TV
లక్నో: ‘ఖాకీలంటే కాఠిన్యమే కాదు.. జనాలను కాపాడే మానవత్వం కూడా ఉంటుంది. మాలోని ఈ కోణానికి నిదర్శనం ఈ వీడియో’ అంటూ ఉత్తరప్రదేశ్‌ ఎస్పీ రాహుల్‌ శ్రీవాస్తవ ఓ వీడియోను ట్వీట్‌ చేశారు. ప్రస్తుతం ఇది తెగ వైరలవ్వడమే కాక ప్రశంసలు కూడా పొందుతుంది. ఇందరి ప్రశంసలు పొందటానికి కారణం ఏంటంటే ఓ కానిస్టేబుల్‌ తన సమయస్ఫూర్తి, ధైర్యంతో ఓ ఇంటిని అగ్ని ప్రమాదం నుంచి కాపాడాడు. దాంతో నెటిజనులు సదరు కానిస్టేబుల్‌ని రియల్‌ హీరో అంటూ ప్రశంసిస్తున్నారు. ఈ సంఘటన సంభాల్‌ పోలీస్‌ స్టేషన్‌ పరిధిలో చోటు చేసుకుంది. (రోడ్డుపై తల్లీకూతుళ్ల ఆత్మహత్యాయత్నం)
వివరాలు.. ఓ మతపెద్ద ఇంట్లో ఉన్న చిన్న సిలిండర్‌ నుంచి మంటలు వచ్చాయి. ఇది గమనించిన కానిస్టేబుల్‌ యోగేందర్‌ రాఠి వెంటనే స్పందించి లాఠీతో ఆ సిలిండర్‌ను కింద పడేస్తాడు. ఆ తర్వాత ఓ టవల్‌ను తడిపి సిలిండర్‌ మీద వేసి మంటలు ఆర్పే ప్రయత్నం చేశాడు. దాంతో పెద్ద ప్రమాదం తప్పింది. ఈ తతంగాన్ని సక్కనే ఉన్న వారు వీడియో తీశారు. దాదాపు ఒక్క నిమిషం నిడివి ఉన్న ఈ వీడియోను ఎస్పీ రాహుల్‌ శీవాస్తవ తన ట్విట్టర్‌ అకౌంట్‌లో ‘కానిస్టేబుల్‌ ధైర్యం ఓ మత పెద్ద ఇంటిని కాపాడింది’ అంటూ షేర్‌ చేయడంతో ప్రస్తుతం ఇది తెగ వైరలవుతోంది. యోగేందర్‌ సమయస్ఫూర్తిని నెటిజనులు తెగ ప్రశంసిస్తున్నారు. రియల్‌ హీరో అంటూ మెచ్చుకుంటున్నారు.
