బాల్కొండ: నిజామాబాద్‌ జిల్లా బాల్కొండ మండల కేంద్రంలో పన్నెండేళ్ల బాలుడు దారుణ హత్యకు గురయ్యాడు. బాలుడిని గుప్త నిధుల కోసం చంపారా? లేదా డబ్బుల కోసమా? అనే కోణంలో పోలీసులు దర్యాప్తు చేస్తున్నారు. పోలీసులు తెలిపిన వివరాలివి. బాల్కొండకు చెందిన బండి నరేందర్‌.. నచ్చు రాకేశ్‌ మేనమామ అయిన నాగాపూర్‌కు చెందిన దశరథ్‌ మేకలను మేతకు తీసుకుని వెళ్తాడు. దీంతో రాకేశ్‌ కుటుంబ సభ్యులకు పరిచయమయ్యాడు. గణపతులను చూసి వద్దామని చెప్పి ఈ నెల 11న బండి నరేందర్‌ చిట్టాపూర్‌ గ్రామానికి చెందిన బాలుడు నచ్చు రాకేశ్‌ను.. బాల్కొండకు తీసుకొచ్చాడు. ఆ రోజు రాత్రి 11 గంటల వరకు కూడా రాకేశ్‌ ఇంటికి రాకపోవడంతో కుటుంబ సభ్యులు నరేందర్‌ను ప్రశ్నించారు. అతని నుంచి సరైన సమాధానం రాక పోవడంతో బాల్కొండ పోలీస్‌ స్టేషన్‌లో ఫిర్యాదు చేశారు. కాగా శనివారం ఉదయం బాల్కొండలోని ఖిల్లా ప్రాంతంలో బాలుడి మృతదేహం ఉందని చిట్టాపూర్‌ గ్రామస్తులు సమాచారం ఇవ్వడంతో ఈ ఘోరం వెలుగుచూసింది. బాలుడి మృతదేహంపై దుస్తులు లేకపోగా.. ఎడమ కంటి భాగంపై బండరాయితో మోది హత్య చేసినట్లు ఆనవాళ్లు కనిపించాయి. ఖిల్లాలోని ఓ గుహ ముందు హత్య చేసి మృతదేహాన్ని కొద్దిదూరంలో పారేశారు. ఘటన స్థలాన్ని సీఐ శ్రీధర్‌రెడ్డి పరిశీలించారు. బాలుడిని నరేందర్‌ హత్య చేసి ఉంటాడని బాధిత కుటుంబ సభ్యులు అనుమానం వ్యక్తం చేశారు. నరేందర్‌తో వెళ్లేముందు బాలుడు తన అన్న మణికంఠకు ఫోను చేసి చెప్పాడని తెలిపారు. పోలీసులు నరేందర్‌ను అదుపులోకి తీసుకొని విచారించారు. అయితే అనుమానితుడు నేరాన్ని అంగీకరించలేదని పోలీసులు పేర్కొన్నారు. త్వరలోనే పూర్తిస్థాయి దర్యాçప్తు చేపట్టి నిందితులను పట్టుకుంటామన్నారు. కాగా బాధిత కుటుంబ సభ్యులు, గ్రామస్తులు పోలీసు స్టేషన్‌కు చేరుకుని నరేందర్‌ను తమకు అప్పగించాలని పోలీసులతో వాగ్వాదానికి దిగారు. హత్య జరిగిన మర్నాడు కూడా నరేందర్‌ తన భార్య మొబైల్‌తో ఫోన్‌ చేసి.. రాకేశ్‌ ఖానాపూర్‌ వద్ద ఉన్నాడని అబద్ధం చెప్పాడని వివరించారు. హత్య జరిగిన రోజు ఉదయం నరేందర్‌.. మొదట బాలుడి అన్న మణికంఠకు ఫోన్‌చేసి ఖిల్లా వద్దకు రమ్మన్నాడని, మణికంఠ వెళ్లకపోవడంతో రాకేశ్‌ను తీసుకెళ్లినట్లు వివరించారు. న్యాయం చేస్తామని ఆర్మూర్‌ ఏసీపీ బస్వారెడ్డి హామీ ఇవ్వడంతో మృతుని కుటుంబ సభ్యులు ఆందోళనను విరమించారు. హతుని తండ్రి రెండేళ్ల క్రితమే రోడ్డు ప్రమాదంలో మృతి చెందాడు.

హెబ్బా పటేల్‌ ప్రధాన పా త్రలో నటించిన చిత్రం ‘సందేహం’. సతీష్‌ పరమవేద దర్శకత్వం వహించిన ఈ చిత్రంలో సుమన్‌ ఊటుకూరు హీరో. సత్యనారాయణ పర్చా నిర్మించిన ఈ చిత్రం నుంచి సంగీతదర్శకుడు సుభాష్‌ ఆనంద్‌ స్వరపరచిన ‘చచ్చినా చావని ప్రేమిది..’ పాటను దర్శకుడు దశరథ్‌ విడుదల చేశారు. ‘‘ఈ చిత్రంలో హెబ్బా పటేల్‌ డిఫరెంట్‌ క్యారెక్టర్‌ చేశారు. త్వరలో రిలీజ్‌ డేట్‌ ప్రకటిస్తాం’’ అని చిత్ర యూనిట్‌ పేర్కొంది. 

రామాయణాన్ని ఆధారంగా చేసుకుని అత్యున్నత టెక్నాలజీని ఉపయోగించి దర్శకుడు ఓంరౌత్‌ 'ఆదిపురుష్‌'  తెరకెక్కించాడు. ఇందులో రాముడిగా ప్రభాస్‌ నటిస్తున్న సంగతే తెలసిందే. శ్రీరాముడి తండ్రి దశరథుడు పాత్రలో కూడా ప్రభాస్‌ నటించారని ప్రచారం జరుగుతుంది. కొడుకుగా రాముడి పాత్రలో కనిపిస్తూనే, మొదటి కొంతసేపు తండ్రిగా దశరథుడు పాత్రలో కూడా ప్రభాస్‌ కనిపించి అలరించాడని, ఇందుకు సంబంధించిన ఫోటోలు తాజాగా నెట్టింట వైరల్ అవుతున్నాయి. అందులో నిజం     లేదని చిత్ర యూనిట్‌ తెలిపింది. కాగా టీజర్ విడుదల సమయంలో  VFX పట్ల మేకర్స్‌పై భారీ ట్రోలింగ్ దెబ్బ పడిన సంగతి తెలిసిందే. ఇప్పుడు మూవీలో కొన్ని చోట్ల VFX సూపర్ అంటున్నారు. (ఇదీ చదవండి: ఆదిపురుష్‌ ట్విటర్‌ రివ్యూ) తెలంగాణలో ఆరు షోలకు ప్రభుత్వం అనుమతినిచ్చింది. ఈ క్రమంలోనే శుక్రవారం ఉదయం 4 గంటలకు ప్రసాద్‌ ఐమ్యాక్స్‌లో షో వెశారు. అక్కడ మంచి రెస్పాన్స్‌ వస్తుంది. అక్కడ మొత్తం ఆరు స్క్రీన్స్‌లోనూ బెనిఫిట్‌ షోలు వేశారు. ‘ఆదిపురుష్‌’ మంచి విజయం అందుకోవాలని టాలీవుడ్‌ టు బాలీవుడ్‌ సెలబ్రిటీలు సోషల్‌ మీడియా వేదికగా ఆకాంక్షిస్తున్నారు. చిత్ర బృందానికి శుభాకాంక్షలు తెలియజేస్తున్నారు.

యంగ్ రెబల్ స్టార్ ప్రభాస్‌ కెరీర్‌ను మలుపు తిప్పిన సినిమాల్లో మిస్టర్‌ పర్ఫెక్ట్ ఒకటి. వరుస ఫ్లాప్‌లతో ఇబ్బందుల్లో ఉన్న సమయంలో ఈ సినిమా ప్రభాస్‌ కెరీర్‌ను గాడిలో పెట్టింది. దశరథ్‌ దర్శకత్వలో దిల్ రాజు నిర్మించిన ఈ సినిమా కథ కాపీ అంటూ వివాదాస్పదమైన సంగతి తెలిసిందే. ప్రముఖ రచయిత్రి శ్యామలా దేవి రాసిన నా మనసు కోరింది నిన్నే నవల ఆధారంగా మిస్టర్‌ పర్ఫెక్ట్ సినిమాను తెరకెక్కించారన్న ఆరోపణలు ఉన్నాయి. ఇదే విషయమై శ్యామలా దేవి 2017లో కోర్టును ఆశ్రయించారు. తాజా సమాచారం ప్రకారం కోర్టు మిస్టర్‌ పర్ఫెక్ట్ సినిమా కాపీయే అని తేల్చినట్టుగా తెలుస్తోంది. ఈ వివాదంపై స్పందించిన శ్యామలా దేవి, తనకు కోర్టులో తేల్చుకునే ఆలోచన లేదని, నిర్మాత దిల్‌ రాజును సంప్రదించే ప్రయత్నం చేసినా ఆయన స్పందించకపోవటంతో తప్పని సరి పరిస్థితుల్లో కోర్టును ఆశ్రయించాల్సి వచ్చిందని వెల్లడించారు. దర్శకుడు దశరథ్‌ వర్షన్‌ మరోలా ఉంది. తాను ఈ కథను 2009లోనే రైటర్స్‌ అసోషియేషన్‌లో రిజిస్టర్‌ చేయించానని, శ్యామల దేవి నవల 2010 ఆగస్టులో పబ్లిష్ అయ్యిందన్నారు.


 రన్‌ రాజా రన్, ఎక్స్‌ప్రెస్‌ రాజా, శతమానం భవతి... ఇలా మూడు వరుస విజయాలతో శర్వానంద్‌ హ్యాట్రిక్‌ సాధించారు. ‘మినిమమ్‌ గ్యారంటీ’ హీరో అనే పేరు సంపాదించుకున్న శర్వానంద్‌ నటించిన తాజా చిత్రం ‘రాధ’ 12న విడుదల కానుంది. ప్రస్తుతం మారుతి దర్శకత్వంలో ఓ సినిమా చేస్తున్నారాయన. ఇది కాకుండా దశరథ్‌ దర్శకత్వంలో ఓ సినిమా చేయడానికి అంగీకరించారన్నది తాజా సమాచారం.
 
  సంతోషం, మిస్టర్‌ పర్‌ఫెక్ట్‌... ఇలా అన్ని వర్గాల ప్రేక్షకులూ చూసే చిత్రాలను తెరకెక్కించిన దశరథ్‌... ఇప్పుడు శర్వానంద్‌తో ఓ మంచి లవ్‌స్టోరీ తీయడానికి సన్నాహాలు చేస్తున్నారట. ఫిల్మ్‌ నగర్‌ టాక్‌ ప్రకారం ఈ కాంబినేషన్‌ నిజంగానే కుదిరిందా? లేదా? అన్నది మరో పది రోజుల్లో తెలిసిపోతుంది. ఎందుకంటే, అన్నీ కుదిరితే టెన్‌ డేస్‌ తర్వాత అధికారికంగా ప్రకటించాలని అనుకుంటున్నారట.


 కొన్ని కథలు కొత్తగా ఉంటాయి. మరికొన్ని కొత్తగా చెప్పాల్సి ఉంటాయి. చాలా కొద్దికథలే కొత్తగానూ, కొత్తగా చెప్పినట్లుగానూ ఉంటాయి. మొదటి రెండు రకాల సినిమాలూ తరచూ వస్తాయి. మూడో రకం సినిమాలు రావ డమే అరుదు. అలాంటి సినిమాలు తీసేవారూ అరుదే. అలాంటి సినిమా తీయాలనుకున్నప్పుడు రాత, దానితో పాటు తీత - రెండూ కత్తి మీద సామే. కానీ, ధైర్యం చేసి, దర్శక - నిర్మాతలు తెరపై చూపిన ‘శౌర్య’ం - ఈ ఫిల్మ్.
  
 చిన్న పాయింట్‌తో అల్లుకున్న 2 గంటల కథేమిటంటే, శౌర్య (మనోజ్) కోట్ల ప్రాజెక్ట్ సాధించినా, దాన్ని ప్రేమించిన అమ్మాయి నేత్ర (రెజీనా) కోసం వదులుకొనే కుర్రాడు. శివరాత్రి నాటి రాత్రి మొక్కు తీర్చేందుకు గుడిలో జాగారం చేస్తుంటే, హీరో పక్కనే హీరోయిన్ పీక తెగి, రక్తపు మడుగులో ఉంటుంది. ఆ నేరం హీరోపై పడుతుంది. డెత్‌బెడ్ మీద ఉన్న ఆ అమ్మాయి ఒక నంబర్ రాసి, కన్ను మూస్తుంది. ఎంపీ కూతురైన హీరోయిన్‌కీ, హీరోకీ సంబంధమేంటి? ఆ నంబరేంటి? హీరోయే నిజంగా నేరం చేశాడా లాంటి వన్నీ సస్పెన్‌‌స నిండిన ఈ థ్రిల్లర్ లవ్‌స్టోరీలో తెరపై చూడాల్సినవి.
  గత ఏడాదే వివాహమైన మనోజ్ ఈ సినిమాలో పాత్ర కోసం బొద్దుగా, ముద్దుగా అయ్యారు. ఎమ్‌ఫార్మసీ చదివిన, హుందాతనం నిండిన ఉద్యోగిగా కాస్ట్యూమ్స్‌లో కొత్తగా కనిపించే ప్రయత్నం చేశారు. ఇక, హీరో ప్రేమికురాలిగా, పలుకుబడి ఉన్న ఎంపీ కూతురు నేత్రగా రెజీనాది అభినయపరంగా కాకున్నా, కథా పరంగా కీలక పాత్ర. ఎస్.ఐగా ప్రకాశ్‌రాజ్‌ది ఇన్వెస్టిగేటివ్ ఆఫీసర్ రోల్. హీరోయిన్ తండ్రిగా నాగినీడు, బాబాయ్‌గా సుబ్బరాజులది పాత్రోచిత నటన. కామిక్ రిలీఫ్ కోసం సినిమాలో హీరోయిన్ బావగా ‘ప్రభాస్’ శ్రీను, పోలీసు కానిస్టేబు ల్‌గా ‘షకలక’ శంకర్ లాంటివాళ్ళున్నారు. ‘చుచ్చూ పోయిస్తా!’ అంటూనే, లేని దయ్యానికి భయపడే మినిస్టర్‌గా బ్రహ్మానందం సెకండాఫ్‌లో ఎంట్రీ ఇస్తారు. ఆయనపై పాట అదనం. ఆ కాసేపు పక్కన పెడితే, మిగతా సినిమా అంతా సిరీస్ ఆఫ్ ఈవెంట్స్, సీరియల్ ఆఫ్ సీన్స్.
 
 చిత్రం:        ‘శౌర్య’,
 తారాగణం: మంచు మనోజ్, రెజీనా కసండ్రా, ప్రకాశ్‌రాజ్, నాగినీడు, సుబ్బరాజు, బ్రహ్మానందం, ‘ప్రభాస్’ శ్రీను,
 రచన:       గోపీ మోహన్,
 మాటలు:   దశరథ్, కిశోర్ గోపు,
 సంగీతం:   కె. వేదా,
 ఎడిటింగ్:  ఎస్.ఆర్. శేఖర్,
 నిర్మాత:   మల్కాపురం శివకుమార్,
 కథ - దర్శకత్వం: దశరథ్,
 నిడివి:     121 నిమిషాలు,
 రిలీజ్:      మార్చి 4
 
 దర్శకుడు దశరథ్ సోదరుడైన వేదా ఇచ్చిన సంగీతం ఆయనలోని వైవిధ్య ప్రదర్శనకు ఉపకరిస్తుంది. కెమేరామన్, ఎడిటర్, ఫైట్స్ లాంటి సాంకేతిక విభాగాలన్నీ కథ, కథనానికి తగట్టుగానే ఉన్నాయి. మొదట క్యారె క్టర్ల పరిచయం, పీటముడిగా మారిన ఒక ఊహించని క్రైమ్‌లో అనుకోని మలుపుతో ఫస్టాఫ్ ముగుస్తుంది. ఆ సమయంలో కోర్టులో హీరో చెప్పిన ఒక మాటతో ఊహించని ట్విస్ట్. దాంతో, ఇంటర్వెల్. ‘థ్రిల్ కంటిన్యూస్’ అనే ఇంటర్వెల్ కార్డ్‌కు తగ్గట్లే, ఫస్టాఫ్ తర్వాతా కథ సీరియస్‌గా సాగిపోతూ... ఉంటుంది. మరో అరగంటలో సినిమా ముగుస్తుందనగా, కథలో కొత్త వేగం వస్తుంది. ఓపిక పట్టినవాళ్ళకు సస్పెన్స్ వీడే అరగంట తప్పక బాగుంటుంది.
  పెచ్చరిల్లుతున్న కుల విద్వేషాలు, పరువు హత్యలనే సమకాలీన అంశాన్ని ఇతివృత్తంగా ఎంచుకోవడం అభినందించాల్సిందే. అయితే, దాన్ని మనసును కదిలించే సెంటిమెంటల్ అంశాలతో కాకుండా, విభిన్నంగా క్రైమ్, సస్పెన్స్, థ్రిల్లర్‌గా రూపొందించాలని భావించారు. ముడివీడనట్లు కనిపిస్తున్న ఒక నేరం తాలూకు మిస్టరీని సాల్వ్ చేయడం కోసం సస్పెన్స్ పంథాను ఆశ్రయించారు. అలా ఈ సినిమా పూర్తిగా ఆ దోవలో వెళ్ళింది.
  ఈ వ్యవహారంలో హీరోతో పాటు పోలీస్ ప్రకాశ్‌రాజ్, నేరస్థులూ మరింత కీలకంగా వ్యవహరిస్తే, కథకు ఇంకా ఊపు, ఉత్సాహం వచ్చేవి. మిస్టరీ సాల్వేషన్‌కి ఒకరు, దానికి వ్యతిరేకంగా మరొకరు వ్యవహరించడ మనే పంథాలో కలిసొస్తుంది. మొత్తం మీద, ప్రేమకథలోనే సస్పెన్స్, థ్రిల్లింగ్ అంశాల లాంటివి కలవడం ఒక కొత్తదనమే. అందుకే, టీవీలో కనిపించే ‘నేరాలు - ఘోరాలు’ లాంటి క్రైమ్‌స్టోరీలకు ఇది వినూత్నమైన వెండితెర ఆవిష్కారం. చాలాసార్లు మనం చూసి ఊహించే దానిలోనో, అవతలివాళ్ళు చెప్పే దానిలోనో కాక, అసలు నిజం వేరొకటి ఉంటుందని అవగాహన కల్పిస్తుంది. వెరసి, ఈ సినిమా ‘ఆనర్ కిల్లింగ్స్’ లాంటి ఘోర మైన నేరాలపై చూపిన ‘శౌర్యం’.   
                                - రెంటాల జయదేవ


  ‘సంతోషం’, ‘సంబరం’, ‘మిస్టర్ పర్‌ఫెక్ట్’లతో కుటుంబ కథాచిత్రాల దర్శకుడిగా పేరు తెచ్చుకున్నారు దశరథ్. తాజాగా ఆయన దర్శకత్వం వహించిన చిత్రం - ‘శౌర్య’. మంచు మనోజ్, రెజీనా జంటగా మల్కాపురం శివకుమార్ నిర్మించిన ఈ చిత్రం శుక్రవారం విడుదలవుతోంది. దశరథ్ చెప్పిన ముచ్చట్లు...
  
  డిఫరెంట్ లవ్‌స్టోరీ చేయాలని ‘శ్రీ’ చిత్రం నుంచి ప్రయత్నిస్తున్నా. అది ఇప్పటికి కుదిరింది. ప్రేమికుల మధ్య భేదాభిప్రాయాలు రావడం వల్లో, తల్లితండ్రులు ఒప్పుకోకపోవడం వల్లో ప్రేమకథలు ఫెయిల్ అవుతూ ఉంటాయి. అయితే ‘శౌర్య’లో ఎవరూ ఊహించని ప్రత్యేక కోణం ఉంటుంది.
  
  ఇదొక థ్రిల్లింగ్ లవ్‌స్టోరీ. ఫైట్లుండవు. సినిమా కథ గ్రామీణ నేపథ్యంలో ఉంటుంది. ఇందులో మనోజ్ రెండు వేర్వేరు పాత్రల్లో నటించాడు. తెలుగులో ఇలాంటి కథతో సినిమా రాలేదు. ‘శ్రీ’ చిత్రం తర్వాత చాలా కాలానికి మళ్ళీ మనోజ్‌తో చేసిన చిత్రమిది. ఇప్పుడు కూడా తనలో ఎనర్జీ ఏ మాత్రమూ తగ్గలేదు. అతను ఎప్పుడూ ఏదో ఒకటి కొత్తగా ట్రై చేయాలని ప్రయత్నిస్తూనే ఉంటాడు.
  
  నా కెరీర్‌లో జయాలు, అపజయాలు చూశా. ఆ రెండింటినీ సమానంగా చూడడం వల్లే సంతోషంగా ఉన్నా. ప్రేక్షకులు ఎప్పుడూ కొత్తదనం కోరుకుంటారు. సినిమాలోని విషయం నచ్చితే ఆదరిస్తారు.
  
  తెలుగు సినీ పరిశ్రమలో నాకు కొద్దిమంది స్నేహితులున్నారు. దర్శకుడు వీవీ వినాయక్, హీరోలు మనోజ్, ప్రభాస్, రచయితలు కోన వెంకట్, గోపీ మోహన్, సంగీత దర్శకుడు ఆర్‌పీ పట్నాయక్ మంచి స్నేహితులు. సినిమాలతో సంబంధం లేకుండా మేము రెగ్యులర్‌గా కలుస్తుంటాం. ప్రభాస్‌తో తప్పకుండా ఓ చిత్రం చేస్తా. ఆ వివరాలు త్వరలో చెబుతా.
  


 పుట్టింట్లో చిన్న కూతురు, మెట్టినింట్లో పెద్ద కోడలు!
  ఎలా ఉంది టైటిల్?
  సౌమ్యంగా, సంప్రదాయంగా ఉంది.
  మరి కథో?
  దశరథే రాయాలి.
  మాటలు?
  అవి కూడా ఆయనే.
  స్క్రీన్‌ప్లే, డెరైక్షన్?
  ఇక అడక్కండి. దశరథ్ మాత్రమే చేయగలరు ఇవన్నీ.
  బహుశా ఆయనకు ఐడియా వచ్చి వుండదు కానీ...
  దాంపత్యబంధంపై ఒక చక్కటి సినిమా తీయడానికి కావలసిన కథ, మాటలు, మలుపులు...
  సర్వం... వాళ్ల పెళ్లిపుస్తకంలోనే ఉన్నాయి!
  సౌమ్య, దశరథ్ భార్యాభర్తలు.
  కుటుంబ అనుబంధాలకు వారధులు.
  వారి వైవాహిక జీవితంలోని బాధ్యతల సంతోషాలు, సర్దుబాట్ల సంబరాలే...
  ఈవారం ‘మనసే జతగా...’
  
 కొండపల్లి దశరథ్‌కుమార్‌గా కంటే డెరైక్టర్ దశరథ్‌గా ఆయన సుపరిచితులు. కుటుంబంలో ప్రేమతో ‘సంతోషం’ నింపడం ఎలాగో తెలిసిన వ్యక్తి. ప్రశాంతంగా ఉండడమే తనకు ‘సంబరం’ అని చెప్పే ఈ డెరైక్టర్ ‘మిస్టర్ పర్‌ఫెక్ట్’గా బయటివారికంటే ఇంట్లో వారి చేత కితాబులు అందుకుంటే చాలు అని హాయిగా నవ్వేస్తారు. ఆయన నవ్వులతో భార్య శేషసౌమ్య జతకలుపుతారు. తమ అనుబంధం గురించి వీరేమంటున్నారంటే...!
  
 రెండు కుటుంబాల బంధం
  
 పెళ్లంటే ఇద్దరు వ్యక్తులకు మాత్రమే కాదు రెండు కుటుంబాలకు సంబంధించింది అంటారు దశరథ్. అందుకేనేమో అత్తమామల చేత ‘మా పెద్ద కొడుకు’ అనిపించుకునేంత ఆత్మీయతను దశరథ్ పెంచుకుంటే, ‘వదిన మా అమ్మ’ అనిపించేటంత ఆప్యాయతను శేషసౌమ్య పొందారనిపించింది వీరి మాటల్లో! ‘నేను పుట్టి పెరిగింది హైదరాబాద్‌లోనే! డిగ్రీ చదివాను. పుట్టింట్లో చిన్నకూతురుని. అత్తింట్లో పెద్దకోడలిని. అల్లుడి హోదా కోసం, అత్తింటి మర్యాదల కోసం ఆశించరు ఈయన. అమ్మవాళ్లకు ఏ చిన్న సమస్య వచ్చినా వారికి సపోర్ట్‌గా ఉంటారు.  అందుకే ఈయన అంటే మా అమ్మానాన్నలకు అమితమైన ఇష్టం... అని ఆమె చెబుతుంటే అంతే సౌమ్యంగా నవ్వుతూ తన అభిప్రాయాలను తెలిపారు దశరథ్- ‘మేం ముగ్గురన్నదమ్ములం. మా బాల్యంలోనే అమ్మనాన్నలు చనిపోయారు. ఎలాగో‘లా’ చదివాను. తర్వాత సినిమా రంగంలోకి వచ్చాను.
 
 బంధువుల ద్వారా సౌమ్య సంబంధం వచ్చినప్పుడు, మొదటి చూపులోనే నచ్చింది. అప్పుడే సౌమ్యకు, తన తల్లిదండ్రులకు ఒకే మాట చెప్పాను ‘నాకు ఇద్దరు తమ్ముళ్లు. వారు జీవితంలో స్థిరపడేంతవరకు నా దగ్గరే ఉంటారు. వదినగానే కాదు తల్లిగానూ వారి బాధ్యతలు తీసుకోవాల్సి ఉంటుంది’ అని, సౌమ్య ‘సరే’ అనడంతో మా పెళ్లి నవంబర్ 13, 2005లో అయ్యింది. ఆ తర్వాత ఈ ఏడేళ్లలో ఇద్దరు తమ్ముళ్ల పెళ్లిళ్ళు అయ్యాయి. వారూ స్థిరపడ్డారు. మా ఇంట అడుగుపెట్టిన నాటి నుంచి మరుదుల పెళ్లిళ్ళ బాధ్యతలు దగ్గరుండి చూసుకోవడం, ఇంటిని చక్కదిద్దుకోవడంలో ఎక్కడా ఏ లోపమూ రానివ్వలేదు సౌమ్య. అందుకే నేను నా పని మీద దృష్టిపెట్టగలుగుతున్నాను’ అన్నారు ఈ నంది అవార్డు గ్రహీత. హైదరాబాద్‌లోని మణికొండలో నివాసం ఉంటున్న వీరికి కార్తీక, షణ్ముఖప్రియ ఇద్దరు కూతుళ్లు.
  
  మొదటి అడుగు ‘శుభవేళ’
  
 భార్యగానే కాదు ఇద్దరు మరుదులకు తల్లి స్థానంలో ఉండి బాధ్యతలు నిర్వర్తించాలి. అత్తమామలు లేని ఇంట్లో కొత్త కోడలిగా అడుగుపెట్టినప్పుడు తనలో వచ్చిన ఆందోళన ఎలా సద్దుమణిగిందో సౌమ్య చెబుతూ - ‘ముందు ఆశ్చర్యపోయాను. ఆడవారు లేరు అంటే నమ్మలేనంత నీటుగా, పద్ధతిగా ఉంది ఇల్లు. వీరికి వంట దగ్గర నుంచి అన్ని పనులు వచ్చు అని తర్వాత అర్థమైంది. ఎవరినీ నొప్పించని స్వభావాలు. పరిస్థితులు త్వరగానే అర్థమయ్యాయి. వాటికి తగ్గట్టుగా నేనే మార్పులు చేసుకోవడం మొదలుపెట్టాను. ఈ మధ్యే చిన్న మరిదికి కూడా పెళ్లైంది. తను వేరు కాపురం పెట్టాడు’ అని ఆమె అంటుండగా దశరథ్ మాట్లాడుతూ - ‘మేం ముగ్గురం మాకు మేమే ఒక రూల్ పెట్టుకున్నాం. పెళ్లిళ్ళు అయ్యాక  అందరం ఒకే చోట ఉంటే ఏవో మనస్పర్థలు వస్తూనే ఉంటాయి. వాటి కారణంగా విడిపోకుండా... వేరుగా ఉంటూనే ఒకరిగా ఉండాలి... అని. అలా విడిగా ఉంటూనే కలుస్తున్నాం’ అన్నారు.
  
 ఒకే స్వభావాలు....
  
 సినీదర్శకుని ఇల్లు అంటే కథలపై కసరత్తులు ఉంటాయి. కొన్ని ‘స్వగతాలు’ ఉంటాయి. ఇంకొన్ని సంభాషణలు ఉంటాయి. కాని, ‘మా ఇంట్లో సినిమాల గురించి అసలు ప్రస్తావనే ఉండదు’ అంటారు సౌమ్య. ‘షూటింగ్ స్పాట్‌కి ఈవిడ ఇంతవరకు రాలేదు. ఆ ఆసక్తీ చూపలేదు. కొత్తవాళ్లు, హడావుడి ఉన్న చోటికి వెళ్లడానికి అసలు ఇష్టపడదు. రెస్టారెంట్‌కైనా సరే  ప్రశాంతంగా ఉండే వాతావరణం కావాలి. నాదీ అలాంటి స్వభావమే! ప్రశాంతతను ఎక్కువ కోరుకుంటాం. పెళ్లిరోజులు, పుట్టిన రోజులు ఆడంబరంగా జరుపుకోవడానికి ఇష్టపడం. మా అమ్మాయి మొదటి పుట్టినరోజు కూడా ఎంత ఖర్చు అవుతుందో ఒక అంచనా వేసుకొని, అంత మొత్తాన్ని ఒక హోమ్‌కి విరాళంగా ఇచ్చేశాం’ అంటూ తమ స్వభావాలను వెలిబుచ్చారు దశరథ్!
  
  ‘నువ్వు నేను’ అనే మాటకు దూరం...
  
  ‘కాపురంలో చిన్న చిన్న గొడవలు, మాటపట్టింపులు వస్తూనే ఉంటాయి. ఎవరో ఒకరు సర్దుకుపోవాలి. మళ్లీ ఇద్దరి మధ్య సఖ్యతను తెచ్చుకోవాలి. మా ఇద్దరిలో నేను టైమ్ సరిగ్గా కేటాయించను అని తను, ఆరోగ్యం పట్ల శ్రద్ధ తీసుకోరు అని నేను అనుకుంటూనే ఉంటాం. పిల్లల విషయంలోనూ కొన్ని చికాకులు చోటుచేసుకుంటూనే ఉంటాయి’ అని దశరథ్ చెబుతుంటే ‘దంపతుల మధ్య అనురాగం ఉండాలి, అహం ఉండకూడదు. మా ఇద్దరి మధ్యా అహానికి తావు ఉండదు. కాబట్టి ‘నువ్వు -నేను’ అనుకున్న సందర్భమే రాలేదు’ అన్నారు సౌమ్య.
  
 పెళ్లంటే భార్య, భర్త మాత్రమే కాదు రెండు కుటుంబాలు ఒక కుటుంబంగా మారడం. అన్నదమ్ములు, తోడికోడళ్లు, బావమరుదులు, అత్తమామలు... ఒకరికొకరు అభిమానంగా ఉంటూ, ఆత్మీయంగా ఉండడం. ఆ సంతోషాల మధ్య తమ సంతోషాన్ని వెదుక్కోవడం. సంబరంగా జీవితాన్ని గడపడం. ఈ పదాలకు సరైన అర్థంలా అనిపించారు వీరు.
  
  - నిర్మలారెడ్డి
  
  పేరుకు తగ్గట్టే సౌమ్యంగా ఉంటుంది. బంధువులతో కలివిడిగా ఉండటం, మరుదుల పెళ్లిళ్ళ బాధ్యతలు దగ్గరుండి చూసుకోవడం, ఇంటిని చక్కదిద్దుకోవడం...లో ఎక్కడా ఏ లోపమూ రానివ్వలేదు. అందుకే నేను నా పని మీద పూర్తి దృష్టిపెట్ట
  గలుగుతున్నాను.
  - దశరథ్
  
 అమ్మవాళ్లకు ఏ చిన్న సమస్య వచ్చినా పెద్ద కొడుకుగా ఈయన వారికి  సపోర్ట్‌గా ఉంటారు. అల్లుడి హోదా కోసం, అత్తింటి మర్యాదల కోసం ఆశించరు. స్నేహంగా కలిసిపోతారు.
  - శేషసౌమ్య్చ