షాకింగ్: వీడు నిజంగా లక్కున్నోడే!

బీజింగ్ : రద్దీ రోడ్డుపై వెళ్తుండగా ప్రమాదవశాత్తూ బైక్ మీద నుంచి కింద పడిపోగా.. వెనకాలే వచ్చిన వాహనం వేగంగా దూసుకెళ్లింది. కానీ క్షణాల్లో అప్రమత్తమైన బాధితుడు ట్రక్కు భారీ నుంచి వెంట్రుక వాసిలో తప్పించుకున్న వీడియో సోషల్ మీడియాలో వైరల్ గా మారింది. చైనాలోని గియాంగ్‌లో ఈ ఘటన చోటుచేసుకుంది.

నైరుతి చైనాలోని గియాంగ్ లో రోడ్లు రద్దీగా ఉంటాయి. ఓ వ్యక్తి తన బైకుపై ఏదో పనిమీద వెళ్తున్నాడు. ఇంతలో వెనుక నుంచి ఓ భారీ ట్రక్కు ఢీకొట్టడంతో అకస్మాత్తుగా రోడ్డుపై పడిపోయాడు. బైకును మాత్రం ట్రక్కు ఈడ్చుకుపోవడాన్ని గమనించిన ట్రాఫిక్ పోలీసులు, స్థానికులు బాధిత వ్యక్తి చనిపోయాడని భావించారు. కానీ అనూహ్యంగా అందర్నీ ఆశ్చర్యానికి లోను చేస్తూ తనపై నుంచి దూసుకెళ్లేందుకు చూసిన ట్రక్కు ముందు చక్రాల నుంచి తప్పించుకుంటూ పక్కకు పొర్లుతూ ప్రాణాలు కాపాడుకున్నాడు. ఇందుకు సంబంధించిన వీడియో ఓ వ్యక్తి పోస్ట్ చేయడంతో సోషల్ మీడియాలో వైరల్‌గా మారింది. 'వీడు లక్కున్నోడు..' అంటూ కొందరు నెటిజన్లు కామెంట్ చేయగా, ఆ వ్యక్తి బతికి బట్టకట్టడం నిజంగానే ఓ వింతలా ఉందని వీడియో చూసిన మరో వ్యక్తి అభిప్రాయపడ్డాడు.