సాక్షి, చెన్నై: కోర్టు విధుల నుంచి బదిలీ చేశారనే ఆగ్రహంతో ఓ ఆఫీస్‌ అసిస్టెంట్‌ న్యాయమూర్తిపై ఏకంగా హత్యకు యత్నించిన ఘటన తమిళనాడులో మంగళవారం చోటు చేసుకుంది. సేలం జిల్లా అస్థంపట్టిలో 24 కోర్టుల సముదాయం ఉంది. నాలుగో నేరవిభాగం కోర్టులో పొన్‌ పాండి న్యాయమూర్తిగా విధులు నిర్వర్తిస్తున్నారు. కేసుల విచారణ నిమిత్తం మంగళవారం ఉదయం 11 గంటలకు కోర్టుకు చేరుకోగా అక్కడే పొంచి ఉన్న ప్రకాష్‌ అనే ఆఫీస్‌ అసిస్టెంట్‌ అకస్మాత్తుగా ఆయన్ను కత్తితో పొడవబోయాడు. అప్రమత్తమైన న్యాయమూర్తి కత్తిని అడ్డుకోగా చేతికి బలమైన గాయమైంది. అక్కడే ఉన్న వారు ప్రకాష్‌ను పట్టుకుని పోలీసులకు అప్పగించారు. ఓమలూరు అనే ప్రాంతంలోని కోర్టుకు ప్రకాష్‌ ఇటీవల బదిలీ అయ్యాడు. దీనిపై అతడు జడ్జితో గొడవపడినట్లు సమాచారం. ఈ కక్షతోనే దాడికి పాల్పడినట్లు పోలీసులు ప్రాథమికంగా నిర్ధారించారు. 


 న్యూఢిల్లీ: అత్యాచార ఘటనల్లో బాధితురాలి వాంగ్మూలాన్ని పోలీసు అధికారులకు బదులుగా జ్యుడీషియల్ మేజిస్ట్రేటే నేరుగా నమోదు చేయాలని సుప్రీం కోర్టు ఆదేశించింది. ఫలితంగా కేసు విచారణ త్వరితంగా పూర్తయ్యే అవకాశం ఉంటుందని కోర్టు తేల్చిచెప్పింది. ఈ మేరకు న్యాయమూర్తి జస్టిస్ జ్ఞాన సుధా మిశ్రా నేతృత్వంలోని మరో న్యాయమూర్తి జస్టిస్ వి. గోపాల గౌడతో కూడిన సుప్రీం కోర్టు ధర్మాసనం ఇటీవల ఆదేశాలు జారీ చేసింది. అత్యాచార ఘటన వెలుగులోకి వచ్చిన తర్వాత బాధితురాలిని సాధ్యమైనంత త్వరగా సమీపంలోని మహిళా మెట్రోపాలిటన్ మేజిస్ట్రేట్ లేదా మహిళా జ్యుడీషియల్ మేజిస్ట్రేట్ వద్దకు తీసుకు వెళ్లాలని కేసు పరిశోధనాధికారులకు సూచించింది.