణంగా ప్రేక్షకులను లీగ్‌ చూసేందుకు అనుమతించడం లేదు. బేస్‌ లైన్‌ వెంచర్స్‌ సంస్థ ప్రైమ్‌ వాలీబాల్‌ లీగ్‌ను ప్రమోట్‌ చేస్తుండగా... ఫాంటసీ గేమ్‌ కంపెనీ  అ23 ప్రధాన స్పాన్సర్‌గా వ్యవహరిస్తోంది. చదవండి: U19 WC Final Ind Vs Eng: 11 మందిలో ఏకంగా 8వ వరుస బ్యాటర్‌ దాకా పరుగులు చేసే సత్తా వాళ్లది.. హోరాహోరీ తప్పదు!