నేటి నుంచి పాలెం వెంకన్న బ్రహ్మోత్సవాలు

నేటి నుంచి పాలెం వెంకన్న బ్రహ్మోత్సవాలు

బిజినేపల్లి: భక్తుల కొంగుబంగారంగా విరాజిల్లుతున్న పాలెం వేంకటేశ్వరస్వామి బ్రహ్మోత్సవాలు గురువారం నుంచి ప్రారంభం కానున్నాయి. బ్రహ్మోత్సవాల్లో భాగంగా ఫిబ్రవరి 2న అలివేలుమంగ సమేత వేంకటేశ్వరస్వామి కల్యాణోత్సవం, 4న స్వామివారి రథోత్సవం నిర్వహించనున్నారు. 6వ తేదీ వరకు కొనసాగే బ్రహ్మోత్సవాలకు అన్ని ఏర్పాట్లు పూర్తిచేసినట్లు ఆలయ ఈఓ రంగారావు ఒక ప్రకటనలో తెలిపారు. ఆలయ ధర్మకర్తగా మనుసాని విష్ణుమూర్తి గురువారం ప్రమాణ స్వీకారం చేయనున్నట్లు పేర్కొన్నారు.

చదువుతోనే

ఉజ్వల భవిష్యత్‌

కల్వకుర్తి టౌన్‌: చదువులో ఎంత బాగా రాణిస్తే.. అంత గొప్ప భవిష్యత్‌ ఉంటుందని చార్మినార్‌ ఎమ్మెల్యే జుల్ఫికర్‌ అలీ అన్నారు. బుధవారం పట్టణంలోని బాలికల ఉన్నత పాఠశాలలో పదో తరగతి ఉర్దూ మీడియం విద్యార్థులకు స్టడీ మెటీరియల్‌ పంపిణీ చేశారు. ఈ సందర్భంగా ఎమ్మెల్యే మాట్లాడుతూ.. ఉన్నత విద్య అభ్యసించాలనే ఆకాంక్ష ఉన్న విద్యార్థులకు పేదరికం అడ్డు కాకుండా ప్రభుత్వం పలు విద్యా పథకాలను అమలు చేస్తోందన్నారు. విద్యార్థులు సద్వినియోగం చేసుకొని ఉన్నత విద్యలో రాణించాలని సూచించారు. అనంతరం పాఠశాల ఉపాధ్యాయులు ఎమ్మెల్యేను సన్మానించారు. కార్యక్రమంలో కల్వకుర్తి ఎంఐఎం అధ్యక్షుడు సత్తార్‌, మజహర్‌ పాల్గొన్నారు.

బాలలతో పనులు చేయిస్తే కేసులు

కల్వకుర్తి టౌన్‌: ఎవరైనా బాలలతో పనులు చేయిస్తే క్రిమినల్‌ కేసులు నమోదు చేస్తామని జిల్లా అసిస్టెంట్‌ లేబర్‌ ఆఫీసర్‌ మహేందర్‌రావు అన్నారు. బుధవారం పట్టణంలోని పలు దుకాణాల్లో ఆకస్మిక తనిఖీలు చేపట్టారు. బస్టాండ్‌ సమీపంలోని రెండు దుకాణాల్లో ఇద్దరు బాలకార్మికులను గుర్తించారు. దుకాణ యజమానులకు సీఐ నాగార్జున ఆధ్వర్యంలో కౌన్సెలింగ్‌ ఇచ్చారు. అనంతరం బాలకార్మికులను జిల్లా కేంద్రంలోని చైల్డ్‌ వెల్ఫేర్‌ కమిటీ ఎదుట హాజరుపరచగా.. దుకాణ యజమానులపై కేసు నమోదు చేయటంతో పాటు జరిమానా విధించినట్లు తెలిపారు. తనిఖీలలో ఆపరేషన్‌ స్మైల్‌ బృందం ఎస్‌ఐ కృష్ణయ్య, ఏఎస్‌ఐ వెంకటయ్య, హెడ్‌ కానిస్టేబుల్‌ పద్మావతి, రామకృష్ణ, కానిస్టేబుల్‌ ఝాన్సీ తదితరులు పాల్గొన్నారు.

ప్లాస్టిక్‌ రహిత క్యాంపస్‌గా తీర్చిదిద్దుదాం

కొల్లాపూర్‌: పాలమూరు యూనివర్సిటీ క్యాంపస్‌ను ప్లాస్టిక్‌ రహితంగా తీర్చిదిద్దేందుకు విద్యార్థులు బాధ్యతాయుతంగా కృషిచేయాలని పీజీ కళాశాలల డైరెక్టర్‌ ఎం.జైపాల్‌రెడ్డి సూచించారు. ‘పర్యావరణం– సుస్థిర అభివృద్ధి’ అంశంపై కొల్లాపూర్‌ ప్రభుత్వ పీజీ కళాశాలలో నిర్వహించిన సదస్సుకు ఆయన హాజరై ప్రసంగించారు. పర్యావరణ పరిరక్షణపై ప్రతి ఒక్కరూ దృష్టి సారించాలని సూచించారు. ప్రొఫెసర్‌ రవీందర్‌ రేరా తదితరులు మాట్లాడుతూ.. సదస్సులో చర్చించిన అంశాలను ఆచరణలో పాటించాలన్నారు. ఇందులో విద్యార్థుల పాత్ర కీలకమైనదన్నారు. అనంతరం యూనివర్సిటీకి చెందిన క్యాలెండర్లను ఆవిష్కరించారు. సదస్సులో పీజీ కళాశాల ప్రిన్సిపాల్‌ మార్క్‌ పోలోనియస్‌, అధ్యాపకుడు దేవరాజ్‌ పాల్గొన్నారు.

1/2

నేటి నుంచి పాలెం వెంకన్న బ్రహ్మోత్సవాలు

2/2

నేటి నుంచి పాలెం వెంకన్న బ్రహ్మోత్సవాలు