వాషింగ్టన్‌: జాత్యాహంకార సందేశాలు అమెరికాలో ఆందోళన రేపుతున్నాయి. మిడిల్‌ స్కూల్‌ విద్యార్థులతో పాటు నల్లజాతీయులనే లక్ష్యంగా చేసుకుని బెదిరింపు ఫోన్‌ సందేశాలు వెల్లువెత్తుతున్నాయి. న్యూయార్క్, అలబామా, కాలిఫోర్నియా, ఒహాయో, పెన్సిల్వేనియా, టెనెసీ వంటి పలు రాష్ట్రాల్లో ఈ ఉదంతాలపై కేసులు నమోదయ్యాయి. సందేశాల్లో వాడిన పదాలు భిన్నంగా ఉన్నా బెదిరింపులు మాత్రం ఒకేలా ఉన్నాయని బాధితులు చెబుతున్నారు. కొందరిని స్వస్థలం చిరునామా చెప్పాలంటూ బెదిరించగా మరికొందరిని రాబోయే అధ్యక్ష పాలన గురించి హెచ్చరించారు. ఈ సందేశాలపై న్యాయ శాఖతో సంప్రదింపులు జరుపుతున్నట్టు ఎఫ్‌బీఐ తెలిపింది. ఫెడరల్‌ కమ్యూనికేషన్స్‌ కమిషన్, ఫెడరల్, స్టేట్‌ లా ఎన్‌ఫోర్స్‌మెంట్‌తో కలిసి దీనిపై దర్యాప్తు చేస్తున్నట్లు తెలిపింది. ఒహాయో అటార్నీ జనరల్‌ కార్యాలయం కూడా ఈ విషయాన్ని పరిశీలిస్తున్నట్లు వెల్లడించింది. కించపరిచే వ్యాఖ్యలు పోలింగ్‌ జరిగిన గత బుధవారం సాయంత్రం తన 16 ఏళ్ల కుమార్తె ఫోన్‌కు సందేశం వచి్చనట్టు కాలిఫోరి్నయాలోని లోడీకి చెందిన తాషా డన్హామ్‌ చెప్పారు. ‘‘నా కూతురిని తక్షణం నార్త్‌ కరోలినాలోని ఒక తోటకు రావాలని ఆదేశించారు. ఆరా తీస్తే అక్కడో మ్యూజియం ఉంది’’అని తెలిపారు. ఈ పరిణామాలు తమను కలవరపరుస్తున్నాయన్నారు. పెన్సిల్వేనియాలోని మాంట్‌గోమెరీ కౌంటీలో ఆరుగురు మిడిల్‌ స్కూల్‌ విద్యార్థులకు కూడా ఇలాంటి సందేశాలే అందాయి. దక్షిణ కరోలినాలోని క్లెమ్సన్, అలబామా వంటి పలు విశ్వవిద్యాలయాల విద్యార్థులు తమకూ ఇలాంటి సందేశాలు వచి్చనట్టు చెప్పారు. పోలీసులకు ఫిర్యాదు చేశామన్నారు. దీనిపై ఆందోళన వ్యక్తం చేస్తూ టెనెసీలోని నాష్‌విల్లేలో ఉన్న చరిత్రాత్మక నల్లజాతి విశ్వవిద్యాలయం ఫిస్క్‌ ప్రకటన విడుదల చేసింది. కొంతమంది విద్యార్థులను లక్ష్యంగా చేసుకున్న ఈ సందేశాలు తీవ్రంగా కలవరపెడుతున్నాయని తెలిపింది. మిస్సోరీ స్టేట్‌ వర్సిటీ చాప్టర్‌లో సభ్యులుగా ఉన్న నల్లజాతి విద్యార్థులకు కూడా సందేశాలు వచ్చాయి. వాటిలో ట్రంప్‌ గెలుపును ప్రస్తావించారు. నల్లజాతి విద్యార్థులను పత్తి ఏరడానికి ఎంపిక చేశారంటూ అందులో పేర్కొన్నారని మిస్సోరి ఎన్‌ఏఏసీపీ అధ్యక్షుడు నిమ్రోద్‌ చాపెల్‌ చెప్పారు. వెంటనే పోలీసులకు సమాచారం అందించినట్లు తెలిపారు. ఈ సందేశాల వెనుక ఎవరున్నారో ఇంకా తెలియలేదని లాయర్స్‌ కమిటీ ఫర్‌ సివిల్‌ రైట్స్‌ అండర్‌ లా డిజిటల్‌ జస్టిస్‌ ఇనిషియేటివ్‌ డైరెక్టర్‌ డేవిడ్‌ బ్రాడీ తెలిపారు. మేరీలాండ్, ఓక్లహామా వంటి 10కి పైగా రాష్ట్రాలతో పాటు డీసీలోనూ ఇలాంటి ఈ ఉదంతాలు చోటుచేసుకున్నట్టు అంచనా వేశారు. దీనిపై తమ ఇంటెలిజెన్స్‌ విభాగం దర్యాప్తు చేస్తోందని పోలీసులు తెలిపారు. ఈ విద్వేష ఘటనలపై పలు పౌర హక్కుల చట్టాలను వర్తింపజేయవచ్చని బ్రాడీ చెప్పారు. సదరన్‌ పావర్టీ లా సెంటర్‌ ప్రెసిడెంట్, సీఈఓ మార్గరెట్‌ హువాంగ్‌ సహా పలు ఇతర పౌర హక్కుల సంస్థల నేతలు ఈ సందేశాలను ఖండించారు. ‘‘విద్వేషాలకు అమెరికాలో స్థానం లేదు. 2024లోనూ బానిసత్వ ప్రస్తావనలు తీవ్రంగా కలవరపరుస్తున్నాయి. నల్లజాతి అమెరికన్ల జీవితాలు ప్రమాదంలో పడ్డాయి’’అని ఎన్‌ఏఏసీపీ అధ్యక్షుడు, సీఈఓ డెరిక్‌ జాన్సన్‌ ఆందోలన వెలిబుచ్చారు.

భార్యాభర్తలు, జీవిత భాగస్వాముల మధ్య ఏదో అంశం మీద వాదోపవాదనలు, చిన్న చిన్న గొడవలు మామూలే. వాదన జరుగుతుండగా... ఆఫీసుకు వెళ్తూ తన పార్ట్‌నర్‌ నుంచి దూరంగా వెళ్తే గొడవ సద్దుమణగడం ఖాయం. కానీ మొబైల్‌ ఫోన్‌లో టెక్ట్స్‌ మెసేజీల రూపంలో అదే గొడవ అదే పనిగా కొనసాగితే...? ఇలా లైఫ్‌ పార్ట్‌నర్స్‌ మధ్య ఫైటింగ్‌ కాస్తా టెక్ట్స్‌ మెసేజీల రూపంలో కొనసాగడాన్ని‘ఫెక్స్‌టింగ్‌’ అనే ధోరణిగా అభివర్ణిస్తున్నారు. మొబైల్స్‌ ఎన్నెన్నో కొత్త కొత్త రకాల ఫీచర్స్‌తో వస్తున్నాయి కాబట్టి వాటిని ‘స్మార్ట్‌’ఫోన్స్‌ అన్నారు. కానీ ‘ఫెక్స్‌టింగ్‌’ అంత స్మార్ట్‌ కాదని నిపుణులు హెచ్చరిస్తున్నారు.  ‘ఫెక్స్‌టింగ్‌’ అంటే కేవలం జీవిత భాగస్వాముల మధ్య ఫైటింగ్‌ అనే కాదు... పేరెంట్స్, ఫ్రెండ్స్‌ మధ్య కూడా కావచ్చుకానీ... అత్యధికంగా ప్రభావం చూపేది భార్యాభర్తల మధ్యనే కావడంతో సాధారణంగా దాన్ని లైఫ్‌పార్ట్‌నర్స్‌కే ఎక్కువగా ఉపయోగిస్తున్నారు.  అత్యంత ప్రఖ్యాతమైన ఓ సెలబ్రిటీ కేస్‌స్టడీ: అమెరికా అధ్యక్షుడు జో బైడెన్, ఆయన భార్య, అమెరికన్‌ ఫస్ట్‌ లేడీ జిల్‌ బైడెన్‌ల దాంపత్యం వయసు 45 ఏళ్లు పైమాటే. ఇటీవల ఆమె ఇచ్చిన ఓ ఇంటర్వ్యూలో తాము వాదించుకునేందుకు టెక్ట్స్‌ మెసేజీలు వాడతామని చెప్పా రు. అందుకు ఓ వినోదాత్మక కారణం కూడా తెలిపారు. తమ ఘర్షణ, వాదోపవాదాలు అమెరికన్‌ సీక్రెట్‌ ఏజెన్సీకి తెలియకుండా ఉండేందుకు ఈ మార్గాన్ని ఉపయోగిస్తుంటామని సరదాగా వెల్లడించారామె. అంటే అందరి గుట్టుమట్లు పసిగట్టే అత్యంత సమర్థమైన ఏజెన్సీనే బురిడీ కొట్టించడానికి ఆమె ‘ఫెక్స్‌టింగ్‌’ ను ఎంచుకున్నారన్న మాట.  రెండు రకాల వాదనలు  ఫెక్స్‌టింగ్‌లో పార్ట్‌నర్స్‌ ఎదురెదురుగా ఉండరు కాబట్టి... ముఖ కవళికలూ. అందులోని ఆవేశాలూ, ఉద్వేగాలూ కనిపించవు. వాదన తాలూకు తీవ్రత అక్షరాల్లో అంతగా ప్రభావ పూర్వకంగా కనిపించదు కాబట్టి అంత హానికరం కాదనీ అనేవాళ్లూ ఉంటారు. అంతేకాదు... ఆ వాదన కొనసాగడానికి ఇష్టపడని వారు...  టెక్ట్స్‌కు బదులుగా క్రమంగా ‘స్మైల్‌’ లేదా షేక్‌హ్యాండ్‌ ఎమోజీల్లాంటివి ఉపయోగిస్తూ పోతే, ఎదుటివారి నుంచి తగినంత ప్రతిస్పందన లేకపోవడంతో క్రమంగా వాదన సన్నగిల్లిపోతుందనీ, ఎదురుబొదురు ఉన్నప్పటంత హాని జరగకపోవచ్చనీ కొందరు చెబుతుంటారు. సరిగ్గా దీనికి పూర్తి భిన్నంగా వాదించేవారూ ఉంటారు. మాటలు తడబడవచ్చు. ఏదో మాట సరిగా వ్యక్తం కాకపోవచ్చు. కానీ సరిగ్గా వ్యక్తీకరించగలిగేవాళ్లైతే రాతలోనే ప్రభావం ఎక్కువ అని చెప్పేవాళ్లూ ఉన్నారు.  పాతగాయాలూ రేగే ప్రమాదం  దంపతుల మధ్య సంభాషణల రూపంలో ఎదురుబొదురుగా ఘర్షణలు జరుగుతున్నప్పుడు  ఏదైనా మాటతూలినా గాలికి పోయే మాటల వల్ల ఆ తర్వాత ఎలాంటి ప్రభావమూ ఉండదు. కానీ ‘రాత’ ఎప్పటికీ నిలిచిపోయే అవకాశం ఉంది. అందువల్ల ఆ తర్వాత ఎప్పుడో చదువుకున్నప్పుడూ పాత మాటలూ, పాత వాదనల ప్రభావాలు కెలికినట్లుగా అయి, అవి ఆ తర్వాతెప్పుడో కూడా ప్రమాదం తెచ్చిపెట్టవచ్చని మరికొందరు చెబుతున్నారు.  అంతుఉండకపోవచ్చు... ఆ అంశమే ప్రమాదం తేవచ్చు...  పొద్దున్నే భార్యాభర్తల మధ్య వాదన చెలరేగింది. ఇద్దరూ తమ తమ పనులు చేసుకుంటూనే వాదనల్లో మునిగిపోయారు. ఆఫీసుకు బయల్దేరే సమయానికి ఘర్షణ పెద్దదైంది. కానీ ఆఫీసు సమయానికి ఎవరి దారిలో వాళ్లు వెళ్లిపోవడంతో ఆ ‘వాదోపవాదాలు’ అక్కడితో ముగుస్తాయి. కానీ ‘ఫెక్స్‌టింగ్‌’ అలా కాదు. ఆఫీసుకు వెళ్లే దారిలో బస్సులోనో, ఆటోలోనో లేదా మెట్రోరైల్‌ లోనో అలాగే కొనసాగవచ్చు. అంతేకాదు... ఆఫీసుకు చేరి, సీట్లలో కూర్చున్నాక కూడా అదేపనిగా కొనసాగితే ప్రమాదమే. ఆ మాటకొస్తే కీలకమైన మీటింగుల్లోనూ ‘టెక్ట్స్‌ మెసేజు’లు కొనసాగుతూ... అసలు లక్ష్యానికి అడ్డంగా మారవచ్చు. టెక్ట్స్‌ వల్ల ఒనగూరే సౌలభ్యమల్లా వాదన మౌనంగా కొనసాగుతూ... అది మాటల ద్వారా బయటకు తెలియదంతే. కానీ పని ప్రదేశంలో... చేయాల్సిన పని వదిలేసి అదేపనిగా వాదులాడుకుంటూ పోతే... ఆఫీసులో  పూర్తి చేయాల్సిన పనులు కొనసాగకపోగా / జరగకపోగా...  అదే ఇబ్బంది తెచ్చిపెట్టే ప్రమాదమూ ఉందంటున్నారు కపుల్‌ కౌన్సెలింగ్‌ నిర్వాహకులు, మనస్తత్వ నిపుణులు. అంతేకాదు... అది పనితీరుతో పాటు, బంధాల విషయాల్లోనూ ప్రమాదం తెచ్చిపెట్టవచ్చునని హెచ్చరిస్తున్నారు.  వస్తువులో కాదు...  అంతా మన విచక్షణలోనే ఉంది...  ‘‘ఏదైనా ప్రయోజనం అన్నది ఆ వస్తువును మనం ఉపయోగించే తీరులో లేదా మన విచక్షణను బట్టే ఉంటుందిగానీ... ఉపకరణంలో ఏమీ ఉండదు. ఇంగ్లిష్‌లో చెప్పా లంటే ‘ఆబ్జెక్ట్‌’లో కాకుండా ‘ఆబ్జెక్టివ్‌’లోనే అంతా ఉంది’’ అంటూ వ్యాఖ్యానిస్తున్నారు కొందరు మనస్తత్వ నిపుణులు.  ఎప్పుడైనా అభిప్రాయ భేదాలు వచ్చినప్పుడు ఎదురుబొదురుగా ఉండి మాట్లాడుకోవడమే మంచిది. కొన్ని పదాలు, పంక్చువేషన్లు, ఎమోజీల వల్ల దురభిప్రాయాలు  వచ్చే అవకాశమూ ఉంది. మాటల్లో చెప్పుకునే విషయాలను రాతలో పెట్టినప్పుడు అది మరింతగా హాని చేసే ప్రమాదం ఉంది. ‘మీ అభిప్రాయం తో ఏకీభవించకపోవచ్చు. కానీ మీ అభిప్రాయానికి విలువివ్వాల్సిందే’ అనే పరస్పర గౌరవ భావన, దృక్పథాల వల్లనే మంచి ఫలితాలు వస్తాయి.  – డాక్టర్‌ సుజాత రాజమణి,  మానసిక నిపుణులు

బెంగళూరు: ఒక వ్యక్తి మొబైల్‌కి సందేశం రావడంతో మంగళూరు నుంచి ముంబైకి వెళ్లాల్సిన విమానం ఆరుగంటలు ఆలస్యంగా బయలుదేరింది. ఈ మేరకు ఆదివారం సాయంత్రం ఇండిగో విమానాన్ని ముంబై బయలుదేరడానికి అనుమతించే ముందు పోలీసులు ప్రయాణికులందర్నీ విమానం నుంచి దించి హఠాత్తుగా తనీఖీలు చేయడం మొదలు పెట్టారు. పోలీసులు ఇంత అకస్మాత్తుగా తనీఖీలు చేయడానికి కారణం అందులో ఉ‍న్న ఒక మహిళా ప్రయాణికురాలు. ఆమె తన సహా ప్రయాణికుడి మొబైల్‌కి అనుమానాస్పద సందేశం రావడంతో ఎయిర్‌ ఫోర్స్‌ సిబ్బందిని అప్రమత్తం చేసింది. దీంతో సిబ్బంది ఎయిర్‌ ట్రాఫిక్‌ కంట్రోలర్‌ని అప్రమత్తం చేయడంతో టేకాఫ్‌కి సిద్ధంగా ఉన్న విమానం కాస్త ఆగిపోయింది. తిరిగి ఎయిర్‌ పోర్టు బేకు చేరుకుంది. ఇంతకీ ఆ వ్యక్తి తన మొబైల్‌లో ప్రియురాలితో చాటింగ్‌ చేస్తున్నాడు. అదే విమానాశ్రయం నుంచి బెంగళూరుకు విమానం ఎక్కేందుకు వచ్చిన తనప్రియురాలితో మొబైల్‌లో చాటింగ్‌ చేస్తున్నాడు. తన స్నేహితురాలు కర్ణాటక రాజధాని వెళ్లే విమానం మిస్సైందని చెప్పుకొచ్చాడు. ఐతే పోలీసులు అతన్ని చాలా సేపు విచారించిన తర్వాత గానీ ప్రయాణించేందుకు అనుమతించ లేదు.  ఈ మేరకు ప్రయాణికులందర్నీ క్షుణ్ణంగా తనిఖీ చేసిన తర్వాత దాదాపు 185 మంది ప్రయాణికులను ముంబై వెళ్లే విమానంలోకి తిరిగి అనుమతించారు. దీంతో విమానం సాయంత్రం ఐదు గంటలకు బయలుదేరింది. ఐతే ఇది భద్రతల నడుమ ఇద్దరి వ్యక్తుల మధ్య స్నేహ పూర్వక సంభాషణే కావడంతో ఆ వ్యక్తి పై ఎటువంటి ఫిర్యాదు నమోదు కాలేదని నగర పోలీస్‌ కమిషనర్‌ ఎన్‌ శశికుమార్‌ అన్నారు. (చదవండి: కాల్చేస్తాం, జరిమానా కట్టేస్తాం )

ఇదొక చిత్రమైన కేసు. కాలిఫోర్నియా స్టాక్‌టన్‌కు చెందిన ఓ వ్యక్తి.. దెయ్యం తన మొబైల్‌ నుంచి మెసేజ్‌లు పంపుతోందని, రిప్లయ్‌లు కూడా ఇస్తోందని వాదిస్తున్నాడు. నలభై ఏళ్ల ఆ వ్యక్తి తన ప్రియురాలితో ఇంగ్లండ్‌లోని యార్క్‌ నగరానికి టూర్‌కి వెళ్లాడు. అయితే అది హాంటెడ్‌ సిటీ అని, అక్కడ ఒక పబ్‌ దగ్గర ఫొటో తీస్తే.. దెయ్యం కనిపించిందని, అప్పటి నుంచి తనకు పారానార్మల్‌ యాక్టివిటీస్‌ (విచిత్రమైన అనుభవాలు) ఎదురవుతున్నాయని చెప్తున్నాడు.  అంతేకాదు.. ఆనాటి నుంచి తన ఫోన్‌ నుంచి తనకు తెలియకుండానే ప్రియురాలికి సందేశాలు వెళ్తున్నాయని, ఇదంతా దెయ్యం పనే అని అనుమానం వ్యక్తం చేస్తున్నాడు. ఈ మేరకు పోలీసులనూ ఆశ్రయించాడు. ప్రస్తుతం అతగాడిని మానసిక వైద్యుల పర్యవేక్షణలో విచారిస్తున్నారు పోలీసులు. అయితే పారానార్మల్‌ యాక్టివిస్ట్‌లు ఈ కేసును ఆసక్తికరంగా గమనిస్తున్నారు. మార్చి 21వ తేదీ నుంచి ఆ వ్యక్తికి ఇలాంటి అనుభవాలు మొదలయ్యాయని ‘టీసిడె లైవ్‌ రిపోర్ట్స్‌’ ఒక కథనం ప్రచురించింది.

Mama This Is So Hard Russian Soldier Text Msg: రష్య ఉక్రెయిన్‌ల మధ్య గత ఐదు రోజులుగా భీకరమైన యుద్ధం జరుగుతుంది. మరోవైపు ప్రపంచ దేశాలన్ని యుద్ధం వద్దని హెచ్చరికలు జారీ చే‍స్తున్న రష్యా వాటిని ఖాతరు చేయక దురాక్రమణకు పాల్పడింది. ఉక్రెయిన్‌లోని పౌరులు రష్యన్‌ యువ సైనికులు సైతం ఈ యుద్ధంలో మరణించారు. ఈ మేరకు జరిగిన ఐక్యరాజ్యసమితి జనరల్‌ అసెంబ్లీ సమావేశంలో ఉక్రెయిన్‌ రాయబారి ఒక రష్యన్‌ సైనికుడు తన తల్లిక పంపిన చివరి సందేశాన్ని వినిపించారు. ఆ సందేశం వింటున్న అక్కడ ఉన్న ప్రతి ఒక్కరి ముందు యుద్ధోన్మాదం కళ్ల ముందు కదలాడటమే కాదు హృదయాల్ని కలిచి వేసింది కూడా. ఇంతకీ ఆ సందేశంలో .."అమ్మా నాకు చాలా కష్టంగా ఉంది. ఉక్రెయిన్‌లోని నగరాలపై బాంబులు వేస్తున్నాం. పౌరులను కూడా లక్ష్యంగా చేసుకుని దాడి చేస్తున్నాం. పైగా అక్కడ ఉన్న ఉక్రెయిన్లు మమ్మల్ని ఫాసిస్టులు అని సంభోదిస్తూ స్వాగతిస్తారు. అంతేకాదు వారు సాయుధ వాహనాల కింద పడిపోతుంటారు, మమల్ని వెళ్లనివ్వరు. ఇదంతా చూస్తుంటే చాలా కష్టంగా అనిపిస్తోందమ్మా!. నన్ను నేను ఉరి తీసుకోవాలన్నంత బాధగా అనిపిస్తుంది అని వాళ్ల అమ్మకు చివరి లేక రాశాడు. అతను చనిపోపయే చివరి క్షణాల ముందు ఈ లేఖను రాశాడు. అంతేకాదు ఆ లేఖను అందుకున్న ఆ రష్యన్‌ సైనికుడి తల్లి సైతం ఇంతకాలం అతను ఎందుకు అమ్మతో మాట్లాడలేకపోయాడు అని ప్రశ్నించారు. అతని మృతదేహాన్ని నాకు పంపించగలరా అని ఆమె దీనంగా అడిగింది." అని చెప్పుకొచ్చారు. అంతేకాదు ఆ సమావేశంలో ఉక్రెయిన్‌ రాయబారి ప్రతి ఒక్క దేశం నేమ్‌ప్లేట్ పక్కన ఇప్పటికే మరణించిన 30 మంది రష్యన్‌ సైనికుల ఆత్మలను ఊహంచుకోండి అని ఆక్రందనగా ఉద్ఘాటించారు. మరోవైపు ఉక్రెయిన్ అధ్యక్షుడు జెలెన్స్కీ సైతం రష్యన్‌ యువ సైనికులు తమ ప్రాణాలను కాపాడుకోవడానికి ఉక్రెయిన్‌ను విడిచిపెట్టాలని విజ్ఞప్తి చేస్తున్నారు. ఉక్రెయిన్ యుద్ధంలొ బలి అవుతున్న యువ రష్యన్ సైనికుల విషాదం గురించి నొక్కి చెబుతోందన్నారు. పైగా ఈ ఉక్రెయిన్‌ యుద్ధంలో ఇప్పటివరకు సుమారు 4 వేల మంది రష్యన్‌ సైనికులు మరణించారని చెప్పారు. (చదవండి: చారిత్రక ఘట్టం: ఈయూ సభ్యత్వ దరఖాస్తుపై సంతకం చేసిన ఉక్రెయిన్‌ అధ్యక్షుడు)

సాక్షి, ముంబై:  లీగల్‌ నోటీసులపై ముంబై హైకోర్టు కీలక ఉత్తర్వులు వెలువరించింది. ఇక మీదట నేరుగా లేదా పోస్టు ద్వారానే కాకుండా సోషల్‌ మెసేజింగ్‌ యాప్‌ వాట్సాప్‌, ఈమెయిల్‌, టెక్ట్స్‌ మెసేజ్‌ల ద్వారా పంపిన లీగల్‌ నోటీసులకు చట్టబద్ధత ఉంటుందని ప్రకటించింది. ఎస్‌బీఐ, ముంబైకి చెందిన రోహిత్‌ జాదవ్‌ కేసులో కోర్టు ఈ మేరకు శుక్రవారం ఉత్తర్వులు జారీ చేసింది. వివరాలు.. క్రెడిట్‌ కార్డు బిల్లులు చెల్లించడం లేదంటూ ముంబైకి చెందిన రోహిత్‌ జాదవ్‌పై ఎస్‌బీఐ చట్టపరమైన చర్యలకు ఉపక్రమించింది. అతనికి లీగల్‌ నోటీసులు పంపించింది. అయితే జాదవ్‌ ఆ నోటీసులకు స్పందించలేదు. ఎన్నిసార్లు ఫోన్‌ చేసినా జవాబు ఇవ్వలేదు. దాంతో, లీగల్‌ నోటీసులు పంపించామనీ, కోర్టుకు హాజరు కావాలని వాట్సాప్‌లో జాదవ్‌కు సమాచారం ఇచ్చింది. కోర్టుకు హాజరుకావాల్సిన తేదీని పేర్కొంటూ వాట్సాప్‌లో పీడీఎఫ్‌ ఫైల్‌ పంపింది.  చూశాడు... అయినా స్పందించలేదు..! తాము వాట్సాప్‌లో పంపిన పీడీఎఫ్‌ ఫైల్‌ను జాదవ్‌ చూశాడనీ, అయినా ఎలాంటి జవాబు ఇవ్వలేదని ఎస్‌బీఐ కోర్టు దృష్టికి తెచ్చింది. ఎస్‌బీఐ వాదనతో ఏకీభవించిన కోర్టు.. సదరు రుణ ఎగవేతదారు వాట్సాప్‌లో పంపిన మేసేజ్‌ను ఓపెన్‌ చేసినట్లు యాప్‌ సమాచారంలో ఉన్న ‘బ్లూ టిక్‌’ను చూస్తే స్పష్టమవుతోందని కోర్టు వ్యాఖ్యానించింది. ఐటీ చట్టంలో వచ్చిన మార్పులకు అనుగుణంగా రిజిస్ట్రర్‌ పోస్టు, నేరుగా పంపిన నోటీసులతో పాటు వాట్సాప్‌, ఈమెయిల్‌, టెక్ట్స్‌ మెసేజ్‌ల ద్వారా పంపిన నోటీసులు కూడా చెల్లుబాటు అవుతాయని పేర్కొంది. దీంతో రోహిత్ కోర్టులో హాజరు కావాలని, ఎస్‌బీఐకు చెల్లించాల్సిన బిల్లును వడ్డీతో సహా చెల్లించాలని కోర్టు తీర్పు చెప్పింది. లేకపోతే జైలుకి పంపాల్సి వస్తుందని హెచ్చరించింది.

లక్నో : ఓవైపు ట్రిపుల్‌ తలాక్‌ను క్రిమినల్‌ నేరంగా పరిగణించేందుకు కేంద్రం ప్రయత్నాలు చేస్తున్న వేళ.. దేశవ్యాప్తంగా షరా మాములుగా ట్రిపుల్‌ తలాక్‌ల పర్వం కొనసాగుతూనే ఉంది. అయితే బిల్లు వార్తల్లో నిలుస్తున్న తరుణంలో అలాంటి కేసులు ఇంకా ఎక్కువ నమోదు అవుతుండటమే ఇక్కడ గమనించదగ్గ అంశం.  ఉత్తర ప్రదేశ్‌లో శనివారం ఒక్క రోజే రెండు ట్రిపుల్‌ తలాక్‌ వ్యవహారాలు వెలుగుచూశాయి. గోండా ప్రాంతంలో ఓ మహిళకు తన భర్త మూడుసార్లు తలాక్‌ చెప్పి వెళ్లగొట్టాడని మీడియా ముందు వాపోయింది. వికలాంగురాలైన కూతురి చికిత్స కోసం డబ్బులు అడిగితే.. తన భర్త ఈ చర్యకు పాల్పడ్డాడని ఆమె వాపోయింది. తనకు న్యాయం జరిగేలా చూడాలని ఆమె మత పెద్దలను, పోలీసులను కోరుతోంది. ఈ విషయాన్ని పరిశీలిస్తున్నట్లు స్థానిక పోలీసులు చెబుతున్నారు. ఇక మరో ఘటనలో దుబాయ్‌లో ఉంటున్న ఓ వ్యక్తి భార్యకు ఫోన్‌లో సందేశం ద్వారా ట్రిపుల్‌ తలాక్‌ చెప్పి విడాకులు ఇచ్చేశాడు. సుల్తాన్‌పూర్‌కు చెందిన రుబినా బానోకు, హఫీజ్‌ ఖాన్‌కు ఐదేళ్ల క్రితం వివాహం జరిగింది. భర్త యూఏఈలో ఉద్యోగం చేస్తుండగా.. ఆమె అత్తవారింట్లో ఉంటోంది. అయితే గత కొంత కాలంగా అదనపు కట్నం కోసం అత్తింటివారు వేధిస్తున్నారు. ఈ క్రమంలోనే రుబినా ఫోన్‌కు హఫీజ్‌ ట్రిపుల్‌ తలాక్‌ సందేశం పంపటంతో ఆమె షాక్‌ తింది. కుటుంబ సభ్యుల ఒత్తిడి మేరకు భర్త తనకు విడాకులు ఇచ్చి ఉంటాడని ఆమె భావిస్తోంది. గత రెండు నెలల్లో యూపీలో ట్రిపుల్‌ తలాక్‌ కేసులు 30 దాకా నమోదు కావటం గమనార్హం. రుబినా బానో ఫోటో ముస్లిం మహిళల (వివాహ హక్కుల రక్షణ) బిల్లు ప్రకారం 'ఇన్‌స్టెంట్ ట్రిపుల్ తలాక్'ను క్రిమినల్ నేరంగా పరిగణిస్తారు. అది ఏ రూపకంలో(ఫోన్‌ సందేశం, సోషల్‌ మీడియా ద్వారా అయినా) ఉన్నా సరే నేరమే. దీని కింద ఒక ముస్లిం పురుషుడికి అత్యధికంగా మూడేళ్ల జైలుశిక్ష విధించవచ్చు. అంతే కాకుండా భర్త ఆ కాలంలో బాధితురాలికి భరణాన్ని కూడా చెల్లించాలి. లోక్‌సభలో బిల్లుకు క్లియరెన్స్‌ లభించగా.. రాజ్యసభలో ఇంకా ఆమోదం పొందాల్సి ఉంది.


 తన భార్యను చంపడానికి కిరాయి హంతకులను మాట్లాడుకుందాం అనుకుని టెక్స్ట్ మెసేజ్ పంపాలనుకున్న ఓ వ్యక్తి.. పొరపాటున దాన్ని కిరాయి హంతకుడికి బదులు తన మాజీ బాస్‌కు పంపేశాడు. తన భార్యతో పాటు నాలుగేళ్ల కూతురిని కూడా చంపాలనుకోవడంతో జెఫ్రీ స్కాట్ లైటిల్ (42)ను పోలీసులు అరెస్టు చేశారు. ఎవరో షేన్ అనే వ్యక్తికి అతడు ఈ మెసేజ్ పంపాలని అనుకున్నాడు. అయితే అనుకోకుండా అది అతడి మాజీ బాస్‌కు వెళ్లడంతో కుట్ర మొత్తం ముందే తెలిసిపోయింది. ''హే షేన్, పని ఎలా నడుస్తోంది? మా భార్యను చంపడానికి నువ్వు సాయం చేస్తానని చెప్పావు గుర్తుందా, ఆ ఆఫర్ గురించి నీకు చెబుదామనుకున్నా'' అని మెసేజ్ పెట్టాడు. 
  
 తన భార్య మరణిస్తే బీమా సొమ్ము వస్తుందని, అది దాదాపు 6.68 కోట్ల రూపాయలు ఉంటుందని, అలాగే తన నాలుగేళ్ల కూతురిని కూడా చంపితే మరో 3.34 కోట్ల రూపాయలు వస్తుందని అతడు తన మెసేజ్‌లో తెలిపాడు. ఆ మొత్తాన్ని పంచుకోవచ్చని అన్నాడు. తాను తెల్లవారుజామున 5 గంటలకే ఉద్యోగానికి వెళ్లిపోతానని, తన భార్య మధ్యాహ్నం 2 గంటలకు వెళ్తుందని, అందువల్ల దోపిడీ ప్రయత్నంలా చేయొచ్చు లేదా ప్రమాదంలా చిత్రీకరించవచ్చని కూడా సూచించాడు. మొత్తం బీమా సొమ్మును సగం సగం పంచుకుందామని ఆఫర్ ఇచ్చాడు. 
  
 దాంతో హత్యాయత్నం కేసు కింద లైటిల్‌ను పోలీసులు అరెస్టు చేశారు. అయితే తాను తన భార్య, కూతుళ్లను చంపాలనుకోలేదని, తాను వేరే మహిళతో మాట్లాడానని ఆమె గొడవ పెట్టుకోవడంతో చిన్నపాటి వివాదం మాత్రమే చెలరేగిందని అన్నాడు. బహుశా తన కూతురు ఆ మెసేజ్ పంపి ఉంటుందని తెలిపాడు. కానీ పోలీసులు తమదైన శైలిలో విచారించడంతో చివరకు నేరాన్ని అంగీకరించాడు.


 
 మీరు యాపిల్ ఐ ఫోన్ వాడుతున్నారా?  అయితే జర భద్రం. హ్యాకర్లు మీ వ్యక్తిగత సమాచారాన్ని దొంగిలించే మరో సరికొత్త మార్గానికి తెరలేపారు.  టెక్స్ట్ సందేశం ద్వారా ఐ ఫోన్ యూజర్లను ట్రాప్ చేస్తున్న కుంభకోణం ఒకటి వెలుగులోకి వచ్చింది.   ఎన్ బీసీ   బే ఏరియా. కాం అందించిన సమాచారం ప్రకారం  ఒక  సాధారణ మెసేజ్ ద్వారా యూజర్లను ప్రమాదంలోకి నెట్టే  ప్రమాదానికి హ్యాకర్లు పూనుకుంటున్నట్టు తెలుస్తోంది.  మీ ఐ ఫోన్ ఐడి ఎక్స్పైర్ అయింది..ఫలానా  లింక్ ను క్లిక్ చేయండి అనే  మెసేజ్  ద్వారా  ఐఫోన్  వినియోగదార్లను హ్యాక్ చేస్తోందని  హెచ్చరిస్తోంది. తద్వారా యాపిల్ ఐ ఫోన్ ఖాతా ఐడి, పాస్ వర్డ్ వివరాలను  సేకరిస్తోందని తెలిపింది.  ఇలాంటి ప్రమాదకరమైన సందేశాలను కొంతమంది యూజర్లు ఇప్పటికే రిసీవ్ చేసుకున్నట్టు చెబుతోంది. వీటిని  నమ్మి మోసపోవద్దంటూ  ఐ ఫోన్ యూజర్లకు సూచిస్తోంది.   
 
 'మీ యాపిల్ ఐడి కాల పరిమితి ముగిసింది.. దీన్ని కొనసాగించాలంటే... సపోర్ట్ యాపిల్ లేదా యాపిల్ ఐడి లాగిన్ అనే వెబ్ సైట్లను క్లిక్ చేయమని' కోరుతుందని తెలిపింది. హాకర్లు ఆధ్వర్యంలో నడుస్తున్న ఆ హానికరమైన  వెబ్ సైట్ ను  యూజర్లు  ఓపెన్  చేయగానే.. యాపిల్ ఐడి, పాస్ వర్డ్ ను తస్కరిస్తుందని, దీంతోపాటు పేరు, చిరునామా,   బ్యాంకు కార్డుల వివరాలతో పాటు, పాస్పోర్ట్ వివరాలను కూడా అడుగుతుందని  పేర్కొంది.  దీన్ని గమనించి  ఐ ఫోన్ వినియోగదారులు అప్రమత్తంగా ఉండాలని హెచ్చరిస్తోంది. యాపిల్ సంస్థ ఇలాంటి సందేశాలను పంపదని, అసలు ఐడీ లను డిలీట్ చేయడం లాంటిది ఉండదని స్పష్టం చేసింది. యాపిల్ ఐడీ  ఖాతాలు రెగ్యులర్ బేసిస్ గా ఉంటాయనే విషయాన్ని గమనించాలని కోరింది.
 
 
 దీనిపై యాపిల్ సంస్థ కూడా స్పందించింది.  ఇలాంటి సందేశాలకు స్పందించి బ్యాంక్ క్రెడిట్ కార్డ్, పాస్వర్డ్ తదితర  విస్తృతమైన వ్యక్తిగత  వివరాలను   మెయిల్ ద్వారా గానీ, టెక్స్ట్ మెసేజ్ ద్వారా షేర్ చేయొద్దని సంస్థ  చెబుతోంది.  
 
  


 బెంగళూరు: ఓ బెంగళూరు యువతి ఇటీవల 'ఓలా' క్యాబ్‌ను బుక్‌ చేసుకుంది. అయితే కొన్ని అనుకోని కారణాల వల్ల కొంతసేపటికే ఆమె తన బుకింగ్‌ను రద్దు చేసుకుంది. దీంతో 'ఓలా' నుంచి ఈ మేరకు ఆమెకు ఓ మెసేజ్ కూడా వచ్చింది. కానీ, బుకింగ్ రద్దవ్వడంతో చికాకు పడ్డ 'ఓలా' క్యాబ్ డ్రైవర్ మాత్రం ఆమెకు ఫోన్‌కాల్ చేశాడు. ఆమె ఎత్తలేదు. దీంతో రెచ్చిపోయిన అతడు నీచంగా తిడుతూ మెసేజ్‌ చేశాడు.
 
 ఆమె ఈ విషయాన్ని ట్విట్టర్‌లో వెల్లడిస్తూ 'ఓలా' కాబ్స్ సపోర్ట్‌ ఖాతాకు ట్యాగ్ చేసింది. దీనిపై వెంటనే స్పందించిన 'ఓలా' క్యాబ్‌ సంస్థ సదరు డ్రైవరుపై వెంటనే చర్యలు తీసుకుంది. సంస్థతో అతని కాంట్రాక్టును రద్దు చేసింది. ఈ అసభ్యమైన చర్యకుగాను అతనిపై చట్టబద్ధమైన చర్యలు కూడా తీసుకుంటామని హెచ్చరించింది. అయితే బెంగళూరు యువతి చేసిన ఈ ట్వీట్‌ మాత్రం ఆన్‌లైన్‌లో హల్‌చల్‌ చేస్తోంది. డ్రైవరు అసభ్య ప్రవర్తన ఎత్తిచూపడంలో ఆ యువతి చూపిన ధైర్యాన్ని అందరూ మెచ్చుకుంటున్నారు.
 
 Had to cancel my cab 2 mins after booking yesterday because of an issue.This is how @Olacabs drivers respond to you. pic.twitter.com/b5F2Beoqwy
 — Micheℒℒe (@Micha_Alvez) February 6, 2016


 బ్రిటన్‌లోని ఓ స్కూలు నుంచి వచ్చిన టెక్ట్స్ మెసేజ్‌ను చూసి అవాక్కవ్వడం తల్లిదండ్రుల వంతైంది. ‘‘మీ పిల్లలు క్లాసు మధ్యలో టాయిలెట్‌కు వెళ్లాలంటే... వచ్చే వారానికల్లా ఈ మేరకు డాక్టర్ నోట్‌ను సమర్పించండి. పాస్‌లు జారీచేస్తాం’’ అని కార్డిఫ్‌లోని వేల్స్ హైస్కూల్ యాజమాన్యం ఎస్సెమ్మెస్ పంపింది. దీన్ని చూసి పేరెంట్స్ డంగైపోయారు. స్కూల్ వాదనేమిటంటే... పదకొండో తరగతికి వచ్చిన పిల్లలు ఒక నియమపద్ధతికి అలవాటుపడతారని, అతిమూత్రం తదితర ఆరోగ్య సమస్యలుంటే... దాన్నే తెలియజేస్తూ డాక్టర్ నోట్‌ను సమర్పించాలని తాము చెప్పామంటోంది.
 
 ఇదెక్కడి గోల బాబు... ఒకటికి వెళ్లాలన్నా డాక్టర్ సర్టిఫికెట్ తేవాలనడమేమిటని తల్లిదండ్రులు ఆగ్రహం వ్యక్తం చేస్తున్నారు. ఒకామైతే డాక్టర్‌తో కూడా మాట్లాడిందట. 25 పౌండ్లు (భారత కరెన్సీలో 2,500 రూపాయలు) అవుతుందని డాక్టరుగారు చెప్పారట. ఇదో అదనపు వాయింపని పేరెంట్స్ నిట్టూరుస్తున్నారు.