ఆపద‌ సమయంలో ప్రభుత్వాస్పత్రులే అండ..!

సాక్షి, అమరావతి: రాష్ట్ర ప్రజలపై గడిచిన ఏడున్నర నెలలుగా కరోనా మహమ్మారి ఎంతగానో ప్రభావం చూపింది. వైరస్‌ సోకుతుందనే భయంతో రోగులు.. ఉన్న జబ్బులకూ ఆస్పత్రులకు రాలేక ఇబ్బంది పడ్డారు. మరోవైపు ప్రైవేట్‌ ఆస్పత్రులు ఔట్‌పేషెంట్‌, ఇన్‌పేషెంట్‌ సేవలు నిలిపివేశాయి. ఈ ఆపద సమయంలో ప్రభుత్వ ఆస్పత్రులే అండగా నిలిచాయి. రాష్ట్రంలో ప్రధానంగా సెకండరీ కేర్‌ అంటే సామాజిక ఆరోగ్య కేంద్రాలు, ఏరియా, జిల్లా ఆస్పత్రులే కొలమానంగా చూస్తాం. ఆయా ఆస్పత్రుల్లో ఔట్‌పేషెంట్‌ సేవలు 55%, ఇన్‌పేషెంట్‌ సేవలు 46% తగ్గిపోయాయంటే కరోనా ప్రభావం ఎంతగా చూపిందో అంచనా వేయవచ్చు. రాష్ట్ర వైద్య ఆరోగ్య శాఖ పరిశీలన మేరకు విధిలేని పరిస్థితుల్లో మినహా చాలామంది రోగులు ఇంటికే పరిమితమైనట్టు తెలుస్తోంది.(చదవండి: ఏపీలో రికార్డ్‌స్థాయిలో కరోనా పరీక్షలు)

వాయిదాకే మొగ్గు

• చాలామంది రకరకాల జబ్బులున్నా కరోనాతో భయపడి వాయిదా వేసుకున్నారు.
• అత్యవసరమైతే మినహా సర్జరీల జోలికి వెళ్లలేదు.
• చాలామంది దీర్ఘకాలిక జబ్బుల బాధితులు ఫోన్‌ల ద్వారానే డాక్టర్లను సంప్రదించి మందులు వేసుకున్నారు.
• నెలకోసారి లేదా మూణ్నెళ్లకోసారి రక్తపరీక్షలు చేయించుకునే వాళ్లు ల్యాబొరేటరీలకే వెళ్లలేదు. దీంతో 79% తగ్గినట్టు తేలింది.
• దగ్గు, జ్వరమూ వంటి లక్షణాలుంటే కరోనా అని భయపడి చాలామంది వైద్యపరీక్షలు చేయించుకున్నారు.
• కరోనా సమయంలో రాష్ట్రంలో పారాసెట్‌మాల్, అజిత్రోమైసిన్‌ వంటి వాటితో పాటు విటమిన్‌ మాత్రలు భారీగా అమ్ముడు పోయాయి.
• విచిత్రమేమంటే కరోనా వైరస్‌ కారణంగా మానసిక వైద్యులను ఫోన్‌ ద్వారా సంప్రదించిన వారి సంఖ్య గణనీయంగా పెరిగింది.
• కరోనాకు భయపడి జూలై మొదటి వారం వరకూ ప్రైవేట్‌ ఆస్పత్రులు తెరవలేదు. 
• కరోనా సమయంలో ప్రభుత్వం ఏర్పాటు చేసిన 14410 టెలీమెడిసిన్‌ నెంబర్‌ రోగులను ఆదుకుంది.
• టెలిమెడిసిన్‌లో భాగంగా సుమారు 50వేల మంది సేవలు పొందారు.

కోవిడ్‌-19కి భయపడి..
కరోనా వైరస్‌ సమయంలో ప్రభుత్వ ఆస్పత్రుల సేవలే అండగా నిలిచాయి. వైరస్‌కు చాలామంది మానసికంగా భయపడ్డారు. అందుకే ఆస్పత్రులకు రావడానికి వెనక్కు తగ్గారు. ఇప్పుడిప్పుడే సాధారణ పరిస్థితులు నెలకొంటున్నాయి. మరికొద్ది రోజుల్లో పూర్తిగా నాన్‌-కోవిడ్‌ సేవలూ అందుబాటులోకి వస్తాయి.
- డా.రామకృష్ణారావు, కమిషనర్‌, వైద్య విధానపరిషత్

వైద్య ఆరోగ్య శాఖ గణాంకాల మేరకు ప్రభుత్వ ఆస్పత్రుల్లో వైద్యసేవలు పొందిన వారి వివరాలు: