TV
ఎల్‌–14 ఎత్తిపోతలకు గండి
వేములపల్లి : మండల కేంద్రంలోని ఎడమకాల్వపై ఉన్న ఎల్‌–14 ఎత్తిపోతలకు కొందరు గండికొట్టి స్థానిక చిన్నచెరువుకు అక్రమంగా నీటి తరలించారు. దీంతో ఆగ్రహించిన లిఫ్టు పరిధిలోని రైతులు శనివారం ఆందోళనకు దిగారు. ఈ సందర్భంగా పలువురు రైతులు మాట్లాడుతూ.. ఇప్పటికే వర్షాలు లేక పంటలు ఎండిపోతున్నాయని, వచ్చే కొద్దిపాటి నీటిని కూడా కొందరు వ్యక్తులు లిఫ్టుకు గండికొట్టి తరలించకపోవడం బాధాకరమన్నారు. ఈ విషయాన్ని ఎన్‌ఎస్‌పీ అధికారుల దృష్టికి తీసుకెళ్లినా పట్టించుకోవడం లేదని ఆరోపించారు. లిఫ్టు పరిధిలో సుమారు 2వేలపై చిలుకు ఎకరాల్లో పంటలు సాగు చేస్తున్నట్లు తెలిపారు. చెరువులోకి నీటిని తరలించేందుకు ఫీడర్‌ ఛానల్‌ ఉన్నప్పటికీ ఎత్తిపోతల ప్రహరీ పగులగొట్టి నీటిని తరలించడం సరికాదన్నారు. అధికారులు స్పందించి గండిని పూడ్చడంతో పాటు బాధ్యులపై చర్యలు తీసుకోవాలని కోరారు. ఈ కార్యక్రమంలో గున్‌రెడ్డి గోపాల్‌రెడ్డి, శ్యాంసుందర్, అనిల్, అనంతరెడ్డి, లక్ష్మయ్య, యాకూబ్‌తో పాటు పలు గ్రామాల రైతులు పాల్గొన్నారు.
