TV
టీమిండియా బ్యాటర్ల ఆట తీరు మారలేదు. న్యూజిలాండ్‌తో తొలి రెండు టెస్టుల్లో చేసిన తప్పులను సరిదిద్దుకున్నట్లు కనిపించడం లేదు. ఇప్పటికే ఘోర పరాభవం పాలైనా మేనేజ్‌మెంట్‌ కూడా కొత్త ప్రయోగాలు చేయడం మానడం లేదు. వెరసి మూడో టెస్టులో మొదటి రోజు ఆట ముగిసేసరికి పాత కథే పునరావృతమైంది.
ప్రపంచ టెస్టు చాంపియన్‌షిప్‌(డబ్ల్యూటీసీ) 2023-25లో భాగంగా భారత్‌ సొంతగడ్డపై న్యూజిలాండ్‌తో మూడు మ్యాచ్‌లు ఆడుతోంది. ఈ మూడూ గెలవడం ఖాయమని.. రోహిత్‌ సేన సులువుగానే ఫైనల్‌కు చేరుతుందని సిరీస్‌ ఆరంభంలో అంతా అనుకున్నారు. కానీ అంచనాలు తలకిందులయ్యాయి.
ఘోర పరాభవం పాలైనా..
బెంగళూరు, పుణెలో జరిగిన తొలి రెండు టెస్టుల్లో భారత బౌలర్లు రాణించినా.. బ్యాటర్లు చేతులెత్తేశారు. దీంతో రెండింటిలో ఓటమి తప్పలేదు. ఫలితంగా పన్నెండేళ్ల తర్వాత భారత్‌ తొలిసారిగా స్వదేశంలో టెస్టు సిరీస్‌ కోల్పోయింది. దీంతో ముంబై వేదికగా జరుగుతున్న మూడో టెస్టు టీమిండియాకు మరింత ప్రతిష్టాత్మకంగా మారింది.
రాణించిన జడ్డూ, వాషీ..
కానీ.. ఇక్కడా టీమిండియా తడ‘బ్యాటు’కు గురైంది. తొలిరోజు బౌలర్లు శుభారంభం అందించినా.. బ్యాటర్లు దానిని నిలబెట్టలేకపోయారు. కాగా వాంఖడే స్టేడియంలో టాస్‌ గెలిచిన న్యూజిలాండ్‌ తొలుత బ్యాటింగ్‌ చేసింది. ఈ క్రమంలో భారత స్పిన్నర్లు రవీంద్ర జడేజా, వాషింగ్టన్‌ సుందర్‌ అద్బుత రీతిలో రాణించి కివీస్‌ బ్యాటర్లను కట్టడి చేశారు.
Washington bowls a jaffa to castle Latham 🤌
Don't miss LIVE action from the 3rd #INDvNZ Test, on #JioCinema, #Sports18 and #ColorsCineplex!#IDFCFirstBankTestTrophy #JioCinemaSports pic.twitter.com/BY5BeQRJ08— JioCinema (@JioCinema) November 1, 2024
జడ్డూ ఐదు, వాషీ నాలుగు వికెట్లు తీయగా.. పేసర్‌ ఆకాశ్‌ దీప్‌(ఒక వికెట్‌) కూడా తన వంతు సహకారం అందించాడు. ఈ క్రమంలో న్యూజిలాండ్‌ తమ తొలి ఇన్నింగ్స్‌లో 235 పరుగులకే ఆలౌట్‌ అయింది. దీంతో టీమిండియా అభిమానులు సంబరాలు చేసుకున్నారు. అయితే, ఆ ఆనందం ఎంతో సేపు నిలవలేదు.
ఆనందం కాసేపట్లోనే ఆవిరి
భారత్‌ తొలి ఇన్నింగ్స్‌ మొదలుపెట్టిన కాసేపటికే కెప్టెన్‌, రోహిత్‌ శర్మ(18 బంతుల్లో 18)పెవిలియన్‌ చేరాడు. ఆది నుంచే దూకుడుకనబరిచిన అతడు.. కివీస్‌ ఫీల్డర్ల తప్పిదాల వల్ల రెండుసార్లు అవుటయ్యే ప్రమాదం నుంచి తప్పించుకున్నాడు. అయినప్పటికీ అగ్రెసివ్‌గా ఆడి పేసర్‌ మ్యాట్‌ హెన్రీ బౌలింగ్‌లో టామ్‌ లాథమ్‌కు క్యాచ్‌ ఇచ్చి వెనుదిరిగాడు.
ఇక వన్‌డౌన్‌ బ్యాటర్‌ శుబ్‌మన్‌ గిల్‌తో కలిసి మరో ఓపెనర్‌ యశస్వి జైస్వాల్‌ భాగస్వామ్యం నెలకొల్పే ప్రయత్నం చేశాడు. కానీ కివీస్‌ స్పిన్నర్‌ అజాజ్‌ పటేల్‌ జైస్వాల్‌(30)ను బౌల్డ్‌ చేసి.. ఈ జోడీని విడదీశాడు. అయితే, ఇక్కడే టీమిండియా మేనేజ్‌మెంట్‌ ఓ ప్రయోగం చేసింది. నాలుగో నంబర్‌లో పేసర్‌ మహ్మద్‌ సిరాజ్‌ను పంపించింది.
ఆఖరి 15 నిమిషాల్లో అంతా తలకిందులు
జైస్వాల్‌ స్థానంలో సిరాజ్‌ క్రీజులోకి వచ్చీ రాగానే.. అజాజ్‌ పటేల్‌ అతడిని వికెట్ల ముందు దొరకబుచ్చుకున్నాడు. దీంతో ఎదుర్కొన్న తొలి బంతికే సిరాజ్‌ డకౌట్‌గా వెనుదిరిగాడు. ఆ తర్వాత విరాట్‌ కోహ్లి(4).. రనౌట్‌ అయి వికెట్‌ సమర్పించుకున్నాడు. ఫలితంగా టీమిండియా 86 పరుగులకే నాలుగు వికెట్లు కోల్పోయి పీకల్లోతు కష్టాల్లో పడింది.
ఇక తొలి రోజు ఆట ముగిసే సరికి.. తొలి ఇన్నింగ్స్‌లో న్యూజిలాండ్‌ కంటే 149 పరుగులు వెనుకబడి ఉంది. రిషభ్‌ పంత్‌ ఒకటి, శుబ్‌మన్‌ గిల్‌ 31 పరుగులతో క్రీజులో ఉన్నారు. నిజానికి శుక్రవారం 4. 45 నిమిషాల వరకు టీమిండియాదే పైచేయి. కానీ పదిహేను నిమిషాల్లోనే అంతా తారుమారైంది. జైస్వాల్‌, సిరాజ్‌, కోహ్లి అవుటైన తర్వాత కివీస్‌ పటిష్ట స్థితికి చేరుకుంది.
భారత్‌ వర్సెస్‌ న్యూజిలాండ్‌ మూడో టెస్టు(నవంబరు 1- 5)
👉వేదిక: వాంఖడే స్టేడియం, ముంబై
👉టాస్‌: న్యూజిలాండ్‌.. తొలుత బ్యాటింగ్‌
👉కివీస్‌ మొదటి ఇన్నింగ్స్‌ స్కోరు: 235 రన్స్‌.. ఆలౌట్‌
👉తొలిరోజు ఆట ముగిసే సరికి భారత్‌ మొదటి ఇన్నింగ్స్‌ స్కోరు: 86/4 (19)
తుది జట్లు
భారత్‌:
రోహిత్‌ శర్మ, యశస్వి జైస్వాల్‌, శుబ్‌మన్‌ గిల్‌, విరాట్‌ కోహ్లి, రిషభ్‌ పంత్‌, సర్ఫరాజ్‌ ఖాన్‌, రవీంద్ర జడేజా, వాషింగ్టన్‌ సుందర్‌, రవిచంద్రన్‌ అశ్విన్‌, ఆకాశ్‌దీప్‌, మహ్మద్‌ సిరాజ్‌
న్యూజిలాండ్‌
టామ్‌ లాథమ్‌, డెవాన్‌ కాన్వే, విల్‌ యంగ్‌, రచిన్‌ రవీంద్ర, డారిల్‌ మిచెల్‌, టామ్‌ బ్లండెల్‌, గ్లెన్‌ ఫిలిప్స్‌, ఇష్‌ సోధి, మ్యాట్‌ హెన్రీ, అజాజ్‌ పటేల్‌, విలియమ్‌ ఓ రూర్కీ.
చదవండి: జడేజా సూపర్‌ డెలివరీ.. కివీస్‌ బ్యాటర్‌ మైండ్‌ బ్లాంక్‌! వీడియో వైరల్‌
Comments
Please login to add a commentAdd a comment