రాష్ట్రాన్ని కాపాడుకుందాం రండి

 పొన్నూరు, న్యూస్‌లైన్ :సమైక్యాంధ్ర ఉద్యమాన్ని మరింత  ఉధ్రుతం చేసి రాష్ట్రాన్ని కాపాడుకుందామని వైఎస్సార్ కాంగ్రెస్ పార్టీ అధికార ప్రతినిధి అంబటి రాంబాబు అన్నారు. వైఎస్సార్ సీపీ ఆధ్వర్యంలో గురువారం రాత్రి  పొన్నూరు పట్టణం ఐలాండ్ సెంటర్‌లోని  పొట్టి శ్రీరాములు విగ్రహం వద్ద  సమైక్య శంఖారావం బహిరంగ సభ నిర్వహించారు. పొన్నూరు నియోజకవర్గ సమన్వయకర్త, పార్టీ సీఈసీ సభ్యులు రావి వెంకటరమణ అధ్యక్షత వహించారు. అంబటి రాంబాబు మాట్లాడుతూ సీమాంధ్రలో కాంగ్రెస్, టీడీపీ ప్రజాప్రతినిధులు  ప్రజలను మభ్య పెడుతున్నారని సమైక్య ఉద్యమాన్ని నీరు గారుస్తున్నారని విమర్శించారు. విభజన ప్రక్రియను ఆపాలని అన్ని రాజకీయపార్టీ నాయకుల మద్దతు  కోసం వైఎస్ జగన్‌మోహన్‌రెడ్డి దేశంలోని ముఖ్యనేతలను కలిశారని గుర్తు చేశారు. జగనన్న ఆశయ సాధనలో అందరు భాగస్వాములు కావాలని పిలుపునిచ్చారు.