లాస్ ఏంజెలెస్: ఆల్ స్టార్ టి20 క్రికెట్ సిరీస్ ను షేన్ వార్న్ సేన 3-0తో క్లీన్ స్వీప్ చేసింది. ఉత్యంఠభరితంగా జరిగిన చివరి మ్యాచ్ లో సచిన్ బ్లాస్టర్స్ పై వార్న్ వారియర్స్ 4 వికెట్ల తేడాతో విజయం సాధించింది. బ్లాస్టర్స్ నిర్దేశించిన 220 పరుగుల లక్ష్యాన్ని మరొక బంతి మిగులుండగానే చేరుకుంది. 19.1 ఓవర్లలో 6 వికెట్లు నష్టపోయి 224 పరుగులు చేసింది.
 
 చివరి 2 బంతుల్లో 2 పరుగులు చేయాల్సిన దశలో షేన్ వార్న్ సిక్సర్ కొట్టి జట్టుకు విజయాన్ని అందించాడు. సంగక్కర 42 (21 బంతుల్లో 4 ఫోర్లు, 3 సిక్సర్లు), కల్లిస్ 47 (23 బంతుల్లో 4 ఫోర్లు, 4 సిక్సర్లు), పాంటింగ్ 43 (25 బంతుల్లో 3 ఫోర్లు, 2 సిక్సర్లు) చెలరేగారు. సైమండ్స్ 31, హేడన్ 12, జాంటి రోడ్స్ 17 పరుగులు చేశారు. స్వాన్ 2 వికెట్లు పడగొట్టాడు. ఆంబ్రోస్, హూపర్, సెహ్వాగ్ తలో వికెట్ తీశారు.
 
 టాస్ గెలిచి ముందుగా బ్యాటింగ్ చేసిన సచిన్ బ్లాస్టర్స్ 20 ఓవర్లలో 5 వికెట్లు కోల్పోయి 219 పరుగులు చేసింది. సచిన్ 56, గంగూలీ 50 పరుగులు చేశారు.


 లాస్ ఏంజెలెస్: ఆల్ స్టార్ టి20 క్రికెట్ సిరీస్ లో మాస్టర్ బ్లాస్టర్ సచిన్ టెండూల్కర్, సౌరవ్ గంగూలీ చెలరేగారు. వార్న్ వారియర్స్ తో జరుగుతున్న మూడో మ్యాచ్ లో అర్ధసెంచరీలతో జట్టుకు భారీ స్కోరు అందించారు. టాస్ గెలిచి ముందుగా బ్యాటింగ్ చేసిన సచిన్ బ్లాస్టర్స్ 20 ఓవర్లలో 5 వికెట్లు కోల్పోయి 219 పరుగులు చేసింది. వారియర్స్ కు 220 పరుగుల టార్గెట్ నిర్దేశించింది.
 
 సచిన్ 27 బంతుల్లో 2 ఫోర్లు, 6 సిక్సర్లతో 56 పరుగులు సాధించాడు. గంగూలీ 37 బంతుల్లో 3 ఫోర్లు, 3 సిక్సర్లతో 50 పరుగులు చేశాడు. సెహ్వాగ్ 27, జయవర్ధనే 41, హూపర్ 33 పరుగులు సాధించారు. వారియర్స్ బౌలర్లలో వెటోరి 3 వికెట్లు పడగొట్టాడు. సైమండ్స్, వాల్ష్ చెరో వికెట్ దక్కించుకున్నారు.  మూడు మ్యాచ్ ల ఈ సిరీస్ లో మొదటి రెండు మ్యాచ్ ల్లో వారియర్స్ గెలిచింది.


 రెండో టి20లోనూ విజయం
 57 పరుగులతో ఓడిన బ్లాస్టర్
 వెటరన్స్ పరుగుల మోత
  
 హోస్టన్: దిగ్గజ క్రికెటర్లు అమెరికా అభిమానులకు ఈ సారి ఫుల్ వినోదాన్ని పంచారు. వార్న్ వారియర్స్, సచిన్ బ్లాస్టర్స్ ఆటగాళ్లు టి20 మ్యాచ్‌లో పోటీ పడి పరుగుల మోత మోగించడంతో స్థానిక మినట్ మెయిడ్ పార్క్ దద్దరిల్లింది. చివరకు ఈ మ్యాచ్‌లోనూ వారియర్స్‌దే పైచేయి అయింది. సమష్టి ప్రదర్శనతో వార్న్ సేన 57 పరుగుల తేడాతో సచిన్ బ్లాస్టర్స్‌ను చిత్తు చేసింది. ముందుగా బ్యాటింగ్‌కు దిగిన వారియర్స్ 20 ఓవర్లలో 5 వికెట్లకు 262 పరుగుల భారీ స్కోరు చేయగా...అనంతరం బ్లాస్టర్స్ 20 ఓవర్లలో 8 వికెట్లకు 205 పరుగులకు పరిమితమైంది. ఫలితంగా వార్న్ జట్టు ఆల్‌స్టార్స్ సిరీస్‌ను 2-0తో సొంతం చేసుకుంది. ఈ మ్యాచ్‌కు భారీ సంఖ్యలో దాదాపుగా 28 వేల మంది ప్రేక్షకులు హాజరు కావడం సిరీస్ సక్సెస్‌ను చూపిస్తోంది. చివరిదైన మూడో మ్యాచ్ శనివారం (భారత కాలమానం ప్రకారం ఆదివారం ఉదయం) లాస్ ఏంజెల్స్‌లో జరుగుతుంది.
 
  చెలరేగిన సంగక్కర
  కుమార సంగక్కర (30 బంతుల్లో 70; 6 ఫోర్లు, 6 సిక్సర్లు) మెరుపు బ్యాటింగ్‌తో వారియర్స్ ఇన్నింగ్స్‌కు ఊపు తెచ్చాడు. ముఖ్యంగా తన మాజీ సహచరుడు మురళీధరన్ బౌలింగ్‌ను చితకబాదుతూ 3 సిక్సర్లు 2 ఫోర్లు కొట్టిన అతను స్వాన్ బౌలింగ్‌లోనూ 10 బంతుల్లోనే 24 పరుగులు రాబట్టాడు. సంగ, కలిస్ (23 బంతుల్లో 45; 3 ఫోర్లు, 4 సిక్సర్లు) కలిసి మూడో వికెట్‌కు 43 బంతుల్లోనే 91 పరుగులు జత చేయగా, ఆ తర్వాత సంగక్కర, పాంటింగ్ (16 బంతుల్లో 41; 5 ఫోర్లు, 3 సిక్సర్లు) 23 బంతుల్లోనే 69 పరుగులు జోడించారు. వారియర్స్ జట్టులో హేడెన్ (15 బంతుల్లో 32; 2 ఫోర్లు, 3 సిక్సర్లు), వాన్ (22 బంతుల్లో 30; 4 ఫోర్లు, 1 సిక్స్) కూడా కీలక ఇన్నింగ్స్ ఆడగా...చివర్లో సైమండ్స్ (6 బంతుల్లో 19 నాటౌట్; 1 ఫోర్, 2 సిక్సర్లు), రోడ్స్ (8 బంతుల్లో 18 నాటౌట్; 1 ఫోర్, 2 సిక్సర్లు) 13 బంతుల్లో అభేద్యంగా 38 పరుగులు జత చేశారు. బ్లాస్టర్స్ బౌలర్లలో క్లూసెనర్‌కు 2 వికెట్లు దక్కాయి.
 
  పోరాడిన పొలాక్
  బ్లాస్టర్స్ తరఫున షాన్ పొలాక్ (22 బంతుల్లో 55; 1 ఫోర్, 7 సిక్సర్లు) అద్భుత ఇన్నింగ్స్ ఆడినా అది జట్టు విజయానికి సరిపోలేదు. అక్రం బౌలింగ్‌లోనే 3 సిక్సర్లు బాదిన పొలాక్, సైమండ్స్ బౌలింగ్‌లో 4 భారీ సిక్సర్లు కొట్టాడు. తనదైన శైలిలో కొన్ని చక్కటి షాట్లు ఆడి అభిమానులను ఆనందపర్చిన సచిన్ (20 బంతుల్లో 33; 3 ఫోర్లు, 2 సిక్సర్లు) సక్లాయిన్ బౌలింగ్‌లో బౌల్డయ్యాడు. ఇతర ప్రధాన బ్యాట్స్‌మెన్ సెహ్వాగ్ (16), గంగూలీ (12), లారా (19), జయవర్ధనే (5), క్లూసెనర్ (21) విఫలం కావడంతో బ్లాస్టర్స్‌కు ఓటమి తప్పలేదు. సైమండ్స్‌కు 4 వికెట్లు దక్కాయి.  ఈ మ్యాచ్ మొత్తం కలిపి 38 సిక్సర్లు నమోదు కావడం విశేషం!
  


 హూస్టన్: వార్న్ వారియర్స్ ముందు సచిన్ బ్లాస్టర్స్ తేలిపోయారు. వరుసగా రెండో మ్యాచ్ లోనూ సచిన్ సేన చతికిలపడింది. ఆల్ స్టార్ క్రికెట్ టి20 సిరీస్ లో భాగంగా అమెరికాలోని హూస్టన్ లో గురువారం జరిగిన రెండో మ్యాచ్ లో షేన్ వార్న్ నాయకత్వంలోని వారియర్స్ ఘనవిజయం సాధించింది. బ్లాస్టర్స్ ను 57 పరుగుల తేడాతో చిత్తు చేసింది.
  
 వారియర్స్ నిర్దేశించిన 263 పరుగుల టార్గెట్ ను చేరుకునేందుకు బరిలోకి దిగిన సచిన్ టీమ్ 20 ఓవర్లలో 8 వికెట్లు కోల్పోయి 205 పరుగులు చేసింది. సెహ్వాగ్ 16, సచిన్ 33, గంగూలీ 12, లారా 19, క్లుసెనర్ 21, స్వాన్ 22 పరుగులు చేశారు. చివర్లో షాన్ పొలాక్ మెరుపు ఇన్నింగ్స్ ఆడడంతో గౌరవప్రదమైన స్కోరు చేయగలిగింది. పొలాక్ 22 బంతుల్లో 7 సిక్సర్లు, ఫోర్ తో 55 పరుగులు పిండుకున్నాడు. వారియర్స్ బౌలర్ సైమండ్స్ 4 వికెట్లు పడగొట్టాడు. ముందుగా బ్యాటింగ్ చేసిన వారియర్స్ 20 ఓవర్లలో 5 వికెట్లు నష్టపోయి 262 పరుగులు చేసింది. కుమార సంగక్కర 'మ్యాన్ ఆఫ్ ది మ్యాచ్' అందుకున్నాడు.
 
 ఈ విజయంతో మూడు మ్యాచ్ ల ఈ సిరీస్ లో వారియర్స్ 2-0 ఆధిక్యంలోకి దూసుకెళ్లింది. న్యూయార్క్ లో జరిగిన మొదటి మ్యాచ్ లో 6 వికెట్ల తేడాతో బాస్టర్స్ పై వారియర్స్ గెలిచింది.


 హూస్టన్: అంతర్జాతీయ క్రికెట్ కు గుడ్ బై చెప్పినా తనలో సత్తా తగ్గలేదని శ్రీలంక దిగ్గజ బ్యాట్స్ మన్ కుమార సంగక్కర నిరూపించాడు. ఆల్ స్టార్ క్రికెట్ టి20 సిరీస్ లో భాగంగా సచిన్ బ్లాస్టర్స్ తో గురువారం జరుగుతున్న రెండో మ్యాచ్ లో సంగక్కర చెలరేగాడు. సిక్సర్లు, ఫోర్లతో విరుచుకుపడ్డాడు. సంగక్కర వీరవిహారంతో వార్న్ టీమ్ భారీ స్కోరు చేసింది. టాస్ ఓడి ముందుగా బ్యాటింగ్ చేసిన వార్న్ వారియర్స్ 20 ఓవర్లలో 5 వికెట్లు నష్టపోయి 262 పరుగులు చేసింది. సచిన్ సేనకు 263 పరుగుల టార్గెట్ ను నిర్దేశించింది.
 
 సంగక్కర 30 బంతుల్లో 6 ఫోర్లు, 6 సిక్సర్లతో 70 పరుగులు చేశాడు. రికీ పాంటింగ్ 16 బంతుల్లో 5 ఫోర్లు, 3 సిక్సర్లతో 41 పరుగులు సాధించాడు. కల్లిస్ 45(23 బంతుల్లో 3 ఫోర్లు, 4 సిక్సర్లు), హేడన్ 32(15 బంతుల్లో 2 ఫోర్లు, 3 సిక్సర్లు), వాగన్ 30(22 బంతుల్లో 4 ఫోర్లు, సిక్సర్), సైమండ్స్ 19(6 బంతుల్లో ఫోర్, 2 సిక్సర్లు) చెలరేగడంతో వార్న్ సేన భారీ స్కోరు చేసింది.


 క్రికెట్ ఆల్-స్టార్స్ సిరీస్‌లో భాగంగా సచిన్ బ్లాస్టర్స్-వార్న్స్ వారియర్స్‌ల మధ్య జరుగనున్న రెండో టి-ట్వంటీ మ్యాచ్ హ్యూస్టన్ (అమెరికా)లో ప్రారంభమైంది. మొదట టాస్ గెలిచిన కెప్టెన్ సచిన్ బౌలింగ్ ఎంచుకున్నాడు. న్యూయార్క్‌లో జరిగిన మొదటి ట్వంటీ ట్వంటీలో షేన్ వార్న్ జట్టు గెలుపొందిన విషయం తెలిసిందే.
  


 ఆల్ స్టార్స్ మ్యాచ్‌లో ‘వార్న్’ వారియర్స్ ఘన విజయం  
 ఆరు వికెట్ల తేడాతో ఓడిన సచిన్‌సేన  
 వీరేంద్ర సెహ్వాగ్ జోరు వృథా
 11న రెండో మ్యాచ్
  
 అదే జోరు.. అవే షాట్లు.. అదే ఊపు... వయసు పైబడినా.. ఆటలో పదును మాత్రం ఇంకా తగ్గలేదు.. స్టార్ల నుంచి దిగ్గజాలుగా మారినా... కొట్టే షాట్లలో మాత్రం మార్పు రాలేదు... ఇప్పటికీ కుర్రాళ్లకు తీసిపోమనే విధంగా ‘క్రికెట్ ఆల్ స్టార్స్ సిరీస్’లో ప్రపంచ మాజీలు చేసిన బ్యాటింగ్ విన్యాసాలకు అమెరికా అభిమానులు ముగ్దులయ్యారు. చూడ ముచ్చటైన కవర్ డ్రైవ్‌లు... తమకు మాత్రమే సాధ్యమయ్యే స్ట్రయిట్ డ్రైవ్‌లు... అప్పర్ కట్స్.. స్వీప్‌లు.. లాంగాన్ షాట్స్‌తో దుమ్మురేపడంతో శనివారం జరిగిన తొలి మ్యాచ్‌లో వార్న్ వారియర్స్... సచిన్ సేనపై ఘన విజయం సాధించింది.
  
 న్యూయార్క్: ఆటకు దూరమైనా... తన స్పిన్ మ్యాజిక్‌ను మాత్రం మర్చిపోలేదని ఆసీస్ బౌలింగ్ దిగ్గజం షేన్ వార్న్ (3/20) నిరూపించుకున్నాడు. గింగరాలు తిరిగే బంతులతో కీలక వికెట్లు పడగొట్టాడు. వార్న్‌కు తోడు సైమండ్స్ (3/15), రికీ పాంటింగ్ (38 బంతుల్లో 48 నాటౌట్; 3 ఫోర్లు, 3 సిక్సర్లు), సంగక్కర (29 బంతుల్లో 41; 2 ఫోర్లు, 3 సిక్సర్లు) జోరు చూపెట్టడంతో... క్రికెట్ ఆల్‌స్టార్స్ సిరీస్‌లో భాగంగా శనివారం జరిగిన తొలి మ్యాచ్‌లో వార్న్ వారియర్స్ 6 వికెట్ల తేడాతో సచిన్స్ బ్లాస్టర్‌పై ఘన విజయం సాధించింది. టాస్ ఓడి బ్యాటింగ్‌కు దిగిన సచిన్స్ బ్లాస్టర్స్ 20 ఓవర్లలో 8 వికెట్లకు 140 పరుగులు చేసింది. సెహ్వాగ్ (22 బంతుల్లో 55; 3 ఫోర్లు, 6 సిక్సర్లు), సచిన్ (27 బంతుల్లో 26; 2 ఫోర్లు, 1 సిక్స్) చెలరేగి ఆడారు. తర్వాత వార్న్ వారియర్స్ 17.2 ఓవర్లలో 4 వికెట్లకు 141 పరుగులు చేసింది. వార్న్‌కు ‘మ్యాన్ ఆఫ్ ద మ్యాచ్’ అవార్డు లభించింది. మూడు మ్యాచ్‌ల ఈ సిరీస్‌లో వార్న్ వారియర్స్ 1-0తో ఆధిక్యంలోకి వెళ్లింది. రెండో మ్యాచ్ ఈనెల 11న హూస్టన్‌లో జరుగుతుంది.
  
 వీరూ... జోరు
  సచిన్‌తో కలిసి ఓపెనింగ్‌కు వచ్చిన సెహ్వాగ్ వీరవిహారం చేశాడు. అక్రమ్ బౌలింగ్‌లో థర్డ్ మ్యాన్ దిశగా తొలి బౌండరీ సాధించిన వీరూ ఆ తర్వాత సిక్సర్లను లక్ష్యంగా చేసుకున్నాడు. డొనాల్డ్, కలిస్ ఓవర్లలో షార్ట్ బంతులను లాంగాన్, ఆన్‌సైడ్‌లో భారీ షాట్లుగా మలిచాడు. వాల్ష్ వేసిన ఏడో ఓవర్‌లో మూడు సిక్సర్లు, ఓ ఫోర్‌తో 23 పరుగులు రాబట్టడంతో స్కోరు బోర్డు పరుగెత్తింది. ఈ దశలో బౌలింగ్‌కు వచ్చిన వార్న్ ఆఖరి బంతికి సచిన్‌ను అవుట్ చేయగా, తర్వాతి ఓవర్ తొలి బంతికి సెహ్వాగ్ జోరుకు వెటోరి కళ్లెం వేశాడు. ఈ ఇద్దరు తొలి వికెట్‌కు 85 పరుగులు జత చేశారు. తర్వాత వార్న్.. వరుస ఓవర్లలో బ్రియాన్ లారా (1), వీవీఎస్ లక్ష్మణ్ (8)లను పెవిలియన్‌కు చేర్చడంతో బ్లాస్టర్స్ జట్టు 97 పరుగులకు 4 వికెట్లు కోల్పోయింది. ఈ దశలో హూపర్ (11), జయవర్ధనే (18) ఇన్నింగ్స్‌ను కుదుటపర్చే ప్రయత్నం చేసినా.. సైమండ్స్ స్లో బౌలింగ్‌లో పరుగులు చేయలేక ఇబ్బంది పడ్డారు. 16వ ఓవర్‌లో జయవర్ధనేను అవుట్ చేసిన సైమండ్స్... 18వ ఓవర్‌లో నాలుగు బంతుల వ్యవధిలో హూపర్, మొయిన్ ఖాన్ (1)ను అవుట్ చేయడంతో బ్లాస్టర్స్ ఓ మాదిరి స్కోరుకే పరిమితమైంది.
 
 పాంటింగ్ అదుర్స్..
 లక్ష్య ఛేదనకు దిగిన వారియర్స్... మూడో ఓవర్‌లోనే ఓపెనర్లు కలిస్ (13), హెడెన్ (4)ల వికెట్లను కోల్పోయింది. అయితే వన్‌డౌన్‌లో పాంటింగ్, సంగక్కరలు మంచి సమన్వయంతో ఆడారు. అంబ్రోస్ బౌలింగ్‌లో సంగ రెండు సిక్సర్లు బాది రన్‌రేట్‌ను పెంచాడు. పాంటింగ్ కూడా పొలాక్, మురళీధరన్‌లకు సిక్సర్ల రుచి చూపెట్టాడు. ఈ ఇద్దరు మూడో వికెట్‌కు 80 పరుగులు జోడించాక.. అక్తర్ బౌలింగ్‌లో సంగక్కర అవుటయ్యాడు. తర్వాతి ఓవర్‌లో సైమండ్స్ (1) వెనుదిరిగినా... పాంటింగ్, జాంటీ రోడ్స్ (14 బంతుల్లో 20 నాటౌట్; 3 సిక్సర్లు) దుమ్మురేపారు. 21 బంతుల్లో అజేయంగా 37 పరుగులు సమకూర్చడంతో వారియర్స్ మరో 16 బంతులు మిగిలి ఉండగానే విజయాన్ని అందుకుంది. అక్తర్‌కు 2 వికెట్లు పడ్డాయి.
 
 ►సచిన్, సెహ్వాగ్ బ్యాటింగ్‌కు వస్తుంటే ఒక్కసారిగా స్టేడియం దద్దరిల్లింది. ‘సచిన్, సచిన్, వీరూ, వీరూ’ అంటూ మైదానంలో ప్రేక్షకులు గొంతు కలిపారు.
  
 ►న్యూయార్క్‌లోని సిటీ ఫీల్డ్ బేస్‌బాల్ మైదానంలో జరిగిన ఈ మ్యాచ్‌కు దాదాపు  36 వేల మంది ప్రేక్షకులు హాజరయ్యారు.
  
  
 ►వివిధ దేశాల జాతీయ పతాకాలతో అభిమానులు ఆటగాళ్లకు మద్దతు తెలిపారు. భారత జాతీయ జెండా రంగులను ముఖానికి పూసుకుని, టీమిండియా   టీ షర్ట్‌లను ధరించి చాలా మంది హాజరయ్యారు.
  
 ► సచిన్ మా దేవుడు, అధ్యక్షుడు అంటూ రకరకాల బ్యానర్లతో స్టేడియం నిండిపోయింది. చాలా మంది ఇతర దేశాల టీ షర్ట్‌లను కూడా ధరించి మద్దతు తెలిపారు.
 
 
 స్కోరు వివరాలు
 సచిన్స్ బ్లాస్టర్స్ ఇన్నింగ్స్: సెహ్వాగ్ (బి) వెటోరి 55; సచిన్ (సి) కలిస్ (బి) వార్న్ 26; లక్ష్మణ్ (స్టంప్డ్) సంగక్కర (బి) వార్న్ 8; లారా ఎల్బీడబ్ల్యు (బి) వార్న్ 1; జయవర్ధనే సబ్ (సి) అగర్కార్ (బి) సైమండ్స్ 18; హూపర్ ఎల్బీడబ్ల్యు (బి) సైమండ్స్ 11; పొలాక్ (సి) కలిస్ (బి) డొనాల్డ్ 11; మొయిన్ ఖాన్ (సి) కలిస్ (బి) సైమండ్స్ 1; ఆంబ్రోస్ నాటౌట్ 1; మురళీధరన్ నాటౌట్ 2; ఎక్స్‌ట్రాలు 6; మొత్తం: (20 ఓవర్లలో 8 వికెట్లకు) 140.
 
 వికెట్ల పతనం: 1-85; 2-85; 3-88; 4-97; 5-118; 6-127; 7-130; 8-137.
  
 బౌలింగ్: అక్రమ్ 4-0-16-0; డొనాల్డ్ 3-0-23-1; వాల్ష్ 2-0-30-0; కలిస్ 1-0-19-0; వార్న్ 4-0-20-3; వెటోరి 4-0-13-1; సైమండ్స్ 2-0-15-3.
  
 వార్న్ వారియర్స్ ఇన్నింగ్స్: కలిస్ రనౌట్ 13; హెడెన్ (సి) మొయిన్ (బి) అక్తర్ 4; పాంటింగ్ నాటౌట్ 48; సంగక్కర (సి) జయవర్ధనే (బి) అక్తర్ 41; సైమండ్స్ ఎల్బీడబ్ల్యు (బి) మురళీధరన్ 1; రోడ్స్ నాటౌట్ 20; ఎక్స్‌ట్రాలు 14; మొత్తం: (17.2 ఓవర్లలో 4 వికెట్లకు) 141.
  
 వికెట్ల పతనం: 1-20; 2-22; 3-102; 4-104.
 బౌలింగ్: అక్తర్ 4-0-26-2; పొలాక్ 3-0-30-0; అంబ్రోస్ 3-0-36-0; మురళీధరన్ 4-1-18-1; హూపర్ 3-0-20-0; సచిన్ 0.2-0-7-0.
  
  


 న్యూయార్క్: క్రికెట్ ఆల్ స్టార్స్ సిరిస్ లో భాగంగా జరిగిన తొలి టి20లో సచిన్ బ్లాస్టర్స్ పై వార్న్ వారియర్స్  విజయం సాధించింది. 6 వికెట్ల తేడాతో గెలిచింది.  టాస్ ఓడిపోయి ముందుగా బ్యాటింగ్ చేసిన సచిన్ సేన 20 ఓవర్లలో 8 వికెట్లు కోల్పోయి 140 పరుగులు చేసింది.
 
 ఇటీవలే అంతర్జాతీయ క్రికెట్ కు గుడ్ బై చెప్పిన డాషింగ్ ఓపెనర్ వీరేంద్ర సెహ్వాగ్ చెలరేగాడు.  22 బంతుల్లో 3 ఫోర్లు, 6 సిక్సర్లతో 55 పరుగులు బాదాడు. అయితే మిగతా ఆటగాళ్లు విఫలమవడంతో బ్లాస్టర్స్ భారీ స్కోరు చేయలేకపోయింది. టెండూల్కర్  26, జయవర్ధనే 18, హూపర్ 11, పొలాక్ 11 పరుగులు చేశారు. మిగతా ఆటగాళ్లు సింగిల్ డిజిట్ స్కోరుకే పరిమితమయ్యారు. వీవీఎస్ లక్ష్మణ్ 8 పరుగులు చేశాడు. వార్న్ 3, సైమండ్స్ 3 వికెట్లు పడగొట్టారు. వార్న్ బౌలింగ్ లోనే సచిన్ అవుట్ కావడం విశేషం.
 
 రికీ పాంటింగ్(48), సంగక్కర(41), జాంటీ రోడ్స్(20) రాణిచండంతో వారియర్స్ విజయం సాధించింది. 17.2 ఓవర్లలో 4 వికెట్లు కోల్పోయి 141 పరుగులు చేసింది. 16 బంతులు మిగులుండగానే టార్గెట్ ను చేరుకుంది. బాస్టర్ బౌలర్ షోయబ్ అక్తర్ 2 వికెట్లు పడగొట్టాడు. మురళీ ధరన్ ఒక వికెట్ తీశాడు. షేన్ వార్న్ 'ప్లేయర్ ఆఫ్ ద మ్యాచ్'గా ఎంపికయ్యారు.