ముంబై: దేశంలో డేటా సెంటర్ల సామర్థ్యం 2026–27 ఆర్థిక సంవత్సరం చివరికి రెట్టింపై 2–2.3 గిగావాట్లకు చేరుకుంటుందని క్రిసిల్‌ రేటింగ్స్‌ తెలిపింది. ఇప్పటికే ఈ రంగంలో కార్యకలాపాలు నిర్వహిస్తున్న సంస్థల విస్తరణ ప్రణాళికలకు తోడు కొత్త సంస్థల రాకతో డేటా సెంటర్ల సామర్థ్యం పెరగనున్నట్టు వెల్లడించింది. డిజిటలైజేషన్‌ పెరగడానికితోడు, క్లౌడ్‌ స్టోరేజీపై సంస్థల పెట్టుబడులు ఇనుమడిస్తుండడం డేటా సెంటర్ల డిమాండ్‌ను పెంచుతున్నట్టు తెలిపింది. జెనరేటివ్‌ ఏఐ వినియోగం వేగంగా విస్తరిస్తుండడం సైతం మధ్య కాలానికి ఈ డిమాండ్‌ను నడిపించనున్నట్టు పేర్కొంది. ఈ బలమైన డిమాండ్‌ను అందుకోవడానికి వీలుగా సంస్థలకు అదనపు మూలధన వ్యయాలు అవసరం అవుతాయని, ఇవి రుణాల రూపంలో ఉండొచ్చని పేర్కొంది. వ్యాపార సంస్థలు తమ వ్యాపారాల నిర్వహణ విషయంలో డిజిటల్‌ ప్లాట్‌ఫామ్‌లకు మొగ్గు చూపిస్తుండడం డేటా సెంటర్ల కంప్యూటింగ్, స్టోరేజ్‌ వసతుల డిమాండ్‌ను పెంచుతున్నట్టు వివరించింది. కరోనా తర్వాత ఈ ధోరణి పెరగడాన్ని గుర్తు చేసింది. అధిక వేగంతో కూడిన డేటా అందుబాటులోకి రావడం సోషల్‌ మీడియా, ఓటీటీ, డిజిటల్‌ చెల్లింపుల వినియోగాన్ని పెంచినట్టు తెలిపింది. గత ఐదు ఆర్థిక సంవత్సరాలుగా మొబైల్‌ డేటా ట్రాఫిక్‌ ఏటా 25 శాతం చొప్పున పెరగడాన్ని ప్రస్తావించింది. 2024 మార్చి నాటికి నెలవారీ డేటా వినియోగం 24 జీబీకి చేరిందని, 2026 మార్చి నాటికి 33–35జీబీకి ఇది పెరుగుతుందని క్రిసిల్‌ రేటింగ్స్‌ అంచనా వేసింది.భారీ పెట్టుబడులు..‘‘పెరుగుతున్న డేటా సెంటర్ల డిమాండ్‌ను తీర్చేందుకు గాను వచ్చే ఐదు ఆర్థిక సంవత్సరాల్లో రూ.55,000–65,000 కోట్ల మేర పెట్టుబడులు అవసరం అవుతాయి. ప్రధానంగా భూమి, భవనాలు, విద్యుత్‌ ఎక్విప్‌మెంట్, కూలింగ్‌ పరిష్కారాల కోసం ఎక్కువ వ్యయం చేయాల్సి ఉంటుంది. భూమి, భవనం కోసమే డేటా సెంటర్‌ ఆపరేటర్లు మొత్తం మూలధన వ్యయాల్లో 25–30 శాతాన్ని వెచి్చంచాల్సి వస్తుంది’’అని క్రిసిల్‌ రేటింగ్స్‌ సీనియర్‌ డైరెక్టర్‌ మనీష్‌ గుప్తా తెలిపారు. ఒక్కసారి ఒప్పందం కుదిరితే డేటా సెంటర్లకు స్థిరమైన నగదు ప్రవాహాలు వస్తుంటాయని క్రిసిల్‌ రేటింగ్స్‌ డైరెక్టర్‌ ఆనంద్‌ కులకర్ణి వివరించారు. ‘‘ఒక కేంద్రం నుంచి మరో కేంద్రానికి మారడం అన్నది అధిక వ్యయాలతో కూడుకున్నదే కాకుండా, వ్యాపార అవరోధాలకు దారితీస్తుంది. దీంతో క్లయింట్లను అట్టిపెట్టుకునే రేషియో ఎక్కువగా ఉంటుంది’’అని తెలిపారు.

న్యూఢిల్లీ: భారతీయ గేమింగ్‌ పరిశ్రమ వార్షికాదాయం ఐదేళ్లలో దాదాపు రెట్టింపు కానుంది. 2028 నాటికి 6 బిలియన్‌ డాలర్లకు చేరనుంది. 2023లో ఇది 3.1 బిలియన్‌ డాలర్లుగా ఉంది. ఇంటరాక్టివ్‌ ఎంటర్‌టైన్‌మెంట్‌ అండ్‌ ఇన్నోవేషన్‌ కౌన్సిల్, ఆన్‌లైన్‌ గేమింగ్‌ సంస్థ విన్‌జో సంయుక్తంగా రూపొందించిన నివేదికలో ఈ విషయాలు వెల్లడయ్యాయి. ’ఇండియా గేమింగ్‌ రిపోర్ట్‌ 2024’ ప్రకారం 2028 నాటికి పెయిడ్‌ యూజర్ల సంఖ్య 24 కోట్లకు చేరనుంది. 2023లో ఇది 14.4 కోట్లుగా ఉంది. ‘భారతీయ గేమింగ్‌ రంగంలో 1,400 గేమింగ్‌ కంపెనీలు ఉన్నాయి. వీటిలో 500 గేమింగ్‌ స్టూడియోలు ఉన్నాయి. 2028 నాటికి గేమింగ్‌కి సంబంధించి వార్షికాదాయం 6 బిలియన్‌ డాలర్లకు చేరగలదని అంచనాలు ఉన్నాయి‘ అని నివేదిక తెలిపింది. రిపోర్టు ప్రకారం ప్రొఫెషనల్‌ ప్లేయర్ల సంఖ్య 2023లో 500గా ఉండగా వచ్చే అయిదేళ్లలో 2.5 రెట్లు పెరగనుంది. ఈ–స్పోర్ట్స్‌కి ప్రభుత్వ గుర్తింపు లభించడంతో పాటు ఈ–స్పోర్ట్స్‌ టాలెంట్‌ను ప్రోత్సహించేందుకు కొన్ని రాష్ట్రాలు  తగు చర్యలు తీసుకుంటున్నాయి.    నాలుగేళ్లలో భారీగా డౌన్‌లోడ్స్‌.. ‘2019 నుంచి 2023 మధ్య కేవలం నాలుగేళ్ల వ్యవధిలో భారత్‌లో గేమ్‌ డౌన్‌లోడ్లు 565 కోట్ల నుంచి 950 కోట్లకు చేరాయి. దీంతో అంతర్జాతీయంగా గేమ్‌ డౌన్‌లోడ్స్‌లో భారత వాటా గతేడాది ఏకంగా 16 శాతానికి చేరింది. 450 కోట్లు (7.6 శాతం మార్కెట్‌ వాటా), 440 కోట్లు (7.4 శాతం మార్కెట్‌ వాటా) డౌన్‌లోడ్స్‌తో బ్రెజిల్, అమెరికా తర్వాత స్థానాల్లో ఉన్నాయి‘ అని రిపోర్టు తెలిపింది. దీని ప్రకారం దేశీయంగా 56.8 కోట్ల మంది గేమర్స్, 15,000 మంది పైచిలుకు గేమ్‌ డెవలపర్లు, ప్రోగ్రామర్లు ఉన్నారు. మూడేళ్ల క్రితం ప్రతి అయిదుగురు గేమర్లలో ఒక్క మహిళ మాత్రమే ఉండేవారు. కానీ ప్రస్తుతం గేమర్లలో 40 శాతం మంది మహిళలు ఉంటున్నారు. ‘భారత గేమింగ్‌ మార్కెట్లో మొబైల్‌ గేమింగ్‌ వాటా 90 శాతంగా ఉంది. అదే అమెరికాలో ఇది 37 శాతంగా, చైనాలో 62 శాతంగా ఉంది. 50 శాతం మంది గేమర్లు 18–30 ఏళ్ల మధ్య వయస్సువారే‘ అని నివేదిక వివరించింది. ఆన్‌లైన్‌ గేమింగ్‌ పరిశ్రమలో వచ్చే 10 ఏళ్లలో మరో 2.5 లక్షల ఉద్యోగాల కల్పన జరగనుంది. ప్రస్తుతం 1 లక్ష మంది నిపుణులు ప్రత్యక్షంగా, పరోక్షంగా గేమింగ్‌తో ఉపాధి పొందుతున్నారు.

గాంధీనగర్‌: ఈ దశాబ్దం ఆఖరు నాటికి భారత ఇంధన అవసరాలు రెట్టింపవుతాయని రిలయన్స్‌ ఇండస్ట్రీస్‌ చైర్మన్‌ ముకేశ్‌ అంబానీ తెలిపారు. ప్రస్తుతం 3.5 ట్రిలియన్‌ (లక్షల కోట్ల) డాలర్ల ఎకానమీగా ఉన్న భారత్‌ 2047 నాటికి 40 ట్రిలియన్‌ డాలర్ల స్థాయికి వృద్ధి చెందుతుందని ఆయన ధీమా వ్యక్తం చేశారు.  పండిట్‌ దీన్‌దయాళ్‌ ఎనర్జీ యూనివర్సిటీ స్నాతకోత్సవ కార్యక్రమంలో పాల్గొన్న సందర్భంగా అంబానీ ఈ విషయాలు తెలిపారు. వచ్చే 25 ఏళ్లలో భారత్‌లో అసాధారణ స్థాయిలో ఆర్థికాభివృద్ధి జరగనుందని ఆయన చెప్పారు. పర్యావరణ అనుకూలమైన, సుస్థిరమైన, సమ్మిళిత అభివృద్ధిలో అంతర్జాతీయంగా దిగ్గజంగా ఎదిగేందుకు భారత్‌ మెరుగైన పరిష్కార మార్గాలను రపొందించగలదని అంబానీ ధీవ వ్యక్తం చేశారు. విద్యార్థులు తమ సామర్ధ్యాలు, నైపుణ్యాలపై నమ్మకం కలిగి ఉండాలని సూంచారు.  ‘ధైర్యమనేది అల్లకల్లోలంగా ఉన్న సముద్రాన్ని కూడా దాటించగలిగే పడవలాంటిది. మీరు తప్పులు చేయొచ్చు. కానీ వాటి గురిం ఆందోళన చెందుతూ, వెనుకడుగు వేయకండి. తమ తప్పులను సరి చేసుకుని, లక్ష్యం వైపు ధైర్యంగా అడుగులు వేసేవారే విజయం సాధిస్తారు. పెద్ద కలలు కనండి. అవే మీ జీవితాన్ని ముందుకు నడిపించే చోదకాలవుతాయి. మీ లక్ష్యాలను సాకారం చేసుకునేందుకు నిబద్ధతతో వ్యవహరించండి. రిస్కులు తీసుకోండి. కానీ నిర్లక్ష్యం వహించకండి‘ అని అంబానీ చెప్పారు.

సాక్షి, హైదరాబాద్‌: గతంలో ఇచ్చిన హామీ మేరకు రేషన్‌ డీలర్ల కమీషన్‌ను ప్రభుత్వం రెండింతలు చేసింది. టన్ను బియ్యంపై రూ. 700గా ఉన్న కమీషన్‌ను రూ. 1,400 రూపాయలకు పెంచుతూ ప్రభుత్వం ఉత్తర్వులు జారీ చేసింది. ఈ సందర్భంగా రాష్ట్ర పౌరసరఫరాల శాఖ మంత్రి గంగుల కమలాకర్‌ హైదరాబాద్‌లోని తన నివాసంలో రేషన్‌ డీలర్ల జేఏసీ ప్రతినిధులకు ప్రభుత్వ ఉత్తర్వుల ప్రతిని అందజేసి శుభాకాంక్షలు తెలిపారు. ఈ పెంపు తక్షణమే అమల్లోకి రానున్నట్లు మంత్రి తెలిపారు. ఈ ఉత్తర్వుల ద్వారా ఏటా డీలర్ల కమిషన్‌ రూ. 303 కోట్లకు చేరనుందని, అందులో రూ. 245 కోట్లను రాష్ట్ర ప్రభుత్వమే సొంతంగా భరిస్తుందని వెల్లడించారు. కరోనా వంటి సంక్షోభ సమయంలో రేషన్‌ డీలర్లు అందించిన సేవలకు గౌరవంగా సీఎం డీలర్ల కమీషన్‌ను రెండింతలు చేసినట్లు తెలిపారు. రాష్ట్రంలో ఏ ఒక్కరూ ఆకలితో అలమటించకూడదనే ఉద్దేశ్యంతో సీఎం కేసీఆర్‌ కేంద్రం అందించే కమీషన్‌కన్నా అదనంగా రూ.950 ఒక్కో టన్నుకు అందిస్తున్నారని తెలిపారు. అలాగే కేంద్రం జాతీయ ఆహార భద్రతా కార్డులు ఇవ్వని దాదాపు 90 లక్షల మంది పేదలకు రాష్ట్ర ప్రభుత్వమే రాష్ట్ర ఆహార భద్రత కింద పూర్తి రేషన్‌ను అదనంగా అందజేస్తుందని తెలిపారు. కేంద్ర ప్రభుత్వం సరఫరా చేసే 5కిలోల బియ్యానికి అదనంగా మరో కిలోని చేర్చి ఎన్‌ఎఫ్‌ఎస్‌సీ కార్డులకు కూడా ఒక్కొక్కరికి 6 కిలోల బియ్యాన్ని అందచేస్తోందని తెలిపారు. ఇందుకోసం ఏటా రూ. 3వేల కోట్లను పేద ప్రజల సంక్షేమం కోసం రాష్ట్ర ప్రభుత్వం ఖర్చుచేస్తోందన్నారు. ఈ సందర్భంగా రేషన్‌ డీలర్ల ప్రతినిధులు మంత్రిని సన్మానించి తమ కృతజ్ఞతలు తెలియజేసారు. ముఖ్యమంత్రి కేసీఆర్‌కు, మంత్రులు హరీశ్‌రావు, గంగుల కమలాకర్‌కు ప్రత్యేక ధన్యవాదాలు తెలిపారు. 

సాక్షి ప్రతినిధి, భద్రాద్రి కొత్తగూడెం: ఖమ్మం, మహబూబాబాద్‌, భద్రాద్రి జిల్లాల మీదుగా వెళ్లే డోర్నకల్‌ – భద్రాచలంరోడ్‌ లైన్‌ డబ్లింగ్‌ పనులకు రైల్వే బోర్డు ఆమోదం తెలిపింది. ప్రత్యేక ప్రాజెక్టుగా ఈ పనులు చేపట్టాలని రైల్వే శాఖ నిర్ణయం తీసుకుంది. అన్నీ కుదిరితే మరో ఆరు నెలల్లో పనులు ప్రారంభమయ్యే అవకాశం ఉంది. గూడ్సు రైళ్లకే ప్రాముఖ్యత డోర్నకల్‌ జంక్షన్‌ నుంచి భద్రాచలం రోడ్డు వరకు ప్రస్తుతం సింగిల్‌ లైన్‌ అందుబాటులో ఉంది. ఈ మార్గం గుండానే ఇల్లెందు, మణుగూరు, కొత్తగూడెం, సత్తుపల్లిలో ఉత్పత్తి అయిన బొగ్గును దేశంలోని ఇతర ప్రాంతాలకు రవాణా చేయాల్సి వస్తోంది. అంతేకాకుండా విశాఖపట్నం స్టీల్‌ ప్లాంట్‌కు డోలమైట్‌ రవాణాకూ ఈ మార్గమే కీలకం. దేశంలో థర్మల్‌ విద్యుత్‌కు విపరీతమైన డిమాండ్‌ ఉండటంతో భద్రాచలంరోడ్‌ నుంచి డోర్నకల్‌ వరకు బొగ్గు రవాణా చేసే గూడ్స్‌ రైళ్ల రాకపోకలు కీలకంగా మారాయి. దీంతో గూడ్స్‌ రైళ్ల క్లియరెన్స్‌కు ప్రాధాన్యం ఇస్తూ ప్యాసింజర్‌ రైళ్లను తరచుగా ఆపేస్తున్నారు. ఫలితంగా డోర్నకల్‌ – భద్రాచలంరోడ్‌ సెక్షన్‌లోకి రైలు వచ్చిన తర్వాత గమ్యస్థానం చేరే వరకు ప్రయాణికులు తీవ్రంగా ఇబ్బంది పడుతున్నారు. ముఖ్యంగా సింగరేణి, కాకతీయ రైళ్లలో వచ్చే వారికి ఈ తరహా కష్టాలు ఎక్కువగా ఉన్నాయి. 54 కి.మీ. మేర ట్రాక్‌ డోర్నకల్‌ నుంచి భద్రాచలంరోడ్‌ వరకు మొత్తం 54 కి.మీ దూరం రైల్వే ట్రాక్‌ ఉంది. ఈ ట్రాక్‌కు సమాంతరంగా మరో ట్రాక్‌ నిర్మిస్తారు. అంతేకాకుండా మార్గమధ్యంలో పోచారం, కారేపల్లి, గాంధీపురం, చీమలపాడు, తడికలపూడి, బేతంపూడి స్టేషన్లలో లూప్‌లైన్ల నిర్మాణం కూడా చేపడతారు. ఇందులో చాలావరకు భూసేకరణ సైతం గతంలోనే పూర్తయింది. ఈ మేరకు ట్రాక్‌ వెంబడి హద్దు రాళ్లు సైతం ఉన్నాయి. ప్రస్తుత రైల్వే అంచనాల ప్రకారం కిలోమీటర్‌ ట్రాక్‌ నిర్మాణానికి రూ.90 నుంచి రూ.100 కోట్ల వరకు వ్యయం అవుతుంది. ఈ లెక్కన ఈ ప్రాజెక్టు నిర్మాణానికి రూ. 540 కోట్ల వరకు ఖర్చు కావచ్చని తెలుస్తోంది. రైల్వేబోర్డు నుంచి గ్రీన్‌ సిగ్నల్‌ వచ్చినందున డీపీఆర్‌ తయారీ, టెండర్లు తదితర పనులన్నీ ముగిసే సరికి కనీసం ఆరు నెలల సమయం పట్టవచ్చు. ఆ తర్వాత నిర్మాణ పనులు మొదలయ్యే అవకాశం ఉంది. మరిన్ని రైళ్లకు అవకాశం.. కరోనాకు ముందు భద్రాచలం రోడ్‌ నుంచి డోర్నకల్‌ల మధ్య ఏడు రైళ్లు నడిచేవి. ప్రస్తుతం ఐదు రైళ్లు నడుస్తున్నాయి. సత్తుపల్లి మార్గం అందుబాటులోకి వచ్చాక గూడ్స్‌ ట్రాఫిక్‌ పెరిగిపోయింది. దీంతో కొత్త రైళ్లు నడిపించడం కష్టంగా మారింది. డబ్లింగ్‌ పనులు పూర్తయితే కనీసం కొత్తగూడెం నుంచి డోర్నకల్‌ మధ్య ప్రస్తుతం ఉన్న రైళ్లు ఆలస్యం కాకుండా నడిచేందుకు వీలవుతుంది. అదే విధంగా తిరుపతి, షిర్డీ, నిజామాబాద్‌, మంచిర్యాల, గుంటూరు తదితర పట్టణాలకు మరిన్ని రైళ్లు నడిపించేందుకు వీలవుతుంది.

న్యూఢిల్లీ: దేశీయంగా ఉత్పత్తి చేసే సహజ వాయువు ధరను రెట్టింపు చేస్తూ కేంద్ర ప్రభుత్వం గురువారం నిర్ణయం తీసుకుంది. ఏప్రిల్‌ 1 నుంచి ఆరు నెలల పాటు కొత్త రేట్లు అమల్లో ఉంటాయి. వీటి ప్రకారం .. ప్రభుత్వ రంగ ఓఎన్‌జీసీ, ఆయిల్‌ ఇండియాకు కేటాయించిన క్షేత్రాల నుంచి ఉత్పత్తి చేసే గ్యాస్‌ రేటు రికార్డు స్థాయిలో యూనిట్‌కు (మిలియన్‌ బ్రిటిష్‌ థర్మల్‌ యూనిట్‌) 6.10 డాలర్ల స్థాయికి పెరిగింది. ఇప్పటిదాకా ఇది 2.90 డాలర్లుగా ఉండేది. ఇక రిలయన్స్‌ ఇండస్ట్రీస్‌ వంటి సంస్థలు సంక్లిష్టమైన క్షేత్రాల నుంచి ఉత్పత్తి చేసే గ్యాస్‌ ధర (యూనిట్‌కు) 6.13 డాలర్ల నుంచి 9.92 డాలర్లకు చేరింది. అంతర్జాతీయంగా ఇంధన రేట్లు ఎగిసిన నేపథ్యంలో ఈ మేరకు ధరలను సవరిస్తూ కేంద్ర చమురు శాఖలో భాగమైన పెట్రోలియం ప్లానింగ్‌ అండ్‌ అనాలిసిస్‌ సెల్‌ (పీపీఏసీ) ఒక నోటిఫికేషన్‌ జారీ చేసింది. ఏటా ఆరు నెలలకోసారి కేంద్రం ఈ ధరలను సవరిస్తుంది.   పెరగనున్న ద్రవ్యోల్బణం.. తాజా పరిణామంతో సీఎన్‌జీ, పైప్డ్‌ గ్యాస్‌ ధరలు పెరిగే అవకాశాలు ఉన్నాయని పరిశ్రమ వర్గాలు తెలిపాయి. ఇప్పటికే గత పది రోజుల్లో పెట్రోల్, డీజిల్‌ రేట్లు తొమ్మిది సార్లు పెంచడంతో ఇంధనాల ధర లీటరుకు రూ. 6.4  స్థాయిలో పెరిగింది. వంట గ్యాస్‌ ధర కూడా సిలిండర్‌కు రూ. 50 చొప్పున పెరిగింది. ఇక గ్యాస్‌ ధర కూడా పెరగడంతో ద్రవ్యోల్బణం మరింత ఎగిసే అవకాశం ఉందన్న ఆందోళనలు నెలకొన్నాయి. సహజ వాయువును విద్యుత్, ఎరువుల ఉత్పత్తితో పాటు కంప్రెస్డ్‌ నేచురల్‌ గ్యాస్‌ (సీఎన్‌జీ), గృహాలకు పైపుల ద్వారా సరఫరా చేసే పైప్డ్‌ గ్యాస్‌ అవసరాల కోసం కూడా వినియోగిస్తున్నారు. అయితే, గ్యాస్‌ ద్వారా విద్యుత్‌ ఉత్పత్తి చాలా తక్కువ స్థాయిలోనే ఉన్నందువల్ల విద్యుదుత్పత్తి వ్యయాలపై అంతగా ప్రభావం పడదని పరిశ్రమ వర్గాలు తెలిపాయి. అలాగే ఎరువులకు సంబంధించి ప్రభుత్వం సబ్సిడీ ఇస్తున్నందున ఆ మేరకు ప్రతికూల ప్రభావం ఎక్కువగా ఉండబోదని పేర్కొన్నాయి.

న్యూఢిల్లీ: బ్రిటానియా ఇండస్ట్రీస్‌ నికర లాభం ఈ ఆర్థిక సంవత్సరం(2020–21) జూన్‌ క్వార్టర్‌లో రెట్టింపునకు మించి పెరిగింది. గత ఆర్థిక సంవత్సరం (2019–20) క్యూ1లో రూ.249 కోట్లుగా ఉన్న నికర లాభం ఈ క్యూ1లో రూ.543 కోట్లకు పెరిగింది. లాక్‌డౌన్‌ సమయంలో బిస్కెట్లకు డిమాండ్‌ పెరగడం, వలస కార్మికులు పట్టణాల నుంచి పల్లెలకు చేరడం కూడా ఈ కంపెనీ అమ్మకాలకు కలసివచ్చిందని నిపుణులంటున్నారు. మొత్తం ఆదాయం రూ.2,768 కోట్ల నుంచి 27 శాతం వృద్ధితో రూ.3,514 కోట్లకు పెరిగిందని కంపెనీ పేర్కొంది. అన్ని అంశాల్లోనూ ఈ కంపెనీ ఫలితాలు విశ్లేషకుల అంచనాలను మించాయి.  ► నిర్వహణ లాభం రూ.395 కోట్ల నుంచి రూ.717 కోట్లకు ఎగసింది.    ► నిర్వహణ లాభ మార్జిన్‌ 6.4 శాతం పెరిగి 21 శాతానికి చేరింది.   ఆర్థిక ఫలితాల నేపథ్యంలో బీఎస్‌ఈలో బ్రిటానియా ఇండస్ట్రీస్‌ షేర్‌ 2 శాతం నష్టంతో రూ.3,784 వద్ద ముగిసింది. ఇంట్రాడేలో ఏడాది గరిష్ట స్థాయి, రూ.3,949ను తాకింది.

న్యూఢిల్లీ: భారత్‌లో శుక్రవారం ఉదయం 8  గంటల నుంచి శనివారం ఉదయం 8 గంటల వరకు కొత్త కరోనా కేసులు ఆరు శాతం పెరిగాయి. దేశంలో కరోనా కేసుల సంఖ్య 100 దాటిన తర్వాత ఒకరోజులో కేసుల వృద్ధి అత్యల్పంగా నమోదు కావడం ఇదే తొలిసారి అని కేంద్ర ప్రభుత్వం తెలిపింది. ప్రస్తుతం  భారత్‌లో కరోనా పాజిటివ్‌ కేసులు రెట్టింపు కావడానికి సగటున 9.1 రోజుల సమయం పడుతోందని తెలిపింది. కేంద్ర ఆర్థిక మంత్రి హర్షవర్దన్‌ నేతృత్వంలోని ఉన్నతస్థాయి మంత్రుల బృందం 13వ సమావేశం శనివారం జరిగింది. దేశవ్యాప్తంగా కరోనా హాట్‌స్పాట్లలో భద్రతా చర్యలు, కరోనా బాధితులకు అందుతున్న వైద్య సేవలు, ఐసోలేషన్‌ బెడ్లు, ఐసోలేషన్‌ వార్డులు, పీపీఈ కిట్లు, ఎన్‌ 95 మాస్కులు, వెంటిలేటర్లు, ఆక్సిజన్‌ సిలిండర్లు, టెస్టింగ్‌ కిట్ల లభ్యతపై చర్చించారు. ప్రస్తుతం దేశంలో రోజుకు లక్షకుపైగా పీపీఈ కిట్లు, ఎన్‌ 95 మాస్కులు ఉత్పత్తి అవుతున్నాయని కేంద్ర ఆరోగ్యశాఖ వెల్లడించింది. 104 సంస్థలు పీపీఈ కిట్లను, మరో మూడు సంస్థలు ఎన్‌95 మాస్కులను తయారు చేస్తున్నాయని వివరించింది.   మెరుగైన స్థితిలో భారత్‌   దేశంలో కరోనా మహమ్మారి బారినపడిన వారిలో కేవలం 3.1 శాతం మంది మరణిస్తున్నారని, 20 శాతానికిపైగా బాధితులు  కోలుకుంటున్నారని కేంద్ర ఆరోగ్య శాఖ ప్రకటించింది. ఈ విషయంలో ప్రపంచంలోని చాలా దేశాల కంటే మెరుగైన స్థితిలో ఉన్నామని చెప్పింది.  దేశవ్యాప్తంగా దాదాపు 92 వేల ఎన్జీవోలు, స్వయం సహాయక సంఘాలు, పౌర  సంఘాలు వలస కూలీలకు ఆహారం అందజేస్తున్నాయని ప్రకటించింది.    ‘ఆ కిట్ల వాడకాన్ని ఆపేయండి’   కరోనా వైరస్‌ నిర్ధారణ కోసం ర్యాపిడ్‌ యాంటీబాడీ టెస్టు కిట్ల వాడకాన్ని నిలిపివేయాలని అధికార వర్గాలు శనివారం అన్ని రాష్ట్ర ప్రభుత్వాలు, కేంద్ర పాలిత ప్రాంతాలకు సూచించాయి.  చైనా కిట్ల నాణ్యతపై అనుమానాలు వ్యక్తమవుతున్న నేపథ్యంలో వాటి కచ్చితత్వాన్ని భారత వైద్య పరిశోధన మండలి(ఐసీఎంఆర్‌) మళ్లీ పరీక్షించాల్సి ఉందని వెల్లడించాయి. ‘కరోనా’ మరణాలు 779 న్యూఢిల్లీ: భారత్‌లో కరోనా విలయం కొనసాగుతోంది. శుక్రవారం సాయంత్రం నుంచి శనివారం సాయంత్రం వరకు.. 24 గంటల వ్యవధిలో 56 మంది కరోనా బాధితులు మరణించారు. అలాగే కొత్తగా 1,490 పాజిటివ్‌ కేసులు నమోదయ్యాయి. ఈ మహమ్మారి కారణంగా దేశంలో ఇప్పటిదాకా 779 మంది ప్రాణాలు కోల్పోయారని, కరోనా పాజిటివ్‌ కేసుల సంఖ్య 24,942కు ఎగబాకిందని కేంద్ర ఆరోగ్య శాఖ శుక్రవారం ప్రకటించింది. దేశంలో యాక్టివ్‌ కరోనా కేసులు 18,953 కాగా, 5,209 మంది చికిత్సతో కోలుకున్నారు. ఆసుపత్రుల నుంచి డిశ్చార్జి అయ్యారు. మొత్తం బాధితుల్లో 20.88 శాతం మంది పూర్తిగా కోలుకున్నారని కేంద్ర ఆరోగ్య శాఖ వెల్లడించింది.

సాక్షి, మహబూబ్‌నగర్‌: సికింద్రాబాద్‌–మహబూబ్‌నగర్‌ డబ్లింగ్‌ లైన్‌ పనులు చురుగ్గా కొనసాగుతున్నాయి. దక్షిణమధ్య రైల్వే హైదరాబాద్‌ డివిజన్‌ పరిధిలో మహబూబ్‌నగర్‌ స్టేషన్‌కు ప్రత్యేక గుర్తింపు ఉంది. మహబూబ్‌నగర్‌ స్టేషన్‌ నుంచి ప్రతినిత్యం 5వేల నుంచి 6వేల మంది ప్రయాణికులు రాకపోకలు సాగిస్తుంటారు. రై ల్వే క్రాసింగ్‌తో హైదరాబాద్‌ వెళ్లాలన్నా.. రా వాలన్నా గంటలతరబడి సమయం పడుతుంది. దీనిని దృష్టిలో ఉంచుకొని జిల్లాకు చెందిన ప్రజాప్రతినిధులు డబ్లింగ్‌ రైల్వే లైన్‌కు నిధులు కేటాయించాలని గత పదేళ్ల నుంచి కేంద్రంపై ఒత్తిడి తీసుకొస్తున్నారు. దీంతో నాలుగేళ్ల నుంచి కేంద్ర బడ్జెట్‌లో మహబూబ్‌నగర్‌ డబ్లింగ్‌ లైన్‌కు అధికంగా నిధులు కేటాయిస్తున్నారు.   బడ్జెట్‌లో డబ్లింగ్‌కు రూ.200 కోట్లు..   దాదాపు రూ.728 కోట్ల అంచనా వ్యయంతో ప్రారంభమైన సికింద్రాబాద్‌–మహబూబ్‌నగర్‌ డబ్లింగ్‌ లైన్‌కు నాలుగేళ్ల నుంచి మెరుగైన నిధులు కేటాయిస్తున్నారు. గతేడాది బడ్జెట్‌లో రూ.250 కోట్లు కేటాయించగా ఈ సారి బడ్జెట్‌లో రూ.200 కోట్లు కేటాయించారు. ఈ రైల్వేలైన్‌ పనులు జిల్లా పరిధిలో ముమ్మరంగా కొనసాగుతుంది. ఉందానగర్‌ నుంచి ప్రారంభమైన డబ్లింగ్‌ రైల్వే పనులు చురుగ్గా జరుగుతున్నాయి. ముఖ్యంగా ఈ ఏడాది డిసెంబర్‌ చివర్లో లేదా జనవరి వరకు గొల్లపల్లి వరకు డబ్లింగ్‌లైన్‌ పూర్తయ్యేలా ముమ్మరంగా పనులు చేపడుతున్నారు. డబ్లింగ్‌లైన్‌లో భాగంగా విద్యుద్దీకరణ పనులు కూడా ముమ్మరంగా జరుగుతున్నాయి. బాలానగర్, రాజాపూర్, గొల్లపల్లి రైల్వే స్టేషన్లలో నూతన భవనాల పనులకు శ్రీకారం చుట్టారు. గొల్లపల్లి స్టేషన్‌లో ఫ్‌లైవర్‌ బ్రిడ్జి నిర్మాణ పనులు పురోగతిలో ఉన్నాయి. బాలానగర్‌ వాగుమీద రైల్వే వంతెన నిర్మిస్తున్నారు. చురుగ్గా సాగుతున్న డబ్లింగ్‌లైన్, విద్యుద్దీకరణ పనులు   డబ్లింగ్‌తో తగ్గనున్న దూరభారం..   సికింద్రబాద్‌–మహబూబ్‌నగర్‌ రైల్వే డబ్లింగ్‌లైన్‌ పూర్తయితే జిల్లా ప్రయాణికులకు ఎంతో వెసులుబాటు లభిస్తుంది. మహబూబ్‌నగర్‌ నుంచి 100  కిలోమీటరు  దూరంలో  ఉన్న సికింద్రాబాద్‌కు వెళ్లడానికి ప్యాసింజర్‌కు 3 గంటలు, ఎక్స్‌ప్రెస్‌కు 2.30 గంటల సమయం పడుతుంది. డబ్లింగ్‌ లైన్‌ పూర్తయితే ఒక గంట సమయం ఆదా అయ్యే పరిస్థితి ఉంది. వాణిజ్యపరంగా కూడా అనేక ప్రయోజనాలు లభించే అవకాశం ఉంది. ప్రయాణికులకు సౌకర్యం  ఈ ఏడాది బడ్జెట్‌లో మహబూబ్‌నగర్‌ డబ్లింగ్‌ లైన్‌కు అధిక నిధులు కేటాయించారు. నిధులతో డబ్లింగ్‌ రైల్వే పనులు చురుగ్గా కొనసాగుతున్నాయి. మరిన్ని నిధులు కేటాయించి డబ్లింగ్‌ లైన్‌ను త్వరితగతిన పూర్తిచేయాలి. డబ్లింగ్‌ లైన్‌ పనులు పూర్తయితే ప్రయాణికులకు ఎంతో సౌకర్యం లభిస్తుంది. క్రాసింగ్‌ ఉండవు. దీంతో గంటలోపే సికింద్రాబాద్‌కు వెళ్లే అవకాశం ఉండడంతో ప్రయాణికులు సంఖ్య కూడా పెరుగుతుంది. సమయం ఆదా అవుతుంది. విద్యార్థులు, ఆస్పత్రులకు వెళ్లేవారికి వెసులుబాటులో ఉంటుంది. – ఎస్‌కే పీరాన్, రిటైర్డ్‌ సీనియర్‌ సీసీఐ  

దొనకొండ: నల్లపాడు నుంచి డోన్‌ వరకు జరుగుతున్న రైల్వే డబ్లింగ్‌ లైన్‌ పనులను దక్షిణ మధ్య రైల్వే జనరల్‌ మేనేజరు గజానన్‌ మాల్యా శనివారం పరిశీలించారు. ఈ సందర్భంగా దొనకొండలో సుమారు గంటసేపు పలు అంశాలను పరిశీలించి రైల్వే అధికారులతో మాట్లాడారు. ముందుగా ఆయనకు రైల్వే పింఛనర్స్‌ అసోసియేషన్‌ కార్యదర్శి కోలా కృపారావు పూలమాల, పుష్పగుచ్ఛం అందజేసి స్వాగతం పలికారు. స్టేషనులోని సిగ్నల్స్, బుకింగ్‌ కౌంటర్‌ను పరిశీలించి సమస్యలడిగి తెలుసుకున్నారు. రైల్వే ఓవర్‌ బ్రిడ్జి ఎక్కి పరిసరాలను గమనించారు. నీటి సౌకర్యాల గురించి అధికారులను అడిగి తెలుసుకున్నారు. నూతనంగా ఏర్పాటు చేసిన రైల్వే వైద్యశాలను పరిశీలించారు. అనంతరం విలేకరులతో జీఎం గజానన్‌ మాల్యా మాట్లాడుతూ నల్లపాడు నుంచి డోన్‌ వరకు డబ్లింగ్‌ లైను పనులు వేగవంతంగా సాగుతున్నాయని తెలిపారు. గుంటూరు–గుంతకల్‌ లైన్‌లో విద్యుత్‌ లైన్‌ పనులు జరుగుతున్నాయన్నారు. స్టేషన్‌లో ప్రయాణికులకు అన్ని సౌకర్యాలను అధికారులు ఏర్పాటు చేస్తున్నారన్నారు. అవసరమైన చోట ప్లాట్‌ఫాంలు ఏర్పాటు చేసేందుకు కృషి చేస్తున్నామన్నారు. దొనకొండలో రైల్వే వైద్యశాల ఏర్పాటు చేయడం చాలా సంతోషకరమన్నారు. స్టేషన్‌ ఆవరణలో మొక్కలు నాటారు. ఆయన వెంట గుంటూరు డివిజన్‌ రైల్వే మేనేజరు వి.జి.భూమా, సీనియర్‌ డీఈఎన్‌ ప్రసాదరావు, సీఎంఎస్‌ ఎన్‌.సి.రావు, సీఏఓ విజయ్‌ అగర్వాల్, చీఫ్‌ ఇంజినీర్లు శ్రీనివాసులు, ప్రకాష్‌ యాదవ్, అసిస్టెంట్‌ ఇంజినీర్లు రమణారావు, కె.సుబ్బారావు, స్టేషను సిబ్బంది, జీఆర్‌పీలు ఉన్నారు.  

న్యూఢిల్లీ: భారత్‌లో 2005తో పోల్చుకుంటే 2016 నాటికి మద్యం తలసరి వినియోగం రెట్టింపు అయిందని ప్రపంచ ఆరోగ్య సంస్థ(డబ్ల్యూహెచ్‌ఓ) తన నివేదికలో తెలిపింది. ఇండియాలో 2005లో ఆల్కహాల్‌ తలసరి వినియోగం 2.4 లీటర్లుగా ఉండగా, 2016 నాటికి అది 5.7 లీటర్లకు చేరుకుందని వెల్లడించింది. వీరిలో పురుషులు సరాసరి 4.2 లీటర్ల మద్యాన్ని తాగేస్తుండగా, మహిళలు 1.5 లీటర్ల మందును లాగించేస్తున్నారని పేర్కొంది. 2025 నాటికి ఆగ్నేయాసియాలో 15 ఏళ్లకు పైబడి మద్యం సేవించేవారి సంఖ్య గణనీయంగా పెరుగుతుందని డబ్ల్యూహెచ్‌ఓ తెలిపింది. అప్పటికల్లా భారత్‌లో తలసరి వినియోగం మరో 2.2 లీటర్లు పెరుగుతుందని వెల్లడించింది. ఇండోనేసియా, థాయ్‌లాండ్‌ దేశాల్లో మద్యం సేవించేవారి సంఖ్య స్వల్పంగా పెరుగుతుందంది. ఆగ్నేయాసియా తర్వాత పశ్చిమ పసిఫిక్‌ ప్రాంతంలో మద్యపాన సేవనం అధికంగా ఉంటుందని పేర్కొంది. 2005లో అంతర్జాతీయంగా తలసరి మద్యం వినియోగం 5.5 లీటర్లుగా ఉండగా, 2010 నాటికి అది 6.4 లీటర్లకు చేరుకుందనీ, 2016లో అదేస్థాయిలో కొనసాగుతోందని తెలిపింది.

న్యూఢిల్లీ: ప్రస్తుతం డిప్యుటేషన్‌పై వెళ్లే కేంద్ర ప్రభుత్వ ఉద్యోగులకు ఇస్తున్న భత్యాన్ని రూ.2 వేల నుంచి రూ.4,500కు పెంచుతున్నట్లు కేంద్ర సిబ్బంది శిక్షణా సంస్థ(డీవోపీటీ) తెలిపింది. ఏడో వేతన సంఘం సిఫార్సుల మేరకు ఈ పెంపు చేపట్టినట్లు పేర్కొంది. ప్రస్తుతం పనిచేస్తున్న ప్రాంతంలోనే డిప్యుటేషన్‌పై వెళ్లే కేంద్ర ఉద్యోగులకు వారి మూలవేతనంలో 5% లేదా గరిష్టంగా నెలకు రూ.4,500 చెల్లిస్తామని తెలిపింది. ఒకవేళ ఉద్యోగులు మరో ప్రాంతానికి డిప్యుటేషన్‌పై వెళితే..వారి మూలవేతనంలో 10% లేదా గరిష్టంగా రూ.9 వేలు చెల్లిస్తామంది.  

లండన్‌: బ్రెగ్జిట్‌ అనంతర వ్యూహంలో భాగంగా బ్రిటన్‌ కీలక నిర్ణయం తీసుకుంది. దేశంలో టెక్నాలజీ, కళలు, సృజనాత్మక పరిశ్రమల్లో పనిచేసే యూరోపియన్‌ యూనియన్‌(ఈయూ) దేశాలకు చెందని నిపుణులకు ప్రస్తుతం జారీచేస్తున్న వీసాలను రెట్టింపు చేయాలని నిర్ణయించింది. అసాధారణ ప్రతిభ(ఎక్సెప్షనల్‌ టాలెంట్‌) ఉండే విదేశీయులకు టైర్‌–1 రూట్‌ ద్వారా ప్రస్తుతం 1,000 వీసాలు ఇస్తుండగా, దీన్ని 2 వేలకు పెంచుతామంది. ‘మనం ఈయూ నుంచి విడిపోతున్న సందర్భంగా బ్రిటన్‌ వ్యాపారాలకు అనుకూలంగా ఉందని స్పష్టంగా చెప్పాలనుకుంటున్నాను. బ్రిటన్‌లో వేగంగా దూసుకెళ్తున్న టెక్నాలజీ రంగం అభివృద్ధికి, సాంకేతికత ఫలాలు దేశంలోని మారుమూల ప్రాంతాల్లోని ప్రజలందరికీ అందడానికి ప్రభుత్వం చేయాల్సిందంతా చేస్తుంది’ అని ప్రధాని థెరెసా మే తెలిపారు.    

ఎసిడిటీ మందులు ఎక్కువగా తీసుకుంటున్నారా? అయితే జాగ్రత్త. వీటిని ఎక్కువ కాలం పాటు తీసుకోవడం వల్ల కడుపులో కేన్సర్‌ వచ్చే అవకాశాలు రెట్టింపవుతాయని శాస్త్రవేత్తలు హెచ్చరిస్తున్నారు. హెలికోబ్యాక్టర్‌ పైలోరీ అనే బ్యాక్టీరియా కారణంగా ఎసిడిటీ ఏర్పడుతుందని తెలిసిన విషయమే. దీనికీ కడుపులో కేన్సర్‌కు సంబంధం ఉన్నట్లు గతంలోనే పరిశోధనలు స్పష్టం చేశాయి. అయితే ఈ బ్యాక్టీరియా నిర్మూలన చికిత్స తీసుకున్నాక కూడా కొందరిలో కడుపు కేన్సర్‌ రావడం శాస్త్రవేత్తల్లో సందేహం రేకెత్తించింది. దీంతో 2003–2012 మధ్యలో ఈ చికిత్స తీసుకున్న దాదాపు 63 వేల మంది వివరాలు పరిశీలించారు. వీరిలో కొందరు ఎసిడిటీ నివారణకు ప్రోటాన్‌ పంప్‌ ఇన్‌హిబిటార్‌ మందులు వాడగా, ఇంకొందరు హెచ్‌2 బ్లాకర్‌ మందులు వాడారు. వీరిలో కొంతమంది కడుపు కేన్సర్‌తో మరణించారు. వీరిలో మూడేళ్ల పాటు ప్రోటాన్‌ పంప్‌ ఇన్‌హిబిటార్లు వాడిన దాదాపు 153 మంది ఉండగా.. హెచ్‌ 2 బ్లాకర్లు తీసుకున్న వారిలో ఎలాంటి లక్షణాలు కన్పించలేదు. అలాగే వారానికో ప్రోటాన్‌ పంప్‌ ఇన్‌హిబిటార్‌ మాత్ర తీసుకునే వారితో పోలిస్తే రోజూ వేసుకునే వారికి కేన్సర్‌ వచ్చే అవకాశం ఎక్కువ ఉన్నట్లు తెలిసింది.


 ముంబై: స్థూల దేశీయోత్పత్తి (జీడీపీ) వృద్ధి రేటు కన్నా... బ్యాంకింగ్ రుణ వృద్ధి రేటు  దాదాపు రెట్టింపు ఉండడం చరిత్రాత్మకంగా కీలక అంశం. అయితే ఈ పరస్పర సంబంధం క్రమంగా బలహీనపడుతూ వస్తోందని రిజర్వ్ బ్యాంక్ ఆఫ్ ఇండియా (ఆర్‌బీఐ) గవర్నర్ ఎస్‌ఎస్ ముంద్రా పేర్కొన్నారు. ఆర్థిక మందగమనం, నాన్-బ్యాంకింగ్ ఫైనాన్స్ కంపెనీ (ఎన్‌బీఎఫ్‌సీ)ల వంటి ప్రత్యామ్నాయ రుణ మంజూరు సంస్థల విస్తరణ వంటివి దీనికి కారణాలుగా పేర్కొన్నారు.
 కంపెనీలు కమర్షియల్ పేపర్లు, బాండ్ల వంటి సాధనాల ద్వారా రుణ సమీకరణలకు మొగ్గుచూపడం కూడా ఇందుకు కారణంగా ఇక్కడ జరిగిన ఒక కార్యక్రమంలో పేర్కొన్నారు. గడచిన ఆర్థిక సంవత్సరం జీడీపీ వృద్ధి రేటు 7.6% ఉంటే, బ్యాంకింగ్ వృద్ధి రేటు గత కొద్ది నెలలుగా 8.5-9.5% శ్రేణిలో తిరుగుతున్న సంగతి తెలిసిందే.


 
      పక్షం రోజుల్లో పనులు ప్రారంభం
 
      జీఎమ్మార్ రాకతో పురోగతి
 
      రూ.379 కోట్లతో  డబ్లింగ్, విద్యుదీకరణ
 
      రూ.300 కోట్లతో కొత్త రైళ్లు, స్టేషన్ల నిర్మాణం
 
      2016 నాటికి పట్టాల పైకి రైళ్లు    
 
 సాక్షి,సిటీబ్యూరో : సుదీర్ఘకాలం పెండింగ్‌లో ఉన్న ఎంఎంటీఎస్  రెండో దశ పనులు త్వరలో  ప్రారంభం కానున్నాయి. పది రోజుల క్రితమే జీఎమ్మార్, కాళింది రైల్ నిర్మాణ్, టాటా ప్రాజెక్ట్స్ కన్సార్షియం ఈ  ప్రాజెక్టును  దక్కించుకోవడంతో  రైల్ వికాస్ నిగమ్ లిమిటెడ్ సంస్థ రెండో దశ పనులపై దృష్టి కేంద్రీకరించింది. 15  రోజుల్లో  పనులు  ప్రారంభించనున్నట్లు  రైల్‌వికాస్ నిగమ్  లిమిటెడ్  ఉన్నతాధికారి ఒకరు ‘సాక్షి’తో చెప్పారు.
 
 రెండో దశలో  ప్రతిపాదించిన  ఆరు లైన్లలో ఒకేసారి పనులు  ప్రారంభమవుతాయని, వీలైనంత  త్వరగా  లైన్‌ల డబ్లింగ్, విద్యుదీకరణ పనులను పూర్తి చేయాలని  లక్ష్యంగా పెట్టుకున్నట్లు తెలిపారు. ఇందుకోసం  రూ.379 కోట్లతో  ప్రణాళికలను రూపొందించారు.  మొత్తం  84 కిలోమీటర్లు వరకు లైన్ల నిర్మాణాన్ని ఈ ఏడాదిలో  పూర్తి చేసి, 2016 చివరి నాటికి  మరో రూ.300 కోట్లతో  స్టేషన్‌ల నిర్మాణం, కొత్త రైళ్లు తెప్పించి పనులను  పూర్తి చేస్తారు. రెండో దశ నిర్మాణానికి  అన్ని అడ్డంకులు  తొలగిపోవడంతో  ఎట్టిపరిస్థితుల్లోనూ సకాలంలో  ప్రాజెక్టును పూర్తి చేసి  దక్షిణమధ్య రైల్వేకు అందజేయాలని  రైల్ వికాస్ నిగమ్ లిమిటెడ్  లక్ష్యంగా  పెట్టుకుంది.