Anantapur: పసి పిల్లలపై పైశాచికత్వం.. మద్యం సీసాలు పగులగొట్టి.. వేడి చేసి

ప్రతీకాత్మకచిత్రం

సాక్షి, అనంతపురం: తమ వివాహేతర సంబంధానికి అడ్డుగా ఉన్నారని చిన్నారులిద్దరిపై ఓ వ్యక్తి అమానుషంగా ప్రవర్తించాడు. చిత్రహింసలకు గురిచేశాడు. చివరికి చుట్టుపక్కల వాళ్లు వచ్చి వారిని రక్షించారు. గుంతకల్లులో వారం కిందట జరిగిన ఈ ఘటన ఆలస్యంగా వెలుగులోకొచ్చింది. విశ్వసనీయ సమాచారం మేరకు.. గుంతకల్లుకు చెందిన ఓ వ్యక్తి అప్పుల బాధతో నాలుగేళ్ల కిందట ఆత్మహత్య చేసుకున్నాడు. అప్పటికే అతనికి భార్య, ఇద్దరు మగ పిల్లలున్నారు. అనంతరం భార్య తన ఇద్దరు పిల్లలను గుంతకల్లులోని పుట్టింట్లో వదిలేసి అనంతపురానికి చేరుకుంది. ఓ కార్పొరేట్‌ ఆస్పత్రిలో వేతనంపై పనిచేస్తోంది.

ఈ క్రమంలోనే పరిచయమైన వ్యక్తితో వివాహేతర సంబంధం పెట్టుకుంది. అప్పుడప్పుడూ గుంతకల్లుకు వెళ్లి తన పిల్లలను చూసి వస్తుండేది. ఈ క్రమంలోనే వారం కిందట ప్రియుడితో కలిసి గుంతకల్లుకు వెళ్లింది. అయితే పిల్లలిద్దరూ తమ సంబంధానికి అడ్డుగా ఉన్నారని భావించిన ఆమె ప్రియుడు.. మద్యం సీసాలు పగులగొట్టి, వాటిని బాగా వేడి చేసి వాటితో ఓ బాలుడి శరీరంపై వాతలు పెట్టాడు. మరో బాలుడి తలపై బలంగా కొట్టడంతో తీవ్రంగా గాయపడ్డాడు. దీంతో భయభ్రాంతులకు గురైన ఆ చిన్నారులు గట్టిగా కేకలు వేయగా.. ఇరుగూ పొరుగు వారొచ్చి పిల్లలను కాపాడారు.

చదవండి: (పెళ్లయిన తొమ్మిది నెలలకే.. కన్నవారింట్లోనే..)

108 సాయంతో వారికి  ప్రథమ చికిత్స చేయించి సురక్షిత ప్రాంతంలో ఉంచారు. ఆ తర్వాత పోలీసులకు సమాచారం ఇవ్వడంతో వారొచ్చి పిల్లల తల్లిని విచారించారు. అయితే ప్రియుడిని కాపాడేందుకు ఆమె అబద్ధాలు చెప్పింది. పిల్లలకు భయం ఉండాలనే ఉద్దేశంతో తానే అలా హింసించానని చెప్పుకొచ్చింది. చివరికి చిన్నారులిద్దరినీ వారి మేనమామతో పంపించాలని పోలీసులు, పెద్దలు నిర్ణయించారు.