TV
ఐపీఎల్‌ 2023లో భాగంగా మే 1న ఆర్సీబీ-లక్నో సూపర్‌ జెయింట్స్ మధ్య జరిగిన మ్యాచ్‌లో కోహ్లి.. నవీన్‌ ఉల్‌ హక్‌, గౌతమ్‌ గంభీర్‌ల మధ్య జరిగిన వివాదం ఇంకా సద్దుమణగక ముందే నవీన్‌ ఉల్‌ హక్‌ మరోసారి కోహ్లిని రెచ్చగొట్టాడు. ఈ ఆఫ్ఘనిస్తాన్‌ పేసర్‌ తాజాగా తన జట్టు మెంటార్‌ గంభీర్‌తో కలిసి దిగిన ఫోటోను ఇన్‌స్టాగ్రామ్‌లో షేర్‌ చేస్తూ కోహ్లిని రెచ్చగొట్టే కామెంట్స్‌ చేశాడు.
మీతో ఇతరులు ఎలా వ్యవహరించాలని కోరుకుంటారో, మీరు కూడా వారితో అలాగే వ్యవహరించండి.. మీతో ఇతరులు ఎలా మట్లాడాలనుకుంటారో, మీరు కూడా వారితో అలాగే మాట్లాడండి అంటూ నవీన్‌ తన ఇన్‌స్టాలో రాసుకొచ్చాడు. దీనిపై గంభీర్‌ స్పందిస్తూ.. నువ్వు ఎలా ఉంటావో అలాగే ఉండు, ఎప్పుడూ మార్చుకోకు.. అంటూ నవీన్‌ కామెంట్స్‌కు మద్దతు పలుకుతూ కోహ్లికి పరోక్షంగా చురకలంటించాడు. మరి నవీన్‌-గంభీర్‌లు చేసిన ఈ వ్యాఖ్యలపై కోహ్లి ఎలా స్పందిస్తాడో వేచి చూడాలి.
మరోవైపు, గంభీర్‌ వ్యవహారం విషయమై కోహ్లి.. బీసీసీఐకి ఓ లేఖ రాసినట్లు ప్రచారం జరుగుతుంది. ఆ లేఖలో కోహ్లి తన తప్పేమీ లేదని, తాను అమాయకుడినని, వారు రెచ్చగొడితేనే నేను స్పందించానని పేర్కొన్నట్లు సమాచారం.
ఇదిలా ఉంటే, కృనాల్‌ పాండ్యా (గాయంతో కేఎల్‌ రాహుల్‌ ఐపీఎల్‌ నుంచి వైదొలిగాడు) నేతృత్వంలో లక్నో టీమ్‌ ఇవాళ (మే 7) టేబుల్‌ టాపర్‌ గుజరాత్‌ టైటాన్స్‌తో ఢీకొట్టనుంది. మధ్యాహ్నం 3: 30 గంటలకు ఈ మ్యాచ్‌లో అహ్మదాబాద్‌లోని నరేంద్ర మోదీ స్టేడియంలో జరుగనుంది. ప్రస్తుతం లక్నో 10 మ్యాచ్‌ల్లో 5 విజయాలతో పాయింట్ల పట్టికలో మూడో స్థానంలో కొనసాగుతోంది.
Comments
Please login to add a commentAdd a comment