అది నా వ్యక్తిగత నిర్ణయం : సోనమ్‌

సోనమ్‌ కపూర్‌- ఆనంద్‌ అహుజా (ఫైల్‌ ఫొటో)

అనిల్‌ కపూర్‌ గారాల పట్టి సోనమ్‌ కపూర్‌ వివాహం ఈనెల(మే) 8న వ్యాపారవేత్త ఆనంద్‌ అహుజాతో అంగరంగ వైభవంగా జరిగిన విషయం తెలిసిందే. పెళ్లి తంతు ముగిసిన వెంటనే సోనమ్‌.. ఇన్‌స్టాగ్రామ్‌, ట్విటర్‌లో తన పేరును సోనమ్‌ కె అహుజాగా మార్చుకున్నారు. అయితే సోనమ్‌ ఈ నిర్ణయంపై ఆమె అభిమానులు, ఫెమినిస్టులు మండిపడుతున్నారు. ఫెమినిస్ట్‌గా గుర్తింపు పొందిన మీరు ఇలా ఎలా చేస్తారంటూ సోషల్‌ మీడియా వేదికగా ఆగ్రహం వ్యక్తం చేస్తున్నారు.

ఈ విషయంపై సోనమ్‌ స్పందించారు. ప్రస్తుతం కేన్స్‌ ఫిలిం ఫెస్టివల్‌లో పాల్గొనేందుకు వెళ్లిన సోనమ్‌ ఓ జాతీయ మీడియాతో మాట్లాడుతూ.. ‘నేను చాలా రోజుల క్రితమే ఓ స్పష్టమైన నిర్ణయానికి వచ్చాను. దీర్ఘకాలం నుంచి రిలేషన్‌ షిప్‌లో ఉన్న నేను.. ప్రస్తుతం పెళ్లి చేసుకున్నాను. ఇక ఇంటి పేరు మార్చుకోవడం అనేది వ్యక్తిగతమైన అంశ’మంటూ వ్యాఖ్యానించారు. అంతేకాదు.. ‘ఫెమినిజం అనే కాన్సెప్ట్‌ను సరిగా అర్థం చేసుకోలేని వాళ్లు ఆన్‌లైన్‌కు వెళ్లి ఓసారి చెక్‌ చేయాలి. అయినా ఆనందే నా పేరు మార్చాడని మీకెలా తెలుసంటూ’ ఘాటుగా స్పందించారు.