హైదరాబాద్‌: ఫిలింనగర్‌ కల్చరల్‌ సెంటర్‌లో సభ్యుడి పర్సును తస్కరించి.. క్రెడిట్, డెబిట్‌ కార్డుల ద్వారా తన అకౌంట్‌లోకి డబ్బును మార్చుకున్న ఘటనలో ప్రముఖ సినీ నిర్మాత సి.కల్యాణ్‌ తనయుడు వరుణ్‌కుమార్‌కు బంజారాహిల్స్‌ పోలీసులు.. స్టేషన్‌కు రావాలంటూ నోటీసులు జారీ చేశారు. ఈ నెల 22న బంజారాహిల్స్‌ రోడ్‌ నం.12లోని ఎమ్మెల్యే కాలనీలో ఉండే వ్యాపారి బిక్కిన శ్రీనివాస్‌ తన కుమారుడితో కలసి ఎఫ్‌ఎన్‌సీసీలో స్విమ్మింగ్‌ చేయడానికి వచ్చాడు. పర్సును పక్కన పెట్టి స్విమ్మింగ్‌ చేసి వచ్చేసరికి అది మాయమైంది.
 
 అందులో ఐసీఐసీఐ, యాక్సిస్‌ బ్యాంకులకు చెందిన డెబిట్, క్రెడిట్‌ కార్డులుండగా, గంట వ్యవధిలోనే ఆయన అకౌంట్‌లో నుంచి రూ.2.12 లక్షలు ఆన్‌లైన్‌ లావాదేవీలు జరిగాయి. బాధితుడు ఇచ్చిన ఫిర్యాదు మేరకు సీసీ ఫుటేజీలు, బ్యాంకు అకౌంట్లు తనిఖీ చేసిన పోలీసులు దీనికి కారకుడు వరుణ్‌కుమార్‌ అని గుర్తించారు. దీంతో వరుణ్‌పై చీటింగ్‌ కేసు నమోదు చేసి... స్టేషన్‌కు వచ్చి వివరణ ఇవ్వాల్సిందిగా డీఐ వెంకటేశ్వర్‌రెడ్డి నోటీసులు జారీ చేశారు.


 బంజారాహిల్స్ : వైద్యురాలిపై దాడి కేసులో సినీ నిర్మాత చిల్లర కల్యాణ్‌కు జూబ్లీహిల్స్ పోలీసులు నోటీసులు జారీ చేశారు. జూబ్లీహిల్స్ రోడ్ నెం.5లో ఆయన నివసించే అపార్ట్‌మెంట్‌లోనే ఉంటున్న డాక్టర్ టి.కవిత  గతనెల 26న నిర్మాత క ల్యాణ్ తనపై దాడి చేసి చంపేస్తానని బెదిరించాడని పోలీసులకు ఫిర్యాదు చేసిన విషయం తెలిసిందే.  కల్యాణ్‌పై నిర్భయ చట్టం కింద కేసు నమోదు చేసిన పోలీసులు అప్పటి నుంచి ఆయన కోసం గాలిస్తున్నారు. 
 
 ఎటకేలకు అతడి  ఆచూకీ తెలుసుకొని బుధవారం మధ్యాహ్నం 2 గంటలకు పోలీసు స్టేషన్‌కు రప్పించా రు. సుమారు రెండు గంటల పాటు కల్యాణ్‌ను విచారించారు. ఆ రోజు జరిగిన ఘటనను తెలుసుకొని ఆయనపై నమోదై ఉన్న కేసు వివరాలను వెల్లడించారు. మీపై వచ్చిన అభియోగాలకు సమాధానం ఇవ్వాలని, ఎందుకు అరెస్టు చేయకూడదో మూడు రోజుల్లో సమాధానం చెప్పాలని నోటీసులు అందించారు.


 ఎప్పటికప్పుడు కొత్త తరహా పాత్రపోషణ ద్వారా తనకు తాను సవాల్ విసురుకొనే నటుడు కమల్ హాసన్. ఆయన నటించిన తాజా చిత్రం ‘ఉత్తమ విలన్’. ఆండ్రియా, పూజాకుమార్ కథానాయికలు. 
 
 రమేశ్ అరవింద్ దర్శకత్వంలో తెలుగు, తమిళ భాషల్లో రూపొందిన ఈ చిత్రం ఈ నెల 17న విడుదల చేస్తున్నామని తెలుగులో ఈ సినిమాను అందిస్తున్న నిర్మాత సి. కల్యాణ్ తెలిపారు. విభిన్న పాత్రపోషణ ద్వారా ప్రేక్షకులను అలరించే నటుడు మనోరంజన్‌గా ఈసారి కమల్ కనువిందు చేయనున్నారు.