TV
గౌతమీపుత్రుడు ఇలా ఉంటాడు!
‘గౌతమీపుత్ర శాతకర్ణి’లో బాలకృష్ణ ఎలా కనిపిస్తారు? ఆయన గెటప్ ఎలా ఉంటుంది? అనేది ఇప్పటివరకూ ఊహకందని ప్రశ్న. ఈ సినిమా కోసం ఆయన మీసాలు పెంచిన విషయాన్ని ప్రత్యేకంగా చెప్పక్కర్లేదు. గెటప్ ఎలా ఉంటుందో గురువారం విడుదలైన ప్రీ-లుక్ చూస్తే కొంతవరకూ ఊహించుకోవచ్చు. శుక్రవారం బాలకృష్ణ పుట్టినరోజు సందర్భంగా ఈ లుక్‌ని విడుదల చేశారు చిత్రదర్శకుడు క్రిష్.
తెలుగు వారి ఖ్యాతిని దశ దిశలా వ్యాపింపజేసిన శాతవాహన సామ్రాజ్య 23వ రాజు గౌతమీ పుత్ర శాతకర్ణిగా ఈ చిత్రంలో బాలకృష్ణ నటిస్తున్నారు. ఫస్ట్ ఫ్రేమ్ ఎంటర్‌టైన్‌మెంట్స్ పతాకంపై బిబో శ్రీనివాస్ సమర్పణలో వై.రాజీవ్‌రెడ్డి, జాగర్లమూడి సాయిబాబు నిర్మిస్తున్న ఈ చిత్రానికి సంబంధించిన తొలి షెడ్యూల్ మొరాకోలో పూర్తయింది. త్వరలోనే మరో షెడ్యూల్ హైదరాబాద్‌లో మొదలు కానుంది. ఈ చిత్రానికి సంగీతం: దేవిశ్రీ ప్రసాద్, మాటలు: సాయిమాధవ్ బుర్రా.
