భార్యను మోసం చేశాను.. సారీ!

భార్యను మోసం చేశాను.. సారీ!

భార్య గర్భవతిగా ఉన్నప్పుడు ఆమెను మోసం చేశానని చైనా బాడ్మింటన్‌ సూపర్‌ స్టార్‌ లిన్‌ డాన్‌ అంగీకరించడం సంచలనం రేపుతోంది. ఇటీవలే లిన్‌ డాన్‌ భార్య తమ తొలిబిడ్డకు జన్మనిచ్చింది. ఈ నేపథ్యంలో ఓ ‘మిస్టరీ మహిళ’తో లిన్‌ డాన్‌ చెట్టాపట్టాలేసుకొని తిరుగుతున్న ఫొటోలు ఆన్‌లైన్‌లో వెలుగులోకి వచ్చాయి. ‘డిటెక్టివ్‌ ఝావో’ అనే నెటిజన్‌ ఆన్‌లైన్‌లో పోస్టుచేసిన ఈ ఫొటోలు లిన్‌ డాన్‌ అభిమానుల్ని షాక్‌కు గురిచేశాయి. లిన్‌తో తిరిగిన సదరు మహిళ ప్రముఖ మోడల్‌, నటి ఝావో యాకిగా తేలింది. గత సెప్టెంబర్‌ నెలలో ఓ రెస్టారెంట్‌ వద్ద లిన్‌, యాకీ సన్నిహితంగా తిరుగుతుంటే తాను గమనించి.. వారిని అనుసరించానని, లిన్‌ యాకీని తన ఇంటికి తీసుకెళ్లాడని, రెండుగంటలు గడిపిన అనంతరం వారు బయటకు వచ్చారని, ఆ తర్వాత ఒక హోటల్‌లోను వారు రాసలీలలు నెరిపారని డిటెక్టివ్‌ ఝావో పేర్కొన్నాడు. 

లిన్‌ భార్య గ్జీ జింగ్‌ఫంగ్‌ కూడా బ్యాడ్మింటన్‌ చాంపియన్‌. ఆమె ఈ నెల 5న బిడ్డను ప్రసవించింది. ఈ క్రమంలోనే లిన్‌, యాకీ సన్నిహితంగా ఉన్న ఫొటోలు వెలుగుచూడటంతో చైనా సోషల్‌ మీడియా సైట్‌ వీబోలో అతనిపై నెటిజన్లు తీవ్రంగా మండిపడ్డారు.దీంతో లిన్‌ డాన్‌ స్పందిస్తూ ‘ ఒక వ్యక్తిగా నా తప్పులకు సాకులు వెతుక్కోను. నా ప్రవర్తన కుటుంబాన్ని గాయపరిచింది. అందుకే నా కుటుంబానికి క్షమాపణలు చెప్తున్నా’అని ఆయన ‘వీబో’లో బదులిచ్చారు. 33 ఏళ్ల లిన్‌ డాన్‌ ఐదుసార్లు బ్యాడ్మింటన్‌ ప్రపంచ చాపింయన్‌గా నిలిచాడు. రెండుసార్లు ఒలింపిక్స్‌ గోల్డ్‌ మెడల్‌ సాధించిన అతను ఇటీవలి రియో ఒలింపిక్స్‌ లో మాత్రం పతకం సాధించలేకపోయాడు.