TV
ఆయన పిట్టల దొరను మించిపోయాడు!
సాక్షి, హైదరాబాద్: హామీలు ఇవ్వడంలో సీఎం కేసీఆర్ పిట్టల దొరను మించిపోయాడని తెలంగాణ తెలుగుదేశం శాసనసభా పక్షం నేత ఎర్రబెల్లి దయాకర్‌రావు విమర్శించారు. టీటీడీపీ శాసనసభా పక్షం కార్యాలయంలో శనివారం పార్టీ ఎమ్మెల్యేల సమావేశం అనంతరం ఎర్రబెల్లి మీడియాతో మాట్లాడారు. అధికారం చేపట్టిన నాటి నుంచి కేసీఆర్ ఇప్పటి వరకు రూ.10లక్షల కోట్ల విలువ చేసే హామీలిచ్చారన్నారు. జిల్లా పర్యటనల్లో కేసీఆర్ ఇచ్చే హామీలకు అంతు లేకుండా పోతోందన్నారు. ఆచరణ సాధ్యం కాని హామీలిస్తూ సీఎం తెలంగాణ పరువు తీస్తున్నాడన్నారు. ముఖ్యమంత్రి ఎడాపెడా ఇస్తున్న హామీలపై అసెంబ్లీ సమావేశాల్లో నిలదీస్తామన్నారు.
ఎంపీటీసీ సభ్యుల న్యాయమైన డిమాండ్లను ప్రభుత్వం పరిష్కరించాలన్నారు. నేడు రాజ్‌భవన్ ఎదుట ధర్నా కృష్ణా జలాల అంశంపై రాష్ట్ర ప్రభుత్వం అనుసరిస్తున్న వైఖరిపై తెలంగాణ తెలుగుదేశం ఎమ్మెల్యేలు ఆగ్రహం వ్యక్తం చేశారు. టీడీఎల్పీ కార్యాలయంలో శనివారం జరిగిన పార్టీ ఎమ్మెల్యేల సమావేశంలో సీఎం వైఖరిపై చర్చించారు. మంత్రి తలసాని రాజీనామా వ్యవహారంలో స్పీకర్, గవర్నర్ అనుసరిస్తున్న వైఖరిపై చర్చించారు. ఆదివారం రాజ్‌భవన్‌తో పాటు, స్పీకర్ కార్యాలయం ఎదుట ధర్నా చేపట్టాలని నిర్ణయించినట్లు సమాచారం.
