TV
సిమ్లా: హిమాచల్‌ ప్రదేశ్‌ కొత్త సీఎం ఎవరనేదానిపై ఆదివారం కీలక ప్రకటన వెలువడే అవకాశం ఉంది. ఇటీవలే ఎన్నికలు జరిగిన హిమాచల్‌లో బీజేపీ భారీ మెజారిటీతో గెలిచినప్పటికీ ఆ పార్టీ ముఖ్యమంత్రి అభ్యర్థి ప్రేమ్‌ కుమార్‌ ధూమల్‌ ఓటమి పాలవ్వడం తెలిసిందే. కేంద్ర మంత్రి జేపీ నడ్డా, ఐదుసార్లు ఎమ్మెల్యేగా గెలిచిన జై రాం ఠాకూర్‌ తదితరుల పేర్లు సీఎం రేసులో వినిపిస్తున్నాయి. అయితే ఇప్పటివరకు ఎలాంటి స్పష్టమైన ప్రకటనా లేదు.
ఈ నేపథ్యంలో ఆదివారం బీజేపీ కేంద్ర కమిటీ సభ్యుల అధ్యక్షతన ఆ పార్టీ ఎమ్మెల్యేల సమావేశం జరగనుంది. ముఖ్యమంత్రిని ఈ సమావేశంలోనే ప్రకటించే అవకాశం ఉందనీ, అయితే అది ఇప్పుడే తాము కరాఖండీగా చెప్పలేమని కొందరు బీజేపీ సీనియర్‌ నేతలు అంటున్నారు. సమావేశానికి అధ్యక్షత వహించేందుకు కేంద్ర మంత్రులు నిర్మలా సీతారామన్, నరేంద్ర సింగ్‌ తోమర్‌లు రేపు హిమాచల్‌కు రానున్నారని ఆ రాష్ట్ర బీజేపీ అధ్యక్షుడు సత్పాల్‌ సింగ్‌ చెప్పారు. కాగా, గుజరాత్‌లో సీఎం విజయ్‌ రూపానీ నేతృత్వంలోని కొత్త ప్రభుత్వం ఈనెల 26వ తేదీన కొలువుదీరనుంది.
