రాష్ట్రస్థాయి పవర్‌ లిఫ్టింగ్‌ పోటీల్లో జిల్లా యువత ప్రతిభ

రాష్ట్రస్థాయి పవర్‌ లిఫ్టింగ్‌ పోటీల్లో జిల్లా యువత ప్ర

విజయనగరం: రాష్ట్రస్థాయిలో జరిగిన పవర్‌ లిఫ్టింగ్‌ పోటీల్లో విజయనగరం యువత సత్తా చాటారు. ఈనెల 1,2 తేదీల్లో విశాఖ జిల్లా గాజువాకలో జరిగిన పోటీల్లో నగరంలోని బాడీ ఫిట్‌నెస్‌ జిమ్‌లో శిక్షణ పొందుతున్న కె.జగదీష్‌ 56 కేజీల బెంచ్‌ ప్రెస్‌ విభాగంలో 87.5 కేజీల బరువు ఎత్తి బంగారు పతకం, డిడ్‌లిఫ్ట్‌లో 195 కేజీల బరువు ఎత్తి మరో బంగారు పతకం దక్కించుకున్నాడు. అంతేకాకుండా సీనియర్‌ కేటగిరీ విభాగంలో అత్యుత్తమ ప్రతిభ కనబరిచిన జగదీష్‌ స్ట్రాంగ్‌ మెన్‌ టైటిల్‌ కై వసం చేసుకోవడం విశేషం. ఇదే పోటీల్లో 66 కేజీల విభాగంలో విజయనగరం నుంచి ప్రాతినిధ్యం వహించిన ఎ.రాజా డెడ్‌లిఫ్ట్‌లో 205 కేజీల బరువు ఎత్తి బంగారు పతకం సాధించగా..74 కేజీల విభాగంలో ఎం.వెంకటేష్‌ బెంచ్‌ ప్రెస్‌లో 90 కేజీల బరువు ఎత్తి కాంస్య పతకంతో సరిపెట్టుకున్నాడు. రాష్ట్ర స్థాయి పవర్‌ లిఫ్టింగ్‌ పోటీల్లో ప్రతిభ కనబరిచిన క్రీడాకారులను బాడీ ఫిట్‌నెస్‌ యూత్‌ వెల్ఫేర్‌ అసోసియేషన్‌ అధ్యక్షుడు రెడ్డి శంకరరావు, ప్రధాన కార్యదర్శి కోరాడ శ్రీనివాసరావులు అభినందించారు. భవిష్యత్‌లో మరిన్ని పతకాలు సాధించి జిల్లా కీర్తి ప్రతిష్టలను చాటి చెప్పాలని ఆకాంక్షించారు.